Àmè Hɛ̃hlɛ̃ 10
10
Klòsalò be èzèwo
1Tɔhonɔ̀ gblɔ̃ na Mosè be: 2“Wò la na wo la wɔ̀ èkpɛ̃ èvè na wò; wo la tù wo ku klòsalò. Wò la nɔ zã wo, la sɔ nɔ yɔ àmèha a bɔ̀, eye wò la nɔ zã wo, la sɔ nɔ hɔ̃ àsàɖaa jo. 3Ne wo ku èkpɛ̃ kèawo ɖodua, àmèha kpata la va bɔ̀ ɖo gbɔ wò lè Ègòdodo be gòxɔa mɔnu. 4Ne èkpɛ̃a ɖèka kpò wo kua, Izràɛlviwo be cãmìwo, àgbònùglawo ku gbãdãgbã èkàwìvɔàtɔ̃wo kpò ye la va bɔ̀ lè gbɔ wò. 5Ne mì ku èkpɛ̃a be ɖìɖi vi ɖèkaa, àsàɖa kèwo lè èwèzɛ̃peawo la hɔ̃ jo. 6Ne mì ku èkpɛ̃a be ɖìɖi èvèa, àsàɖa kèwo lè àpùgoawo la hɔ̃ jo. Èkpɛ̃ kuku vòvòwo ye la na mì la nɔ hũ jo. 7Vɔ̀, ne mì la yɔ àmèha a bɔ̀a, mì ɖo la ku èkpɛ̃a dìdiɖe, mu nyi zè vi ɖe kpò mì la ku ì ò?
8Arɔ̀n be ŋusùvi, hũbonɔawo ye la nɔ ku èkpɛ̃awo, ekèa la nyi èkɔ̀nu mì la nɔ wɔ̀, so jìjimè yì jìjimè.
9Ne mì la kpe àhùa, lè mìabe ànyigbã ji ku kɛ̃tɔ kè le ɖèfũ na mìa, mì la ku èkpɛ̃a be ɖìɖi vi, viwo ɖo woa nɔ̀nɔwo nu. Nène a, mì la na Tɔhonɔ̀, mìabe Mawu la ɖoŋù mì, eye be la hlùɛ̃ mì lè mìabe kɛ̃tɔwo si. 10Lè mìabe àzãɖùɖuwo mè, lè mìabe wètri jè èji be àzãwo mè, ku lè àzã buwo hùenua, mì la nɔ ku èkpɛ̃awo, la sɔ kplɔ̀ mìabe ènumème vɔsa ku ŋuti fàfa vɔ̀sawo. Ekèa la na be mìabe Mawu la ɖoŋù mì. Ènyè ye nyi Tɔhonɔ̀, mìabe Mawu.#10.10 Woa kpɔ Gbì 1.6-8
So Sinaì va yì Mòab
11–21
Izràɛlviwo jè èmɔ
11Èpè èvègɔ̃a mèa, lè wètri èvègɔ̃a be ŋùkèkè èwìgɔ̃a gbèa, lilikpoa kɔ yì èji, lè Zòɖùɖu-Ɖakà a be nɔ̀pea tamè. 12Izràɛlviwo jè èmɔ, lè Sinaì be zògbè a ji, ɖo àmè sia àmè be ɖoɖo nu, eye lilikpoa yì nɔ̀ Paràn be zògbè a ji. 13Ekèa ye nyi cucugbã kè Izràɛlviwo le hũ jo, ɖo Tɔhonɔ̀ be ègbè kè be do àsi na Mosè a nu.
14Cucugbɔ̃a a, Yudà be jìjimèviwo be hɛ̃nuwo be àplãŋuga ye jè ŋùkɔ̀ ku woabe àsàɖa mè be àhùakɔ̃wo. Nahsɔ̀n, Aminadàb be èvia ye nɔ̀ ŋùkɔ̀ na Yudà be jìjimèviwo be àhùakɔ̃wo. 15Àmè kè nɔ̀ ŋùkɔ̀ na Isakàr be jìjimèviwo be hɛ̃nuwo be àhùakɔ̃woa ye nyi Netanèl, kè nyi Suàr be èvia. 16Àmè kè nɔ̀ ŋùkɔ̀ na Zabulɔ̀n be jìjimèviwo be hɛ̃nuwo be àhùakɔ̃woa ye nyi Eliav, kè nyi Helɔ̀n be èvia.
17Mosè na wo kãkã Nɔ̀pe Kɔ̀kɔ̀ɛ, eye Gɛrsɔ̀n ku Merarì be èviwo dro è.
18Rubɛ̀n be jìjimèviwo be hɛ̃nuwo be àhùakɔ̃wo jè èmɔ. Elisùr kè nyi Sedeùr be èvia ye lè ŋùkɔ̀ na wo. 19Àmè kè nɔ̀ ŋùkɔ̀ na Simeɔ̀n be jìjimèviwo be hɛ̃nuwo be àhùakɔ̃woa ye nyi Selumìɛl, kè nyi Surisadai be èvia. 20Àmè kè nɔ̀ ŋùkɔ̀ na Gad be jìjimèviwo be hɛ̃nuwo be àhùakɔ̃woa ye nyi Elyasàf, kè nyi Deuɛ̀l be èvia.
21E yomè a, Kehàt be jìjimèviwo dro Zòɖùɖu-Ɖakà a, jè èmɔ. Levì kpɔ̀tɛawo ɖo la gbìgbɔ̀ tu Nɔ̀pe Kɔ̀kɔ̀ɛ gbɔ̀xue woa va ɖo.
22Woa yomè a, Efràyim be jìjimèviwo be hɛ̃nuwo be àhùakɔ̃wo jè èmɔ. Elisamà kè nyi Amihud be èvia ye lè ŋùkɔ̀ na Efràyim be jìjimèviwo be àhùakɔ̃a. 23Àmè kè nɔ̀ ŋùkɔ̀ na Manasè be jìjimèviwo be hɛ̃nuwo be àhùakɔ̃woa ye nyi Gamelìɛl, kè nyi Pedahsùr be èvia. 24Àmè kè nɔ̀ ŋùkɔ̀ na Bɛnyamìn be jìjimèviwo be hɛ̃nuwo be àhùakɔ̃woa ye nyi Avidàm, kè nyi Gideonì be èvia.
25Mɛmlɛ̃nua, lè àsàɖa vòvòvòwo yomè a, Dàn be jìjimèviwo be àhùakɔ̃wo be àsàɖaa jè èmɔ. Ahiezɛr kè nyi Amisadaì be èvia ye nɔ̀ ŋùkɔ̀ na Dàn be jìjimèviwo be àhùakɔ̃a. 26Àmè kè nɔ̀ ŋùkɔ̀ na Àsɛr be jìjimèviwo be hɛ̃nuwo be àhùakɔ̃woa ye nyi Pagìɛl, kè nyi Okràn be èvia. 27Àmè kè nɔ̀ ŋùkɔ̀ na Neftalì be jìjimèviwo be hɛ̃nuwo be àhùakɔ̃woa ye nyi Ahirà, kè nyi Einàm be èvia.
28Ɖoɖo kèa nu ye Izràɛlviwo hũ jo ku woabe àhùakɔ̃wo lè.
Àmè kɛ ye la kplɔ̀ dùkɔ̃a ò?
29Mosè gblɔ̃ na Hobàb kè nyi ètoa, Reùɛl, Midìan ŋusùa be èvia be: “Mi le jo, le yì ànyigbã kè ŋuti Tɔhonɔ̀ gblɔ̃ so be: “Mù sɔ ɛ̀ na mìa!” Ji Va ne mia yì. Mi la na, wò la kpɔ gomè lè ɖàgbè kè be àjɔ̀gbè Tɔhonɔ̀ fìã na Izràɛlviwoa mè.” 30Hobàb ɖo e ŋuti na Mosè be: “Nyè mu la yì ò; èdù nyè mè kè nyi xòmè nyèwo be èdù mèa ye mù la yì.” 31Mosè gbà gblɔ̃ be: “Mù gbà gble mi ɖɛ ò. Ekè wò ya, wo nya tèpe kèwo mi teŋu tù àsàɖa ɖo, lè zògbè a, jia, wò la nyi miabe èmɔfiɔtɔ. 32Ne wò yì ku mia, ne jɔ̀gbènyuɛ̃ kè Tɔhonɔ̀ be yèa wɔ̀ na mia sù mia sia, mi la na, wò cã, wò la kpɔ gomè lè e mè.”
33Kè Izràɛlviwo jo lè Tɔhonɔ̀ be ètoa gbɔa, wo zɔ̃ ŋùkèkè ètɔ̃. Tɔhonɔ̀ be Zòɖùɖu-Ɖakà a nɔ̀ ŋùkɔ̀ na wo, na ŋùkèkè ètɔ̃ be àzɔ̃lìa, la sɔ kpɔ àfi kè wo teŋu do àsàɖa ɖoa. 34Tɔhonɔ̀ be lilia le cɔ̃ woa ji, dɔ̃ŋùkusu mè, wàlɛbɛ kè wo le ɖè woabe àsàɖa joa. 35Gà kè mè zòɖùɖu ɖakàa le joa, Mosè gblɔ̃ be: “Tɔhonɔ̀, sitè, ne kɛ̃tɔ wòwo ne kã hlɛ̃, ne woa si lè ŋùkɔ̀ na wò!” 36Ne zòɖùɖu ɖakàa nɔ̀tèa, Mosè gblɔ̃nà be: “Tɔhonɔ̀, trɔ va, xɔ̀ ànyi nɔ̀ ɖo Izràɛlviwo be xòmè gbogbo kèawo dòmè!”
Mina Bible © Bible Society of Togo, 2014.