Nàhum 3
3
Wo do èhlɔ̃dã-dùa ŋutɔ àsi na èhlɔ̃dãdã
1Hèlu na èhlɔ̃dã-dù
kè mè ɖɔ kudo èfĩ fìfi,
eye be gbe be yè mu la nɔ̀tè èhlɔ̃dãdã òa!
2Èsɔba le ɖì! Àhùahũwo be àfɔ̀kuwo le ɖègbè!
Èsɔwo le sidù! Àhùahũwo lè èdù ji!
3Èsɔdotɔwo zrò jè e ji!
Èwuiwo le dàzò!
Èhuãwo le klɛ̃zò!
Àmè sùgbɔ ci àhùa! Wo bɔ̀ àmèkpòtiawo ɖɛ vòvòvò!
Sɛ̃pe mu lè na àmèkukuawo ò,
eye àmèwo le klɛ̃ àmèkukuawo, le jè ànyi.
Àhasìtɔa yrɔ̀, ŋuzĩzĩ mà nɔ̀ e mè
4Ekèawo keŋu jɔ̀, ɖo àhasìtɔa be àgbè bàɖà nɔ̀nɔa ŋuti.
Àhasìtɔ kè be nyɔnyɔ flùnà àmè,
vɔ̀ nyi àzewo be nyɔ̃nùfìɔ
kè be gbòlò-gbè trɔna dùkɔ̃wo zũnà yebe kluviwo,
eye yebe àze blana àmèhawoa.
5Kpɔɖa, mù sitè ɖo ŋuti wò!
Àhùadù Tɔhonɔ̀a ye gblɔ̃ ɛ̀.
Mù la klo àpo kpòyòkpoyoe,
kaka yì cɔ̃ ŋùmè na wò,
mù la sɔ àpo àma fiɔ dùkɔ̃wo,
eye èfìɔduwo la kpɔ àpo ŋùkpɛ̃.
6Mù la kɔ̀ ènu nyɔŋuwo ɖo ŋuti wò.
Mù la ɖìgbɔ wò,
eye mù la na èdù la kpɔ wò.
7Eye àmè ɖekpe kè la kpɔ wòa,
la si jo lè gbɔ wò ku àpa be:
“Ninivè be èdùa gbã!
Àmè kɛ ye la làmɔɛ̃ ɖo e ta ò?
Fikɛ ye mù la kpɔ àsiɖoàkɔ na àmètɔ lè na wò ò?”
Àmè ɖekpekpe be hùenu la va
8Ɖe ye wò nyɔ wu Nɔ-Amɔ̀n#3.8 Èdù kèa nyi blèmà be èfìɔdu na Ejiptè. Sãa, wo yɔna ɛ̀ be Tɛb. Funua, wo tù vòdu Amɔ̀n be kuefãpe ɖo, eye wo yɔna ɛ̀ be Nɔ-Amɔ̀n kè gɔ̃mè nyi Amɔ̀n be èdùa,
èdù kè lè Ejiptè be ètɔ̀ gãa to,
eye èsì trɔ do è gòdòa?
Ètɔ̀ ye nyi yebe èkpa,
eye èsì ye nyi yebe èglì.
9Etiopìatɔ ku Ejiptètɔ gbogboawo
ye nyi yebe ŋusɛ̃ mà-ɖo sɛ̃pe,
Putìtɔwo ku Libìatɔwo
ye nyi yebe xɔ̀namètɔwo
10Gãkea, wo le è àhùale,
Eye be yì gàtɔnugbe.
Wo wù èviawo kãkã ɖo èmɔ̃zɛ̃kpliwo nu.
Wo dà àkɔ̀, le yebe àgbònùglawo,
eye wo do kɔ̀sɔ̀kɔsɔ yebe àmègãwo.
11E va jè wò ca ji wò fifì, be wòa nù vevesèse be àhàa!
Eye, ne wò le jè ànyi lè èkɛ̃tɔa be ŋùkɔ̀a,
wò la ji wawlape!
La sɔ bè do èkɛ̃tɔ wòwo
Èdù sɛ̃ŋua gbɔjo kpàtà
12Àgbògbò wòwo keŋu lè sìgbè ègboti
kèwo ji èkusɛ̃sɛ̃ ɖìɖi ye yèwo lèa nène;
ne wò gbe hũhũ wo kpòa,
Ègbòawo la gɛ̃ jè ènu mè
na àmè kè la ɖù woa.
13Kpɔ àhùakɔ̃ wòwo ɖa,
woawo keŋu lè sìgbè nyɔ̃nùwo nène.
Mìabe èdù be àgbowo lè hũhũ gbàa na èkɛ̃tɔwo,
ɖoa, èzò fiɔ̃ woabe lɔkèwo.
14Kù èsì ɖɛ na hùenu kè wo la trɔ do èdù wò,
la zĩ mìa jia.
Ɖo èglì sɔ kpe èkpa wòwo,
eye gbãdãgbã ne jè gbãdãgbã ji,
lè àgbògbò wòwo mè.
Nyà ànyikɔ, sɔ mè èkpe,
ne wòa jrà èglìawo ɖo.
15Funua ye èzò la ɖù wò lè,
Èwui la flì wò,
wo la vũvũ wò,
sìgbè lekè hùesuviwo vũvũna ègbe nène.
Èdù kè ɖɔ ku àgbètɔa ci gbalo zè ɖèka
Mì jì ɖo e ji! Mì sùgbɔ sìgbè hùesuviwo nène!
Gãke, wo la vũvũ mì!
Mì jì ɖo e ji! Mìabe dùkɔ̃a ne lɔ hòo sìgbè tìkpo-tìkpowo nène!
Wo la vũvũ mì keŋu-keŋu!
16Kè wò na àjɔdotɔ wòwo sùgbɔ
kaka wu wètriviwo lè jiŋùkusia,
ekè wò hlà èdùa,
wò zrò jo, sìgbè hùesuvi kèwo le zròa nène.
17Èdɔjikpɔtɔ wòwo sùgbɔ sìgbè hùesuviwo nène;
àgbònùgla wòwo sùgbɔ sìgbè hùesuvi be èha gã ɖe
kèwo va jè ɖo èdùa be èglìkpawo mè,
lè àvìvɔ zã gbèa nène.
Vɔ̀a, ekè èwè gbà to kpòa,
wo gbà zrò jo,
eye àmè ɖekpe mu nya
àfi kè wo yì ò.
18Àsur be èfìɔ gã,
àlɛ̃kplɔ̀tɔ wòwo yì àlɔ̃ mè!
Àhùaŋùkɔ̀nɔ̀tɔ wòwo dɔ̃ àlɔ̃ mà vɔ!
Dùkɔ̃ wòwo kãkã ɖo ètowo ji,
eye àmè ɖekpe mu lè,
la bɔ̀ wo ɖodu ò!
Àmè kè xixea vɔ̃naa xɔ̀ èku-bi
19Ènu ɖekpe mu la teŋu wù àpo àbìa ò.
Àbì wòa, èku-bi ye be nyi.
Àmè ɖekpekpe kè la sè àpo ènyàa,
la pò àsikpe ku jìjɔɛ be wò jè ànyi.
Ɛ̃ɛ, àmè kɛ ŋuti ye àpo èvuɛ̃jɔ̀jɔ
be àbì mu lè ò?
Mina Bible © Bible Society of Togo, 2014.