Àmè Hɛ̃hlɛ̃ 30
30
1Mosè gblɔ̃ ɖoɖo kèwo keŋu Tɔhonɔ̀ sɔ do àsi na ɛ̀a, na Izràɛlviwo.
Èse so àjɔ̀gbè fìãfiãwo ŋuti
2Mosè gblɔ̃ na Izràɛlviwo be hɛ̃nu be ègawo be: “Ɖoɖo kèwo Tɔhonɔ̀ sɔ do àsi na mùawo ye nyi ekèawo: 3Ne ŋusù ɖe fìã àjɔ̀gbè ɖe na Tɔhonɔ̀, àlo kã àtãŋu ɖe na ye ɖokoea, mu ɖo la dà ègbè kè be ɖoa ji ò. E ɖo la wɔ̀ ènu kè be sɔ ye ŋutɔ be ènu gblɔ̃a tututu.
4Ne nyɔ̃nù ɖe, kè gbà nyi tùgbɛ̀jɛ, eye be gbà lè ètɔa gbɔa fìã àjɔ̀gbè ɖe na Tɔhonɔ̀, àlo kã àtãŋu ɖe, na ye ɖokoea, 5ne ètɔa sè be e fìã àjɔ̀gbè kèa, àlo, be e kã àtãŋu kèa, na ye ɖokoea, ne ètɔa mu gblɔ̃ ènyà ɖekpe na ɛ̀ ò a, yebe àjɔ̀gbèwo keŋu ɖo woabe àsìxɔ̀xɔ, eye àtãŋu ɖekpekpe kè be kãa ɖo yebe àsìxɔ̀xɔ. 6Vɔ̀a, ne ètɔa sè, eye be gbe è na ɛ̀, gbè ŋua gbè kea, eŋuã, àjɔ̀gbè àlo, àtãŋukãkãa mu gbà ɖo yebe àsìxɔ̀xɔ ò. Nyɔ̃nùa be àjɔ̀gbè ku àtãŋukãkãa mu gbà ɖo ŋusɛ̃ ò. Tɔhonɔ̀ la sɔ kè è, ɖoa, ètɔa mu dà àsi ɖo e ji ò.
7Eye, ne nyɔ̃nù ɖe fìã àjɔ̀gbè, àlo, kã àtãŋu ɖe. Eye e va ɖè èsrɔ̃ e yomè a, 8ne èsrɔ̃a sè è, vɔ̀a mu gblɔ̃ ènyà ɖekpe, gbè ŋua gbè ò a, eŋuã, yebe àjɔ̀gbè ku àtãŋuwo la gbà ɖo woabe àsìxɔ̀xɔ. 9Vɔ̀a, ne èsrɔ̃a sè, eye be gbe è na ɛ̀, gbè ŋua gbè kea, eŋuã, èsrɔ̃ gli àjɔ̀gbè kè bla nyɔ̃nùa, ku àtãŋukãkã kè to lè ènu mè na ɛ̀, ɖo ye ŋutɔ be èjro nua; Tɔhonɔ̀ la sɔ ɛ̀ kè è, ne mu wɔ̀ ɖo e ji ò a.
10Ne àhòsì, àlo nyɔ̃nù èsrɔ̃tɔ kè wo gbea ya be àjɔ̀gbè, àlo, àtãŋukãkã ɖekpekpe kè be kãa la ɖo yebe àsìxɔ̀xɔ.
11Vɔ̀a, ne nyɔ̃nùa fìã yebe àjɔ̀gbèa, àlo, kã àtãŋua, lè èsrɔ̃a be àxàda mèa, 12eye èsrɔ̃a sè è, vɔ̀a e bɔ̀nu eye mu gbe è na èsrɔ̃a ò a; eŋuã nyɔ̃nùa be àjɔ̀gbè àlo àtãŋu kè be kãa ɖo yebe àsìxɔ̀xɔ. 13Vɔ̀a, ne èsrɔ̃a gbe àjɔ̀gbè ku àtãŋu kè nyɔ̃nùa kãa, gbè kè gbè be sè èa, eŋuã, àjɔ̀gbè àlo àtãŋu ɖekpe kè nyɔ̃nùa kãa mu gbà ɖo ŋusɛ̃ ò. Tɔhonɔ̀ la sɔ kè è, ɖo èsrɔ̃a gbe wo. 14Àjɔ̀gbè, àlo, àtãŋu ɖekpe kè nyɔ̃nùa la kã be yèa blanua, èsrɔ̃a ye la na be la ɖo yebe àsìxɔ̀xɔ, àlo mu la ɖo è ò. 15Vɔ̀a, ne ŋusùa mu gblɔ̃ ènyà ɖekpe, kaka èŋù kè ò a, e dà àsi ɖo àjɔ̀gbè, àlo àtãŋu kè nyɔ̃nùa kãa ji. E dà àsi ɖo e ji, kaka kè mu gblɔ̃ ènyà ɖekpe na nyɔ̃nùa, gbè kè gbè be sè è ò a. 16Vɔ̀a, ne ŋusùa ɖo è, eye gbè kè gbè be sè èa, va yì, gbɔ̀xue be gli ìa, eŋuã, ŋusùa ye la nɔ̀ àgɔ̀ kè nyɔ̃nùa la jè a nu.
17Ekèawo ye nyi èse kèwo Tɔhonɔ̀ ŋlɔ̀ na Mosè, so ŋusù ku èsrɔ̃a ŋuti, àlo, so ètɔ ku yebe nyɔ̃nùvi ŋuti, wàlɛbɛ kè nyɔ̃nùvia mu kpɔ sĩ ò, eye be gbà lè ètɔa gbɔa.
Mina Bible © Bible Society of Togo, 2014.