Èlododowo 27
27
1Mù gbà yigò ɖo èsɔ̀ kè gbãnà ŋuti ò, ɖo wò mu nya ènu kè la jɔ̀ egbèa ŋutɔ cã ò.
2Tàsi àmèwo ne woa kafu wò. Àmè bu ne wɔ̀ ɛ̀, vɔ̀ mu gbà nyi èwò ŋutɔ ò!
3Èkpe gãa kpɛ̃nà, èkɔ sako ɖèka cã kpɛ̃nà, vɔ̀ sùkunɔ̀ be àdɔ̀mèze dodo gbà ɖo kpɛ̃kpɛ̃ sɔ wu.
4Àkpasɛ̃sɛ̃ be ènu wɔ̀wɔ nyi ènu jiŋɔ ɖe, àdɔ̀mèze dodo lè sìgbè èsì sàsra kè ɖɔna nène, vɔ̀ àmè kɛ ye la teŋu nɔ̀tè lè ŋuhuã nu ò?
5Ènyà dɔ̃dɔ̃ kè so èjì mèa, nyɔ wu èxlɔ̃ wɔ̀wɔ kè mu dɔ̃ àmè ji òa.
6Lɔ̃lɔ̃ nɔ̀nà àmè be èxlɔ̃ be ènyà gbe na àmèwo mè, vɔ̀ jè àyè na kɛ̃tɔ kè le ɖè lɔ̃lɔ̃ be àfɔ̀a.
7Àmè kè àdɔ̀ mu le wù òa, gbena ànyisì ŋutɔ cã. Vɔ̀a, àmè kè àdɔ̀ le wùa, mu gbena ènu ɖekpe ò.
8Àmèjro kè lè ègbe ji le yìa, lè sìgbè xèvi kè yì boo lè yebe àtɔ̃ gbɔa nène.
9Àmìsìsi kudo anùwɛtrɛ̀wo dona jìjɔɛ na àmè. Èxlɔ̃ be àmè hɛ̃hɛ̃ blɛ̀wù nyɔ wu anùwɛtrɛ̀ àdodoe.
10Mù gbà gble èxlɔ̃ wò, àlo ètɔ wò be èxlɔ̃ ɖɛ ò. Mù gbà yì fòfo wò gbɔ ne e nyi be wò ɖo xaxa mè ò. Àmè havi kè sɔ̀ àmè gbɔ nyɔ wu fòfo kè lè àzɔ̀ge boa.
11Èvi nyè, kplɔ̀ ɖokoe wò kudo ènunya ne ma kpɔ jìjɔɛ ɖo ŋuti wò. Eye ne àmè ɖe zũ mù a, mù la teŋu ɖo e ŋuti.
12Ne gbledo vaa, àmè kè ɖùnà ye ɖokoe jia, jina ètabèpe. Vɔ̀ àmè mà-ɖo àɖàŋùwo kpɔ̀tɔ̀ nɔ̀nà èmɔ̃a ji kaka va jènà gbledo mè.
13Ne àmè ɖe va ɖo èxɔ̀ lè gbɔ wò, nɔ̀ ŋùgbe na àmè bu be bèa do ègà lè gbɔ wòa, ne sɔ yebe àwù sɔ do àwòba na wò. Ekèa ye la nyi ɖase na wò ɖo e nɔ̀ ŋùgbe sɔ do ègà na àmè kè wò mu jèsi òa.
14Àmè zũzũ ye nyi ne wò fɔ̃ le do ègbè na àmè ŋùdekɛ̃nyɛ kudo àpa lelelea.
15Nyɔ̃nù be ènyàdɔ̃dɔ̃ nɔ̀nà sìgbè ŋùkèkè be èjijàja mà tɔtè nène. 16E la nɔ̀ na àmè kè ji be yèa nɔ̀ ɛ̀ tèa sìgbè àya be le ji la tɔtè nène. Àlo sìgbè àmì be kù ɖo àlɔ̀ mè nène.
17Gàkpo ye ɖana gàkpo, àmèwo be èdunɔ̀nɔ ye nana àmèdòmè nɔ̀nɔ vivina.
18Àmè kè lenabè na yebe àtia, la ɖù yebe èkusɛ̃sɛ̃wo. Sumɔvi kè lenabè na àpetɔa, la xɔ̀ bùbu.
19Àmè be susu zena lè ye ŋutɔ be ŋùmè sìgbè lekè wo kpɔna àmè be ŋùmè lè èsì mèa nène.
20Èkuwode be èdoa mu ɖɔnapò ò. Nène a ke ye àgbètɔ cã le ji ènu yeyewo.
21Èzò ye wo sɔ dona sìka kudo klòsalò kpɔ be wo nyɔ mà a. Eye àmèwo be ɖase ye wo sɔ kpɔna àmè be àsìxɔ̀xɔ.
22Ne wò gbà to sùkunɔ̀ lè èto mè ŋutɔ cã a, yebe ènuwɔ̀wɔ ya kpɔ̀tɔ̀ tɛna ɖo e ŋuti.
23Le ŋùku ɖo ègbɔ wòwo ŋuti nyuɛ̃ ɖe ne wòa lebè na àlɛ̃ha wòa. 24Nyàwo ye be nyi be àdɔ̀kùnu mu dɔ̃na ò, eye hùɛ̃yi mu sona ètɔwo ji kɔ̀nà ɖo ɖèviwo ji ò. 25Sò ègbea lè àgblèa ji eye ne ègbe mumu buwo toa, wòa lɔ ègbe pupuawo lè ètowo ji. 26Nyì ègbɔwo ne wòa sɔ woabe èfua sɔ wɔ̀ àwù do. Nyì ègbɔsuwo eye wòa sà wo sɔ plè àgblè-nyigbã yeye. 27Nyì ègbɔnɔ sùgbɔ ne wòa ɖo nyìnɔsi drì. E la nyì wò, la kpɔ àpo xòmè ji kaka la jè àpo sumɔ̃viwo ji.
Mina Bible © Bible Society of Togo, 2014.