Èlododowo 18
18
1Àmè kè le ji ye ŋutɔ ɖèka be nyɔnaa, mu teŋu nɔ̀nà àmè dòmè ò. E dona àdɔ̀mèze ɖo àmè kè le ji la do è àlɔ̀a ŋuti.
2Ènu kè jɔ̀nàjì na sùkunɔ̀a ye nyi be woa xɔ̀ yebe ènyàa sɔ wu be woa sè yebe ènyàa gɔ̃mè.
3Èku nyànyrã hɛ̃nà àmè cìcri vana eye èzũ hɛ̃nà ŋùkpɛ̃ vana.
4Àgbètɔ be ènyà ɖo gòglòpewo sìgbè àpù tɔ̀ nène. E jina sìgbè èsì kè ɖɔna nène vɔ̀a, e nyi ènunya be èsìdo.
5Mu nyi ènu nyuɛ̃ ɖe be nyi be woa nɔ xɔ̀ ènyà ɖo àgɔ̀jètɔ ta vɔ̀a, nɔ zĩ è ɖemànyatɔa ɖo e mè ò.
6Sùkunɔ̀ be ènyàwo hɛ̃nà ènyàdɔ̃dɔ̃ vana. Yebe ènupo pòpowo nana èwui kudo èkpò dàda.
7Ènumànyatɔ be ènyàwo kplɔ̀nà ɛ̀ yì cɔ̃crɔ̃ mè. Ye ŋutɔ be ènu kpò ye gbà nyina èmɔ̃ kè mè e la jèa.
8Àjèɖàɖa ɖo àmè si vivina sìgbè ènumèɖènu nène. E ɖona kaka àkpà mè na àmè.
9Àmè kè ɖènàkɔ̀ lè yebe èdɔ do àsi ŋuti kudo àmè kè le gble èdɔ do àsia, wo nyi ènɔ̀ ɖèka be èviwo.
10Tɔhonɔ̀ ɖo ŋusɛ̃ kè tɔ̃nà èkpa do àmè sìgbè àgbògbò nène. Àmè kè le wɔ̀ ènu nyuɛ̃a, kpɔna àgbɔ̃jèpò lè e gbɔ.
11Àdɔ̀kùnu ye nyi ècitɔ be àgbɔ̃jèpò. E hena èmɔ̃ na ènuwo na ɛ̀ sìgbè èglìkpa kpò nène.
12Àmè be ègòyiyi kplɔ̀nà ɛ̀ yì cɔ̃crɔ̃ mè. Àmè kè wɔ̀ ye ɖokoe sumɔ̃via, ye wo nana gogo.
13Àmè kè ɖona ènyà ŋuti gbɔ̀xue ɖonato ènyàbiɔsèa, le ɖè yebe èlãnyinyi fiɔ eye e dona ŋùkpɛ̃ ye ɖokoe.
14Jìdodo ye kpena ɖo èdɔ̀nɔ̀ ŋuti. Vɔ̀a, ne èdɔ̀nɔ̀a bu jìdodoa ɖe, nukɛ ye la teŋu le è ɖotè ò?
15Àmè kè ɖo ènunyaa, jina la kpla ènu kpe è; ènunyatɔ ɖona èto ènufiɔfiɔ àdodoewo.
16Ènu nana hũnà àgbo sùgbɔ eye e wɔ̀nà be ènunatɔa donagò àmè kɔsùwo.
17Àmè kè pò nupo cucugbã lè kòjoɖopea, wɔ̀nà sìgbè yebe ènyà jɔ̀ nène. Vɔ̀a, ne àmè kè ŋuti e sɔ ènyà ɖo vaa, yebe ènyàwo sinatè ɖo ènyà kè ye ŋutɔ gblɔ̃ va yìa ŋuti.
18Ne woa gbe ènyà lè àmè cãcã mèa, wo dànà ègà sɔ sònà ènyà.
19E sɛ̃sɛ̃na ŋutɔ ne woa dogò kudo nɔ̀vi kè ji wo jè àgɔ̀ lèa, wu be woa yì xɔ̀ èdù ɖe kè ye àgbògbò trɔdoa. Ènyàdɔ̃dɔ̃wo tuna èjì kpikpikpi sìgbè èdù ɖe be àgbo kè wo do lɔkè na a nène.
20Àmè teŋu kpɔ yebe ènuɖùɖu so yebe ènyàwo gbɔ̃gblɔ̃ mè. E teŋu nɔ̀ àgbè to yebe ènyà nya-gbɔ̃gblɔ̃ mè.
21Ènyà teŋu na èku àlo àgbè. Àmè kè ènupo pòpo vivina na a, ɖo la nɔ tɔtè kpɔ ye mè sonuwo cã.
22Àmèkè kè ɖo yebe àsì ŋutia, fɔ̀ nyɔna. Tɔhonɔ̀ ye na ɛ̀ ènu kèa.
23Wɔ̀amènɔ̀ pònà nupo to kukuɖèɖe mè, vɔ̀a, ècitɔ ya ɖona ènyà ŋuti kudo ŋusɛ̃.
24Èhavi sùgbɔ ɖoɖo hɛ̃nà gbledo vana na àmè. Vɔ̀a, èxlɔ̃ àdodoe wɔ̀nà ànùkua sìgbè nɔ̀vi nène.
Mina Bible © Bible Society of Togo, 2014.