Àmè Hɛ̃hlɛ̃ 31
31
Izràɛlviwo kpe àhùa ku Midìantɔwo
1Tɔhonɔ̀ gblɔ̃ na Mosè be: 2“Biɔ èhlɔ̃ na Izràɛlviwo ɖo èvuɛ̃#31.2 Woa kpɔ Hɛ̃h 25.17-18 kè Midìantɔwo wɔ̀ ɖo woa ŋutia nu; ekèa yomè a, wò la trɔ yì tɔgbe wòwo gbɔ.” 3Mosè gblɔ̃ na dùkɔ̃a be: “Ŋusùwo ne bla àkpà lè mìa dòmè, ne woa yì àhùa. Wo la kpe àhùa ku Midìantɔwo, la sɔ biɔ èhlɔ̃ na Tɔhonɔ̀. 4Mì cã àhùasuka àkpe ɖèka lè Izràɛl be kɔ̀ta sia kɔ̀ta mè.”
5Ekèa ŋutia, wo ɖè ŋusù èkà èwìvɔàtɔ̃ lè Izràɛlviwo be àhùakɔ̃ àlɔ̀ èwo-èwowo dòmè, eye, so kɔ̀tawo keŋu mèa, e wɔ̀ àgbètɔ hotu àdɛ̃ (12000) kèwo bla àkpà, la jè èmɔ na àhùa gbèjia. 6Mosè ɖo àmè èkà èwì vɔ àtɔ̃, so kɔ̀ta ɖe sia ɖe mè ɖoɖa àhùagbea ji; e ɖo wo ɖoɖa ku hũbonɔ Pinhàs, Eleazàr be èvia. Hũbonɔa le kɔ̀kɔ̀ɛpea be ènuwo#31.6 Ènu kɔ̀kɔ̀ɛ kèwo wo sɔ biɔna ènyà Tɔhonɔ̀a wo ye nyi Urìm ku Tumìm kèwo ŋuti wo mu va kè ɖo, ne woa sɔ nya ènu kèwo ŋùku mè wo nyi ò. ɖo àsi, kpe ɖo èzè kèwo wo la nɔ zã, la sɔ nɔ ɖè ègbèa ŋuti. 7Wo jè èmɔ, yì àhùa gbea ji, sìgbè lekè Tɔhonɔ̀ ɖè ègbè na Mosè a nène, eye wo wù Midìan be ŋusùwo keŋu. 8Kpe ɖo woa ŋutia, wo wù Midìantɔwo be èfìɔwo cã: wo wù èfìɔ àtɔ̃ kèwo nyi: Ɛvì, Rekɛ̀m, Sur, Hur ku Rɛvà. Wo sɔ èwui wù Bìleam kè nyi Beɔ̀r be èvia cã. 9Izràɛlviwo le Midìan nyɔ̃nùwo ku woabe èviwo àhùale; wo le woabe èlãwo keŋu, woabe èlãhawo kpata, eye wo fɔ̀ woabe ènuɖoɖowo keŋu. 10Wo tɔzò èdù kèwo keŋu mè Midìantɔwo lèa ku woabe àsàɖawo. 11E yomè a, Izràɛlviwo fɔ̀ ènu kèwo wo lɔawo keŋu, eye wo kplɔ̀ àmè ku èlã kèwo wo leawo jo. 12Wo kplɔ̀ àhùaleawo, ku ènu kèwo wo lɔawo va na Mosè, na hũbonɔ Eleazàr ku na Izràɛlviwo be àmèha a. Wo sɔ wo yì woabe àsàɖaa mè, lè Mòab be ànyigbã gbàjà kè lè Yɔrdàn be ètɔ̀a to, lè Yerikò gbɔa.
13Mosè, hũbonɔ Eleazàr ku Izràɛlviwo be ŋùkɔ̀nɔ̀tɔwo keŋu to lè àsàɖaa mè va dogò wo lè àsàɖaa godo. 14Mosè do àdɔ̀mèze do àhùakplɔ̀tɔ kèwo wo sɔ ɖo àmè èkà èwì vɔ àtɔ̃ (1000) ku àmè èkà èvè takpowo (100) be àhùakɔ̃ kèwo ye gbɔ̀ so àhùagbe ŋua jia. 15E gblɔ̃ na wo be: “Nukɛ! Mì gble nyɔ̃nùawo kpata ɖo àgbèa! 16Lè Peɔ̀r#31.16 Lè Hebrùgbe mèa, hɛ̃hlɛ̃ kèa mè mu kɔ̀ nyuɛ̃ ɖe ò. Lè èta 25 mèa, Peɔ̀r be ènyàa mu tɛ ègbè ɖo Bìleam be àfɔ̀ɖèɖe lè Izràɛlviwo be àhasìwɔ̀wɔa ji ò. be ènyàa mèa, mu nyi woawo tutu ye dɔ̃ Izràɛlviwo ɖo àhasì gbe, eye wo trɔ ŋùgbe do Tɔhonɔ̀, lè Bìleam be ènyàa nu, eye èdɔ̀ vuɛ̃ ɖe va jè Tɔhonɔ̀ be àmèha a ji ò a? 17Ekèa ŋutia, mì wù ŋusùviwo keŋu ku nyɔ̃nù kèwo ɖè èsrɔ̃a. 18Vɔ̀a, nyɔ̃nùvi kèwo kpata mu nya ŋusù, to èsrɔ̃ɖèɖe mè ò a, mì gble wo ɖo àgbè, na mìa ŋutɔwo. 19Eye, mìa ŋutɔwoa, mì la do àsàɖa ɖo àsàɖaa godo, ŋùkèkè adrɛ̃. Mì àmè kèwo kpata wù àmè, àlo, àmè kèwo tɔ àlɔ̀ àmèkukua, mì la lè mìa ɖokoewo ɖì, ŋùkèkè ètɔ̃gɔ̃a, ku adrɛ̃gɔ̃ a gbè, mia ŋutɔwo ku mìabe nyɔ̃nù àhùaleawo. 20Nène a ke, mì la kɔ̀ àvɔwo keŋu, àgbàze nuwo, ègbɔfu be ènuwo ku ènu kèwo keŋu wo sɔ àti kpàawo ŋuti.”
21Hũbonɔ Eleazàr gblɔ̃ na gbãdãgbãwo be: “Èsea be ɖoɖo kèwo Tɔhonɔ̀ wɔ̀, do àsi na Mosè a wo ye nyi ekèawo: 22Sìka, klòsalò, gàjɛ̃, gàyìbɔ, ègàɣe ku suŋubui, 23ku ènu kèwo keŋu teŋu to èzò mèawo ŋuti kpò ye mì la sɔ èzò nɔ kɔ̀, gbɔ̀xue, la sɔ wo do àmèlèleɖì be èsì mè#31.23 Woa kpɔ Hɛ̃h 19.9. Ènu kèwo keŋu mu teŋu to èzò mè ò a, mì la sɔ èsì nɔ klɔ woa ŋuti. 24Ne mì nyà mìabe àwùwo, ŋùkèkè adrɛ̃ a gbè vɔ̀a, mìa ŋuti la kɔ̀, eye, e yomè a, mì la trɔ gbɔ̀ va àsàɖaa mè.”
Lekè wo la mã àmɔ̀nyɔ̀nuawo ɖoa
25Tɔhonɔ̀ gblɔ̃ na Mosè be: 26“Wò ku hũbonɔ Eleazàr, kudo àmèha a be xòmègawo, mì la hlɛ̃ àhùaleawo ku èlã kèwo wo lea, ɖèka ɖèka. 27Wò la ma àmɔ̀nyɔ̀nuawo ɖo gbãdãgbãwo ku àmèha bliboa nu. 28Wò la xɔ̀ àjɔ̀ lè gbãdãgbã kèwo yì àhùawo si, na Tɔhonɔ̀. Wò la xɔ̀ àgbètɔ ɖèka lè àlɔ̀ àtɔ̃ (500) ji, eye wò la xɔ̀ èlã ɖèka lè àlɔ̀ àtɔ̃ (500) ji, lè ènyì, èsɔ-àkɛtɛ, ku àlɛ̃ kudo ègbɔwo dòmè. 29Wò la ɖè è lè woabe mamãwo mè, eye wò la sɔ na hũbonɔ Eleazàr; e la nyi àjɔ̀ kè wo ɖo la na Tɔhonɔ̀a. 30Lè Izràɛlvi kpɔ̀tɛawo tɔ̀ mèa, wò la xɔ̀ àgbètɔ ɖèka lè èkà ci èwo (50) ji, èlã ɖèka lè èkà ci èwo (50) ji; lè ènyìwo, èsɔ-àkɛtɛwo, àlɛ̃wo ku ègbɔwo, èlãwo kpata dòmè, eye wò la sɔ wo na Levì kèwo le wɔ̀ èdɔ lè Tɔhonɔ̀ be Nɔ̀pe Kɔ̀kɔ̀ɛ.”
31Mosè ku hũbonɔ Eleazàr wɔ̀ ɖo ènu kè Tɔhonɔ̀ do àsi na Mosè a ji. 32Lè àmɔ̀nyɔ̀nu kèwo gbãdãgbãwo hlà lè Midìantɔwo si, lè àhùagbea jia dòmèa, ekè kpɔ̀tɔ̀a kpata lè: àlɛ̃ ku ègbɔ hotu àlɔ̀ ètɔ̃ ègbã vɔ adrɛ̃ ci èkà èwì vɔ àtɔ̃ (675000), 33ènyì hotu ègbã vɔ àdɛ̃ (72000), 34èsɔ-àkɛtɛ hotu ègbã èkà èwì vɔ àtɔ̃ (61000), 35àgbètɔwo yaa, vevetɔa, nyɔ̃nù kèwo mu nya ŋusù, eye wo mu ɖè èsrɔ̃ ò a, woa kpata wo lè àgbètɔ hotu woeàdɛ̃ (32000). 36Àmɔnyɔnuawo be mamã mè lè àlɛ̃ ku ègbɔ hotu àlɔ̀ ɖèka èkà takpo ci ènyi àlɔ̀ woeàtɔ̃ (337500); 37Àjɔ̀ kè wo ɖè na Tɔhonɔ̀ lè àlɛ̃ ku ègbɔwo dòmèa lè èlã àlɔ̀ àdɛ̃ èkà takpo ci woeàtɔ̃ (675); 38ènyìawo lè hotu woènyi (36000), eye wo ɖè èkà takpo ci woèvè (72), sɔ na Tɔhonɔ̀; 39èsɔ-àkɛtɛawo lè hotu woeàtɔ̃ àlɔ̀ àtɔ̃ (30500), eye wo ɖè èkà takpo ci ɖèka (61), sɔ na Tɔhonɔ̀; 40àgbètɔawo lè àmè hotu ènyi (16000), eye wo ɖè ègbã vɔ èvè (32) sɔ na Tɔhonɔ̀. 41Mosè sɔ àjɔ̀ kè be ɖè na Tɔhonɔ̀a do àsi na hũbonɔ Eleazàr, sìgbè lekè Tɔhonɔ̀ ɖè ègbè na Mosè a nène. 42Ènuawo ku àhùaleawo be mamã mè kè la nyi Izràɛlviwo tɔ̀, eye Mosè xɔ̀ lè àmè kèwo yì àhùawo sia, 43àkpa kè wo sɔ na àmèha a nyi: àlɛ̃ ku ègbɔ hotu àlɔ̀ ɖèka èkà takpo ci ènyi àlɔ̀ woeàtɔ̃ (337500); 44ènyì hotu woènyi (36000), 45èsɔ-àkɛtɛ hotu woeàtɔ̃ àlɔ̀ àtɔ̃ (30500), 46ku àgbètɔ hotu ènyi (16000). 47Lè àkpa kè la nyi Izràɛlviwo tɔ̀a, Mosè ɖè àgbètɔ ɖèka lè èkà ci èwo (50) ji ku èlã ɖèka lè èkà ci èwo (50) ji, sɔ na Levì kèwo sumɔna lè Tɔhonɔ̀ be nɔ̀pea, sìgbè lekè Tɔhonɔ̀ ɖè ègbè na ɛ̀a nène.
48Àhùaga ku àhùa be ŋùkɔ̀nɔ̀tɔwo va kpɔ Mosè; 49wo gblɔ̃ na ɛ̀ be: “Sumɔvi wòwo hlɛ̃ gbãdãgbã kèwo wo sɔ do àsi na mia, eye àmè ɖekpe mu to lè woa mè ò. 50Ekèa ŋutia, ne mia wɔ̀ àvũlele be èkɔ̀nu na mia ɖokoewo lè Tɔhonɔ̀ be ŋùkɔ̀a, mi hɛ̃ sìkanu kèwo nyi: àlɔ̀tinugawo, àlɔ̀gawo, àlɔ̀gaviwo, ètomègàviwo ku èwlɔ kèwo mia dòmètɔ ɖe sia ɖe teŋu kpɔa va.”
51Mosè ku hũbonɔ Eleazàr xɔ̀ sìkaa kè nyi àlɔ̀nu-dɔwɔ̀wɔwo lè woa si. 52Sìka kè kpata wo ɖè, sɔ wɔ̀ àjɔ̀ na Tɔhonɔ̀a lè sekɛ̀l hotu ènyi àlɔ̀ adrɛ̃ èkà ci èwo (16750). Ekèa ye gbãdãgbã èkàwìvɔàtɔ̃ ku àlɔ̀-àlɔ̀wo be ŋùkɔ̀nɔ̀tɔwo sɔ va na Tɔhonɔ̀. 53Gbãdãgbãawo mu na ènu ɖe àmɔ̀nyɔ̀nu kèwo woa ŋutɔ wo hlàa mè. 54Mosè ku hũbonɔ Eleazàr xɔ̀ sìkaa lè gbãdãgbãawo be ŋùkɔ̀nɔ̀tɔwo si; wo sɔ ɛ̀ va Ègòdodo be gòxɔa mè, ne bèa nyi ŋùkuɖojinu na Izràɛlviwo lè Tɔhonɔ̀ be ŋùku mè.
Mina Bible © Bible Society of Togo, 2014.