Èlododowo 11
11
1Tɔhonɔ̀ crì àjè sìkelì, vɔ̀ e lɔ̃nà ènudànu jɔ̀jɔɛwo.
2Ègòyiyi hɛ̃nà cìcri vana, vɔ̀ ènunya nɔ̀nà àmè kè bɔ̀bɔ̀ ye ɖokoea si.
3Ànùkua kɔ̀nà àmè jɔ̀jɔɛ be wɔ̀nawo, eye ànùkua mà-wɔ̀ crɔ̃na àjèɖàtɔwo.
4Ne èku do ŋùmè ɖoɖaa, àdɔ̀kùnu mu gbà teŋu ɖona ŋusɛ̃ ɖekpe ò, vɔ̀ àgbè nɔ̀nɔ nyuɛ̃ ɖèka kpò ye teŋu hlùɛ̃ àmè lè èku si.
5Àgbènɔ̀nɔ nyuɛ̃ dànà àmè ɖo èmɔ̃ jɔ̀jɔɛ ji. Èkunyànyrã nana àmè bàɖàa jènà ànyi.
6Ànùkua be àgbènɔ̀nɔ nana vòvo àmè jɔ̀jɔɛwo. Vɔ̀ àjèɖàtɔwo jènà woabe èjro be èmɔ̃ tetrewo mè.
7Ne àmè bàɖàwo kua, woabe ŋùɖowo buna kudo wo, eye woabe jìdo ɖo àdɔ̀kùnuwo ji cã buna.
8Àmè kè le wɔ̀ nyuɛ̃a, àdìka mu sònà ɛ̀ ò. Vɔ̀ àmè kè le wɔ̀ èvuɛ̃a, ye àdìka sònà.
9Àmè bàɖàwo crɔ̃na àmèwo kudo woabe ènyàwo. Ènunyuɛ̃wɔ̀tɔwo kpɔna jiɖùɖu to woabe ènunyawo mè.
10Ne ènu le nyɔ na kplɔ̀tɔ nyuɛ̃woa, èdùa kpata nɔ̀nà jìjɔɛ mè. Eye ne kplɔ̀tɔ vuɛ̃ kua, wo dona jìjɔɛ be àpa.
11To woabe ènyuɛ̃ wɔ̀wɔ jia, àmè jɔ̀jɔɛwo tùnà èdù. Vɔ̀ àmè bàɖà be nupo pòpo crɔ̃na èdù.
12Àmè kè crìnà àmèa mu ɖènà susu ò. Àmè nyanuwo lena woabe ènu.
13Àmè kè ɖànàjè ɖo àmè sia, mu wlana àmè bu be ènyà ò. Vɔ̀ àmè kè ŋuti ŋùmè kãkã ɖe mu lè òa, mu pònà nupo ò.
14Dùkɔ̃ kè wo mu le kplɔ̀ nyuɛ̃ ɖe òa, ɖota cɔ̃crɔ̃ mè. Topòɖotɔ sùgbɔ nana jiɖùɖu.
15Àmè kè lɔ̃nà dona ènu na àmèjroa, le dɔ̃ àhovì va ye ɖokoe ji. Eye àmè kè gbea, la nɔ̀ ètomè fàfa mè.
16Nyɔ̃nù kè jrànà ye ɖokoe ɖoa, xɔ̀nà bùbu; ŋusù kè jènà àgbàgba ŋutɔa, ɖona àdɔ̀kùnu.
17Àmè kèwo lɔ̃nà àmèa, wɔ̀nà nyuɛ̃ na woa nɔ̀nɔwo. Vɔ̀ àmè nyrãkua hɛ̃nà gbledo va na ye ɖokoe ji.
18Ènu bàɖàwɔ̀tɔ jènà àgbàgba gbalo. Vɔ̀ àmè kèwo wɔ̀nà ènyuɛ̃a, la xɔ̀ yebe àjɔ̀ godo.
19Àmè kè jro la wɔ̀ nyuɛ̃a, la nɔ̀ àgbè. Vɔ̀ àmè kè kplɔ̀ èvuɛ̃ wɔ̀wɔ do a, la crɔ̃ gbidi-gbidi.
20Tɔhonɔ̀ crìnà àmè kè ɖo susu gɔ̃glɔ̃a, vɔ̀a e dànà àsi ɖo ànùkuamèwo be wɔ̀wɔ ji.
21Nyàwo be nyi be àmè kè le wɔ̀ èvuɛ̃a la xɔ̀ yebe ètodɔ̃, vɔ̀a àmè kè le wɔ̀ nyuɛ̃a mu la nya ènu kè nyi ètodɔ̃ ò.
22Nyɔ̃nù sùkunɔ̀ be tùgbɛ̀jɛ jèje nɔ̀nà sìgbè èhã kè wo do sìka be àlɔ̀gàvi ŋɔ̀ti na a nène.
23Nyuɛ̃wɔ̀tɔwo jina ènunyuɛ̃ gà sia gàmè. Eye àmè kè wɔ̀nà ènu bàɖà be fɛ̃tu ye nyi àdɔ̀mèze klìko.
24Àmè ɖewo nana ènu sùgbɔ eye wo gbà ɖona àdɔ̀kùnu sùgbɔ ɖo e ji kpe è. Àmè kèwo zĩna àdɔ̀kùnu jia zũnà wɔ̀amènɔ̀wo.
25Àdɔ̀mènyuɛ̃wɔ̀tɔ xɔ̀nà ènunana sùgbɔ. Àmè kè le na èsì àmèa cã kpɔna èsì nùnu so àmè gbɔ.
26Dùkɔ̃a sɛ̃nakpɛ̃ na àmè kè le wla yebe nukuwoa. Vɔ̀a, àmè kè ɖè wo to le sàa, kpɔna sìtu xɔ̀nà.
27Àmèwo lɔ̃nà àmè kè le ji la wɔ̀ ènyuɛ̃a, èvuɛ̃wɔ̀tɔ tɔ̀ ye nyi gbledo.
28Àmè kè kãna ɖo yebe àdɔ̀kùnu jia, buna yebe ŋusɛ̃. Vɔ̀a àmè kè wɔ̀nà nyuɛ̃a, vũnà sìgbè àti do àmà nyuɛ̃ nène.
29Àmè kè dona àjrè yebe xòmè mèa, le gbã xòmè kèa. Eye sùkunɔ̀wo la nyi ènunyatɔ be kluviwo.
30Ènyuɛ̃wɔ̀tɔ lè sìgbè àti kè nana àgbèa nène. Àmè kè ɖo ènunyaa, bɔ̀nà àmè fuu.
31Ènyuɛ̃wɔ̀tɔ xɔ̀nà yebe àjɔ̀ lè ànyigbã ji. Nène a ke ye àmè vuɛ̃ kudo vuɛ̃wɔ̀tɔwo cã la xɔ̀ àjɔ̀ kè jè na woa yeŋu.
Mina Bible © Bible Society of Togo, 2014.