Àmè Hɛ̃hlɛ̃ 24
24
1Kè Bìleam kpɔ be e jè ŋùmè na Tɔhonɔ̀ be yèa tusì na Izràɛlviwoa, mu gbà yì ji Tɔhonɔ̀ be ègbè do àsi, sìgbè lekè be wɔ̀ sãa nène ò, vɔ̀a, e trɔ, jè ŋùkɔ̀ zògbè a ji. 2E kɔ ŋùmè yì ji, kpɔ Izràɛlviwo do àsàɖa, ɖo woabe hɛ̃nu vòvòvòwo nu. Eye Tɔhonɔ̀ be gbɔ̃gbɔ̃ ɖì va Bìleam ji, 3eye be kè ènu gblɔ̃ ènyà kèawo be:
“Bìleam kè nyi Beɔ̀r be èvia be ènyà ye nyi ekèa,
ènyà kè so àmè kè be ŋùku hũa bè ènu mèa,
4ènyà kè so àmè kè sènà Mawu be ègbèa gbɔa,
ènyà kè so àmè kè kpɔna ènu kè Ŋusɛ̃kpatatɔa sɔ fiɔna ɛ̀a gbɔ,
wàlɛbɛ kè be le sɛ̃ Mawu, eye Mawu be Gbɔ̃gbɔ̃ jè e ji, yebe ŋùkuviwo hũ:
5Yakɔb be jìjimèviwo, leke mìabe gòxɔwo nya kpɔkpɔ lekea ò!
Mìabe nɔ̀pewo nyɔ loo ò!
6Wo kãkã ɖɛ, sìgbè ètɔ̀ sɛ̃sɛ̃ nène,
sìgbè àbɔ kèwo ye lè ètɔ̀ toa nène,
sìgbè àɖi-àɖi#24.6 Àɖi-àɖi: wo yɔna ɛ̀ lè Frãsegbe mè be Àlòɛs kèwo Tɔhonɔ̀ do a nène,
sìgbè sedàti kèwo wo do ɖo ètɔ̀ toa nène.
7Èsì ɖɔ tɔ̀kawo kɔ̃ŋùgbe,
èji jànà nyuɛ̃ ɖe ɖo woabe àbɔ mè be ènukuwo ji,
woabe èfìɔa ɖù èfìɔ Agag#24.7 Woa kpɔ 1Sam 15. ji,
eye woabe èfìɔa be èfìɔɖùɖu le yì ŋùkɔ̀.
8Mawu ɖè wo to so Ejiptè-nyigbã ji,
Tɔhonɔ̀ be ŋusɛ̃ lè na wo sìgbè ètò be àzò be ŋusɛ̃ nène.
Wo vũvũna dùkɔ̃ kèwo nyi woabe kɛ̃tɔawo,
wo ŋɛ̃na èpu na wo,
eye woabe àŋùtiwo trɔ̃na wo.
9Wo cɔ̃na àkɔ ànyi, eye wo mlɔ̃na ànyi sìgbè jãŋùta nène,
sìgbè èlã wɔ̀ àdã nène; àmè kɛ ye la teŋu na woa sitè ò?
Sìtu na àmè kè la tusì na mìa,
eye kpɛ̃sɛ̃ na àmè kè la sɛ̃kpɛ̃ na wòa!”
Bìleam be ènyà kpɔ̀tɛawo
10Bàlak do àdɔ̀mèze ɖo Bìleam ŋuti; e pò àsikpe eye be gblɔ̃ na ɛ̀ be: “Mù yɔ wò be wòa va sɛ̃kpɛ̃ na kɛ̃tɔ nyèwo, gãkea, kpɔɖa, zè ètɔ̃gɔ̃a ye nyi ekèa, kè wò le tusì na woa! 11Ekè e nyi be nène wò wɔ̀a, jo yì àpo èdù mè! Mù gblɔ̃ sãa be mù la do bùbu ŋuti wò. Vɔ̀a, kpɔɖa, Tɔhonɔ̀ tè wò bùbu kèawo!”
12Bìleam ɖo e ŋuti na ɛ̀ be: “Nyè mu gblɔ̃ na àpo àmèdɔ̃dɔ̃awo be: 13'Ne Bàlak sɔ klòsalò ku sìka kè kpata la ɖɔ yebe àxuea na mù ŋutɔ cã a, nyè mu la teŋu dà èse kè Tɔhonɔ̀ do na mùa ji, ne nyè ŋutɔ ma sɔ hɛ̃ jɔ̀gbènyuɛ̃, àlo jɔ̀gbèvuɛ̃ va ò a?' Ènu kè Tɔhonɔ̀ gblɔ̃ na mùa kpò ye mù la gblɔ̃!” 14E nyɔ! Fifìa, mù trɔ le yì miabe èdùmètɔwo gbɔ. Vɔ̀a, va, ne ma gblɔ̃ ènu kè dùkɔ̃ kèa la wɔ̀ na àpo dùkɔ̃a, lè hùenu kèwo gbãnàawo mè na wò.” 15Eye Bìleam kè ènu gblɔ̃ ènyà kèawo be:
Bìleam kè nyi Beɔ̀r be èvia be ènyà ye nyi ekèa,
ènyà kè so àmè kè be ŋùku hũa bè ènu mè,
16ènyà kè so àmè kè sènà Mawu be ègbèa gbɔ,
ènyà kè so àmè kè xɔ̀ ènunya so Ŋusɛ̃kpatatɔa gbɔ,
ènyà kè so àmè kè kpɔna ènu kè Ŋusɛ̃kpatatɔa sɔ le fiɔ ɛ̀a gbɔ,
wàlɛbɛ kè be le sɛ̃ Mawu, eye Mawu be gbɔ̃gbɔ̃a jè e ji, yebe ŋùkuviwo hũ:
17“Mù le kpɔ ènu kè la jɔ̀ a, vɔ̀, mu nyi fifì ye be la va ò;
e le ze na mù, vɔ̀a, mu gogo mù ò:
Wètrivi ɖe le so Yakɔb be jìjimèviwo dòmè, le yì èji,
èfìɔtikplɔ ɖe le to so Izràɛlviwo dòmè,
wètrivi kèa le gbã ètomè na Mòab be dùkɔ̃a,
eye be le crɔ̃ Sɛt be jìjimèviwo be ŋùkɔ̀nɔ̀tɔwo kpata.
18Wo la ɖo àlɔ̀ Edɔ̀m be ànyigbãa ji;
wo la ɖo àlɔ̀ Sèir kè nyi yebe èkɛ̃tɔwo be ànyigbãa cã ji.
Izràɛlviwo ye le ɖè woabe ŋusɛ̃a fiɔ nène.
19Àmè ɖe la to so Yakɔb be jìjimèviwo dòmè, la ɖùji;
e la crɔ̃ àmè kèwo kpɔ̀tɔ̀ lè èdùawo mèa.”
Izràɛlviwo be kɛ̃tɔwo be cɔ̃crɔ̃
20Bìleam kpɔ Àmàlɛkviwo cã, eye be gblɔ̃ so woa ŋuti be:
Àmàlɛktɔwo ye lè ŋùkɔ̀ na dùkɔ̃wo kpata!
Gãkea, vɔ̀vɔnua, wo la crɔ̃.”
21E yomè a, e kpɔ Kaɛ̃ be jìjimèviwo, eye be gblɔ̃ so woa ŋuti be:
“Nɔ̀pe woa ɖo ŋusɛ̃
eye wò ɖo àtɔ̃ ɖo àkpã ji.
22Gãkea, èzò ye la fiɔ̃ Kaɛ̃ be ànyigbãa,
eye vɔ̀vɔnua, Àsurtɔwo la kplɔ̀ mì àhùale.”
23Lè ènuwuwua, Bìleam kè ènu gblɔ̃ be:
“Hèlu lò! Àmè kɛ ye la teŋu ci àgbè ne Mawu wɔ̀ ènu kèawo ò?
24Mɛlɛ̀wo la so Kitìm-nyigbã ji va,
Ànyigbã ŋua jitɔwo la crɔ̃ Àsur be èdùmètɔwo, eye Ebɛ̀r be jìjimèviwo la trɔ zũ woabe kluviwo ŋutɔ cã;
woawo cã la crɔ̃.”
25Ekèa yomè a, Bìleam trɔ yì àxue, eye Bàlak cã sɔ yebe èmɔ jo.
Mina Bible © Bible Society of Togo, 2014.