Àmè Hɛ̃hlɛ̃ 32
32
Kɔ̀ta ètɔ̃ ci Yɔrdàn be èwèzɛ̃pe
1Rubɛ̀n be jìjimèviwo ku Gad be jìjimèviwo ɖo èlãha kèwo sùgbɔ ŋutɔ. Kè wo ɖè èkɔ̀ kpɔ Yazɛ̀r be ànyigbã ku Gilead be ànyigbãa, wo kpɔ ɛ̀ jèsi be ànyigbã ŋua la nyɔ na èlã nyìnyi. 2Gad be jìjimèviwo ku Rubɛ̀n be jìjimèviwo va gblɔ̃ na Mosè ku hũbonɔ Eleazàr kudo àmèha a be ŋùkɔ̀nɔ̀tɔwo be: 3“Àtarɔ̀t, Divɔ̀n, Yazɛ̀r, Nimrà, Hɛsbɔ̀n, Ɛlealè, Sebàm, Nebò ku Beɔ̀n be ànyigbã 4kè ji Tɔhonɔ̀ ɖù na Izràɛlviwo, lè àmèha a be ŋùmè a nyi ànyigbã ɖe kè jè na èlã nyìnyi. 5Ne mi kpɔ màje lè àpo ŋùmè a, sɔ ànyigbã kèa na sumɔ̃vi wòwo, ne bèa nyi mia tɔ̀, àleke be miawo yaa, mi mu la gbà sò Yɔrdàn be ètɔ̀a jè e godo ke ò.”
6Eye Mosè ɖo e ŋuti na Gad ku Rubɛ̀n be jìjimèviwo be: “Nukɛ! Mìa nɔ̀viwo lè èmɔ ji, la yì wɔ̀ àhùa, eye mìawo yaa, mì le gblɔ̃ be yèwo la ci fikèa? 7Nukɛ ŋuti mì le ji la gbɔjɔ Izràɛlviwo, ne wo mu gbà sò ètɔ̀a, yì ànyigbã kè Tɔhonɔ̀ sɔ na woa ji ò? 8Ènu kè tutu mìa tɔwo wɔ̀, wàlɛbɛ kè mù dɔ̃ wo so Kadɛ̀s-Barnea ɖoɖa be wo ne yì sã ŋùku kpɔ ànyigbãa jia yeŋu! 9Wo lia ètoa, yì kaka Ɛskɔ̀l be Bàlìa mè, eye, kè wo sã ŋùku, kpɔ ànyigbãa ji vɔ̀a, wo va gbɔjɔ#32.9 Woa kpɔ Hɛ̃h 13.17-33 Izràɛlviwo be yèwo mu la yì ànyigbã kè Tɔhonɔ̀ sɔ na yèwoa ji ò. 10Gbè ŋua gbèa, Tɔhonɔ̀ do àdɔ̀mèze gã ɖe, eye be kã àtãŋu be: 11“Ŋusù kèwo hũ so Ejiptè-nyigbã jiawo dòmètɔ ɖekpe, àmè kèwo ɖo so èpè èwì ku e jivɔwoa dòmètɔ ɖekpe mu la kpɔ ànyigbã kè be àjɔ̀gbè mù fìã na Abràham, na Izàk ku na Yakɔb ò, ɖoa wo mu sè ètonu na mù lè ànùkua mè ò.” 12Àmè kèwo to lè woa mèawo kpò ye nyi Kàlɛb, Yefunè kè nyi Kenàz ŋusùa be èvia ku Yosùa, Nun be èvia, ɖoa, wo kplɔ̀ Tɔhonɔ̀ do, ŋùgbe mà kpɔ. 13Tɔhonɔ̀ do àdɔ̀mèze ɖo Izràɛlviwo ŋuti veveɖe ŋutɔ, ekèa ŋutia, Tɔhonɔ̀ na wo sã lè zògbè a ji èpè èkà sɔ̃ŋu, kaka na gà kè mè jìjimè kè wɔ̀ ènu kè ve àdɔ̀mè na Tɔhonɔ̀a crɔ̃ keŋu-keŋuã. 14Eye fifìa, mìa èvuɛ̃wɔ̀tɔwo be jìjimè kèa, mì gbà jè mìa tɔwo yomè, la gbà do èzò ɖo Tɔhonɔ̀ be àdɔ̀mèzea gɔ̃mè ɖo Izràɛlviwo ŋuti! 15Ɖoa, ne mì trɔ lè Tɔhonɔ̀ yomè a, e la gbà na mì la nɔ̀ zògbè a ji kpe è, eye mì la na dùkɔ̃ kèa kpata la crɔ̃.”
16Wo tètè gogo Mosè, eye wo gblɔ̃ na è be: “Mi la tù àlɛ̃kpawo ɖo fikèa, na miabe èlãhawo, eye mi la tù èdùwo na miabe èviwo. 17Eye mia ŋutɔwo, mi la bla àkpà, la jè ŋùkɔ̀ na Izràɛlviwo, mi la ɖèbla kplɔ̀ wo, kaka na gà kè mè, wo ɖo woabe tèpe vɔ̀a. Gãkea, miabe èviwo la nɔ̀ fikèa, lè àgbògbò be èdùwo mè, ɖo ànyigbãa jitɔwo ŋuti. 18Mi mu la trɔ gbɔ̀ va miabe àxuewo mè, ne Izràɛlvi ɖe sia ɖe mu xɔ̀ yebe ècrɔ̃nu ò. 19Vɔ̀a, mi mu la xɔ̀ miabe ènumamã ku wo, lè Yɔrdàn be ètɔ̀a godo ò, ɖoa, miawo yaa, miabe ècrɔ̃nua lè àkpa kèa, lè Yɔrdàn be ètɔ̀a be èwèzɛ̃pe.” 20Mosè ɖo e ŋuti na wo be: “Ne mì wɔ̀ ènu ŋua, ne mì bla àkpà, na àhùa lè Tɔhonɔ̀ be ŋùkɔ̀a, 21ne mìabe gbãdãgbãwo keŋu sò ètɔ̀a lè Tɔhonɔ̀ be ŋùku mè, kaka na gà kè mè be nyà yebe kɛ̃tɔwo jo lè yebe ŋùkɔ̀a, 22eye, ne gà kè mè Tɔhonɔ̀ ɖo àsi ànyigbãa ji vɔ̀a, gbɔ̀xue mì trɔ joa, eŋuã, mì mu la gbà jè àgɔ̀ ɖe lè Tɔhonɔ̀ ku Izràɛlviwo be ŋùku mè ò; eye ànyigbã kèa la trɔ zũ mìa tɔ̀, lè Tɔhonɔ̀ be ŋùkɔ̀. 23Vɔ̀a, ne mì mu wɔ̀ nènea ò a, eŋuã, kpɔɖa, mì la jè àgɔ̀ lè Tɔhonɔ̀ be ŋùku mè, eye mìabe àgɔ̀a la jè mìa yomè. 24Mì sò èdùwo na mìabe èviwo, eye mì tù èlãkpawo na mìabe èlãhawo. Vɔ̀a, mì wɔ̀ ɖo ènyà kè to lè ènu mè na mìa ji.” 25Gad ku Rubɛ̀n be jìjimèviwo ɖo e ŋuti na Mosè be: “Sumɔvi wòwo la zɔ̃ ɖo ègbè kè àpetɔ nyè ɖèa ji. 26Miabe èsrɔ̃wo ku miabe èviwo, miabe èlãhawo ku miabe èlãwo keŋu la ci fikèa, lè Gilead be èdùwo mè. 27Eye, mia, sumɔ̃vi wòwo ya, mia kpata, mi la bla àkpà, na àhùa, lè ètɔ̀a godo, lè Tɔhonɔ̀ be ŋùkɔ̀, eye mi la yì àhùa, sìgbè lekè miabe àpetɔa gblɔ̃ ɛ̀a nène.”
28Mosè do ɖoɖowo àsi na hũbonɔ Eleazàr, na Yosùa, Nun be èvia, ku Izràɛlviwo be kɔ̀tawo be xòmègawo. 29Gblɔ̃ na wo be: “Ne Gad be jìjimèviwo ku Rubɛ̀n be jìjimèviwo bla àkpà, sò ètɔ̀a ku mì, yì àhùagbe ji, lè Tɔhonɔ̀ be kpɔ̀kplɔ nua, ne ànyigbãa sù mìa si vɔ̀a, mì la sɔ Gilead be ànyigbãa sɔ wɔ̀ ècrɔ̃nu na wo. 30Vɔ̀a, ne wo mu sò ètɔ̀a ku mì, yì wɔ̀ àhùa ò a, eŋuã, wo la xɔ̀ ècrɔ̃nu lè mìa dòmè, lè Kanàn-nyigbã ji.” 31Gad be jìjimèviwo ku Rubɛ̀n be jìjimèviwo ɖo e ŋuti be: “Mi la wɔ̀ ènu kè Tɔhonɔ̀ gblɔ̃ na sumɔ̃vi wòwoa. 32Miawo ya, mi la bla àkpà, la sò ètɔ̀a, la wɔ̀ àhùa, yì Kanàn-nyigbã ji, lè Tɔhonɔ̀ be ŋùkɔ̀, vɔ̀a, ànyigbã kè la nyi miabe ècrɔ̃nua lè Yɔrdàn be ètɔ̀a be àgo#32.32 Woa kpɔ Yos 1.12-15 kèa ji.
33Mosè sɔ Àmorìtɔwo be èfìɔ, Sihɔ̀n be èfìɔdua, Ɔg, Basàn be èfìɔ, be èfìɔdua, ànyigbã a keŋu ku yebe èdù gãwo ku ànyigbã kèwo keŋu nyi woa tɔ̀awo, kpe ɖo èdù kèwo trɔ do woa ŋuti, sɔ na Gad be jìjimèviwo, na Rubɛ̀n be jìjimèviwo ku Manasè kè nyi Yosɛ̀f be èvia be jìjimèviwo be mamã mè.
34Gad be jìjimèviwo gbìgbɔ̀ trɔ tù èdù kèawo: Divɔ̀n, Àtarɔ̀t, Àroà, 35Atrɔ̀t-Sofàn, Yazɛ̀r, Yogbohà, 36Bait-Nimrà ku Bait-Haràn; wo tù àgbògbò-dù kèawo ku àlɛ̃kpawo.
37Rubɛ̀n be jìjimèviwo gbìgbɔ̀ tù Hɛsbɔ̀n, Elealè, Kiriatayìm, 38Nebò, Baal-Mɛɔ̀n kèwo be nyikɔwo wo trɔa, ku Sibmà. Wo ɖo nyikɔ buwo na èdù kèwo wo gbìgbɔ̀ tùa.
39Makìr kè nyi Manasè be èvia be jìjimèviwo yì Gilead, nyà Amɔrìtɔ kèwo ye lè èdùa mèa jo, xɔ̀ èdùa lè woa si. 40Eye Mosè sɔ Gilead-nyigbãa na Makìr, Manasè be èvia, eye be nɔ̀ èdùa mè. 41Yàir kè cã nyi Manasè be èvia yì xɔ̀ Gilead be kɔpewo eye be ɖo nyikɔ na wo be Yàir be kɔpewo. 42Nɔbà kè nyi Manasè be èvi bua cã yì xɔ̀ Kenat be èdùa ku èdù kèwo trɔ do èa, eye be sɔ ye ŋutɔ be nyikɔ na ɛ̀ be Nɔbà.
Mina Bible © Bible Society of Togo, 2014.