Èlododowo 17
17
1Ètomè fàfa tèpe kè kpɔ̃nɔ pupu kpò ye lèa, nyɔ wu àjrè be àxue kè mè ènuɖùɖu bɔ lèa.
2Sumɔvi kè ɖo ènunyaa xɔ̀nà èvi kè le do ŋùkpɛ̃ àmèa be tèpe. Eye lè xòmè mèa, sumɔ̃via la xɔ̀ ècrɔ̃nu.
3Wo sɔna èzò sɔ dona sìka kudo klòsalò be àsìxɔ̀xɔ kpɔ; vɔ̀a, Tɔhonɔ̀ ye jrònà àgbètɔ be èjì mè kpɔ.
4Àmè kè le wɔ̀ ènu bàɖàa, ènyà kpòtoe sèse jɔ̀nàjì na ɛ̀. Eye àjèɖàtɔ ɖona èto ènyà gbegble.
5Àmè kè le kò wɔ̀amènɔ̀a, le zũ Ɖotɔ a. Ètodɔ̃ la va àmè kè le kpɔ jìjɔɛ ɖo àmèwo be gbledo ŋutia ji.
6Tɔgbe kpɔna jìjɔɛ so tɔgbeyɔvia ŋuti, eye èvi kpɔna jìjɔɛ so yebe àjìtɔwo ŋuti.
7Ènupo nya pòpo mu jènà sùkunɔ̀ ò, nènea ke ye àjèɖàɖa mu jènà ŋùkɔ̀nɔ̀tɔ cã ò.
8Ènu nana nyi nyɔna be àgbo na àmè kè le ji la na ènua. Àmèa susuna be e la hũ àgbowo kpata na yè.
9Àmè kè sɔna àgɔ̀jèje kènà a, la ɖo èxlɔ̃ sùgbɔ. Vɔ̀a, àmè kè ɖona ŋùku àmèwo be àgɔ̀jèje ji gà sia gàmèa, la bu yebe èxlɔ̃wo.
10Ŋùmèkãkã ɖèka sù la wɔ̀ èdɔ lè àmè kè ɖo ènunyaa mè wu èkpò fuu dodona sùkunɔ̀.
11Ènu bàɖà wɔ̀wɔ kpò ye jɔ̀nàjì na àmè bàɖà. Nène a, e le hɛ̃ gbledo va ye ŋutɔ ɖokoe ji.
12E la nyɔ be woa dogò sisiblìsi kè si wo xɔ̀ èviawo lèa, sɔ wu be woa dogò sùkunɔ̀ kè ɖɔ kudo èlãnu wɔ̀wɔa.
13Àmè kè le wɔ̀ èvuɛ̃ ɖo ènyuɛ̃ tèpea be àxuedo la nɔ̀ gbledo mè.
14Ènudɔ̃dɔ̃ hɛ̃nà èdù be àjrè vana. Le ɖokoe wò kaba gbɔ̀xue àjrè gãa bèa jɔ̀.
15Tɔhonɔ̀ crìnà àmè kè do àmè mà-nyã ɖe èku mèa kudo àmè kè do àlìlɔ na àmè kè jè àgɔ̀a kpata.
16Nukɛ ye sùkunɔ̀ a la sɔ ègà sɔ wɔ̀ ò? E la teŋu sɔ plè ènunyã à? Gbèɖe! Yebe susu mu sùtè funu ò.
17Èxlɔ̃ ɖènà yebe lɔ̃lɔ̃ fiɔ lè ènu sia ènu mè. Vɔ̀a, àmè nɔ̀vi ye hànànu kudo àmè.
18Àmè kè mu lè nyuɛ̃ ɖe òa kpò ye teŋu ɖè gblɔ̃ be èyè ye ɖùfɛ̃ kè àmè bu ɖù a.
19Àmè kè lɔ̃nà ènyà dɔ̃dɔ̃a, lɔ̃ ènuvuɛ̃; eye ègòyitɔa pu dù le yì cɔ̃crɔ̃ mè.
20Àmè kè àyè gɛdɛ na a, mu la kpɔ nyɔna ò. Àmè kè gblɔ̃nà àmè be ènyà vuɛ̃ a, la kpɔ gbledo.
21Àmè kè jì èvi kè àyè ku na a, mu la vò ò, eye ɖèvi kè ètagbɔ gble na a be ètɔa, mu la kpɔ jìjɔɛ ò.
22Èjì kè xayaa la teŋu dà èdɔ̀. Vɔ̀a, àkpɔ̃ nana wo gũna ŋusɛ̃.
23Àmè mà-wɔ̀ ànùkua ye lɔ̃nà xɔ̀nà ènunana lè wawla mè ne èse mu gbà va kù ì ò.
24Àmè nyanu jina ènunya kè sɔ̀ àlɔ̀sɔpe na ɛ̀a. Àmè kè ètagbɔ gble na a be susu nɔ̀nà ènu kèwo wo mu la teŋu wɔ̀ òa ji.
25Sumɔvi kè àyè ku na a, nyina tùkaɖa na ètɔa, eye yebe ènu wɔ̀nà ŋuzĩzĩ na ènɔa kè jì ìa.
26Mu sɔ̀gbè be woa dɔ̃to na àmè kè mu nya èɖèe ò. Eye jɔ̀jɔɛ sòso mu na èmɔ̃ be woa pò àmè kè ɖo bùbua ò.
27Àmè kè nya ènupo pòpoa, ɖènà yebe àɖàŋù fiɔ. Àmè kè lena ye ɖokoea, ɖo ènunya.
28Ɛ̃ɛ, ènunyaa mu zena lè ègòta ò, vɔ̀a, ènupo pòpo kudo wɔ̀na mè ye e zena lè. Sùkunɔ̀ kè mu le pò nupo òa, teŋu ze ènunyatɔ. Ne mu gbe ɖè yebe ènu mànya fiɔ ò kpòa, wo la teŋu sɔ ɛ̀ sìgbè àmè kè ɖo ènunyaa nène.
Mina Bible © Bible Society of Togo, 2014.