Àmè Hɛ̃hlɛ̃ 11
11
Izràɛlviwo ɖo Tàberà
1Gbè ɖèkaa, Izràɛlviwo na àle veve ɖe ŋutɔ. Kè Tɔhonɔ̀ sè èa, e do àdɔ̀mèze ŋutɔ, eye yebe àdɔ̀mèze be èzò bì dùkɔ̃a lè àsàɖaa be àkpa ɖèka. 2Dùkɔ̃a do àpa yɔ Mosè, eye Mosè fã yɔ Tɔhonɔ̀. E yomè a, àdɔ̀mèze be èzòa nu fa. 3Wo yɔ tèpe kèa be Tàberà, ɖoa, Tɔhonɔ̀ be èzò bì Izràɛlviwo lè funua.
Dùkɔ̃a biɔ èlã ne yèwoa ɖù
4Àmè ɖewo lè dùkɔ̃a dòmè kèwo ɖè woabe ènu jro àmè to, eye Izràɛlviwo kpata tɔ àlenana be: “Àmè kɛ ye la na mi èlã, ne mia ɖù ò? 5Mi le ɖoŋù ètɔ̀mèlã kè mi ɖùnà gbalo, lè Ejiptè-nyigbã jia, àgbìsã, àɖùbatrɛ̀, yèbese, sàbulɛ ku ayò. 6Gãke fifìa, miabe àgbè le yrɔ̀, ɖoa, ènu kèawo dòmètɔ ɖekpe mu lè, tovò na manà kè mi le kpɔ gbè sia gbèa ò.” 7Manàa#11.7 Tot 16.31; Gɔ̃m 2.12 lè sìgbè àbòɖà kè woa nène, eye be nɔ̀nà ɣe#11.7 Manà: lè Biblìa buwo mèa, wo gblɔ̃ be manàa nɔ̀nà sìgbè yòvowo be àtikusɛ̃sɛ̃ kè wo yɔna be Koriãdrà nène, eye be nɔ̀nà ɣe. 8Dùkɔ̃a yì cãna ɛ̀; e yomè a, wo tùnà ɛ̀ lè ète ji, àlo, wo tona ɛ̀, lè èto mè. Wo ɖànà ɛ̀, lè èzewo mè, eye wo sɔ wɔ̀nà klàkowo. E vivina sìgbè àmì klàko nène. 9Ne àhũ le jà, èzã mè, ɖo àsàɖaa jia, manàa cã hlɛ̃na. 10Mosè sè leke dùkɔ̃a le fã àvi ɖoa, hɛ̃nu ɖe sia ɖe bɔ̀, àmè sia àmè lè yebe àsàɖa-mɔnu. Tɔhonɔ̀ do àdɔ̀mèze gã ɖe. Ekèa mu jɔ̀jì na Mosè ò. 11Mosè gblɔ̃ na Tɔhonɔ̀ be: “Nukɛ ŋuti ye wò le wɔ̀ èvuɛ̃ ku sumɔ̃vi wò, eye nukɛ ŋuti ye wò mu wɔ̀ àdɔ̀mè nyuɛ̃ na mù ò, kaka sɔ dùkɔ̃ kèa kpata be àgbã sɔ dro na mù ò? 12Àlo, ènyè ye fɔ dùkɔ̃ gbogbo kèa be èfua? Ènyè ye jì woa? Wò gblɔ̃ na mù be: 'Kɔ ɛ̀ ɖo àkɔ nu, sìgbè vifɛ̃ lè ànɔ nu nène', kaka sɔ yì ànyigbã kè be àjɔ̀gbè wò fìã na woa tɔgbewoa ji. 13Fikɛ ye mù la kpɔ èlã lè, la na dùkɔ̃ kèa kpata kè lè fã àvi na mù, be: 'Na mi èlã, mia ɖù ò?' 14Nyè ɖèka nyè mu la gbà teŋu kpe dùkɔ̃ gbogbo kèa be àgbã ji ò. E kpɛ̃ wu mù! 15Ne e nyi be nènea ye wò la nɔ wɔ̀ ku mùa, tɔ̀ wò jɔ̀, jo wù mù bòhũ. Ne mù fɔ̀ màje lè gbɔ wɔ̀a, wù mù, zè ɖèka, ne nyè mu gbà kpɔ nyè ŋutɔ àpe jɔ̀gbèvuɛ̃ tèpe ò!”
16Tɔhonɔ̀ ɖo e ŋuti na Mosè be: “Bɔ̀ ŋusù èkàtakpo ci èwo na mù, lè Izràɛlviwo be àmèsĩsĩwo dòmè, àmèsĩsĩ kèwo wò nya be wo nyi dùkɔ̃a be ŋùkɔ̀nɔ̀tɔwoa. Wò la kplɔ̀ wo, wò ku wo, mì la va nɔ̀tè ɖo Ègòdodo be gòxɔa be ŋùkɔ̀. 17Mù la ɖì va funua, eye mù la pò nupo ku wò. Mù la ɖè lè gbɔ̃gbɔ̃ kè lè ji wòa ŋuti, la sɔ ɖo woa ji. Ekèa la na be wo la teŋu dro dùkɔ̃a be àgbã ku wò. Mu gbà nyi wò ɖèka ye la nɔ dro è ò. 18Ekèa yomè a, wò la gblɔ̃ na dùkɔ̃a be: “Mì kɔ̀ mìa ɖokoewo ŋuti na èsɔ̀, ne mìa teŋu ɖù èlã. Ɖoa, mìabe àvi fãfã ɖo Tɔhonɔ̀ be èto mè be: 'Àmè kɛ ye la na mi èlã, mia ɖù ò? Kè mi nɔ̀ Ejiptè a, mi nɔ̀ nyuɛ̃ ɖe lè funua.' Ekèa ŋutia, Tɔhonɔ̀ la na mì èlã, mì la ɖù. 19Eye, mu nyi ŋùkèkè ɖèka, èvè, àtɔ̃, èwo, àlo èwì, kpò mì la ɖù ì ò. 20Vɔ̀a, mì la ɖù ì, wètri blibo, kaka na gà kè mè be la to lè ŋɔ̀ti mè na mì, eye be la nyɔŋu na mìa. Ɖoa, mì gbe Tɔhonɔ̀ kè le mìa dòmèa, eye mì le fã àvi na ɛ̀ be: 'Nukɛ ŋuti ŋutɔ mi jo hũ jo lè Ejiptè-nyigbã ji ya ɖo ò?'”
21Mosè gbà ɖo e ŋuti na Tɔhonɔ̀ be: “Lè àfɔ̀zɔ̃tɔwo be àhùakɔ̃a mèa, àgbètɔ hotu àlɔ̀ ètɔ̃ ye lè dùkɔ̃ kè mè mù lèa mè. Eye wò le gblɔ̃ be: “Mù la na wo èlã, wo la ɖù, wètri blibo ɖèkaa? 22Ènyì, àlo ègbɔ be èlãha, wo la wù, ne bèa sù wo loo, àlo àpùmèlãwo kpata ye wo la bɔ̀, ne bèa sù woa?” 23Tɔhonɔ̀ ɖo e ŋuti na Mosè be: “Ɖe ye Tɔhonɔ̀ be àlɔ̀ hùea? Wò la kpɔ, ne ènyà kè mù gblɔ̃a, la va e mè loo, àlo, mu la va e mè na wò ò.”
24Mosè to lè gòxɔa mè, yì gblɔ̃ Tɔhonɔ̀ be ènyàa na dùkɔ̃a. E yɔ dùkɔ̃a be àmèsĩsĩ èkàtakpo ci woèvè, eye be na, wo va trɔ do gòxɔa. 25Tɔhonɔ̀ lè lilia mè#11.25 Woa kpɔ Tot 13.21, ɖì, eye be pò nupo na Mosè. Tɔhonɔ̀ ɖè lè gbɔ̃gbɔ̃ kè lè Mosè jia ŋuti, sɔ ɖo àmèsĩsĩ èkàtakpo ci woèvèawo ji. Kè gbɔ̃gbɔ̃a gbe jè woa ji kpòa, wo tɔ ènyà gbɔ̃gblɔ̃ ɖɛ, gãkea, wo mu gblɔ̃ ɛ̀ yì ŋùkɔ̀ ò.
26Ŋusù èvè ci àsàɖaa mè; woa dòmètɔ ɖèka tɔ̀ Ɛldàd, eye èvègɔ̃a tɔ̀ Medàd. Gbɔ̃gbɔ̃ a jè woa ji, ɖoa, woabe nyikɔwo lè àmè kèwo Mosè cãawo dòmè, vɔ̀a wo mu to va yì Ègòdodo be gòxɔa gbɔ ò. Wo tɔ ènyàgbɔ̃gblɔ̃ ɖɛ lè àsàɖaa mè. 27Ŋusùvi ɖe pu dù yì gblɔ̃ ɛ̀ na Mosè be: “Ɛldàd ku Medàd le gblɔ̃ ènyà ɖɛ, lè àsàɖaa mè!” 28Yosùa, Nun be èvi kè dona àlɔ̀ Mosè, so kaka yebe ɖèkajɛ mèa gblɔ̃ be: “Àpetɔ nyè Mosè, tɔ wo tè!” 29Mosè ɖo e ŋuti be: “Ɖe ye wò le hùãŋu ɖo nu nyèa? Ne ɖe ye Tɔhonɔ̀ la lɔ̃, la sɔ yebe gbɔ̃gbɔ̃ ɖo dùkɔ̃a kpata jia, woa kpata, wo la nɔ gblɔ̃ ènyà ɖɛ.” 30Ekèa yomè a, Mosè ku àmè sĩsĩawo trɔ yì àsàɖaa mè.
Tèkleviwo
31Àya ɖe kè Tɔhonɔ̀ ɖo ɖoɖaa, pò so àpù ji va. Àyaa kplɔ̀ tèkleviwo va pòxla do àsàɖaa, eye wo kɔ̀ ɖo ànyi, pòxla àsàɖaa, kaka yì dìdìpe sìgbè ŋùkèkè ɖèka be àzɔ̃lì nène, eye wo kɔ yì èji sìgbè àbɔglìgo èvè nène. 32Gbè ŋua gbèa, dùkɔ̃a nɔ̀ ètènu, ŋùkèkè bliboa, èzã blibo kè kplɔ̀ ɛ̀ do a ku yebe ŋùkègbè bliboa, lè cã tèkleviawo. Àmè kè mu cã sùgbɔ ò a, fɔ̀ wo ɖɔ àjàfi gã#11.32 Lè Hebrùgbe mèa wo pò nupo so “Homer” kè nyi jijenu gãa ŋuti. èwo. Dùkɔ̃a fɔ̀ tèkleviawo sia trɔ do àsàɖa keŋu. 33Èlã mu kpɔ jo lè àɖutomè na Izràɛlviwo, kaka woa va ɖù ì vɔ̀, keŋu gbɔ̀xue Tɔhonɔ̀ do àdɔ̀mèze gã ɖe do wo, ku èdɔ̀ vuɛ̃ ɖe ò. 34Wo ɖo nyikɔ na tèpe kèa be Kivrɔt-Taavà kè gɔ̃mè ye nyi 'Ŋùbia be Eyɔ̀do', ɖoa, funua ye wo ɖì àmè gbogbo kèwo èlãɖùɖu be ŋùbia wùawo lè.
35Kè dùkɔ̃a jo lè Kivrɔt-Taavàa, Izràɛlviwo jè èmɔ tùtà Haserɔt, eye wo yì do àsàɖa ɖo funua.
Mina Bible © Bible Society of Togo, 2014.