Èlododowo 16
16
Tɔhonɔ̀ be èjro wɔ̀nà godoo
1Àgbètɔ wɔ̀nà ɖoɖo co vɔ̀, Tɔhonɔ̀ ye nana ɖoɖo kèa kpɔna e mè vava.
2Àgbètɔ be susuwo kpata jènà ŋùmè na ɛ̀; vɔ̀a, Tɔhonɔ̀ ye jrònà èjìwo kpata mè kpɔ.
3Sɔ àpo ɖoɖowo sɔ do àsi na Tɔhonɔ̀ eye wo la kpɔ e mè vava.
4Tɔhonɔ̀ ɖo ènuwo keŋu kudo susu tɔ̀hɛ ɖe. E ɖo àmè bàɖàwo ne bèa teŋu va dɔ̃to na wo.
5Tɔhonɔ̀ crì ègòyitɔwo; lè vɔ̀vɔnua, wo la dɔ̃to na wo godoo.
6Wo la tutu àmè kè le wɔ̀ ènyuɛ̃ gbà le wɔ̀ ànùkua be àgɔ̀jèjewo jo. Àmè kè le vɔ̃ Tɔhonɔ̀a, la na àsà èvuɛ̃.
7Ne Tɔhonɔ̀ dà àsi ɖo àmè ɖe be wɔ̀na jia, e nana kaka be àmèa kudo yebe kɛ̃tɔwo trɔnazũ èxlɔ̃wo.
8Ènu viɖe kè sù àmè si lè nyàwo toto mèa, nyɔ wu àdɔ̀kùnu sùgbɔ kèwo wo tafu àmè sɔ ɖoa.
9Àgbètɔ jina yebe èmɔ̃; vɔ̀a, Tɔhonɔ̀ ye jɔ̀nà yebe àfɔ̀wo.
So èfìɔwo ŋuti
10Èfìɔ ɖona Mawu ŋutɔ be ègbè. Mu ɖànà àjè lè kòjoɖoɖo mè ò.
11Tɔhonɔ̀ tɔ̀wo ye nyi sìkelì ku àgbã gbɛjɛ dànu kèwo sɔ̀gbèa. Eye ye ŋutɔ ye ɖo sìkelì be ènu dànuwo.
12Èfìɔwo crìnà ènu bàɖà wɔ̀wɔ. Nyàwo, ne wo le wɔ̀ ènu nyuɛ̃a, woabe èfìɔɖùɖu linakè.
13Èfìɔ lɔ̃nà àmè kè le pò nupo kudo kãkãɖoji a be ènyà gbɔ. Àmè kè tona nyàwoa, be ènu dona jìjɔɛ na ɛ̀.
14Èfìɔ kè le bijìa, teŋu do àmè èku. Àmè ènunyatɔa la teŋu fa ɛ̀.
15Ne èfìɔ lè jìjɔɛ mèa, àgbè nɔ̀nà ènu sia ènu mè. Yebe àdɔ̀mè nyuɛ̃a nɔ̀nà sìgbè àgbè be gbawɛ nène.
Èha dòmè be àgbè nɔ̀nɔ
16Ènunya ɖoɖo nyɔ wu sìka ɖoɖo. Woa ɖo ènunyaa, ɖè àlè wu klòsalò ɖoɖo.
17Àmè kèwo wɔ̀nà jɔ̀jɔɛa, nana àsà ènu bàɖà. Àmè kè le le ŋùku ɖo yebe àgbè ŋutia, le hlùɛ̃ yebe àgbè.
18Ègòyiyi nana ènu bàɖà sùgbɔ, àmè cìcri nana ànyi jèje.
19E nyɔ be woa nɔ̀ àgbè lè ŋuti fàfa mè kudo wɔ̀amènɔ̀wo; sɔ wu be woa yì nɔ hlà àmɔ̀nyɔ̀nuwo kudo ègòyitɔwo.
20Àmè kè dèŋùgblè so ènu ŋuti gbɔ̀xuea, ɖona àkɔ̃ŋùta nyuɛ̃. Àmè kè kãna ɖo Tɔhonɔ̀ jia, kpɔna sìtu.
21Àmè kè le ɖokòjo kudo ènunyaa, ɖo ènunya. Nupo nyapòpoa, bɔ̀nà àmèwo be susu wɔ̀ ɖèka.
22Susu nyuɛ̃ ɖèɖe nyi àgbè sìdo na àmè kè le ɖèa. Sùkunɔ̀a, kpɔna ètodɔ̃ so yebe èlãnu wɔ̀wɔ mè.
23Ènunyatɔ bùnà èta mè nyuɛ̃ ɖe gbɔ̀xue pònà nupo. Nène a, yebe ègbè la vivi àmèwo nu.
24Ènyà vivi nɔ̀nà sìgbè ànyisì nène. E gbɔ̀nà àgbè èjì eye e nana ŋutilãa xayana.
25Àmè ɖe teŋu susu be yebe wɔ̀naa nyɔ. Co, lè nyàwo toto mèa, wɔ̀na kèa bòhũ ye le kplɔ̀ ɛ̀ yì èku mè.
26Pòdo ye nana èdɔwɔ̀tɔ jènà àgbàgba kpe è. Ɖo àdɔ̀wùàmè la nɔ tùtù ì.
27Àmè kè mu ɖo àsìxɔ̀xɔ ɖekpe òa, ye ɖènà ènu bàɖà be susu. Yebe nupo nɔ̀nà sìgbè èzò kè le fiɔ̃ ènua nène.
28Àjèɖàtɔ dona àjrè àmèwo dòmè. Àmè kè le gblɔ̃ àmè be ènyàa, hɛ̃nà mamã va èxlɔ̃wo dòmè.
29Àmè jèagla blènà ye havi. E kplɔ̀nà ɛ̀ ɖo èmɔ̃ bùblu ji.
30Àmè kè le jràɖo na ènu bàɖà ɖe be wɔ̀wɔ eye e miɔ̃ ŋùkuviwo, kpe àɖuwoa, àmèa wɔ̀ nène be ènu bàɖàa xoxo vɔ̀.
31Àgbè dìdì ye nyi àjɔ̀ àdodoea. Àmè kè wɔ̀nà nyuɛ̃a, ye xɔ̀nà ɛ̀.
32Àmè kè mu dona àdòmèze òa, nyɔ wu kãlìsu. Àmè kè ɖù ye ɖokoe jia, nyɔ wu àhùaga.
33Ne wo gbà dà èxòci sɔ biɔ ènu gɔ̃mè sè cã a, Tɔhonɔ̀ ɖèka kpò ye nana ènu sia ènu.
Mina Bible © Bible Society of Togo, 2014.