Àmè Hɛ̃hlɛ̃ 29
29
1Wètri adrɛ̃gɔ̃ a be ŋùkèkè cucugbãa gbèa#29.1 Woa kpɔ Lev 23.24, mì la bɔ̀, la sɔ sɛ̃ mù. Mì mu la wɔ̀ èdɔ ɖekpe ò, ɖoa, jìjɔɛ zã gbè ku kafu zã gbè be la nyi na mì. 2Mì la wɔ̀ vɔsa kè be hɔ̃hɔ̃ɛ gbligbli la fa àkɔ na Tɔhonɔ̀a ku ènyì-suvi ɖèka, àgbò ɖèka, èpè ɖèka be àlɛ̃vi adrɛ̃, eye àfi ɖekpe mu la gble lè èlãawo dòmètɔ ɖe ŋuti ò. 3Mì la sɔ èwɔ kè wo blù ku àmì be ènu nana kè jè a kpe ɖo e ŋuti: ekèa ye nyi mamã èwogɔ̃a be tèpe ètɔ̃, na ènyì-su ɖèka, eye mamã èwogɔ̃a be tèpe èvè, na àgbò ɖèka. 4Wo la sɔ èwɔ kè wo blù ku àmìa be mamã èwogɔ̃a be tèpe ɖèka kpe è, na àlɛ̃vi ɖe sia ɖe. 5Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì la sɔ wɔ̀ èvuɛ̃ sɔsɔkè be èkɔ̀nua ɖo mìabe nuvuɛ̃wo ta. 6Mì la wɔ̀ vɔsa kèawo keŋu, kpe ɖo gbè sia gbè be ènumème vɔsaa ŋuti. Mì la gbà wɔ̀ wo kpe ɖo wètri yeye be ènumème vɔsa, èwɔ ku àmì be ènunana, kèwo mì wɔ̀nà ŋuti. Ekèa la nyi ènu ɖùɖu kè be hɔ̃hɔ̃ɛ gbligblia fana àkɔ na Tɔhonɔ̀.
7Wètri adrɛ̃gɔ̃ kèa be ŋùkèkè èwogɔ̃a, mì la bɔ̀, la sɔ sɛ̃ mù. Mì la blanu, eye mì mu la wɔ̀ èdɔ ɖekpe ò 8Mì la wɔ̀ ènumème vɔsa kè be hɔ̃hɔ̃ɛ gbligblia la fa àkɔ na Tɔhonɔ̀: ènyì-suvi ɖèka, àgbò ɖèka, èpè ɖèka be àlɛ̃vi adrɛ̃, èlã kèwo be àfi ɖekpe mu gble ò a. 9Mì la sɔ èwɔ kè wo blù ku àmì be ènu nana kè jè a kpe ɖo e ŋuti: ekèa ye nyi mamã èwogɔ̃a be tèpe ètɔ̃, na ènyì-suvia, eye mamã èwogɔ̃a be tèpe èvè, na àgbòa. 10Wo la sɔ èwɔ kè wo blù ku àmìa be mamã èwogɔ̃a be tèpe ɖèka kpe è, na àlɛ̃vi ɖe sia ɖe. 11Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì la sɔ wɔ̀ èvuɛ̃ sɔsɔkè be ŋùkèkè gãa be èkɔ̀nua ɖo mìabe nuvuɛ̃wo ta, ku ènumème vɔsa gbè sia gbè tɔ̀a kudo yebe ènu nana gbàkudo èsìkɔ̀ɖɛ kèwo la zɔ̃ ku ìa.
12Wètri adrɛ̃gɔ̃ a be ŋùkèkè woeàtɔ̃gɔ̃a gbèa, mì la bɔ̀, la sɔ sɛ̃#29.12 Wo gbà yɔna àzã kèa be Gòxɔwo be Àzã. Woa kpɔ Tot 23.16; 34.22; Lev 23.33-43; Gbì 16.13-15 mù. Mì mu la wɔ̀ èdɔ ɖekpe ò. Mì la ɖù àzã na Tɔhonɔ̀, ŋùkèkè adrɛ̃ sɔ̃ŋu. 13Mì la sɔ ènyì-suvi woètɔ̃, àgbò èvè, èpè ɖèka be àlɛ̃vi woènè, èlã kèwo be àfi ɖekpe mu gble ò a, sɔ wɔ̀ ènumème vɔsa kè be hɔ̃hɔ̃ɛ gbligblia, la fa àkɔ na Tɔhonɔ̀. 14Mì la sɔ èwɔ kè wo blù ku àmì be ènu nana kè jè a kpe ɖo e ŋuti: ekèa ye nyi mamã èwogɔ̃a be tèpe ètɔ̃, na ènyì-suvi woètɔ̃awo dòmètɔ ɖe sia ɖe, eye mamã èwogɔ̃a be tèpe èvè, na àgbò èvèawo dòmètɔ ɖe sia ɖe. 15Eye, mì la sɔ èwɔ kè wo blù ku àmì be mamã èwogɔ̃a be tèpe èvè na àlɛ̃viawo dòmètɔ ɖe sia ɖe. 16Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀ ku yebe ènu nana a, kudo èsìkɔ̀ɖɛ kèwo la zɔ̃ ku ìa ò.
17Ŋùkèkè èvègɔ̃a gbèa, mì la sɔ ènyì-suvi woèvè, àgbò èvè, èpè ɖèka be àlɛ̃vi woènè, èlã kèwo be àfi ɖekpe mu gble ò a, 18mì la sɔ ènu nana ku èsìkɔ̀ɖɛ kè jè na ènyì-suviawo, na àgbòawo ku àlɛ̃viawoa, nenè kè wo gbe nyi kpòa be ènu kè jè na vɔsaa, zɔ̃ ɖo èkɔ̀nua nu. 19Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀a ku yebe ènu nana, kudo èsìkɔ̀ɖɛ kèwo la zɔ̃ ku ìa ò. 20Ŋùkèkè ètɔ̃gɔ̃a gbèa, mì la sɔ ènyì-suvi woeɖèka, àgbò èvè, èpè ɖèka be àlɛ̃vi woènè, èlã kèwo àfi ɖe mu gble na ò a, 21mì la sɔ ènu nana ku èsìkɔ̀ɖɛ kè jè na ènyì-suviawo, na àgbòawo ku àlɛ̃viawoa, nenè kè wo gbe nyi kpòa be ènu kè jè na vɔsaa, zɔ̃ ɖo èkɔ̀nua nu. 22Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀a ku yebe ènu nana kudo èsìkɔ̀ɖe kèwo la zɔ̃ ku ìa ò. 23Ŋùkèkè ènègɔ̃a gbèa, mì la sɔ ènyì-suvi èwo, àgbò èvè, èpè ɖèka be àlɛ̃vi woènè, èlã kèwo be àfi ɖekpe mu gble ò a, 24mì la sɔ ènu nana ku èsìkɔ̀ɖɛ kè jè na ènyì-suviawo, na àgbòawo ku àlɛ̃viawoa, nenè kè wo gbe nyi kpòa be ènu kè jè na vɔsaa, zɔ̃ ɖo èkɔ̀nua nu. 25Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀a ku yebe ènu nana kudo èsìkɔ̀ɖɛ kèwo la zɔ̃ ku ìa ò. 26Ŋùkèkè àtɔ̃gɔ̃a gbèa, mì la sɔ ènyì-suvi àsiɖèkɛ, àgbò èvè, èpè ɖèka be àlɛ̃vi woènè, èlã kèwo àfi ɖekpe mu gble na ò a, 27mì la sɔ ènu nana ku èsìkɔ̀ɖɛ kè jè na ènyì-suviawo, na àgbòawo ku àlɛ̃viawoa, nenè kè wo gbe nyi kpòa be ènu kè jè na vɔsaa, zɔ̃ ɖo èkɔ̀nua nu. 28Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀a ku yebe ènu nana kudo èsìkɔ̀ɖɛ kèwo la zɔ̃ ku ìa ò. 29Ŋùkèkè àdɛ̃gɔ̃ a gbèa, mì la sɔ ènyì-suvi ènyi, àgbò èvè, èpè ɖèka be àlɛ̃vi woènè, èlã kèwo àfi ɖekpe mu gble na ò a, 30mì la sɔ ènu nana ku èsìkɔ̀ɖɛ kè jè na ènyì-suviawo, na àgbòawo ku àlɛ̃viawoa, nenè kè wo gbe nyi kpòa be ènu kè jè na vɔsaa, zɔ̃ ɖo èkɔ̀nua nu. 31Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀a ku yebe ènu nana kudo èsìkɔ̀ɖɛ kèwo la zɔ̃ ku ìa ò. 32Ŋùkèkè adrɛ̃gɔ̃ a gbèa, mì la sɔ ènyì-suvi adrɛ̃, àgbò èvè, èpè ɖèka be àlɛ̃vi woènè, èlã kèwo àfi ɖekpe mu gble na ò a, 33mì la sɔ ènu nana ku èsìkɔ̀ɖɛ kè jè na ènyì-suviawo, na àgbòawo ku àlɛ̃viawoa, nenè kè wo gbe nyi kpòa be ènu kè jè na vɔsaa, zɔ̃ ɖo èkɔ̀nu kè kã woa nu. 34Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀a ku yebe ènu nana kudo èsìkɔ̀ɖɛ kèwo la zɔ̃ ku ìa ò. 35Ŋùkèkè ènyigɔ̃a gbèa, mì la wu mìabe àzãɖùɖua nu: mì mu la wɔ̀ èdɔ ɖekpe ò. 36Mì la sɔ ènyì-suvi ɖèka, àgbò ɖèka, èpè ɖèka be àlɛ̃vi adrɛ̃, èlã kèwo be àfi ɖekpe mu gble ò a, sɔ wɔ̀ ènumème vɔsa kè be hɔ̃hɔ̃ɛ gbligblia, la fa àkɔ na Tɔhonɔ̀. 37Mì la sɔ ènu nana ku èsìkɔ̀ɖɛ kè jè na ènyì-suviawo, na àgbòawo ku àlɛ̃viawoa, nenè kè wo gbe nyi kpòa be ènu kè jè na vɔsaa, zɔ̃ ɖo èkɔ̀nu kè kã woa nu. 38Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì mu la ŋlɔ̀be ènumème vɔsa gbè sia gbè tɔ̀a ku yebe ènu nana kudo èsìkɔ̀ɖɛ kèwo la zɔ̃ ku ìa ò.
39Ènu kèwo mì la sɔ nɔ savɔ na Tɔhonɔ̀, ɖo hùenu kèwo wo ɖo na mìawo nua ye nyi ekèawo. Tovò na mìabe ènumème vɔ̀sawo, ènu ɖùɖu vɔ̀sawo, ènunùnu vɔ̀sawo, àkpedodo vɔ̀sawo ku àjɔ̀gbè be ènu nana, àlo, ènu kèwo mì la na, lè mìa ɖokoewo sia.”
Mina Bible © Bible Society of Togo, 2014.