Èlododowo 14
14
1Nyɔ̃nù ènunyatɔ lenabè na yebe xòmèa. Vɔ̀a, sùkunɔ̀a ya crɔ̃na ye tɔ̀a.
2Àmè kè lè àgbè lè jɔ̀jɔɛnyinyi mèa, ɖo bùbu na Tɔhonɔ̀. Àmè kè trãa, crì Tɔhonɔ̀.
3Àmè mà-ɖo ènunya be nupo ɖɔna kudo ègòyiyi. Vɔ̀a, ènunyatɔ be nupo pòpo hlùɛ̃nà ɛ̀ gã lè siasìa mè.
4Àmè kè si ènyì wɔ̀ àgblèdɔ mu lè òa, be àvàwo nɔ̀nà gbalo. Vɔ̀a, àmè kè si ènyì wɔ̀ àgblèdɔ nyuɛ̃wo lèa, be àvàwo ɖɔna kudo àgblèmènukuwo fuu.
5Ɖaseɖùtɔ kè tona nyàwoa mu blènà àmè ò. Àjè ɖaseɖùtɔ tɔ̀ ye nyi àjèɖàɖa.
6Àmè kè donavlo ènu ɖekpekpea, la ji ènunya kaka vɔ̀a, mu la kè ɖo e ŋuti ò. Vɔ̀ àmè kè ɖo ènunyaa, trɔnazũ ènunyatɔ kaba.
7Mù gbà do ènu mànyatɔwo be èha ò, woabe ènyàwo mu la ɖè èvi ɖe na wò ò.
8Àmè kè hɛ̃nà àdòdòa, lena ŋùku ɖo yebe àgbènɔ̀nɔ ŋuti: E ɖo ènunya. Àmè kè mu ɖo ènunya òa, blènà àmèwo: Mu nyi ènunyatɔ ò.
9Sùkunɔ̀ mu kpɔna àlè kè lè àgɔ̀jèje be sɔsɔkè mè ò. Vɔ̀a, àmè kèwo wɔ̀nà jɔ̀jɔɛa, sɔ kènà woa nɔ̀nɔwo.
10Àmè kè lè ŋuzĩzĩmèa ŋutɔ ɖèka kpò ye nyana ènu kè le wɔ̀ ɛ̀a be kpɛ̃kpɛ̃ mè. Nène a ke mu la teŋu ma yebe jìjɔɛa cã kudo àmè ɖekpe ò.
11Wo la crɔ̃ àmè bàɖàwo be xòmè, vɔ̀a, àmè kèwo wɔ̀nà jɔ̀jɔɛa be xòmè la kèkètaa.
12Àmè ɖe ŋutɔ la teŋu susu be yebe àgbènɔ̀nɔ nyɔ, co lè nyàwo mèa, yebe wɔ̀nàa ke le kplɔ̀ ɛ̀ yì èku mè.
13Wo la teŋu nɔ kò ènu co vɔ̀a, la nɔ sè veve lè èjì mè. Lè vɔ̀vɔnua, àpo jìjɔɛa la trɔ ŋuzĩzĩ.
14Àmè kè nɔ̀nà àgbè mà-ɖo kɔpea, la xɔ̀ ènu kè jè na ɛ̀a be fɛ̃tu. Àmè kè nɔ̀nà àgbè nyuɛ̃a la kpɔ yebe nyɔna.
15Àmè kè lè bòlì mèa, xɔ̀nà ènu sia ènu kè wo gblɔ̃ na ɛ̀a ji sè. Vɔ̀a, àmè kè ɖo àdòdòa, bùnà èta mè so ènu kè wo gblɔ̃ na ɛ̀a ŋuti gbɔ̀xue yìnà ŋùkɔ̀.
16Ènunyatɔ vɔ̃na gbledo eye e sina na ɛ̀. Vɔ̀ sùkunɔ̀a susuna be yè lè àgbɔ̃jèpò mè eye e tànàsi ye ɖokoe kpò.
17Àmè kè binajì kabaa, wɔ̀nà àɖìkunu. Wo crìnà àmè kè blènà àmèa.
18Àmè kè kpɔ̀tɔ̀ ci bòlì mèa, trɔnazũ yɛ̀yìnɔ̀, vɔ̀ àmè kè bùnà èta mèa, trɔna ènunyatɔ.
19Àmè bàɖàwo ɖo la bɔ̀bɔ̀ lè àmè nyuɛ̃wo be ŋùkɔ̀. Àmè kèwo wɔ̀nà ènudrãa, la yì biɔ ɖù lè àmè nyuɛ̃wo gbɔ.
20Wɔ̀amènɔ̀ mu dona èha ò. Vɔ̀a, ècitɔ ɖona èxlɔ̃ sùgbɔ.
21Àmè kè le ɖìgbɔ nɔ̀via, le wɔ̀ ènuvuɛ̃. Vɔ̀a, àmè kè le kpɔ ɖo e mè na àmè gbɔjɔwoa, la fɔ̀ nyɔna.
22Àmè kèwo ɖo susu bàɖàa, trãnà èmɔ̃. Vɔ̀a, àmè kèwo ye ɖènà susu nyuɛ̃woa, tɔ̀ ye nyi àdɔ̀mè nyuɛ̃ kudo ègbèjinɔ̀nɔ.
23Àmè kè le hlɔ̃ le wɔ̀ èdɔa, kpɔna nyɔna so yebe àgbàgba jèje mè. Vɔ̀a, àmè kè lenabè na ènupo pòpo kpò mà-wɔ̀ èdɔa, la kpɔ̀tɔ̀ nɔ̀ wɔ̀amènɔ̀ be ànyi.
24Àdɔ̀kùnu ye nyi ènunyatɔwo be fɛ̃tu, sùkunɔ̀wo be fɛ̃tua ye nyi àɖìkunu wɔ̀wɔ.
25Ɖaseɖùtɔ kè le to nyàwoa, le hlùɛ̃ àmè be àgbè, vɔ̀a, àjèɖàtɔa le blè àmè sùgbɔ.
26Àmè kè ɖo bùbu na Tɔhonɔ̀a lè àgbɔ̃jèpò mè, ɖo e la kpɔ èviawo ji.
27Bùbu ɖoɖo na Tɔhonɔ̀ ye nyi àgbè be sìdo, e ɖènà àmè to lè èmɔ̃ kèwo wùnà àmèawo mè.
28Dùkɔ̃ kè sùgbɔa nana èfìɔa be gogo, vɔ̀a, èdù kè mu ɖo àmè sùgbɔ òa, be èfìɔ jènà ànyi kaba.
29Àmè kè xɔ̀nà èjìgbɔ̃ɖɛa ɖo ènunya tɔ̀xɛ. Vɔ̀a, àmè kè binajì kabaa, ɖènà yebe èlã nyinyia fiɔ.
30Àmè kè ɖo ètù fàfaa, kpɔna lãmèsɛ̃, vɔ̀a, ŋuhuã ɖùnà àmèti bliboa lè yebe ètùmè.
31Àmè kè le zĩ wɔ̀amènɔ̀wo ɖo ànyi, to màjɔ̀ màjɔ sòso jia, le zũ ye ŋutɔ be ɖotɔ a. Vɔ̀a, àmè kè le ku ŋuzĩzĩ na ènuwɔ̀donɔ̀a, le na gogo Tɔhonɔ̀.
32Àmè kè le wɔ̀ ènu bàɖàa, kpɔna ètodɔ̃ so yebe ènu bàɖàwɔ̀wɔ mè. Vɔ̀a, àmè kè le wɔ̀ ènunyuɛ̃a ɖona èjìdo, kaka yì èku mè ŋutɔ cã.
33Àmè kè bùnà ènu ŋuti kpɔ gbɔ̀xuea, ɖo ènunya. Vɔ̀a, ekèa dɛ̃ sùkunɔ̀wo.
34Bùbu ɖoɖo na jɔ̀jɔɛ sòso nana èdù yìnà ŋùkɔ̀. Vɔ̀a, màjɔ̀ màjɔ sòso dona ŋùkpɛ̃ dùkɔ̃wo.
35Èfìɔ dɔ̃na sumɔ̃vi kè nyana ènua ji. Vɔ̀a, e binajì do sumɔ̃vi kè le do e ŋùkpɛ̃a.
Mina Bible © Bible Society of Togo, 2014.