Èlododowo 20
20
1Vɛ̃ nana àmè kè nù ìa, mu sɔna èɖe lè e mè na àmè ò. Àhà sɛ̃sɛ̃ nana àmè kè nù ìa, wɔ̀nà tùkaɖa. Àmè kè nùnà àhà mà-ɖo kɔpea, mu nyi ènunyatɔ ò.
2Èfìɔ kè bijìa, nɔ̀nà sìgbè jãŋùta kè le do àpa a nène. Àmè kè gbà le do àdɔ̀mèze na èfìɔa le sɔ ye ŋutɔ be àgbè do àfɔ̀ku mè.
3Bùbu tɔ̀xɛ ye nɔ̀nà àmè kè le na àsà ènyà dɔ̃dɔ̃ mà-ɖo kɔpea ŋuti. Vɔ̀a, àmè kè àyè ku na a, bina èjì kaba.
4Kuviɔ̃tɔ mu jina la dè àgblè lè hùenu nyuɛ̃tɔa mè ò. Lè ènuyàya hùenua, mu la kpɔ ènuku ɖekpe la yà ò.
5Àgbètɔ be tamèsusuwo lè sìgbè èsì kè lè ànyigbã gɔ̃mèa nène. Àmè kè ɖo ènunya kpò ye teŋu kè ɖo woa ŋuti.
6Àmè sùgbɔ susuna be yèwo nyɔ. Vɔ̀a, ànùkuamè kè lè ègbèjia, fikɛ ye wo la kpɔ ɛ̀ lè ò?
7Àmè kè wɔ̀nà ènunyuɛ̃a, nɔ̀nà àgbè ànùkua tɔ̀. Eye ènu nyɔna na yebe jìjimèviwo.
8Ne èfìɔ ɖe nɔ̀ ànyi ɖo kòjoɖopea, e kpɔna ènu kè mu sɔ̀gbè òa, zè ɖèka.
9Àmè kɛ ye la teŋu gblɔ̃ be: “Èjì mu le dohùɛ do mù ò, ɖo èvuɛ̃ ɖekpe mu lè ŋuti nyè ò?”
10Tɔhonɔ̀ crìnà àmè tafu-tafu to sìkelì (ènu-dànu) zãzã mè.
11Vifɛ̃ ŋutɔ cã ɖènà yebe àgbè nyuɛ̃ nɔ̀nɔ fiɔ to yebe wɔ̀nawo mè.
12Tɔhonɔ̀ kpò ye wɔ̀ èto kè sènà ènua kudo ŋùku kè kpɔna ènua kpata.
13Àmè kè dɔ̃na àlɔ̃ mà-ɖo kɔpea jènà èhiã mè. Bìa ŋùku, ji àpo ènuɖùɖu.
14Ènuplètɔ gblɔ̃nà be: “E xɔ̀ èci ŋutɔ!” Vɔ̀a, ne e plè è jo le yìa, e kpɔna jìjɔɛ so ènu kè be plèa ŋuti.
15Sìka mu dɛ̃ ò eye jònu xɔ̀asìwo cã bɔ, vɔ̀a, ènu kè xɔ̀ àsì wu woa kpata ye nyi ènufiɔàmè be ènyàwo.
16Ne àmè ɖe nɔ̀ ŋùkɔ̀ na àmèjro ɖe sɔ do ègàjìga lè àsi wòa, ne sɔ yebe ènu ɖe sɔ do àwòba gbɔ̀xue. Ɖo wò mu jèsi àmèjroa ò.
17Èfĩnu ɖùɖu vivina, vɔ̀a, e yomè a e va vlɛ̀nà ènu na àmè.
18Àmè kè lɔ̃nà ètopòɖoa be ènu zɔ̃nà sùu. Gbɔ̀xue wò la sɔ ènu ɖe be yèa wɔ̀a, bù e ŋuti kpɔ nyuɛ̃ ɖe.
19Àmè kè gblɔ̃nà àmè be ènyà pòxlaa, mu la teŋu wla àmè gɔ̃mè ò. Na àsà àmè kè pònà nupo màgbɔ̃jɛ̃a.
20Àmè kè le sɛ̃kpɛ̃ na ètɔa kudo ènɔa be àgbè mè mu nyɔna ò (Àmè kè le gblɔ̃ ènyà kpòtoe so yebe àjìtɔawo ŋutia, la kpɔ gbledo). Yebe àgbè be vɔ̀vɔnua la nɔ̀ sìgbè kãligbɛ̃ cici lè vìvìti mè nène.
21Àdɔ̀kùnu kè sù àmè si àgbàgba fu ɖe màjèa, mu dɔ̃na àmè ji kaka yìnà vɔ̀vɔnu ò.
22Mù gbà gblɔ̃ be: “Mù la ɖo èvuɛ̃ èvuɛ̃ tèpe ò.” Sɔ àpo èjìdodo dà ɖo Tɔhonɔ̀ ji, eye e la hlùɛ̃ wò gã.
23Tɔhonɔ̀ crìnà àjè be ènudànuwo. Mu nyɔ be woa nɔ zã sìkelì kè wo sɔ tafuna àmè ò.
24Tɔhonɔ̀ ŋutɔ ye kpɔna àmè be àgbè ji. Eŋuã àmè ɖekpe mu teŋu nya yebe àgbèa be vɔ̀vɔnu ò.
25Woa do ènunana be ŋùgbè na Tɔhonɔ̀ mà dà ɛ̀ kpɔ, àlo woa kã àtãŋu gbɔ̀xue woa va bù e ŋuti kpɔa, hɛ̃nà àfɔ̀ku vana.
26Èfìɔ ènunyatɔa jènasi àmè kè le wɔ̀ ènu bàɖàa, eye e crɔ̃na ɛ̀ godoo.
27Èjìjigbè nyi kãligbɛ̃ kè Tɔhonɔ̀ sɔ do àgbètɔ mè ne bèa nɔ kɔ̀ yebe èjìmè.
28Ànùkua àlo ègbèji nɔ̀nɔ kudo àdɔ̀mè nyuɛ̃ wɔ̀wɔ ye kpɔna èfìɔ ji. Àdɔ̀mènyuɛ̃ wɔ̀wɔ nana yebe ŋusɛ̃ linakè.
29Ŋusɛ̃ nɔ̀ àmè ŋuti ye dona jìjɔɛ na ɖèkajɛ ku tùgbɛ̀jɛwo. Vɔ̀ èɖà ɣewo ye nana àmè sĩsĩwo nyana kpɔna.
30Àbì jèje ɖe teŋu klɔ èvuɛ̃ jo. Eye èkpò àlo àlɔ̀kpo teŋu lè èjì be gòglòpe ɖì.
Mina Bible © Bible Society of Togo, 2014.