Nàhum 1
1
1Ekèa ye nyi ènu kè Mawu ɖèfiɔ so Ninivè ŋutia. Nàhum kè nyi Ɛlkɔ̀s ŋusùa ŋlɔ̀ ɖèɖèfiɔ kèa ɖo xoma kèa mè.
Tɔhonɔ̀ ɖo vɔ̃vɔ̃, vɔ̀a, nyi xòmèfàtɔ
2Tɔhonɔ̀a, Mawu hùãŋu ku èhlɔ̃biɔtɔ ye be nyi.
Tɔhonɔ̀ nyi èhlɔ̃biɔtɔ, eye yebe àdɔ̀mèze ɖona vɔ̃vɔ̃.
Tɔhonɔ̀ biɔna èhlɔ̃ àmè kèwo crì ìa.
E ɖènà yebe àdɔ̀mèze ɖo yebe èkɛ̃tɔwo ji.
3Tɔhonɔ̀ gbɔ̃nà èjì ɖɛ blɛ̀wù ŋutɔ, eye mu binajì kaba ò.
Vɔ̀a, Tɔhonɔ̀ mu gblena àgɔ̀jèje ɖɛ, èto mà dɔ̃ ò.
Àyapòpo be àdã vùdù vùdù ye nyi èmɔ̃ kè ji Tɔhonɔ̀ zɔ̃nà a,
eye lilikpowo ye nyi hũhũ lè yebe àfɔ̀wo nu.
4E kã ŋùmè na àpù, eye àpùa pu,
eye be na ètɔ̀sisiwo keŋu pu tako.
Basàn be àtikusɛ̃sɛ̃-gblèwo ku Karmèl be àvewo pu
eye Libàn be èsepòpowo yrɔ̀.
5Ètowo hũhũ lè ŋùkɔ̀ na ɛ̀,
eye ètokɔ̃ɛwo srè yì ŋùgbe.
Lè yebe ŋùkɔ̀a, ànyigbã le mlì
kudo e ji nɔ̀tɔwo keŋu.
6Àmè kɛ ye la teŋu nɔ̀tè ɖo yebe èjìbibi nu ò?
Àmè kɛ ye la teŋu nɔ̀ yebe àdɔ̀mèze be fìɔfìɔ nu ò?
Yebe àdɔ̀mèze le bì vlà vlà, sìgbè èzò nène,
eye àkpã mlìgò yìjiwo le wo lè nùkɔ̀ na ɛ̀.
7Tɔhonɔ̀ nyɔ eye be nyi bèbèpe lè àkpɔ̃-zãgbè;
E cɔ̃na àmè kèwo dojì ɖo e ŋutia ji,
8e la sɔ èsìɖɔɖɔ wɔ̀adã hɔ̃ èdùa
be dodoewo jo lè yebe tèpe
eye be la nyà yebe èkɛ̃tɔwo ɖo nu,
kaka yì èku be vìvìti mè ke.
Tɔhonɔ̀ gbà le yɔ Yudà-nyigbã ku Ninivè
9Èse kɛwo ye mì le bla ɖo Tɔhonɔ̀ ŋuti ò?
E la gũ woa nu keŋu,
eye ènu bàɖà mu la gbà jɔ̀, zè èvègɔ̃a ò,
10Ɖoa, ne wo gbà caka sìgbè àŋùjawo nène, eye
woabe àhàwo mu wo ɖekpekpe cã a,
wo la fiɔ̃ keŋu-keŋu sìgbè èbè pupuwo nène.
Àŋɛ̀do na Ninivè
11Èwò, Ninivè mè, ye àmè kè ɖo ètamè bàɖà
ɖo Tɔhonɔ̀ ŋutia to so,
eye be ɖènà àɖàŋù vuɛ̃wo
Àŋɛ̀do na Yudà
12Tɔhonɔ̀ ye gblɔ̃ ɛ̀ be:
“Ne wo sùgbɔ, eye wo sɛ̃ŋu ɖekpekpe cã a,
àgɔ̃ la crɔ̃ woa kpata, eye woa nu la va yì.
Oò Yudà, ne mù dovlo wò sãa,
nyè mu la gbà dovlo wò ke ò.
13Fifìa, mù la ŋɛ̃ yebe èkɔ̀kùti
kè le zĩ wò ɖo ànyi a,
eye mù le ɖè ègà wò.”
Àŋɛ̀do na Ninivè be èfìɔa
14Tɔhonɔ̀ do èse so ŋuti wò be:
“Jìjimèvi ɖekpe mu la so èwò mè,
la sɔ nyikɔ wò ò.
Mù la gbã vòdu tata
ku legba kpàkpa
kèwo ye lè vòdu wòwo
be kuefãpewo.
Mù la kù èyɔ̀do na wo,
ɖoa, wo mu ɖo kpɛ̃kpɛ̃ ò.”
Mina Bible © Bible Society of Togo, 2014.