Àmè Hɛ̃hlɛ̃ 34
34
Kanàn-nyigbãa be lipòwo
1Tɔhonɔ̀ gblɔ̃ na Mosè be: 2“Ɖè ègbè na Izràɛlviwo ne wòa gblɔ̃ na wo be: Ne mì ɖo Kanàn-nyigbã ji, ànyigbã kè mù sɔ le na mì, ne bèa nyi mìabe ècrɔ̃nua jia, be lipòwo nyi kèwo gbãnàa:
3Lè àpùgoa, mìabe lipò la tɔ e ji so Sìn be zògbè a ji, eye be la to Edɔ̀m be ànyigbãa be àxàda mè. Lè èwèzɛ̃pea, mìabe àpùgo be lipòa la so Èjè be gbàgàa be àpùgo be ènu gbɔ. 4E yomè a, mìabe lipòa la kpà to Akuabìm be ètoa be àpùgo, la to Sìn, ne bèa va ɖo Kadɛ̀s-Bàrneà be àpùgo. E la gbà so funua, tùtà Hasàr-Adàr, eye be la to Asmɔ̀n. 5Ne e so Asmɔ̀n kpòa, lipòa la trɔ kpà tùtà Ejiptè be ètɔ̀ wɔ̀ àdã a gbɔ, eye be la va ɖo àpùa to.
6Àpù Gãa#34.6 Àpù Gãa: Ànyigbãwo Dòmè be àpù kè wo yɔna lè Frãsegbe mè be Mèdìtɛranèa ye Izràɛlviwo yɔna be Àpù Gã. ye la nyi mìabe èwèɖoxɔ̀pe be lipòa.
7Mìabe àvego be lipòa ye nyi ekèa: Mì la tè lipòa, so kaka Àpù Gãa to, sɔ va ɖo Hɔr be ètoa ŋuti. 8So Hɔr be ètoa ŋutia, mì la tè è kaka va ɖo Lebò-Hamàt. Lipòa la va ɖo Sedàd. 9E yomè a, lipòa la gbà tùtà Zifrɔ̀n, eye be la yì ɖo Hasàr-Einàn. Lekea ye mìabe àpùgo be lipòa la nɔ̀a yeŋu.
10Na mìabe èwèzɛ̃pe be lipòa, mì la tè èflì ɖe, so Hasàr-Einàm sɔ yì Sefàm. 11So Sefàm, lipòa la ɖiɖi to Riblà, lè èwèzɛ̃pe na Ayìn, eye be la gbà ɖiɖi kaka la yì tɔ Kinerɛ̀t be tɔ̀gbaa be èwèzɛ̃pe be àgowo ji. 12E yomè a, e la gbà ɖiɖi kaka yì Yɔrdàn be ètɔ̀a ŋuti, eye be la yì tɔ èjè be gbàgàa.
Lekea ye mìabe èdùa la nɔ̀ ku lipò kèwo la trɔ do èa.”
Ɖoɖo buwo na ànyigbã be mamã
13Mosè sɔ ɖoɖo kèawo do àsi na Izràɛlviwo, eye be gblɔ̃ na wo be: “Ànyigbã kèa ji ye mì la dà àkɔ̀, la sɔ mã àmè si àmè be ècrɔ̃nu na ɛ̀, lè ànyigbã kè Tɔhonɔ̀ gblɔ̃ be yè la sɔ do àsi na kɔ̀ta àsiɖèkɛawo ku Manasè be kɔ̀ta mamã mèa. 14Ɖoa, Rubɛ̀n be jìjimèviwo be kɔ̀taa ku woabe xòmèwo ku Gad be jìjimèviwo be kɔ̀taa ku woabe xòmèwo kudo Manasè be jìjimèviwo be kɔ̀taa be mamã mè ya xɔ̀ woabe ècrɔ̃nu vɔ̀. 15Kɔ̀ta èvè kèawo ku Manasè be kɔ̀taa be mamã mè xɔ̀ woabe ècrɔ̃nu lè Yɔrdàn be ètɔ̀a godo, lè Yerikò lɔ̀ge, lè èwèzɛ̃pe.”
16Tɔhonɔ̀ gblɔ̃ na Mosè be: 17“Àmè kèwo la ma mìabe ècrɔ̃nuawo na mì, lè èdùa mèawo ye nyi ekèawo: hũbonɔ Aleazàr ku Yosùa, Nun be èvia. 18Kɔ̀ta ɖe sia ɖe la cã ŋùkɔ̀nɔ̀tɔ ɖèka na ècrɔ̃nu mamãa, ne mì ɖo èdùa mèa. 19Àmè ŋuawo be nyikɔwo ye nyi:
Kàlɛb, Yefunè be èvia, la nɔ̀ ŋùkɔ̀ na Yudà be kɔ̀taa.
20Semuɛ̀l, Amihùd be èvia la nɔ̀ ŋùkɔ̀ na Simeɔ̀n be kɔ̀taa.
21Elidàd, Kislɔ̀n be èvia, la nɔ̀ ŋùkɔ̀ na Bɛnyamìn be kɔ̀taa.
22Bukì, Yoglì be èvia, la nɔ̀ ŋùkɔ̀ na Dàn be kɔ̀taa.
23Na Yosɛ̀f be jìjimèviwoa, Haniɛl, Efod be èvia la nɔ̀ ŋùkɔ̀ na Manasè be kɔ̀taa.
24Kemùɛl, Siftàn be èvia, la nɔ̀ ŋùkɔ̀ na Efràyim be jìjimèviwo be kɔ̀taa.
25Elisàn, Parnàk be èvia, la nɔ̀ ŋùkɔ̀ na Zabulɔ̀n be jìjimèviwo be kɔ̀taa.
26Patìɛl, Azàn be èvia, la nɔ̀ ŋùkɔ̀ na Isakàr be jìjimèviwo be kɔ̀taa.
27Ahihùd, Selumì be èvia, la nɔ̀ ŋùkɔ̀ na Àsɛr be jìjimèviwo be kɔ̀taa.
28Pedahɛ̀l, Amihùd be èvia, la nɔ̀ ŋùkɔ̀ na Neftalì be jìjimèviwo be kɔ̀taa.
29Àmè ŋuawo ye nyi àmè kèwo Tɔhonɔ̀ ɖè ègbè na be wo ne mã ècrɔ̃nu na Izràɛlviwo, lè Kanàn-nyigbãa ji.
Mina Bible © Bible Society of Togo, 2014.