Àmè Hɛ̃hlɛ̃ 16
16
Korà be jìjimèviwo jè àgla
1Levìwo dòmètɔ ɖèka kè tɔ̀ Koràa nyi Yisehar kè Kehàt jìa be èvi. E kplɔ̀ Datàn ku Abiràm kèwo nyi Eliav be èviwoa ku Onè kè nyi Pelɛt kè Rubɛ̀n jìa be èvi. 2Wo kplɔ̀ Izràɛlvi àlɔ̀ èvè èkà ci èwo, sɔ sitè ɖo Mosè ŋuti. Wo nyi ŋùkɔ̀nɔ̀tɔ kèwo wo cã lè Izràɛlviwo be àmèha a dòmè, cãmì kèwo ɖènà àɖàŋù lè bɔ̀bɔwo mèawo. 3Wo jè àgla ɖo Mosè ku Arɔ̀n ŋuti eye wo gblɔ̃ be: “Mìa tɔ̀ va glo! Àmèhaa mètɔwo kpata lè kɔ̀kɔ̀ɛ, eye Tɔhonɔ̀ lè woa dòmè! Nukɛ ŋuti mìawo ya, mì le kɔkɔ mìa ɖokoewo yì èji, sɔ le ɖo Tɔhonɔ̀ be àmèha a nu ɖo ò?”
4Ekè Mosè sè ènyà kèawoa, e sɔ ŋùmè cɔ̃ ànyi. 5Ekèa yomè a, Mosè gblɔ̃ na Korà ku àmè kèwo lè e yomè awo be: “Èsɔ̀ ŋùdekɛ̃nyɛ mèa, Tɔhonɔ̀ la ɖè àmè kè nyi ye tɔ̀a fiɔ; e la ɖè àmè kè be ɖè èmɔ na be ne nɔ gogo yèa fiɔ. Àmè kè be cã a, e la ɖè èmɔ na ɛ̀ be ne nɔ gogo yè. 6Ènu kè mì la wɔ̀a ye nyi ekèa: Mì la sɔ lifi fiɔ̃nu, mìawo, Korà ku àmè kèwo keŋu lè e yomè awo, 7èsɔ̀a, mì la do èzò ɖo woa mè; mì la kɔ̀ lifi ɖo e ji, lè Tɔhonɔ̀ be ŋùmè. Eye, àmè kè Tɔhonɔ̀ la cã a, àmè ŋua ye lè kɔ̀kɔ̀ɛ. Mìa Levì be jìjimèviwo tɔ̀a va glo!”
8Mosè gbà gblɔ̃ na Korà be: “Mìa Levì be jìjimèviwo, mì ɖo èto mù! 9Eŋuã, mu kpɔ sù na mì be Izràɛl be Mawu a ɖè mì ɖovò, lè Izràɛl be àmèha a dòmè, ɖè èmɔ na mì be mìa nɔ gogo yè, ne mìa nɔ wɔ̀ èdɔ lè Tɔhonɔ̀ be Nɔ̀pe Kɔ̀kɔ̀ɛ mè, eye mìa gbà nɔ nɔ̀ àmèha a tèpe, wàlɛbɛ kè mì la nɔ sumɔ ɛ̀, ɖo àmè sia àmè nu ò a? 10E ɖè èmɔ be mìa nɔ gogo yè, èwò ku nɔ̀vi wò Levì be jìjimèviwo, eye, fifìa, hũbonɔ be èdɔ mì le ji la xɔ̀a? 11Ekèa ŋuti ye èwò ku àpo yomè jètɔwo, mì le jè àgla ɖo Tɔhonɔ̀ ŋuti ɖoa? Eye, ekɛ ye le nyi Arɔ̀n ya tɔ̀ lè e mè, ne mìa nɔ pò nupo ɖo e ŋuti ò?
12Ekèa yomè a, Mosè dɔ̃ àmè be wo ne yì yɔ Abiràm ku Eliav va, vɔ̀a, wo ɖo e ŋuti be: “Mi mu la yì#16.12 Xoma buwo ɖè egɔ̃mè be wo ɖo e ŋuti be: “Mi mu la yì Kanàn-nyigbã ji ò!” ò! 13Mu sù na wò be wò kplɔ̀ mi jo lè èdù kè mè ànyisi ku nyìnɔsi bɔ lèa, va, ne mia ku lè zògbè a ji ò, fifìa wò gbà ji la nɔ̀ ɖè ègbè ɖo mìa jia? 14Wò mu kplɔ̀ mi yì ànyigbã kè ji nyìnɔsi ku ànyisi bɔ lèa ò. Wò mu sɔ àgblè, àlo vɛ̃-gble wɔ̀ ècrɔ̃nu na mi ò. Eŋuã, wò susu be ŋùkuvi gbãgbãnɔ̀wo ye ŋusù kèawo nyia? Mi mu le yì àfi ɖekpe ò!” 15Mosè do àdɔ̀mèze gã ɖe, eye be gblɔ̃ na Tɔhonɔ̀ be: “Tɔhonɔ̀, tɔ̀ wò jɔ̀, mù gbà xɔ̀ woabe ènu nana ò. Nyè mu xɔ̀ èsɔ-àkɛtɛ ɖèka tètè cã lè woa si ò, nyè mu jè àgɔ̀ do woa dòmètɔ ɖe ò.”
Mawu dɔ̃ èto na Korà ku yebe àmèawo
16Mosè gblɔ̃ na Korà be: “Èwò ku àpo yomè jètɔwo kpata, mì la va Tɔhonɔ̀ be ŋùku mè èsɔ̀; èwò, woawo ku Arɔ̀n, èsɔ̀, lè Tɔhonɔ̀ be ŋùmè. 17Ne mì gbãnà a, àmè sia àmè ne hɛ̃ yebe lififiɔ̃nu ɖo àsi, mìa kɔ̀ lifi ɖo e mè, va. Mìa dòmètɔ ɖe sia ɖe la sɔ ɛ̀ ɖo Tɔhonɔ̀ be ŋùku mè. E kpata la nɔ̀ lififiɔ̃nu àlɔ̀ èvè èkà ci èwo. Wò cã, wò ku Arɔ̀n, mì la sɔ mìa tɔ̀awo va.” 18Eye àmè sia àmè sɔ yebe lififiɔ̃nua, do èzò ɖo e mè, kɔ̀ lifi ɖo èzòa mè, eye wo yì nɔ̀ Ègòdodo be gòxɔa mɔnu ku Mosè kudo Arɔ̀n. 19Korà cã bɔ̀ àmè kèwo ye lè e yomè awo ɖo woa gbɔ, lè Ègòdodo be gòxɔa mɔnu. Wàlɛbɛ ŋuaa, Tɔhonɔ̀ be gogoa ze do àmèha bliboa, 20eye Tɔhonɔ̀ gblɔ̃ na Mosè be: 21“Mì dɔ̃ jo lè èha kèa ŋuti, ne ma crɔ̃ wo, zè ɖèka!” 22Mosè ku Arɔ̀n sɔ ŋùmè cɔ̃ ànyi ku àpa be: “Aò Mawu, èwò kè nyi àgbè gbɔ̃gbɔ̃ kè lè ŋutilãwo kpata mèa be Mawu a! Àmè ɖèka pɛ ye wɔ̀ ènuvuɛ̃a, wò jo le do àdɔ̀mèze do àmèha bliboa?”
23Tɔhonɔ̀ gblɔ̃ na Mosè be: 24“Gblɔ̃ na àmèha a be ne dɔ̃ jo yì ŋùgbe, lè Korà, Datàn ku Abiràm be nɔ̀pewo ŋuti.” 25Mosè sitè tùtà Datàn, ku Abiràm gbɔ, eye Izràɛl be àmè sĩsĩwo kplɔ̀ ɛ̀ do. 26Mosè gblɔ̃ na àmèha a be: “Mì dɔ̃ jo lè àmè bàɖà kèawo be gòxɔwo gbɔ; mì mu gbà tɔ àsi ènu ɖekpe kè nyi woa tɔ̀a ŋuti ò, ne mu nyi nène ò a, mìawo cã, mì la va ku ɖo woabe ènuvuɛ̃awo kpata ta!” 27Àmèhaa tètè jo lè Korà, Datàn ku Abiràm be nɔ̀pewo gbɔ. Datàn ku Abiràm to va nɔ̀ woabe gòxɔwo mɔnu ku woa srɔ̃wo, woabe ŋusùviwo ku woabe tɔgbeyɔviwo. 28Mosè gblɔ̃ be: “Mìa kpɔ ènu kèawo, sɔ jèsi ì be Tɔhonɔ̀ ye ɖo wɔ̀na kèawo keŋu na mù; mu nyi nyè ŋutɔ ye ɖo wo le wɔ̀ ò. 29Ne àmè kèawo ku kpò, sìgbè leke àmè sia àmè kunaa nène, ne wo xɔ̀ ètodɔ̃, sìgbè lekè àmè sia àmè xɔ̀nà ètodɔ̃a nènea, eŋuã, mu nyi Tɔhonɔ̀ ye dɔ̃ mù ò. 30Vɔ̀a, ne Tɔhonɔ̀ wɔ̀ ènu màjɔ̀ kpɔ gbèɖe ɖe, ne ànyigbã la kè ènu, la sɔ wo mì ku ènu kèwo keŋu nyi woa tɔ̀a, ne wo yì èkuwo de àgbèagbèa, eŋuã, mì la nya be àmè kèawo dovlo Tɔhonɔ̀ nyàwo.” 31Wàlɛbɛ kè Mosè le wu ènyà kèwo keŋu be le gblɔ̃a nua, ànyigbãa fɛ̃ lè àfɔ̀ gɔ̃mè na wo. 32Ànyigbã kè ènu mè, mì wo ku woabe xòmètɔwo, kpe ɖo Korà be àmèwo kudo woabe ènu nɔ̀amèsiwo ŋuti. 33Woawo ku woabe ènu nɔ̀amèsiwo keŋu ɖì yì èkuwo de àgbèagbè, eye ànyigbãa cɔ̃ woa ji. Nène a ye wo bu lè àmèha a dòmèa yeŋu. 34Ekè Izràɛlvi kèwo keŋu trɔ do woawo sè woabe àpadodowoa, wo si, le gblɔ̃ be: “Mi si, ne mu nyi nène ò a, ànyigbãa la mì miawo cã.” 35Eye èzò ɖe so Tɔhonɔ̀ gbɔ va, fiɔ̃ àmè àlɔ̀ èvè èkà ci èwo kèwo le fiɔ̃ lifiawo.
Mina Bible © Bible Society of Togo, 2014.