Èlododowo 21
21
1Èfìɔ be èjì lè sìgbè ètɔ̀ sàsra lè Tɔhonɔ̀ be àlɔ̀ mè nène. E ye nana be yìnà fikè e jro be bèa yìa.
2Àmè sia àmè susuna be yebe wɔ̀nawo lè jɔ̀jɔɛ, vɔ̀a, Tɔhonɔ̀ ɖèka kpò ye nya àmè be èjì mè be susu.
3Ànùkua wɔ̀wɔ kudo àgbè nɔ̀nɔ jɔ̀jɔɛ jènà Tɔhonɔ̀ be ŋùmè wu vɔ̀sawo.
4Àmè bàɖà be vuɛ̃wo nyi àmè cìcri kudo ègòyiyi.
5Àmè kè wɔ̀nà ɖoɖowoa, trɔnazũ ècitɔ. Àmè kè cinajia trɔnazũ wɔ̀amènɔ̀.
6Àmè kèwo kpɔna èci to àjèɖàɖa mèa, ɖota woabe cɔ̃crɔ̃ mè. Wo kènà ɖo ènu kèwo mu ɖo àsìxɔ̀xɔ ò, eye wo mu dɔ̃na òa ŋuti.
7Àmè bàɖàwo crɔ̃ ɖo woabe èhlɔ̃ dãdãwo ŋuti. Nyàwo, wo mu wɔ̀nà ɖo èse ji ò.
8Gbèvũ nɔ̀nà àgbè kpòtoe, vɔ̀a, àmè wɔ̀ ànùkua, nɔ̀nà àgbè jɔ̀jɔɛ.
9E la nyɔ be woa nɔ̀ ci ègbã ji wu be woa nɔ̀ àxomè kudo nyɔ̃nù kè wɔ̀nà àjrè gbà lɔ̃nà èkɛ̃a.
10Àmè nyrãku jro wɔ̀nà ènu bàɖà, mu kpɔna ɖo e mè na ye ŋutɔ be xlɔ̃ cã ò.
11Àmèkòtɔ be ètodɔ̃ ye nyina sùkunɔ̀ be ènunya fiɔfiɔ. Ne wo le fiɔ ènu ènunyatɔa, e sɔ wɔ̀nà èdɔ.
12Ènunyuɛ̃wɔ̀tɔ lena ŋùku ɖo àmè nyrãku be àxue ŋuti eye e tùtùnà wo ɖo gbledo mè.
13Àmè kè le tu yebe èto do àmè kè jè gbledo mèa, cã mu la kpɔ àlɔ̀do ne e va jè èhiã mè ò.
14Àmè kè le na ènu lè wawla mèa le fa àmè kè le bijìa. Ne e ɖiɖi ènunanaa ɖo yebe ègo mèa, e la ci yebe àdɔ̀mèze be èzòa.
15Èse ji kpɔkpɔ nyina jìjɔɛ na àmè nyuɛ̃wo. Vɔ̀a, e dona ŋɔji na àmè kèwo wɔ̀nà ènu bàɖàwo.
16Àmè kè mu lè èmɔ̃ nyuɛ̃a ji òa, kènà ɖo èkuwode ŋuti kaba.
17Àmè kè àgɔɖùɖu jɔ̀nàjì na a, la nyi wɔ̀amènɔ̀ tɛ̀gbɛ̀. Àmè kè àhà nùnu kudo ènuɖùɖu jɔ̀nàjì na a, mu la kpɔ èci gbèɖe ò.
18Àjèɖàtɔwo tɔ̀ ye nyi gbledo lè àmè kèwo nɔ̀nà àgbè nyuɛ̃, jɔ̀jɔɛa gbɔ.
19E la nyɔ be woa yì sò ci zògbè ji sɔ wu be woa nɔ̀ àxomè kudo nyɔ̃nù nyrãku kè lɔ̃nà àjrèwɔ̀wɔa.
20Wo kènà ɖo àdɔ̀kùnu àdodoewo ŋuti lè ènunyatɔ gbɔ, vɔ̀a, àyèkukutɔ mu ɖona ènu nɔ̀ àmè si ɖekpe ò.
21Ànùkuamè kè kplɔ̀ àdɔ̀mè nyuɛ̃ wɔ̀wɔ do a, nɔ̀nà àgbè dìdì. Eye wo ɖona bùbu na ɛ̀ gbà sònà jɔ̀jɔɛ na ɛ̀.
22Gbãdãgbã ènunyatɔ teŋu xɔ̀ èdù kè àgbògbò trɔ do a. E teŋu gbã èglì kèwo ŋuti dùkɔ̃a le dojì ɖoa.
23Àmè kè lena yebe ènua, le si na gbledo.
24Ènu ɖe mu ɖìnà ènu na ègòyitɔ kè crìnà àmè ò. Yebe ègòyiyia tɔna ŋùku lè yebe ènuwɔ̀wɔwo mè.
25Àdɔ̀ wùnà kuviɔ̃tɔwo kaka wo kuna ɖo wo mu teŋu wɔ̀ ɖo woabe èjrowo ji ò. Nyàwo ye nyi be wo mu jina ènu ɖe la wɔ̀ ò.
26Wo zãna woabe gàmè sɔ bìanàŋù àmèwo. Vɔ̀a, àmè nyuɛ̃ nana fàa eye mu wlana ènu ɖekpe na ye ɖokoe ò.
27Àmè nyrãku be vɔsa wɔ̀nà àfɛ̃. Vɔ̀a, kè be gbà le wɔ̀ kudo susu vuɛ̃ a, gbà nyrã wu.
28Àjè ɖaseɖùtɔ kuna, vɔ̀a, àmè kè nya àlekè wo ɖonatoa, ɖo èmɔ̃nu kpɔkpɔ la pò nupo.
29Ènu bàɖàwɔ̀tɔ wɔ̀nà sìgbè ènu kè be le wɔ̀a, sɔ̀gbè nène. Vɔ̀a, àmè jɔ̀jɔɛ zãna àgbènɔ̀nɔ nyuɛ̃.
30Àgbètɔ be ènunya àlo ènunya àlo ŋùgblèdède ɖekpe mu sɔ̀gbè lè Tɔhonɔ̀ be ŋùkɔ̀ ò.
31Wo blana àkpà na èsɔwo ɖo àhùawɔ̀wɔ be ŋùkèkè ŋuti, vɔ̀a, Tɔhonɔ̀ ye nana jiɖùɖua.
Mina Bible © Bible Society of Togo, 2014.