Èlododowo 23
23
1Ne wò lè èkplɔ̃ ŋuti kudo àmè ɖìnyi ɖe a, kpɔ ɖokoe wò ji lè àmè kè lè ŋùkɔ̀ na wòa ŋuti. 2Ne nusuɖùtɔ ye wò nyia, le ɖokoe wò. 3Mù gbà vlũ pòdo ɖo àmè kèa be ènuɖùɖu àdodoewo ŋuti ò, wo la teŋu nyi èmɔ̃ tetre na wò.
4Mù gbà nɔ hlɔ̃ be yèa kpɔ èci ò, nɔ̀tè ètamè bùbu so ekèa ŋuti. 5Ne wò dà ŋùku kpɔ àdɔ̀kùnua, e sina zè ɖèka! E nya lekè wo zrònà sìgbè èhɔ̃ nène.
6Mù gbà ɖùnu lè àmè kè ɖo ŋuhuã ɖo nɔ̀via ŋutia gbɔ ò, yebe ènuɖùɖu mu gbà jro wò ò. 7Ènu kè be le susua, mu nyi nyàwo ò. E la gblɔ̃ na wò be “Ɖù ne wòa nù!” Vɔ̀a, mu le gblɔ̃ ɛ̀ so kaka yebe àdɔ̀mè ò. 8E yomè a, wò la trɔ jo ènu kè wò ɖù a na, eye vivi do àmè ŋuti wòa mu la gbà ɖo gɔ̃mè sèse ɖe ò.
9Mù gbà gblɔ̃ ènyà ɖekpe na sùkunɔ̀ ò: e la crì àpo ènyà jɔ̀jɔɛwo.
10Mù gbà ɖè àgblè be lipò be èkpewo jo sɔ hlà cɔɛviwo be ànyigbãwo ò. 11Nyàwo, woabe ɖiatɔa ɖo ŋusɛ̃: e la xɔ̀ ènyà ɖo woa ta lè ŋùkɔ̀ na wò.
12Na àpo èjì ne xɔ̀ àfɔ̀ ɖo àfɔ̀ ji kè wo le na wòa, eye wòa ɖoto ètopòɖo kè ènunyatɔ le gblɔ̃ na wòa.
13Mù gbà si èvi wòa kpakpla ò. Ne wò pò èa, mu la ku ò! 14Co ne wò le pò èa, wò le hlùɛ̃ ɛ̀ lè èku si bòxũ ye.
Ètɔ be ètopòɖo na èviwo
15Èvi nyè, mù la kpɔ jìjɔɛ, ne àpo èjì le ji ènunya be èmɔ̃a. 16Èjì la jɔ̀ mù, ne wò le to nyàwoa.
17Mù gbà ɖo ŋuhuã na èvuɛ̃wɔ̀tɔ ò, vɔ̀ do bùbu Tɔhonɔ̀ ŋuti gbè sia gbè. 18Nène a, èsɔ̀ mè la nyɔ na wò, eye àpo ŋùɖo mu la gble ò.
19Èwò, èvi nyè ɖoto mù ne wòa trɔ zũ ènunyatɔ. Wò la zɔ̃ èmɔ̃ jɔ̀jɔɛa ji. 20Mù gbà do èha kudo àmè kè nùnà vɛ̃ kaka munaa ò. Àlo àmè kè èlãɖùɖu jɔ̀nàjì na ŋutɔ ò. 21Àhànùmunɔ̀wo kudo àmè kèwo ɖùnà èlã sùgbɔa, la ci àyà mè. Woabe kuviɔ̃ wɔ̀wɔ la na be wo la ci àma.
22Ɖoto ètɔ wò, e na wò va xixea mè. Mù gbà crì ènɔ̀ wò, wàlɛbɛ kè e la va ku nyagã ò. 23Kpla àgbè nɔ̀nɔ lè nyàwo toto mè, kpla àlekè wo dènà ŋùgblè so ènu ŋutia, lɔ̃ ènufiɔfiɔ nyuɛ̃a kudo ènunya. Eye ne wò ɖo ènunana kèawoa, mù gbà zã wo yàkà yàkà ò. 24Ɖèvi kè le wɔ̀ ènu nyuɛ̃a, dona jìjɔɛ nana ètɔa. Eye nyɔ̃nù kè jì ènunyatɔa, nɔ̀nà jìjɔɛ mè. 25Èwò, do jìjɔɛ kèa na ètɔ wò kudo ènɔ̀ wò. Nyɔ̃nù kè jì wòa ne ɖu jìjɔɛ be èwè.
26Èvi nyè, dojì ɖo ŋuti nyè ne wòa kplɔ̀ àpe kpɔwɛ do kudo jìjɔɛ. 27Ɛ̃ɛ, nyɔ̃nù àhasìwɔ̀tɔ vuɛ̃ɖì wu ègũ tito, eye àmè bu be èsrɔ̃ nyɔ̃nù la do àfɔ̀ku àmè sìgbè vudo kè mu kèkè òa nène. 28Sìgbè gbevũwo nènea, nyɔ̃nù kèawo trena èmɔ̃ na àmèwo. Wo na èsrɔ̃tɔ ŋusù sùgbɔ jè ànyi.
Vɛ̃ be èdɔwɔ̀nawo
29Àmè kɛ ye nyi ènuwɔ̀donɔ̀ ò? Àmè kɛ ye le gblɔ̃ be ne yè nya sã ò? Àmè kɛ ye le wɔ̀ àjrè eye be le xà ènu ètèmàtɔ ò? Àmè kɛ be ŋùkuwo mu le kpɔ ènu nyuɛ̃ ɖe ò? 30Àhànùmunɔ̀ kè cakana àhà sɛ̃sɛ̃wo nùnà, mà-ɖo kɔpea ye! 31Mù gbà kpɔ vɛ̃ ne e le dàzò àlo e le sɔfu lè kɔpò wòa mè ò. E la yì ènu mè na wò bɔ̀bɔɛɖe. 32Vɔ̀ lè vɔ̀vɔnua, e la ɖù wò sìgbè èdã nène, e la ŋɔ wò sìgbè jàkpàtà nène. 33Wò la kpɔ ènu mànyatanawo eye wò la gblɔ̃ ènyà mà-ɖotawo. 34Wò la susu be yè lè àpù be dòdò mè, lè ànyi mɔmlɔ̃ lè àpùjihũ be àsike gbɔ. 35Wò la nɔ gblɔ̃ be: “Wo vìa mù co, àfi ɖekpe mu ve mù ò! Wo pò mù co, nyè mu sè vève ɖe ò! Mù ji be ma fɔ̃ kaba ne ma gbà ji àhà nùnu be èmɔ̃ nu.”
Mina Bible © Bible Society of Togo, 2014.