Àmè Hɛ̃hlɛ̃ 23
23
1Bìleam gblɔ̃ na Bàlak be: “Tù vɔsakpe adrɛ̃ ɖo fikèa na mù, eye kplɔ̀ ènyì-su adrɛ̃ ku àgbò adrɛ̃ va na mù, lè fikèa.” 2Bàlak wɔ̀ ènu kè Bìleam gblɔ̃ na ɛ̀a, eye wo àmè èvèa, wo sɔ ènyì-su ɖèka ku àgbò ɖèka savɔ lè vɔsakpe ɖe sia ɖe ji. 3Bìleam gblɔ̃ na Bàlak be: “Nɔ̀ vɔsa mème wòa gbɔ, wàlɛbɛ kè nyè ya, mù la yì àzɔ̀ge. Ta mu nyɔ ò a, Tɔhonɔ̀ la va dogò mù; ènyà kè be la gblɔ̃ na mùa, lekè be nyi cã a, mù la gblɔ̃ ɛ̀ na wò.” Eye Bìleam le èmɔa, yì. 4Mawu va dogò Bìleam, eye Bìleam gblɔ̃ na Mawu be: “Mù na wo wɔ̀ vɔsakpe adrɛ̃awo, eye wo sɔ ènyì-su ɖèka ku àgbò ɖèka savɔ lè woa dòmètɔ ɖe sia ɖe ji.” 5E yomè a, Tɔhonɔ̀ sɔ ènyà do ènu mè na Bìleam, eye be gblɔ̃ na ɛ̀ be: “Trɔ yì Bàlak gbɔ; ènyà ŋua ye wò la gblɔ̃ na ɛ̀.”
6Bìleam trɔ yì Bàlak gbɔ, eye be kpɔ ɛ̀, nɔ̀tè ɖo yebe ènumème vɔsaa gbɔ ku Mòab be àmègãwo. 7Kè Bìleam kè ènua, e gblɔ̃ be:
Aràm ye Bàlak yɔ mù so;
èwèzɛ̃pe be ètowo ji ye Mòab be èfìɔa yɔ mù so be:
“Va sɛ̃kpɛ̃ na Yakɔb be jìjimèviwo na mù!
Va do ènu Izràɛlviwo ŋuti na mù!”
8Leke mù la wɔ̀, la sɛ̃kpɛ̃ na àmè kè Mawu mu sɛ̃kpɛ̃ na ò?
Leke mù la wɔ̀, la do ènu àmè kè ŋuti Tɔhonɔ̀ mu do ènu ò?
9Mù ɖè ŋùku le kpɔ ɛ̀, so àkpãwo tamè,
mù ɖè ŋùku le kpɔ ɛ̀, so ètokɔ̃ɛ̃wo ji,
eye, kpɔɖa, dùkɔ̃ kè ɖè ye ɖokoe ɖo vòa, ye mù kpɔ.
Mu bùnà ye ɖokoe ɖo dùkɔ̃ buwo dòmè ò.
10Àmè kɛ ye la teŋu hlɛ̃ Yakɔb be jìjimè kè sùgbɔ sìgbè èkɔkuiwo nènea ò?
Àmè kɛ ye la teŋu hlɛ̃ Izràɛlvi gbogboawo ò?
Nyè ŋutɔ, mù la ku sìgbè àmè jɔ̀jɔɛwo nène,
eye, àpe ènuwuwu ne nɔ̀ sìgbè dùkɔ̃ kèa tɔ̀ nène!”
Bìleam gbà gblɔ̃ ènyà ɖɛ ke
11Bàlak gblɔ̃ na Bìleam be: “Nukɛ wò wɔ̀ ku mù ŋua ò? Mù kplɔ̀ wò va be wòa sɛ̃kpɛ̃ na kɛ̃tɔ nyèwo, vɔ̀a, kpɔɖa, sìtu ɖèɖe kpò wò le kɔ̀ ɖo woa ji!” 12Bìleam ɖo e ŋuti be: “Ne mù le pò nupoa ɖe, ɖe ye nyè mu la gblɔ̃ ènu kè Tɔhonɔ̀ sɔ ɖo ènu mè na mùa pɛpɛpɛ ò a?”
13Bàlak gbà gblɔ̃ na Bìleam be: “Va mia yì tèpe bu, àfi kè wò la kpɔ dùkɔ̃ kèa lè nyuɛ̃ ɖe wua, ɖoa, e wɔ̀ na mù be woabe àkpa ɖe kpò wò le kpɔ. Wò mu le kpɔ woa kpata ò. Ne mi ɖo funua, wòa sɛ̃kpɛ̃ na wo na mù.” 14Bàlak kplɔ̀ Bìleam yì Pisgà be ètoa tamè, àfi kè àhùagbeji be ŋùkusãtɔwo nɔ̀nàa. E tù vɔsakpe adrɛ̃, eye be sɔ ènyì-su ɖèka ku àgbò ɖèka savɔ lè ɖe sia ɖe ji. 15Bìleam gblɔ̃ na Bàlak be: “Nɔ̀ fikèa, lè ènumème vɔsa wòa gbɔ, eye ènyè yaa, mù la yì funu, la yì nɔ̀tè kpɔ àŋɛ̀do ɖe.”
16Tɔhonɔ̀ va dogò Bìleam, eye be sɔ ènyà ɖo ènu na ɛ̀. E yomè a, Tɔhonɔ̀ gblɔ̃ na ɛ̀ be: “Trɔ yì Bàlak gbɔ, ne wòa gblɔ̃ ènyà ŋua na ɛ̀.” 17Bìleam trɔ gbɔ̀ va Bàlak gbɔ, eye be kpɔ ɛ̀, nɔ̀tè ɖo yebe ènumème vɔsaa gbɔ ku Mòab be àmègãwo. Bàlak biɔ Bìleam be: “Leke Tɔhonɔ̀ gblɔ̃ ò?” 18Eye Bìleam ɖo e ŋuti ku ènyà kèawo be:
“Bàlak, sitè, ne wòa ɖo èto!
Sipɔ̀r be èvi, ɖo èto!
19Mawu mu nyi àgbètɔ, ne bèa ɖà àjè ò,
eye mu nyi Adàm be jìjimèvi, ne bèa trɔ ènyà ò.
Mawu pònà nupo, ènu ɖe màwɔ̀a?
E gblɔ̃nà ènyà, kè mu wɔ̀nà ɖo e ji ò a?
20Kpɔɖa, sìtu be èdɔ mù xɔ̀ na dùkɔ̃ kèa,
ɖoa, ne Mawu tusìa, nyè mu la teŋu trɔ ɛ̀ ò.
21Tɔhonɔ̀ mu kpɔ jɔ̀gbèvuɛ̃ ɖekpe lè Yakɔb be jìjimèviwo ŋuti ò,
mu kpɔ àyà do na àmè ɖekpe lè Izràɛlviwo ŋuti ò.
Tɔhonɔ̀ kè nyi dùkɔ̃ kèa be Mawu a lè kudo è,
eye dùkɔ̃a le na èfìɔ be màmlã, Tɔhonɔ̀.
22Mawu kè ɖè è to so Ejiptè-nyigbã jia
be ŋusɛ̃ lè na ɛ̀, sìgbè ètò be àzò be ŋusɛ̃ nène.
23Ènu mè jijikpɔ ɖekpe mu lè Yakɔb be jìjimèviwo dòmè ò,
eye àfã kãkã mu lè Izràɛlviwo dòmè ò.
Yakɔb be jìjimèviwo sènà,
eye Izràɛlviwo nyana, ènu kèwo Mawu wɔ̀nà na woa ɖo woabe hùenu.
24Kpɔɖa, dùkɔ̃a sitè, sìgbè jãŋùta-nɔ nène,
e sitè, sìgbè jãŋùta-su nène.
Mu la cɔ̃ àkɔ ànyi, ne mu vũvũ ènu kè be lea ò,
ne mu nù èlã kèwo ci e siawo be èhũ ò.”
25Eye Bàlak gblɔ̃ na Bìleam be: “Ne wò mu la sɛ̃kpɛ̃ na ɛ̀ ò a, mù gbà jo tusì na ɛ̀ ò.” 26Bìleam ɖo e ŋuti na Bàlak be: “Nyè mu gblɔ̃ na wò sãa be: 'Ènu kè Tɔhonɔ̀ gblɔ̃ na mùa ye mù la wɔ̀ ò a?'”
Bìleam gbà gblɔ̃ ènyà ɖɛ zè ètɔ̃gɔ̃a
27E yomè a, Bàlak gblɔ̃ na Bìleam be: “Va, ne ma kplɔ̀ wò yì àfi bu. Ta mu nyɔ ò a, Mawu la lɔ̃ be wòa sɛ̃kpɛ̃ na dùkɔ̃ kèa na mù, so funua.” 28Eye Bàlak kplɔ̀ Bìleam yì Peɔ̀r be èto kè kpã ŋùkɔ̀ zògbè a be tamè. 29Bìleam gblɔ̃ na Bàlak be: “Tù vɔsakpe adrɛ̃ ɖo fikèa na mù, eye wòa jrà ènyì-su adrɛ̃ ku àgbò adrɛ̃ ɖo fikèa tutu, ɖɛ na mù.” 30Bàlak wɔ̀ ènu kè Bìleam gblɔ̃ na ɛ̀a. E yomè a, e sɔ ènyì-su ɖèka ku àgbò ɖèka wɔ̀ vɔsa lè vɔsakpe ɖe sia ɖe ji.
Mina Bible © Bible Society of Togo, 2014.