Èlododowo 15
15
1Ènyà ŋuti ɖoɖo nyuɛ̃ nyànà àdɔ̀mèze jo, vɔ̀a, ègbè dà àmè hɛ̃nà àdɔ̀mèze va.
2Ènunyatɔ be ègbè dona àmè ŋusɛ̃ na ènukpakpla. Vɔ̀a, sùkunɔ̀ be nupòpo nyina èlãnu wɔ̀wɔ ɖèɖe.
3Tɔhonɔ̀ le kpɔ àmè sia àmè: àmè nyuɛ̃ kudo àmè vuɛ̃wo kpata.
4Ŋusɛ̃ doàmènya lè sìgbè àgbè be àti nène, vɔ̀a, ègejinyaa gbãnà èjì.
5Àmè mànyanu mu lɔ̃nà ètɔa be kpakpla ò. Vɔ̀a, àmè kè ɖonato ètɔa, ɖènà yebe ènunya fiɔ.
6Jìjɔɛ ku nyɔna nɔ̀nà àmè jɔ̀jɔɛ be àxomè, vɔ̀a, veve sèse ku kpɛ̃sɛ̃ ye nɔ̀nà àmè vuɛ̃ be àxomè.
7Ènunyatɔ be àɖe fiɔna ènu, vɔ̀a, mu lè nène lè sùkunɔ̀a gbɔ ò.
8Tɔhonɔ̀ ɖènàkɔ̀ lè àmè kè wɔ̀nà ènu bàɖàa be vɔsa ŋuti, vɔ̀a, e xɔ̀nà àmè kè wɔ̀nà ènu jɔ̀jɔɛa be kuefã.
9Tɔhonɔ̀ crìnà àmè kèwo nɔ̀nà àgbè kpòtoewo be ènyà gbɔ. Vɔ̀a, e lɔ̃nà àmè kè jina la wɔ̀ ènyuɛ̃a.
10Wo la dɔ̃to na àmè kè gbe nyàwo be èmɔ̃a sùsuiɖe. Àmè kè crìnà ŋùmèkãkãa, la ku.
11Sìgbè àlekè Tɔhonɔ̀ nya èkuwode be gòglòpewoa, nènea ke e nya àgbètɔ be èjì mè cã yeŋu.
12Àmè kè kɔna ye ɖokoe yì jia, mu lɔ̃nà ŋùmèkãkã ò. Mu dona èha ku ènunyatɔwo ò.
13Àmè kè le kpɔ jìjɔɛa be ŋùmè vlũna, vɔ̀a, ŋuzĩzĩ nana àmè cina kpɔ̃.
14Àmè kè dènà ŋùgblèa, jina ènunya; vɔ̀a, sùkunɔ̀a lenabè na èlãnu wɔ̀wɔ.
15Ènuwɔ̀donɔ̀ be ŋùkèkèwo kpata nyina àɖukluiɖùɖu; vɔ̀a, ŋùkèkèwo kpata nyina jìjɔɛ be ŋùkèkèwo na àmè kè fɔ̀ ɖàgbèa.
16E la nyɔ be àmè bèa ɖo ènu kè jè na ɛ̀a eye bèa ɖo bùbu na Tɔhonɔ̀ sɔ wu be bèa nyi ècitɔ, co vɔ̀a, gbà nɔ sè veve.
17Ègbekui kè wo nyà nyuɛ̃ ɖe ku lɔ̃lɔ̃ a, vivi wu nyìlãdesi kè wo ɖà ku àdɔ̀mèzea.
18Àmè kè dona àdɔ̀mèze kabaa, wɔ̀nà àjrè; vɔ̀a, àmè kè hɛ̃nà àdòdòa, gbena ènyà.
19Kuviɔ̃tɔ be àfɔ̀tope ɖɔna kudo àŋùja. Àmè jɔ̀jɔɛwo be èmɔ̃wo zìɔ̃nà.
20Èvi kè nyana ènua, dona jìjɔɛ na ètɔa. Vɔ̀a, sùkunɔ̀a, crìnà ènɔa.
21Àmè kè ènunya xùedoa, kpɔna jìjɔɛ lè yebe èlãnu wɔ̀wɔ mè. Vɔ̀a, àmè kè bùnà èta mèa, zɔ̃nà èmɔ̃ jɔ̀jɔɛ ji.
22Ènu kè wo mu ɖo ègbè èdu sɔ wɔ̀ òa, mu nyɔna ò; vɔ̀a, ènu kè be wɔ̀wɔ mè ye ètopòɖo sùgbɔ lèa, zɔ̃nà sùu.
23Ènyà-ɖoŋuti nyuɛ̃ nana jìjɔɛ; ènyà nyuɛ̃ kè wo gblɔ̃ ɖo àmè hùenua, jrànà ènu ɖo.
24Ènunyatɔ nɔ̀nà àgbè be èmɔ̃ ji kpò. Mu jina la trã yì èmɔ̃ kè kplɔ̀nà àmè yì èku mèa ji ò.
25Tɔhonɔ̀ crɔ̃na àmè kè yinagòa be àxue; vɔ̀a, e ɖiana àhòsì be àgblè.
26Tɔhonɔ̀ crìnà susu bàɖà; vɔ̀a, susu nyuɛ̃ ɖèɖe jɔ̀nàjì na ɛ̀.
27Àmè kè ègà jɔ̀nàjì na a, le hɛ̃ gbledo va yebe àgbè mè. Vɔ̀a, àmè kè mu lɔ̃nà àɖùflui-nu ɖùɖu òa, la nɔ̀ àgbè dìdì.
28Àmè kè le nɔ̀ àgbè nyuɛ̃a, bùnà èta mè gbɔ̀xue pònà nupo. Vɔ̀a, àmè kè le nɔ̀ àgbè kpòtoea, pònà nupo mà-ɖo kɔpe.
29Tɔhonɔ̀ ɖènàkɔ̀ lè àmè bàɖà ŋuti. Vɔ̀a, e ɖona èto àmè kè le wɔ̀ ènu nyuɛ̃a be kuefã.
30Ŋùkumè kè vlũa, dona jìjɔɛ na àmè; àŋɛ̀ kè nyɔa, dona àmè ŋusɛ̃.
31Àmè kè ɖona èto àgbèa be ènufiɔfiɔwoa, kpɔna èmɔ̃ lè ènunyatɔwo dòmè.
32Àmè kè gbe kpakpla xɔ̀xɔa, le ɖèkɔ̀ lè yebe àgbè ŋuti. Vɔ̀a, àmè kè lɔ̃nà ènyà gbegbe na àmèa, le jrà yebe èdɛ̃ ɖo.
33Àmè kè le vɔ̃ Tɔhonɔ̀a, ɖo ènunya be kpakpla. Bɔ̀bɔɛ nyinyi mè ye gogo tona lè.
Mina Bible © Bible Society of Togo, 2014.