Èlododowo 13
13
1Èvi kè bùnà àmèa, ɖona èto ètɔa be ègbè. Vɔ̀a, èvi kè mu bùnà àmè òa, mu lɔ̃nà be woa gbe ènyà na yè ò.
2Àmè ɖekpekpe àmè teŋu kpɔ àlè so ye ŋutɔ be nupo pòpowo mè. Vɔ̀ ènudrãwɔ̀wɔ ye nɔ̀nà àmè bàɖàa be susu mè.
3Àmè kè lena ŋùku ɖo yebe nupo pòpowo ŋutia, hlùɛ̃nà yebe àgbè. Vɔ̀a, àmè kè pònà nupo vlàvlàvlàa, le crɔ̃ ye ɖokoe.
4Ènu jrona kuviɔ̃tɔ, vɔ̀a, mu jènà àgbàgba ɖekpe sɔ kènà ɖo ènua ŋuti ò. Vɔ̀a, àmè kèwo le xlɔ̃, le jè àgbàgbaa ye kènà ɖo ènuwo ŋuti.
5Àmè kè le wɔ̀ jɔ̀jɔɛa, crìnà àjèɖàɖa. Vɔ̀a, àmè kè le wɔ̀ ènu bàɖàa, dona ŋùkpɛ̃ àmèwo, zũnà wo.
6Ànùkua wɔ̀wɔ hlùɛ̃nà àmè kè le wɔ̀ ànùkua a. Vɔ̀a, ènu bàɖàwɔ̀wɔ crɔ̃na àmè kèwo le wɔ̀ ènu bàɖàawo.
7Àmè ɖewo kpɔna woa ɖokoe sìgbè àdɔ̀kùnɔ̀wo nène, vɔ̀a, wo mu ɖo ènu ɖekpe ò. Àmè buwo sɔ woa ɖokoe sɔ wɔ̀ wɔ̀amènɔ̀wo eye wo ɖo àdɔ̀kùnuwo drì.
8Gà ɖewo mèa, àdɔ̀kùnɔ̀ tuna èfɛ̃ sɔ nɔ̀nà àgbè. Vɔ̀a, wɔ̀amènɔ̀ ya mu hiã ɛ̀ ò.
9Àmè jɔ̀jɔɛ be wɔ̀nawo klɛ̃na sìgbè kãligbɛ̃ kè wo sũa nène. Vɔ̀a, àmè bàɖàwo lè sìgbè kãligbɛ̃ kè cia nène.
10Àjrè kpò ye àmè kèwo kɔna woa ɖokoe yì jia, wɔ̀nà. Vɔ̀a, àmè kèwo lɔ̃nà ètopòɖowoa, ɖona ènunya.
11Àdɔ̀kùnu kè sù àmè si kpàtàa, mu nɔ̀nà ànyi ò. Àdɔ̀kùnu kè to so èpè sùgbɔ be àgbàgba jèje mèa, jìnà ɖo ji.
12Àmè kè lè ŋùɖo mè na ènu ɖe kè le ci ŋùgbea, gbɔjɔna. Vɔ̀a, ènujroàmè kè ŋuti wo kè ɖoa, nɔ̀nà sìgbè àti kè nana àgbèa nène.
13Àmè kè gbe ètopòɖoa kpɔna àfɔ̀ku. Vɔ̀a, àmè kè wɔ̀nà ɖo ègbè do àsi jia, fɔ̀nà màje.
14Ènunyatɔ be ènufiɔfiɔ nyi àgbè sìdo. Ènufiɔfiɔ kèa xena èmɔ̃ na ànyi jèje kèwo kplɔ̀nà àmè yì èku mèa.
15Àmè kè jina àmèwo be nyɔnaa, be ènu jɔ̀nàjì na àmè sia àmè. Vɔ̀a, àmèwo crìnà àmè bàɖàwo.
16Ènunyatɔ mu wɔ̀nà yebe ènuwo kpò ò. Vɔ̀a, àmè mànyanua, wɔ̀nà yebe ènuwo mà bù woa ŋuti kpɔ.
17Àŋɛ̀dotɔ bàɖà hɛ̃nà gbledo vana. Vɔ̀ àŋɛ̀dotɔ wɔ̀ ànùkua hɛ̃nà èdɔ̀dàdàa vana.
18Àmè kèwo gbe àfɔ̀ ɖo àfɔ̀ jia, la nyi wɔ̀amènɔ̀wo eye wo la crì wo. Vɔ̀a, àmè kèwo lɔ̃nà ŋùmèkãkãa, la kpɔ nyɔna.
19Jìjɔɛ tɔ̀hɛ ɖe nɔ̀nà èjro kè kpɔ e mè vavaa mè. Ye ŋuti àmè mànyanua, mu gbena ènu lè ènu bàɖàwɔ̀wɔ ŋuti ò.
20Ne wò le zɔ̃ kudo ènunyatɔa, wò la ɖo ènunya. Ne wò le yì kudo ènu mànyatɔa, wò la kpɔ àfɔ̀ku.
21Gbledo kplɔ̀nà èvuɛ̃wɔ̀tɔ do. Vɔ̀a, nyɔna ye jènà àmè kèwo le wɔ̀ ènu nyuɛ̃a yomè.
22Ènu nyuɛ̃wɔ̀tɔ jrànà ècrɔ̃nu ɖo ɖɛ na yebe jìjimèviwo, vɔ̀a, èvuɛ̃wɔ̀tɔ be àdɔ̀kùnuwo trɔna àmè jɔ̀jɔɛa tɔ̀.
23Wɔ̀amènɔ̀ be àgblè kè wo lebè na nyuɛ̃ ɖe a, nana ènuɖùɖu sùgbɔ. Vɔ̀a, àmè mà-wɔ̀ ànùkua buna yebe ŋusɛ̃a vivivi.
24Àmè kè mu gbena ènyà na èvia òa, mu ɖo lɔ̃lɔ̃ na ɖèvia ò. Vɔ̀a, àmè kè lɔ̃ èvia, gbena ènyà na ɛ̀.
25Àmè kè le wɔ̀ ènyuɛ̃a, ɖona ènuɖùɖu lè gbɔsùsu mè. Vɔ̀a, àmè bàɖà be àxomè cina gbalo.
Mina Bible © Bible Society of Togo, 2014.