Àmè Hɛ̃hlɛ̃ 22
22
Izràɛlviwo va ɖo Mòab be ànyigbã ji
22–36
Èfìɔ Bàlak yɔ Bìleam
1Kè Izràɛlviwo hɔ̃ joa, wo yì sò àsàɖa ɖo Mòab be ànyigbã gbàjàwo ji, lè Yɔrdàn be ètɔ̀a godo, lè Yerikò gbɔ lɔ̀ge. 2Bàlak kè nyi Sipɔ̀r be èvia kpɔ ènu kèwo keŋu Izràɛlviwo wɔ̀ ku Àmorìtɔwo a. 3Mòabtɔwo vɔ̃ lekè dùkɔ̃ kèa sùgbɔ ɖoa ŋutɔ. Kè wo kpɔ Izràɛlviwoa, àdìka sò wo. 4Mòabtɔwo gblɔ̃ na Midìan be àmèsĩsĩwo be: “Àmè gbogbo kèawo la ɖù ènuwo keŋu trɔ do mi, sìgbè lekè ènyìwo ɖùnà ègbe lè ègbe mèa nène.” Lè hùe ŋua nua, Bàlak, Sipɔ̀r be èvia ye le ɖùfìɔ lè Mòab-nyigbã ji. 5Èfìɔa dɔ̃ àmè ɖoɖa Bìleam kè nyi Beɔ̀r be èvia, lè ètɔ̀a to, lè Petɔ̀r, woa de, be wo ne gblɔ̃ na ɛ̀ be: “Dùkɔ̃ ɖe to so Ejiptè, eye wo kãkã ɖo ànyigbãa kpata ji. Woawo ye nyi ekèa, xɔ̀ tèpe kpã ŋùkɔ̀ mù, lè fikèa yà! 6Tɔ̀ wò jɔ̀, va jro, ne wòa sɛ̃kpɛ̃ na dùkɔ̃ kèa, ɖoa, wo sɛ̃ŋu wu mù. Èta mu nyɔ ò a, mù la teŋu kpe woa ji, la ɖù woa ji, la nyà wo to lè èdùa mè. Ɖoa, mù nya be sìtu nɔ̀nà àmè kè wò tusì na a ji, eye kpɛ̃sɛ̃ nɔ̀nà àmè kè wò sɛ̃kpɛ̃ na a ji.” 7Mòab be àmèsĩsĩwo ku Midìan be àmèsĩsĩwo jè èmɔ, eye wo hɛ̃ ènu kèwo wo la sɔ tufɛ̃ na àfãkãtɔa ɖo àsi. Kè wo ɖo Bìleam gbɔa, wo ɖè Bàlak be ègbè do àsia na ɛ̀. 8Bìleam gblɔ̃ na wo be: “Mì ci fikèa dɔ̃. Ɖoŋuti kè mù la na mìa la nyi ekè Tɔhonɔ̀ la sɔ do àsi na mùa.” Eye Mòab be àmègãwo ci Bìleam gbɔ. 9Tɔhonɔ̀ va Bìleam gbɔ, eye be gblɔ̃ na ɛ̀ be: “Àmè kɛwo ye nyi àmè kèawo lè gbɔ wò ò?” 10Bìleam ɖo e ŋuti na Mawu be: “Bàlak, Sipɔ̀r be èvi kè nyi Mòab be èfìɔa ye dɔ̃ àmè ɖoɖa mù be: 11Kpɔɖa, dùkɔ̃ kè to so Ejiptè-nyigbã jia, kãkã ɖo ànyigbã ji keŋu. Va, ne wòa sɛ̃kpɛ̃ na wo na mù. Ta mu nyɔ ò a, mù la teŋu kpe àhùa ku wo, la nyà wo jo.” 12Mawu gblɔ̃ na Bìleam be: “Wò mu la kplɔ̀ wo do ò, eye wò mu la sɛ̃kpɛ̃ na dùkɔ̃ kèa ò, ɖoa, sìtu be dùkɔ̃ ye be nyi.”
13Ekè èŋù kèa, Bìleam fɔ̃, eye be gblɔ̃ na Bàlak be àmègãawo be: “Mì trɔ jo yì àxue, ɖoa, Tɔhonɔ̀ gbe be yè mu la ɖè àsi lè ŋuti nyè, ne ma kplɔ̀ mì do ò.”
14Mòab be àmègãawo sitè, eye wo trɔ gbɔ̀ va Bàlak gbɔ. Wo va gblɔ̃ na Bàlak be: “Bìleam mu jro be yèa va ku mi ò.” 15Vɔ̀a, Bàlak gbà dɔ̃ àmègã bu kèwo sùgbɔ, eye wo ɖìnyi wu àmègã cucugbã tɔ̀awo ɖoɖa. 16Kè wo ɖo Bìleam gbɔa, wo gblɔ̃ na ɛ̀ be: “Bàlak, Sipɔ̀r be èvia be mia gblɔ̃ na wò be: Tɔ̀ wò jɔ̀, mù gbà gbe gbɔ nyè vava ò! 17Ɖoa, mù la do bùbu ŋuti wò ŋutɔ, eye mù la wɔ̀ ènu ɖekpekpe kè wò la gblɔ̃ na mùa. Va jro, ne wòa sɛ̃kpɛ̃ na dùkɔ̃ kèa na mù.” 18Bìleam ɖo e ŋuti na Bàlak be àmèdɔ̃dɔ̃awo be: “Ne Bàlak la na mù klòsalò ku sìka ke la ɖɔ yebe àxuea kpata ŋutɔ cã a, nyè mu la teŋu wɔ̀ ènu bu, kè la hùe, àlo, la lòlò, ne ènu kèa la sitè ɖo Mawu nyè be ègbè ɖèɖe ŋuti ò. 19Mìawo cã, mì ci fikèa, èzã kèa mè, ne ma nya ènu kè Tɔhonɔ̀ gbà ɖo, la gblɔ̃ na mùa.” 20Mawu va Bìleam gbɔ, èzã mè, eye be gblɔ̃ na ɛ̀ be: “Ne e nyi be ŋusù kèawo va, la yɔ wò ye à, kplɔ̀ wo do yì. Vɔ̀a, ènu kè mù gblɔ̃ na wòa kpò ye wò la wɔ̀.”
Bìleam be èsɔ-àkɛtɛ-nɔa
21Ekè èŋù kèa, Bìleam fɔ̃, eye be bla àkpà na yebe èsɔ-àkɛtɛa. E jè èmɔ ku Mòab be àmègãawo. 22Kè be jè èmɔa, Mawu do àdɔ̀mèze, eye Tɔhonɔ̀ be àtikplɔtɔa va nɔ̀tè ɖo èmɔa ji, ne bèa xe èmɔ na Bìleam, wàlɛbɛ kè Bìleam lè yebe èsɔ-àkɛtɛ-nɔa ji, le zɔ̃ èmɔa ku yebe sumɔ̃vi èvèa. 23Èsɔàkɛtɛ-nɔa kpɔ Tɔhonɔ̀ be àtikplɔtɔ kè tɔtè ɖo èmɔa ji, le èwui ɖo àsia; èsɔ-àkɛtɛ-nɔa jo lè èmɔa ji, jè ègbe mè. Bìleam do èba na èsɔ-àkɛtɛ-nɔa, ne bèa trɔ va èmɔa ji. 24Tɔhonɔ̀ be àtikplɔtɔa va tɔtè ɖo vɛ̃-bɔwo be èkpadòmè be èmɔ̃ ɖe kè to èglì èvè dòmèa ji. 25Kè èsɔ-àkɛtɛ-nɔa kpɔ Tɔhonɔ̀ be àtikplɔtɔa, e zɛ̃ ɖo èglì ŋuti; ekèa miɔ̃ Bìleam be àfɔ̀ ɖo èglìa ŋuti, eye Bìleam gbà tɔ ɛ̀ pòpo. 26Tɔhonɔ̀ be àtikplɔtɔa gbà to woa ŋuti, yì nɔ̀ èmɔa ji, lè àfi kè èmɔa jã lè, eye, tèpe mu lè ne woa zɛ̃ yì ɖùsi, àlo èmìɔ̃ mè ò a. 27Kè èsɔ-àkɛtɛ-nɔa gbà kpɔ Tɔhonɔ̀ be àtikplɔtɔa, e cɔ̃ àkɔ ànyi, lè Bìleam gɔ̃mè. Bìleam do àdɔ̀mèze, eye be gbà ɖè èba ɖo èsɔ-àkɛtɛ-nɔa ji.
28Tɔhonɔ̀ na èsɔ-àkɛtɛa pò nupo, eye be biɔ Bìleam be: “Nukɛ ye mù wɔ̀ na wò, eye wò le pò mù, kaka zè ètɔ̃ ò?” 29Bìleam ɖo e ŋuti na ɛ̀ be: “Kè wò le wɔ̀ ènu kè jro wòa ŋuti ye! Ne ɖe ye èwui lè àsi nyèa, mù la kè wù wò, zè ɖèka!” 30Èsɔàkɛtɛ-nɔa gbà gblɔ̃ na Bìleam be: “Mu nyi àpo èsɔ-àkɛtɛ-nɔ kè ji wò liana, so kaka gbè ɖe gbè kea ye mù nyia? Mù wɔ̀nà lekea ku wò, kòkòkòa?” Bìleam ɖo e ŋuti be: “Ào.”
31Eye Tɔhonɔ̀ hũ ŋùkuvi na Bìleam, eye be kpɔ Tɔhonɔ̀ be àtikplɔtɔ kè nɔ̀tè ɖo èmɔa ji, le èwui ɖo àsia. Bìleam bɔ̀bɔ̀, cɔ̃ ŋùmè ànyi. 32Ekèa yomè a, Tɔhonɔ̀ be àtikplɔtɔa gblɔ̃ na ɛ̀ be: “Nukɛ ŋuti wò pò èsɔ-àkɛtɛ-nɔ wòa, zè ètɔ̃, lekea ɖo ò? Ènyè ye va xe èmɔ na wò, ɖoa, wò mu ɖo la wɔ̀ èmɔzɔ̃zɔ̃ kèa ò. 33Èsɔàkɛtɛ-nɔa ya kpɔ mù, eye be zɛ̃ na mù, zè ètɔ̃. Ne mu kè zɛ̃ na mù ò a, mù la kè wù wò, zè ɖèka ye. Eye mù la gble e ya ɖo àgbè.” 34Bìleam gblɔ̃ na Tɔhonɔ̀ be àtikplɔtɔa be: “Mù wɔ̀ nuvuɛ̃, ɖoa, nyè mu kpɔ ɛ̀ jèsi be èwò ye nɔ̀tè ɖo funu, lè ŋùkɔ̀ na mù, lè èmɔa ji ò. Eye, ne èmɔzɔ̃zɔ̃a mu jè ŋùmè na wò ò a, eŋuã, ɖe kpò mù la trɔ yì àxue.” 35Vɔ̀a, Tɔhonɔ̀ be àtikplɔtɔa gblɔ̃ na Bìleam be: “Kplɔ̀ ŋusù kèawo do, gãkea, ènyà kè mù la gblɔ̃ na wòa kpò wò la gblɔ̃.” E yomè a, Bìleam le èmɔa yì ku Bàlak be àgbònùglaawo.
36Kè Bàlak sè be Bìleam gbãnàa, Bàlak to va, la dogò è, lè Ir-Mòab, lè àfi kè Ornɔ̀n be ètɔ̀a nyi lipò na yebe èdùa lèa. 37Bàlak gblɔ̃ na Bìleam be: “Nyè mu dɔ̃ àmè ɖoɖa, be wo ne yɔ wò va veve ɖe ò a? Nukɛ ŋuti wò mu va ò? Nyè mu sù, la teŋu do bùbu ŋuti wò ku yɛyìa?” 38Bìleam ɖo e ŋuti na Bàlak be: “Kpɔɖa fifìa, mù va gbɔ wò vɔ̀. Gãkea, ɖe ye mù la teŋu gblɔ̃ ènyà bu, tovò na ènyà kè Tɔhonɔ̀ la sɔ do ènumè na mùa?” 39Bìleam jè èmɔ ku Bàlak, eye wo va ɖo Kiryàt-Husɔ̀t. 40Bàlak sɔ ènyì ku àlɛ̃wo savɔ, eye be sɔ èɖewo ɖoɖa Bìleam ku àmègã kèwo ye lè e ŋutiawo.
Bìleam tusì na Izràɛl dùkɔ̃a
41Kè èŋù kèa, Bàlak kplɔ̀ Bìleam yì Bamɔ̀t-Bal be ètoa ji, eye, kè wo ɖo funua, wo le kpɔ Izràɛl-dùkɔ̃a be àkpa ɖe.
Mina Bible © Bible Society of Togo, 2014.