Nàhum 2
2
Àŋɛ̀do na Yudàviwo
1Kpɔɖa, àŋɛ̀dotɔ ɖe be àfɔ̀ lè èdù ji,
lè ètowo ji, sɔ ènyà nyuɛ̃ ɖe gbãnà.
E hɛ̃ ŋuti fàfa be àŋɛ̀ va.
Ɖù àpo àzãwo, Yudà!
Eye wɔ̀ ɖo àjɔ̀gbè wòwo ji!
Ɖoa, àmè nyrãhũa mu la gbà va to èdù wò mè ke ò.
E crɔ̃ gbidi.
Àŋɛ̀do na Ninivètɔwo
2Ènugbletɔa va kpe àhùa ku wò;
ekèa ŋutia, ɖia àpo àgbògbòwo;
ŋùku wò ne nɔ̀ èmɔ̃a ji,
tù àfɔ̀ tè, eye pòtɛ hɔ̃hlɔ̃ wòwo keŋu ɖɛ!
Ènyà kè so Yudà ŋutia
3Tɔhonɔ̀ la gbìgbɔ̀ likè Yakɔb be jìjìmèviwo be kɛ̃klɛ̃,
sìgbè lekè ye ŋutɔ likè Izràɛl be kɛ̃klɛ̃a nène,
togbɔ be ènugbãtɔwo kã wo hlɛ̃,
wàlɛbɛ kè ènuhlàtɔwo gudu woabe vɛ̃-gblèwoa.
Wo ɖù e ji, wo ɖù èdùa ji!
4Yebe kãlìsuwo be àkpoxɔ̀nuwo bìa,
Gbãdãgbãwo do ènu jɛ̃ hɛ̀lì,
àhùahũwo be gàkpowo le klɛ̃ sìgbè èzò nène;
wàlɛbɛ kè wo bla àkpà, la kpe àhùaa,
wo kɔ woabe èhuãwo ɖo èji.
5Àhùahũwo jè èdù ji,
lè èmɔ̃wo ji, to èkpawo dòmè,
trɔ, lũ va èdùgbowonu.
Wo le bì sìgbè kakatiwo nène,
le zrò sìgbè èjikèzò nène.
6Àsirìa be èfìɔa mì àsi yɔ yebe àhùaŋùkɔ̀nɔ̀tɔ kãlìwɔ̀tɔwo,
Vɔ̀a, kãkãɖoji hùetè do woabe àzɔ̃lì;
Àhùakɔ̃ kèwo ɖè èzò ɖo àfɔ̀nu na woa
lũ ɖo kaka èdùkpawo gɔ̃mè vɔ̀.
Wo doxa ɖo àkpoxɔ̀nu ɖe godo.
7Wo fo ètɔ̀nu be àgboa lè àvò mè
Eye èfìɔsaa ci àsi!
8Wo ɖè Huzàb, èfìɔ-srɔ̃ kè nyi vòdu na woa,
to so yebe wlapea, eye wo kplɔ̀ ɛ̀ àhùale;
yebe kòsìwo le na àle sìgbè àhɔ̃newo nène,
eye wo le pu àsi àkɔ.
9So kaka gbè ɖe gbèa, Ninivè lè sìgbè èsìdo ɖɔɖɔ nène.
Vɔ̀a, èdùamètɔ kèwo ye nyi èsìa,
Woawo ye le si jo ŋua!
Àmèwo gblɔ̃ na wo be: “Mì nɔ̀tè! Mì dojì!”
Gãke àmè ɖekpe mu trɔ ò.
10Mì hlà klòsalòa! Mì hlà sìkaa!
Yebe àdɔ̀kùnu mà-vɔ ye be nyi!
Ènu xɔ̀asì vòvòvòwo bɔ̀ ɖodu!
11Wo hlà yebe ènuwo keŋu,
wo lɔ yebe ènuwo keŋu,
wo xɔ̀ yebe ènuwo keŋu!
Èjìwo gbã,
èklòwo pò tìtìtì,
àmèti bliboawo hũhũ,
eye woabe ŋùmèwo ci vĩ.
12Fikɛ ye jãŋùta be èdoa lè fifì ò?
Àfi kè wo nyìnà woabe èviwo lè,
eye jãŋùta-su ku jãŋùta-nɔ
yìnà ku woabe èviwo,
àmè ɖekpe mu dona vɔ̃vɔ̃ ji na wo ò.
13Jãŋùta-su wùnà èlã, be sùnà èviawo nu.
E jènà èhlò ji na èlãa, sɔ nana yebe jãŋùta-nɔ,
e wùnà èlã ɖɔna yebe èdowo,
eye èlã kèwo be lea, ɖɔna yebe nɔ̀pewo fuu.
14Àhùadù Tɔhonɔ̀a gblɔ̃ be: “Kpɔɖa, mù sitè ɖo ŋuti wò!
Mù la tɔzò àpo àhùahũwo, eye wo la fiɔ̃ keŋu-keŋu,
Jãŋùtavi wòwo la ci èwui nu
nyè mu la gble àmɔ̀nyɔ̀nu ɖe ɖo ànyi na wo ò.
Wo mu la gbà sè àmèdɔ̃dɔ̃ wòwo be ègbèɖèɖe ke ò!”
Mina Bible © Bible Society of Togo, 2014.