Àmè Hɛ̃hlɛ̃ 36
36
Nyɔ̃nù kè ɖù ècrɔ̃a be èsrɔ̃ɖèɖe
1Ènu kèawo yomè a, xòmèga kèwo so Gilead be jìjimèviwo be hɛ̃nuwo mèa va. Gilead nyi Makìr be èvi, Makìr nyi Manasè be èvi, Manasè ŋutɔ nyi Yosɛ̀f be kɔ̀ta mèviwo dòmètɔ ɖèka. Wo xɔ̀ ègbè lè Mosè ku Izràɛlviwo be ŋùkɔ̀nɔ̀tɔwo ku kɔ̀ta be gawo be ŋùkɔ̀, eye wo gblɔ̃ be: 2“Tɔhonɔ̀ ɖè ègbè na àpetɔ nyè be ne na, woa dà àkɔ̀, sɔ mã ànyigbãa na Izràɛlviwo. Eye Tɔhonɔ̀ ɖo è na àpetɔ nyè be ne sɔ mia fòfo Selofehàd be ècrɔ̃nua na mia fòfo be nyɔ̃nùviwo. 3Vɔ̀a, ne nyɔ̃nùviawo yì ɖè èsrɔ̃ lè Izràɛlviwo be kɔ̀ta bu mèa, woabe ècrɔ̃nua la va to lè mia tɔwo be ècrɔ̃nu mè, la yì kpe kɔ̀ta kè mè wo yì ɖè èsrɔ̃ lèa mètɔwo tɔ̀. Nène a, ècrɔ̃nua la to lè ekè mi le xɔ̀a mè. 4Eye, èpè kè mè àyosòso be àzãa la va ɖo na Izràɛlviwoa, wo la sɔ nyɔ̃nùviawo be ècrɔ̃nu sɔ kpe kɔ̀ta kè mè wo ɖo, kè mè wo ɖè èsrɔ̃ lèa be ècrɔ̃nu; ècrɔ̃nu kèa la to lè mia tɔwo be kɔ̀ta be ècrɔ̃nu mè.”
5Zɔ̃ ɖo Tɔhonɔ̀ be ègbè jia, Mosè gblɔ̃ na Izràɛlviwo be: “Yosɛ̀f be kɔ̀ta be jìjimèviwo be ènyà jɔ̀. 6Ègbè kè Tɔhonɔ̀ ɖè so Selofehàd be nyɔ̃nùviwo ŋutia ye nyi ekèa: Wo teŋu ɖè ŋusù kè jro woa, vɔ̀a, àmèa ɖo la nyi ŋusù kè so hɛ̃nu kè so woa-tɔ be kɔ̀ta mèa mè. 7Ekèa la na be, lè Izràɛlviwo dòmèa, ècrɔ̃nu ɖe mu la so kɔ̀ta ɖe mè, la yì kɔ̀ta bu mè ò. Izràɛlvi ɖe sia ɖe la tɛ ɖo ètɔa be kɔ̀ta be ècrɔ̃nu ŋuti. 8Nyɔ̃nùvi ɖekpekpe kè la ɖù ècrɔ̃ ɖe, lè Izràɛlviwo be kɔ̀ta ɖe mèa ɖo la ɖè èsrɔ̃ lè ètɔa be kɔ̀ta be hɛ̃nuwo dòmètɔ ɖèka mè. Nène a ye Izràɛlviwo la wɔ̀, la xɔ̀ woa-tɔwo be ècrɔ̃nu, àmè sia àmè ɖo yebe dɛnua yeŋu. 9Ècrɔ̃nu be àkpa ɖe mu la so kɔ̀ta ɖe mè, la yì kɔ̀ta bu mè ò, vɔ̀a, Izràɛlviwo be kɔ̀tawo la tɛ ɖo woabe ècrɔ̃nuwo ŋuti, àmètɔ̀ àmètɔ̀.”
10Selofehàd be nyɔ̃nùviwo wɔ̀ ɖo ɖoɖo kèwo Tɔhonɔ̀ sɔ do àsi na Mosè a ji. 11Ekèa ŋuti ye Mahlà, Tirsà, Hoglà ku Nɔà kèwo nyi Selofehàd be nyɔ̃nùviwo ɖè woabe àtàviwo be ŋusùviwo ɖo. 12Wo ɖè ŋusù kèwo so Manasè kè nyi Yosɛ̀f be èvia be jìjimèviwo be xòmèwo mèa. Eye woabe ècrɔ̃nu be mamãa ci kɔ̀ta kè mè woa tɔ be hɛ̃nu soa mè.
13Ekèawo ye nyi ɖoɖo ku èse kèwo Tɔhonɔ̀ ŋlɔ̀, do àsi na Izràɛlviwo, to Mosè ji, lè Mòab be ànyigbã gbàjàa ji, lè Yɔrdàn be ètɔ̀a to, lè Yerikò lɔ̀ge.
Mina Bible © Bible Society of Togo, 2014.