Èlododowo 22
22
1Nyikɔ nyuɛ̃ xɔ̀xɔ nyɔ wu èci kpɔkpɔ drì. Lɔ̃lɔ̃ ɖoɖo na àmè havi nyɔ wu sìka kudo klòsalò.
2Ènu ɖèka kè bɔ̀ ècitɔ kudo wɔ̀amènɔ̀ ɖodua ye nyi be Tɔhonɔ̀ na wo àgbè.
3Ne gbledo do ŋùmè ɖoɖaa, àmè kè mu punadù jè ènu mè òa, nyana àlekè wo la wɔ̀ ɖù e jia. Vɔ̀a, àmè kè mu kpɔ ènu ɖe be tèpe kpɔ òa, kpɔ̀tɔ̀ nɔ̀nà woabe ènu kè wo le wɔ̀a ji, eye e va hɛ̃nà àhovì va na wo.
4Àmè kè wɔ̀ ye ɖokoe ɖèvia, dona bùbu Tɔhonɔ̀ ŋuti. E va trɔnazũ ècitɔ, bùbu nɔ̀nà e ŋuti eye e nɔ̀nà àgbè dìdì.
5Èzãnuɖùtɔ be èmɔ̃ ɖɔna ku àŋùja kudo èmɔ̃ tetrewo. Àmè kè ji be yèa hlùɛ̃ yebe àgbè lè àjèɖàɖa mèa, la bu ì.
6Na èvi kpakpla nyuɛ̃ so gɔ̃mèjèje ke. E la kpɔ e ji kaka na yebe sĩsĩ mè.
7Ècitɔ tafuna wɔ̀amènɔ̀. Àmè kè ɖùfɛ̃a trɔnazũ èkluvi na àmè kè si e ɖùfɛ̃ lèa.
8Àmè kè le dɔ̃ màjɔ̀ màjɔ jia, la kpɔ hùɛgbledo; eye ènu bàɖà kè ji be le dɔ̃a, mu la teŋu nɔ̀ ànyi ò.
9Sìtuɖèɖe ye la nyi na àdɔ̀mè nyuɛ̃ wɔ̀tɔwo, ɖo wo le kpɔ wɔ̀amènɔ̀wo ji.
10Ɛ̃ɛ, nyà àmè kè le ɖì ègbɔ ènu sia ènua eye ènyà dɔ̃dɔ̃wo kpata la tɔtè. Eye àjrè kudo àmèzũzũ ɖekpe mu la gbà nɔ̀ ànyi ò.
11Àmè kè lɔ̃nà àmè kè ɖo èjì mè kɔ̀kɔ̀ɛ eye be wɔ̀nà àdɔ̀mè nyuɛ̃a, nyina èfìɔ be èxlɔ̃.
12Tɔhonɔ̀ ŋutɔ ɖiana ènunya àdodoea, vɔ̀ e crɔ̃na àjèɖàtɔ be ènyà gbɔ̃gblɔ̃wo kpata.
13Kuviɔ̃tɔ gblɔ̃nà be: “Jãŋùta ɖe lè xixeanu. Ne mù toa, e la trɛ̃ mù lè àmèwo be ŋùku mè!”
14Nyɔ̃nù àhasìwɔ̀tɔwo be nupo pòpo nyi àfɔ̀ku be èmɔ̃ tetre. Àmè kèwo Tɔhonɔ̀ crìa, jènà èmɔ̃ kèa mè.
15Ɖèviwo lɔ̃nà ènu kè flùnà àmèa. Èkpò kpò ye la teŋu ɖè wo jo lè èvuɛ̃ kèa gbɔ.
16Àmè kè to màjɔ̀ màjɔ ji le tafu wɔ̀amènɔ̀a, le na ɛ̀ mɔnu kpɔkpɔ yeye bu. Àmè kè le na ènu àdɔ̀kùnɔ̀a, la trɔ zũ wɔ̀amènɔ̀.
Ètopòɖo vòvòvòwo
17Ɖoto ènunyatɔwo be ènyà nyuɛ̃ ɖe, le ŋùku ɖo àpe àɖàŋù be nufiɔfiɔwo ŋuti.
18E la nyi jìjɔɛ na wò ne wò le wo ɖo àpo èjì mèa, ne wò sɔ̀gbè la nɔ pò nupo so woa ŋutia.
19Mù jro be wòa sɔ àpo èjìdo ɖo Tɔhonɔ̀ ji. Ènu kèa ŋuti ye egbèa, mù la fiɔ èwò cã ènyà kèawo.
20Mù ɖè ènyàti kudo ŋùgblèdède ègbã ɖovò na wò.
21Ne wòa sɔ kpla àlekè wo pònà nupo kudo èjìɖèɖe tututua. Na àmè kè le dɔ̃ wòa, wò la nyi ànùkua-tikplɔtɔ.
22Mù gbà fĩ wɔ̀amènɔ̀ ɖo e nyi wɔ̀amènɔ̀ ò. Lè kòjoɖopea, mù gbà zĩ àmè mà-ɖo xɔ̀namètɔa, ɖo ànyi ò.
23Nyàwo, Tɔhonɔ̀ ŋutɔ la xɔ̀ ènyà ɖo àkɔ na wo. E la xɔ̀ àgbè lè àmè kè hlà woabe ènuwoa si.
24Mù gbà nyi àmè kè dona àdɔ̀mèzea be èxlɔ̃ ò. Mù gbà zɔ̃ kudo àmè kè bina èjì kabaa ò.
25Mu nyi nène òa, wò la va ɖì ì eye wò cã wò la jè èmɔ̃a mè.
26Mù gbà xɔ̀ àmè bu be èfɛ̃ be ŋùkɔ̀ ò.
27Ne wò mu va teŋu tu nène be èfɛ̃ òa, wo la xɔ̀ àpo ènu zãzãwo kpata, kaka jè àbàti kè ji wò le mlɔ̃ a ŋutɔ cã ji.
28Mù gbà yì ɖè lipò kèwo tɔgbe wòwo ɖo ànyi sãa na mìabe ànyigbãwo jo ò.
29Kpɔ àmè kè le wɔ̀ èdɔ nyuɛ̃ ɖe a ɖa, e la teŋu yì wɔ̀ èdɔ na èfìɔ fàa, wu ne bèa nɔ̀ èdɔwɔ̀tɔ bu kèwo àmè ɖe mu jèsi òa mè.
Mina Bible © Bible Society of Togo, 2014.