Àmè Hɛ̃hlɛ̃ 12
12
Mirìam be ètodɔ̃a
1Mirìam ku Arɔ̀n pò nupo ɖo Mosè ŋuti, ɖo èsrɔ̃a ta, ɖoa, Kusì#12.1 Kusì-nyigbã, àlo Nubia-nyigbãa lè Afrikà. Kusìtɔwo nyi àmè yìbɔwo (Kpɔ Hab 3.7). nyɔ̃nù ye Mosè ɖè. 2Wo gblɔ̃ be: “Mosè ɖèka kpò ye Tɔhonɔ̀ pò nupo na a? Mu pò nupo na miawo cã ò a?” Tɔhonɔ̀ sè ènyà kèa. 3Mosè nyi àmè ɖe kè bɔ̀bɔ̀nà ye ɖokoe wu àmèwo kpata, lè ànyigbãa ji. 4Lè àvò mè kpòa, Tɔhonɔ̀ gblɔ̃ na Mosè be: “Mì àmè ètɔ̃a, mì yì Ègòdodo be gòxɔa mɔnu.” Wo àmè ètɔ̃a, wo yì. 5Tɔhonɔ̀ nɔ̀ lili babla ɖe mè, ɖì va nɔ̀ goxɔa mɔnu. E yɔ Arɔ̀n ku Mirìam, eye wo àmè èvèawo zɔ̃ va ŋùkɔ̀. 6E gblɔ̃ na wo be: “Mì ɖo èto, ne mìa sè ènyà kè lè àsi nyèa: Ne Tɔhonɔ̀ be gblɔ̃ɖɛtɔ ɖe lè mìa dòmèa, è nyè Tɔhonɔ̀a, ŋùtègã mè ye mù ɖènà ɖokoe nyè fiɔ ɛ̀ lè. Èdrɔ̃ mè ye mù pònà nupo na ɛ̀ lè. 7Vɔ̀a, mu nyi lekea na sumɔ̃vi nyè Mosè ya ò. Ànùkuamè be nyi, lè àpe àxue bliboa mè. 8Ŋùkumè ku ŋùkumè ye mù pònà nupo na ɛ̀ lè. Mù ɖènà ɖokoe nyè fiɔna ɛ̀. Nyè mu dona èlo na ɛ̀ ò. E kpɔna Tɔhonɔ̀ be nɔ̀nɔmè. Nukɛ ŋuti mì mu vɔ̃ nupo pòpo ɖo sumɔ̃vi nyè Mosè ŋuti ò?” 9Tɔhonɔ̀ do àdɔ̀mèze ɖo woa ŋuti, eye be jo. 10Ekè lilikpoa gbe jo lè gòxɔa tamè kpòa, Mirìam jè èkpò, zè ɖèka. E ɣe sìgbè ɖèti-fu nène. Kè Arɔ̀n trɔ kpɔ ɛ̀a, e kpɔ be Mirìam jè èkpò. 11Arɔ̀n gblɔ̃ na Mosè be: “Aò! Àpetɔ nyè, tɔ̀ wò jɔ̀, mù gbà dɔ̃ àgɔ̀ kè mi jè a be èto na mi, èvuɛ̃wɔ̀tɔ, ènu mà-nyãtɔ kèawo ò! 12Aò! Mù ɖè kuku; Mirìam mu gbà trɔ sìgbè èvi kè ku ɖo àdɔ̀mè na ènɔa, eye yebe àkpa ɖèka nyìnyɔ̀ gbɔ̀xue wo jì ìa nène ò.”
13Eye Mosè do àpa, fã yɔ Tɔhonɔ̀ be: “Oò Mawu, dà èdɔ̀ na ɛ̀ jro!” 14Tɔhonɔ̀ ɖo e ŋuti na Mosè be: “Ne ɖe ye ètɔa tu ètã ɖo ŋùkumè na ɛ̀a ɖe, èŋù mu la kpɛ̃ ɛ̀ ŋùkèkè adrɛ̃ ò a? Mì ɖè è to lè àsàɖaa mè, ŋùkèkè adrɛ̃. E yomè a, e teŋu trɔ va ye tèpe.” 15Eye, wo ɖè Mirìam to lè àsàɖaa mè, ŋùkèkè adrɛ̃, eye dùkɔ̃a mu hũ jo, kaka na gà kè mè wo gbìgbɔ̀ kplɔ̀ Mirìam va ye tèpe ò. 16Ekèa yomè a, dùkɔ̃a hɔ̃, jo lè Haserɔt, eye wo yì do àsàɖa ɖo Paràn be zògbè a ji.
Mina Bible © Bible Society of Togo, 2014.