Èlododowo 19
19
1E nyɔ be woa nyi wɔ̀amènɔ̀ vɔ̀a, woa nɔ nɔ̀ àgbè nyuɛ̃ wu be woa nyi sùkunɔ̀ eye woa nɔ blè àmèwo. 2Ènu kè ŋuti wo mu bù nyuɛ̃ ɖe gbɔ̀xue wɔ̀ òa, mu nyɔna ò. Èjicici nana wo wɔ̀nà ènu gbegble.
3Ènumànya ye kplɔ̀nà àgbètɔ sekunɔ̀tɔ̀ ɖona èmɔ̃ vuɛ̃ ji co, e va dona àdɔ̀mèze ɖo Tɔhonɔ̀ ŋuti.
4Ècitɔ ɖona èxlɔ̃ wè sia wè vɔ̀a, èxlɔ̃ ɖèka kè lè wɔ̀amènɔ̀ sia ŋutɔ cã va gblena ɛ̀ dà ɖɛ.
5Wo va kona àjèɖàtɔ be èxɔ̀a gbè ɖèka. Eye àjèɖàtɔa xɔ̀nà ètodɔ̃ kè jè na ɛ̀a.
6Àmè sùgbɔ ye klina ènu do àmè kè le wɔ̀ àdɔ̀mè nyuɛ̃a. Àmè sia àmè trɔnazũ àmè kè le na ènu màjìjɔa be èxlɔ̃.
7Àmè kè jè èhiãa be èxlɔ̃wo sina gble è ɖɛ, kaka va jè nɔ̀viawo ŋutɔ cã ji. E jina wo dokpò wàlɛbɛ kè e jro la pò nupo na woa.
8Àmè kè le kpla àlekè wo bùnà ètamè ɖoa, le wɔ̀ ènunyuɛ̃. Àmè kè le jè àgbàgba la sè ènugɔ̃mèa be ènuwo kpata zɔ̃nà sùu.
9Wo va kènà ɖo àjèɖàtɔ ŋuti gbè ɖèka. Eye àjèɖàtɔa le crɔ̃ ye ŋutɔ ɖokoe.
10Mu nyɔ be sùkunɔ̀ bèa nɔ̀ àgbè lè nyɔna mè ò. Èkluvi mu ɖo ŋusɛ̃ la kpàcɛ̀ na àmègãwo ò.
11Àmè kè ɖo ènunyaa, mu binajì kaba ò; eye e ŋlɔ̀nàbe àmè be àgɔ̀jèje sɔ ɖona gogo.
12Èfìɔ be àdɔ̀mèze dodo nɔ̀nà sìgbè jãŋùta be àpadodo nène. Vɔ̀a, yebe àdɔ̀mè nyuɛ̃a nɔ̀nà bɔ̀kɔ̀ sìgbè èsì fàfa kè jà kɔ̀ ɖo ègbe jia nène.
13Sumɔvi sekunɔ̀ nyina gbledo na ètɔa. Nyɔ̃nù be ènyàdɔ̃dɔ̃ nɔ̀nà sìgbè èjijàja mà-ɖo kɔpe nène.
14Wo la teŋu ɖù àxue kudo àjìtɔ be àdɔ̀kùnuwo be ècrɔ̃. Vɔ̀a, nyɔ̃nù ɖo ènunyaa, nyi Tɔhonɔ̀ be ènunana blibo.
15Kuviɔ̃ nana wo dɔ̃na àlɔ̃ eye àdɔ̀ wùnà àmè kè mu le wɔ̀ ènu ɖekpe òa.
16Àmè kè le wɔ̀ ɖo ègbèɖèɖe jia, le hlùɛ̃ yebe àgbè. Àmè kè mu sɔɖe lè e mè na ye ɖokoe òa, la crɔ̃.
17Àmè kè le na ènu wɔ̀amènɔ̀a lè sìgbè àmè kè le do na Tɔhonɔ̀ nène, eye Tɔhonɔ̀ la ɖo e tèpe na ɛ̀.
18Gbe ènyà na èvi wò wàlɛbɛ kè wò la gbà teŋu kpe ɖo e ŋutia. Vɔ̀a, lè àpo èjìbibi mèa, mù gbà pò è wù ò.
19Àmè kè le do àdɔ̀mèze kaɖi kaɖia, ɖo la na àjɔ̀. Ne wo mu le biɔ ɛ̀ àjɔ̀a be èfɛ̃ òa, eŋuã wo le do è ŋusɛ̃ ne bèa yì àdɔ̀mèze dodoa ji.
20Ɖoto ètopòɖo, lɔ̃ ènyà gbena àmè. Eye lè vɔ̀vɔnua wò la trɔ zũ ènunyatɔ.
21Àgbètɔ wɔ̀nà ɖoɖo sùgbɔ, vɔ̀a, Tɔhonɔ̀ be èjro kpò ye wɔ̀nà.
22Ènu ɖèka kè wo jina so àmè gbɔa ye nyi àdɔ̀mè nyuɛ̃ wɔ̀wɔ eye wɔ̀amènɔ̀ nyɔ wu àjèɖàtɔ.
23Bùbu dodo Tɔhonɔ̀ ŋuti nana wo nɔ̀nà àgbè. Àmè kè ɖo bùbu na Tɔhonɔ̀a, mu hiãna ènu ɖekpe ò eye gbledo cã mu vana e ji ò.
24Kuviɔ̃tɔ dona àlɔ̀ àgbã mè vɔ̀a, mu jrona la sɔ àlɔ̀a yì ènu gbɔ ò.
25Ne wo pò àmèkòtɔa, sùkunɔ̀ teŋu kpla ènu ɖe so e mè. Ne wo gbe ènyà na àmè kè ɖo ènunyaa, e kplana ènu ɖe so emè kòkòkò.
26Sumɔvi kè nɔ̀nà àgbè bàɖàa, fĩnà ètɔa be àdɔ̀kùnuwo eye e nyànà ènɔa do ègbe ŋutɔ cã.
27Èvi nyè, ne wò mu gbà le ɖo èto àfɔ̀ ɖo àfɔ̀ ji be ènyàwo òa, eŋuã wò trɔ ŋùgbe do ènunyaa.
28Ɖaseɖùtɔ kè mu tona nyàwo òa, tùnàfɔ̀ èsea ji. Àmè bàɖà lɔ̃nà ènu kpòtoe gbɔ̃gblɔ̃.
29Àmèkòtɔ jè na ètodɔ̃ eye sùkunɔ̀ tɔ̀ ye nyi èkpò.
Mina Bible © Bible Society of Togo, 2014.