Àmè Hɛ̃hlɛ̃ 35
35
Levìwo be èdùwo
1Tɔhonɔ̀ pò nupo na Mosè, lè Mòab be ànyigbã gbàjàa ji, lè Yɔrdàn be ètɔ̀a to, lè Yerikò lɔ̀ge. E gblɔ̃ na Mosè be: 2Ɖè ègbè na Izràɛlviwo be wo ne ɖè lè woabe ècrɔ̃nuwo ŋuti, sɔ na Levìwo, woa na Levìwo, èdù kèwo mè Levìwo la nɔ̀a. Wo ne na wo ànyigbã kèwo la nyi èlãnyìpewo, trɔ do èdù kèawo. 3Èdùawo la nyi woa tɔ̀, ne woa nɔ̀ woa mè, eye ànyigbãawo la nyi woabe èlãnyìpewo ku woabe èdɔwɔ̀lã ku èdɔwɔ̀nuwo. 4Èdùawo be ànyigbã kèwo mì la na Levìwoa, la so èdùawo be èglìwo ŋuti, la kèkè àbɔglìgo èkà èwì vɔ àtɔ̃ (1000), trɔ do èdùawo. 5Èdùawo la nɔ̀ dòdò mè, eye mì la jije kèkemè àbɔglìgo hotu ɖèka, lè èwèzɛ̃pe, àbɔglìgo hotu ɖèka (2000), lè àpùgo, àbɔglìgo hotu ɖèka, lè èwèɖoxɔ̀pe, ku àbɔglìgo hotu ɖèka, lè àvego. Ekèawo ye la nyi ànyigbã kè la trɔ do Levìwo be èdùawo be kèkemè. 6Èdù kèwo mì la sɔ na Levìwoa la trɔ zũ ètabèpe be èdù àdɛ̃ kèwo mì la ɖo ànyi, ne èhlɔ̃dãtɔwo ne yì nɔ wla ɖo woa mè. Mì la sɔ èdù èkà ci èvè buwo kpe ɖo woa ŋuti na Levìawo. 7Ekèa la na be èdù kèwo kpata mì la sɔ na Levìwoa la nyi èdù èkà ci ènyi, èdù ɖe sia ɖe ku yebe èlãnyìpewo. 8Èdù kèwo mì la xɔ̀ le Izràɛlviwo be ènunɔ̀amèsiwo mè, la sɔ na Levìwoa la nɔ̀ àmè sia àmè be ènunɔ̀amèsiwo nu. Mì la xɔ̀ sùgbɔ lè àmè kèwo xɔ̀ ènunɔ̀amèsi sùgbɔa si, eye mì la xɔ̀ viɖe kpò lè àmè kèwo xɔ̀ ènunɔ̀amèsi vi ɖeawo si.”
Ètabèpe be èdùwo na èhlɔ̃dãtɔwo
9Tɔhonɔ̀ gblɔ̃ na Mosè be: 10“Gblɔ̃ na Izràɛlviwo be: Ne mì sò Yɔrdàn be ètɔ̀a vɔ̀, la sɔ ɖo Kanàn-nyigbã jia, 11Mì la cã èdù ɖewo, sɔ wɔ̀ ètabèpe be èdùwo. Ne àmè ɖe mu jro ò, vɔ̀, wù àmèa, e la yì bè ɖo funua. 12Èdù ŋuawo la nyi ètabèpe na mì, àleke be mìa teŋu nɔ si lè èhlɔ̃biɔtɔwo nu. Wo mu la wù àmèwùtɔ, ne mu va àmèha a be ŋùkɔ̀, ne woa ɖo kòjo na ɛ̀ ò. 13Lè èdù kèwo mì la ɖè ɖovòawo dòmèa, mì sɔ èdù àdɛ̃ wɔ̀ wawlape be èdùwo; 14Èdù ètɔ̃ la nɔ̀ Yɔrdàn be ètɔ̀a godo, eye ètɔ̃ la nɔ̀ Kanàn-nyigbãa ji. 15Èdù àdɛ̃ kèawo la nyi ètabèpe na Izràɛlviwo, na àmèjrowo ku èmɔzɔ̃tɔ kèwo ye to woa dòmè, va le yìa; àmè ɖekpekpe àmè kè mu jro ò, vɔ̀, wù àmèa, la kpɔ bèbèpe lè èdù ŋuawo mè.
16Ne èlãnu ɖe ye àmèwùtɔa sɔ ja àmèa, be kua, eŋuãa, àmèwùtɔ ye be nyi, wo ɖo la wù ye cã. 17Ne èkpe kè la wù àmèa ye be dà sɔ wù ìa, eŋuã, àmèwùtɔ ye be nyi; wo ɖo la wù àmèwùtɔa cã. 18Ne àti kè la teŋu wù àmèa ye be sɔ wù ìa, eŋuã, àmèwùtɔ ye be nyi; wo ɖo la wù àmèwùtɔa. 19Èhlɔ̃biɔtɔa ye ɖo la wù àmèwùtɔa; wàlɛbɛ kè be gbe dogò è kpòa, e ye ɖo la wù ì. 20Ne àmè ɖe crì àmè bu, eye be tùtù ì, pu ànyi, àlo, sɔ àdɔ̀mèvuɛ̃ dà ɛ̀ ènu, eye àmèa kua, 21ne e sɔ àdɔ̀mèvuɛ̃ tù ì èkɔ̃, eye àmèa kua, wo la wù àmè kè wù àmèa cã: àmèwùtɔ ye be nyi. Èhlɔ̃biɔtɔa ye la wù ì, wàlɛbɛ kè be la gbe dogò è kpòa.
22Vɔ̀a, ne e nyi be mu nya ò, eye mu sɔ àdɔ̀mèvuɛ̃ gbɔ̀xue tùtù àmèa, àlo dà ɛ̀ ènu ò a, 23àlo, ne mu kpɔ àmèa ò, eye be dà èkpe ɖekpekpe kè la teŋu wù ìa, yì pò è, àlo, na be gɛ̃, jè e ji, eye be kua, ne e wɔ̀ ènu kèa, kè mu crì àmèa, àlo, ɖo èvuɛ̃ ɖe ɖo àmèa ŋuti ò a, 24àmèha la kpɔ ènyàa, zɔ̃ ɖo ɖoɖo kèawo ji, ne bèa sò ènyàa, lè àmè kè wù àmèa ku èhlɔ̃biɔtɔa dòmè. 25Àmèhaa la xɔ̀ àmè kè wù àmèa lè èhlɔ̃biɔtɔa si, eye be la gbìgbɔ̀ kplɔ̀ ɛ̀ yì wawlape be èdù kè mè be bè ɖo sãa mè. Àmèa la nɔ̀ funua, kaka na gà kè mè hũbonɔ gã kè wo do àmì kɔ̀kɔ̀ɛ èta na a la kua. 26Vɔ̀a, ne àmèwùtɔa kãsè to lè wawlape be èdù kè mè be bè ɖoa be lipòwo mèa, 27eye, èhlɔ̃biɔtɔa dogò è lè èdù kè mè be bè ɖoa godo, eye be wù ìa, èhlɔ̃biɔtɔa mu dã èhlɔ̃ ò. 28Ekèa ŋuti ye àmè kè wù àmèa ɖo la nɔ̀ wawlape be èdù kè mè be bè ɖoa mè, kaka na hũbonɔ gãa be èku gbè. Ne hũbonɔ gãa ku vɔ̀a, e teŋu trɔ gbɔ̀ va ye ŋutɔ be èdù mè.
29Ènu kèawo la nyi èse kèwo mì la sɔ nɔ kplɔ̀ mìabe jìjimèviwo kpata, lè àfi kèwo kpata mì la nɔ̀awo.
30Ne e va jɔ̀ be àmè ɖe gbe wù àmè kpòa, wo mu ɖo la wù ì, ne àmè sùgbɔ mu ɖù ɖase so ènu kè jɔ̀ a ŋuti ò. Wo mu la gble èhùɛ do àmèa, ne e nyi be àmè ɖèka kpò ye ɖù ɖase so e ŋuti ò. 31Mì mu la xɔ̀ àjɔ̀ ɖo àmè kè wù àmè, eye be jè na èkua be àgbè ta ò; wo ɖo la wù ì. 32Mì mu la xɔ̀ àjɔ̀ cã, be ne si, yì ji ètabèpe, lè wawlape be èdù ɖe mè, àlo, ne bèa trɔ yì nɔ̀ èdùa mè, gbɔ̀xue hũbonɔa ne ku ò.
33Mì mu la kɔ̀ èhũ ɖɛ, la sɔ gble èkɔ̀do na ànyigbã kè ji mì lèa ò. Èhũ nyi ènu ɖe kè gblena èkɔ̀do na èdù be ànyigbã. Eye, àmè kè kɔ̀ èhũ ɖɛa be èhũ ke ye kpò wo la sɔ kɔ̀ ànyigbã kè ji be kɔ̀ èhũ ɖoa ŋuti. 34Wò mu la gble èkɔ̀do na ànyigbã kè ji mì lèa, dùkɔ̃ kè dòmè mù lèa ò, ɖoa, ènyè ye nyi Tɔhonɔ̀, eye mù lè Izràɛlviwo dòmè.”
Mina Bible © Bible Society of Togo, 2014.