Àmè Hɛ̃hlɛ̃ 15
15
Ènu nana kèwo kplɔ̀nà vɔ̀sawo doawo
1Tɔhonɔ̀ gblɔ̃ na Mosè be: 2Ne mì ɖo ànyigbã kè ji mì la ɖo nɔ̀pe lèa jia, ànyigbã kè mù la sɔ na mìa, 3ne mì la wɔ̀ vɔsa na Tɔhonɔ̀a, vɔsa lè èzò nu, sìgbè ènumème vɔsa kè mì la sɔ ègbɔ, àlɛ̃, àlo ènyì wɔ̀a nènea, ne e nyi àjɔ̀gbè ɖèɖe be vɔsa, àlo, èjro be vɔsa, àlo, vɔsa lè mìabe àzãɖùɖuwo mèa, ne mì jro be mìabe ènu nana a ne hũɛ gbligbligbli do Tɔhonɔ̀a, 4àmè kè le na ènu Tɔhonɔ̀a la sɔ èwɔ meme, jijenu efà ɖèka be mamã èwogɔ̃a, la blù ì ku àmì, jijenu hɛ̃ ɖèka be mamã ènègɔ̃a. 5Èwò kè le na ènu Tɔhonɔ̀a, wò la na vɛ̃, jijenu hɛ̃ ɖèka be mamã ènègɔ̃a, sɔ kpe ɖo ènumème vɔsa, àlo, àlɛ̃via be vɔsa ŋuti, na èsì kɔ̀ ɖɛ. 6Ne àgbò ye wò le na a, wò la sɔ èwɔ meme, jijenu efà ɖèka be mamã èwogɔ̃a be tèpe èvè, la blù ì ku àmì, jijenu hɛ̃ ɖèka be mamã ɖo ètɔ̃ be àkpa ɖèka kpe àgbòa; 7wò la na vɛ̃, jijenu hɛ̃ ɖèka be mamã ɖo ètɔ̃ be àkpa ɖèka, na èsìkɔ̀ɖɛ. Wò la sɔ ènu kèawo va ɖo Tɔhonɔ̀ be ŋùmè, ne woa hũɛ gbligbligbli na Tɔhonɔ̀. 8Ne ènyì-vi ye wò le na Tɔhonɔ̀, sɔ le wɔ̀ vɔsa, àlo, ènumème vɔsa, la sɔ ɖè àjɔ̀gbè ɖe, àlo, na ŋuti fàfa vɔsaa, 9wò la sɔ èwɔ meme, jijenu efà ɖèka be mamã èwogɔ̃ be tèpe ètɔ̃, la blù ku àmì, jijenu hɛ̃ ɖèka be mamã mè na ku ènyì-via; 10wò la sɔ vɛ̃, jijenu hɛ̃ ɖèka be mamã mè kpe ɖo e ŋuti, na èsìkɔ̀ɖɛa. Ènu kèawo ye wò la sɔ savɔ, ne bèa hũɛ gbligbligbli na Tɔhonɔ̀.
11Nène a ye wo la wɔ̀, ne wo la sɔ ènyì-su, àgbò, ènyì-vi, àlo, ègbɔ savɔ na Tɔhonɔ̀a. 12Ne èlã kèwo mì la sɔ savɔawo sùgbɔ cã a, nènea tutu ye mì la wɔ̀, ɖo èlã ɖe sia ɖe nu. 13Ne èdùmèvi ɖekpekpe la sɔ, vɔsa va ɖo Tɔhanɔ̀ be ŋùmè, ne bèa hũɛ gbligbligbli na Tɔhonɔ̀a, lekea ye be la wɔ̀ ɛ̀. 14Ne àmèjrovi ɖe va zɛ̃ mìa gbɔ, àlo àmèjrovi ɖe kè lè mìa dòmè, so jìjimèwo ji ke, jro be yèa ɖà ènu, sɔ savɔ, ne bèa hũɛ gbligbligbli na Tɔhonɔ̀a, e ɖo la wɔ̀ ɛ̀, leke mì wɔ̀nà ɛ̀a. 15Mìabe àmèha bliboa, èkɔ̀nu be ɖoɖo ɖèka kè lè mìa sia ke ye àmèjro kè lè mìa dòmèa cã la nɔ wɔ̀. E la nyi èkɔ̀nu mà trɔ, lè Tɔhonɔ̀ be ŋùkɔ̀, na mìawo ku na àmèjro kè lè mìa dòmèa, kaka sɔ yì. 16Èse ɖèka ku ɖoɖo#15.16 Woa kpɔ Lev 24.22 ɖèka, ye la kplɔ̀ mìawo ŋutɔwo ku àmèjro kè lè mìa dòmèa.”
Ènuɖùɖu cucugbãawo be vɔsa
17Tɔhonɔ̀ gblɔ̃ na Mosè be: 18“Gblɔ̃ na Izràɛlviwo be: Ne mì ɖo ànyigbã kè ji mù la kplɔ̀ mì yìa jia, 19ne mì la ɖù ànyigbã ŋua ji be ènu ɖùɖu cucugbãa, mì la ɖè lè e ŋuti, na Tɔhonɔ̀. 20Lè mìabe mawɛ cucugbãa mèa, mì la wɔ̀ èkpo mè-klàko, sɔ na mù àjɔ̀; mì la na ɛ̀, sìgbè àjɔ̀ kè wo sɔ sanavɔ, ne wo yà nukuwo vɔ̀a nène. 21Klàko cucugbãa la nyi àjɔ̀ kè mì la na Tɔhonɔ̀a; nènea ye be la nyi, so jìjimè, yì jìjimè.”
Vɔsa ɖo àgɔ̀ kè wo mu jro ò a ta
22Ne mì mu nya ò, eye mì dà èse kèawo dòmètɔ ɖèka ji, èse kèwo Tɔhonɔ̀ na, Mosè ŋlɔ̀ ɖɛa, 23Ne mì mu wɔ̀ ɖo èse kèwo kpata Tɔhonɔ̀ na, Mosè do na mìawo ji ò, so kaka gbè kè gbè, Tɔhonɔ̀ na, Mosè ŋlɔ̀ wo ɖɛ na mì, so jìjimè yì jìjimè ò a, 24Ne àgɔ̀jèje kè a va, lè mà-nyã mè na àmèha blibo a, àmèha blibo a la na ènyìsu ɖèka kè be la sɔ wɔ̀ ènumème vɔsa, la sɔ fa Tɔhonɔ̀ be àdɔ̀mèze a. Àmèha la gbà na èsìkɔ̀ɖɛ be ènu nana kè èkɔ̀doa biɔa, kpe ɖo ègbɔsu ɖèka ŋuti, na vɔsa ɖo èvuɛ̃ ta. 25Hũbonɔa la wɔ̀ èvuɛ̃ sɔ kè be èkɔ̀nu na Izràɛlviwo be àmèha bliboa. Ekèa yomè a, wo la sɔ woabe èvuɛ̃wo kè wo. Kè e nyi be mà-nyã mè ye wo jè àgɔ̀ a lè a ŋuti ye wo hɛ̃ ènu nanawo ku ènu ɖùɖu va na Tɔhonɔ̀, kpe ɖo vɔsa kè wo wɔ̀ ɖo àgɔ̀ kè wo jè lè mà-nyã mè a ta. 26Wo sɔ àgɔ̀ a lè kè Izràɛlviwo be àmèha a keŋu ku àmèjro kè lè woa dòmè a ɖodu, ɖo a, dùkɔ̃ a kpata ye jè àgɔ̀ a, lè mà-nyã mè.
27Ne e nyi be àmè ɖèka kpò ye jè àgɔ̀ a, lè mà-nyã mè a, àmè a la sɔ ègbɔ kè xɔ̀ èpè ɖèka a, va savɔ ɖo èvuɛ̃ a ta. 28Hũbonɔ a la wɔ̀ èvuɛ̃ sɔkè be èkɔ̀nua#15.28 Woa kpɔ Lev 4.27-31 lè Tɔhonɔ̀ be ŋùkɔ̀ na àmè kè jè àgɔ̀ lè mà-nyã mè a. Ne wo wɔ̀ èkɔ̀nua na ɛ̀ vɔ̀a, wo la sɔ èvuɛ̃a sɔ kè è. 29Ne àmè kè jè àgɔ̀a nyi Izràɛlvi jìji, èdùmèvi, àlo àmèjro kè va lè mìa dòmè, lè èdùa mèa, èse ɖèka kpò ye la kplɔ̀ mì, ne mì jè àgɔ̀ lè mà-nyã mè a.
30Vɔ̀, ne àmè ɖe nya vɔ̀, dà èsea jia, ne àmèa nyi Izràɛlvi jìji, èdùmèvi, àlo àmèjro kè va lè mìa dòmèa, èse kè ji be dà a, èzũ ye be nyi na Tɔhonɔ̀. Ekèa ŋuti ye wo la ɖè nène mèa to lè yebe dùkɔ̃a mè. 31Ekè e nyi be Tɔhonɔ̀ be ègbè, ye àmè ŋua dovlo, eye be dà Tɔhonɔ̀ be ègbè ɖèɖewo jia, wo ɖo la crɔ̃ ɛ̀ lè yebe dùkɔ̃a mè. E la nɔ̀ yebe àgɔ̀jèjea nu.
Ne wo dà jɛ̃gbɔ̃zãa jia
32Wàlɛbɛ kè Izràɛlviwo gbà kpɔ̀tɔ̀ lè zògbè a jia, wo sò ŋusù ɖe do, be le fɔ̀ ànakè lè jɛ̃gbɔ̃zã gbè. 33Àmè kèwo sò è do, be le fɔ̀ ànakèawo kplɔ̀ ɛ̀ va Mosè, Arɔ̀n ku àmèha bliboa be ŋùkɔ̀. 34Ekè wo mu kpɔ nya ètodɔ̃ kè wo la na ɛ̀ ò a, wo le è ɖɛ, ɖo ɖiatɔwo si mè. 35Eye Tɔhonɔ̀ gblɔ̃ na Mosè be: “Ŋusù kèa jè na èku. Àmèha bliboa la pò èkpe è wù, lè àsàɖa godo.” 36E yomè a, àmèha bliboa kplɔ̀ ɛ̀ to lè àsàɖaa mè. Wo pò èkpe è, eye be ku. Ekèa ye nyi ègbè kè Tɔhonɔ̀ ɖè na Mosè a.
Jèsìdo lè àwùwo be ètomè
37Tɔhonɔ̀ gblɔ̃ na Mosè be: 38“Pònupo na Izràɛlviwo, ne wòa gblɔ̃ na wo be, ne woa ku woabe jìjimèviwo pò èto na woabe àwùwoa, wo ne nɔ do èkà àmàdodo ètopòpoa mè. 39Ekèa la nɔ̀ èto kè mì la pò na mìabe àwùwoa ŋuti, àlekè be, ne mì le kpɔ woa, mì la nɔ ɖoŋù èse kèwo keŋu Tɔhonɔ̀ do na mìawo, mì la nɔ wɔ̀ ɖo woa ji, eye mì mu la nɔ kplɔ̀ mìabe èjìwo ku ŋùkuwo do, sɔ yì ànùkua màwɔ̀ be èmɔ ji ò. 40Ekèa la na be mì la nɔ bù lekè mì la nɔ wɔ̀ ɖo èse nyèawo keŋu ji ɖoa ŋuti, eye mì la nɔ̀ kɔ̀kɔ̀ɛ na mìabe Mawu. 41Ènyè ye nyi Tɔhonɔ̀, mìabe Mawu kè ɖè mì to so Ejiptè-nyigbã ji, ne ma nyi mìabe Mawu. Ènyè ye nyi Tɔhonɔ̀, mìabe Mawu.
Mina Bible © Bible Society of Togo, 2014.