Àmè Hɛ̃hlɛ̃ 17
17
Korà be àmèwo be lifi fiɔ̃nuawo
1Tɔhonɔ̀ pò nupo na Mosè, eye be gblɔ̃ na ɛ̀ be: 2“Gblɔ̃ na hũbonɔ Eleazàr, Arɔ̀n be èvia be ne ɖè lifi fiɔ̃nuawo to lè èzòa mè, ɖoa, lifi fiɔ̃nuawo lè kɔ̀kɔ̀ɛ, eye Eleazàr ne sɔ èzòa kãkã ɖo dìdìpe. 3Ŋusù ŋuawo kèwo be nuvuɛ̃wo hɛ̃ èku va na woawo be lifi fiɔ̃nuawo ŋuti kɔ̀, ɖoa, wo sɔ wo va ɖo ŋùmè na mù, ekèa na be wo lè kɔ̀kɔ̀ɛ. Mi la pò lifi fiɔ̃nu ŋuawo kpàbà, la sɔ wo tre ɖo vɔsakpea ŋuti. Ekèa la nyi ŋùkuɖojinu na Izràɛlviwo.” 4Hũbonɔ Eleazàr sɔ gàjɛ̃ be lifi fiɔ̃nu kèwo àmè kèwo fiɔ̃awo sɔ va ɖo Tɔhonɔ̀ be ŋùmèawo. Wo pò wo kpàbà, la sɔ tre ɖo vɔsakpea ŋuti. 5Ekèa nyi ŋùkuɖojinu na Izràɛlviwo, àleke be àmè kè mu nyi èkɔ̀vi ò a, àmè kè mu so Arɔ̀n be jìjimè ò a, mu gbà dɔ̃ va be yèa tɔ èzò lifi lè Tɔhonɔ̀ be ŋùkɔ̀ ò. Ne ènu kè jɔ̀ ɖo Korà ku yebe yomè jètɔwo jia mu gbà jɔ̀ ɖo e ji ò. Tɔhonɔ̀ ŋutɔ gblɔ̃ ɛ̀ na ɛ̀ jè ŋùkɔ̀, to Mosè ji.
Dùkɔ̃a sitè ɖo Mosè ku Arɔ̀n ŋuti
6Ekè èŋù kèa, dùkɔ̃a kpata sitè ɖo Mosè ku Arɔ̀n ŋuti be: “Mì na Tɔhonɔ̀ be dùkɔ̃ mètɔwo ku!” 7Wàlɛbɛ kè àmèha a le wɔ̀ tùkaɖa ku woa, Mosè ku Arɔ̀n trɔ ɖo Ègòdodo be gòxɔa gbɔ. Wàlɛbɛ ŋua ye Tohonɔ̀ be gogoa ze. 8Mosè ku Arɔ̀n yì Ègòdodo be gòxɔa gbɔ. 9Tɔhonɔ̀ pò nupo na Mosè be: 10“Mì to lè àmèha kèa dòmè, ne ma crɔ̃ ɛ̀ zè ɖèka!” Mosè ku Arɔ̀n sɔ ŋùmè cɔ̃ ànyi, 11eye Mosè gblɔ̃ na Arɔ̀n be: “Sɔ lifi fiɔ̃nu wòa. Ɖè èzò lè vɔsakpea ji ɖo e mè. Kɔ̀ lifi ɖo èzòa mè. Ɖèbla yì àmèha a gbɔ, ne wòa wɔ̀ èvuɛ̃ sɔsɔkè be èkɔ̀nua ɖo e ta, ɖoa, àdɔ̀mè le ve Tɔhonɔ̀ ŋutɔ: jɔ̀gbèvuɛ̃ a jè e gɔ̃mè vɔ̀.” 12Arɔ̀n sɔ lifi fiɔ̃nua, sìgbè lekè Mosè gblɔ̃ ɛ̀ na ɛ̀a nène. E pu dù yì àmèha a dòmè, eye, kpɔɖa, jɔ̀gbèvuɛ̃ a jè e gɔ̃mè, lè dùkɔ̃a dòmè vɔ̀. Arɔ̀n do lifia, eye be wɔ̀ èvuɛ̃ sɔsɔkè be èkɔ̀nua ɖo dùkɔ̃a ta. 13E yì nɔ̀ àmè kukuawo ku àmè ci-àgbèawo dòmè, eye jɔ̀gbèvuɛ̃ a tɔtè. 14Ne wo mu hlɛ̃ àmè kèwo ku lè Korà be ènyàa mèawo ɖo e mè ò a, àmè kèwo jɔ̀gbèvuɛ̃ a pò wùawo kpata lè àgbètɔ hotu adrɛ̃ àlɔ̀ adrɛ̃ (14700). 15Ekè Arɔ̀n trɔ yì Mosè gbɔ, lè Ègòdodo be gòxɔa nua, jɔ̀gbèvuɛ̃ a nɔ̀tè.
Arɔ̀n be èkpò pòse
16Tɔhonɔ̀ gblɔ̃ na Mosè be: 17Pònu na Izràɛlviwo, ne kɔ̀ta ɖe sia ɖe ne sɔ àtikplɔ ɖèka na wò. Ekèa la wɔ̀ àtikplɔ woèvè ye wò la xɔ̀ lè xòmè ŋùkɔ̀nɔ̀tɔawo keŋu si. Wò la ŋlɔ̀ woa dòmètɔ ɖe sia ɖe be nyikɔ ɖo yebe àtikplɔa ŋuti. 18Wò la ŋlɔ̀ Arɔ̀n be nyikɔ ɖo Levì be àtikplɔa ŋuti, ɖoa, àtikplɔ ɖèka kpò ŋùkɔ̀nɔ̀tɔ ɖe sia ɖe la ɖo. 19Wò la sɔ àtikplɔawo dà ɖo Ègòdodo be gòxɔa mè, lè Zòɖùɖu-Ɖakà a be ŋùkɔ̀, lè àfi kè mù donagò mì lèa. 20Ŋusù kè mù cã a be àtikplɔ ye la pòse. Nène a ye mù ɖè Izràɛlviwo be àgla kè wo le jè ɖo mìa ŋuti jo lè ɖokoe nyè gbɔ.”
21Kè Mosè pò nupo na Izràɛlviwoa, woabe ŋùkɔ̀nɔ̀tɔ ɖe sia ɖe sɔ yebe àtikplɔ na Mosè, ɖo yebe kɔ̀ta nu, eye be wɔ̀ àtikplɔ woèvè kèwo Mosè xɔ̀a. Eye Arɔ̀n be àtikplɔa lè dòdòmè na àtikplɔ kpɔ̀tɛawo. 22Mosè sɔ àtikplɔawo ɖo Tɔhonɔ̀ be ŋùmè, lè Zòɖùɖu-Ɖakà a be ŋùkɔ̀ lè gòxɔa mè. 23Ekè èŋù kèa, Mosè ɖo gɔ̀xɔa mè, eye, kpɔɖa, Arɔ̀n kè so Levì be jìjimèviwo dòmèa be àtikplɔa jè, e pòse, eye èsepòpoa sɛ̃ èvò be èku kèwo ɖì. 24Mosè ɖè àtikplɔawo keŋu to, jo lè Tɔhonɔ̀ be ŋùkɔ̀, sɔ wo va fiɔ Izràɛlviwo kpata. Izràɛlviwo kpɔ àtikplɔawo, eye àmè sia àmè gbìgbɔ̀ sɔ yebe àtikplɔa. 25Tɔhonɔ̀ gblɔ̃ na Mosè be: “Gbìgbɔ̀ trɔ Arɔ̀n be àtikplɔa ɖo Zòɖùɖu-Ɖakà a be ŋùkɔ̀. Lebè na ɛ̀, ne bèa nyi jèsìdo na àglajètɔwo, ne woa tɔtè lihũi lìli, ne wo mu gbà ku ò. 26Mosè sè ègbè kè Tɔhonɔ̀ ɖè na ɛ̀a, eye be wɔ̀ ɖo e ji.
Hũbonɔwo ku Levìwo be èdɔ
27Izràɛlviwo gblɔ̃ na Mosè be: “Kpɔɖa, mi le ku, mi le crɔ̃, mia kpata, mi le crɔ̃! 28Àmè ɖekpekpe àmè kè le gogo Tɔhonɔ̀ be nɔ̀pea, le ku zè ɖèka. Eŋuã, mi la nɔ ku, kaka la vɔ̀ keŋu-keŋuã?”
Mina Bible © Bible Society of Togo, 2014.