Màteo 9
9
Yesù dà èdɔ̀ na dɔ̀nɔ̀kplibɔ ɖe
(Mrk 2.1-12; Luk 5.17-26)
1Yesù ɖo ètɔ̀jihũ ɖe mè, trɔgbɔ̀ va yebe èdù mè#9.1 Èdù mè: e le nyi Kapɛrnaum be èdùa ɖo funu ye Yesù tu ètaci lè (17.24-27). E wɔ̀ ŋùdãnu sùgbɔ lè funu.. 2Eye kpɔɖa, wo kɔ dɔ̀nɔ̀kplibɔ ɖe va na ɛ̀, lè ànyi mɔmlɔ̃ lè àba ji. Eye ekè Yesù kpɔ àlekè wo xɔ̀sè ɖoa, e gblɔ̃ na dɔ̀nɔ̀kplibɔa be: “Èvi nyè, àgbɔ̃ ne jèpò na wò, wo sɔ àpo ènuvuɛ̃wo kè wò.” 3Kè èsefiɔtɔwo sè ènyà kèa, wo gblɔ̃ lè woa nɔ̀nɔwo dòmè be: “Ŋusù kèa le gblɔ̃ bùsu-nya ɖo Mawu ŋuti.” 4Kè Yesù nya ènu kè wo le susua, e gblɔ̃ na wo be: “Nukɛ ŋuti mì le ɖè susu vuɛ̃ ŋuawo ɖo ò? 5Ènyà kɛ be gbɔ̃gblɔ̃ ye lè bɔ̀bɔɛ ɖe wu lè ènyà kèawo dòmè ò? 'Wo sɔ àpo èvuɛ̃wo kè wò', àlo 'Sitè ne wòa zɔ̃'? 6Vɔ̀a, ne mìa nya be *Àgbètɔ be Èvia ɖo ŋusɛ̃ lè ànyigbã ji ne bèa sɔ èvuɛ̃ kè àmèa”, Wàlɛbɛ ŋua, e to na dɔ̀nɔ̀kplibɔa be: “Sitè, ŋlɔ̃ àba wòa, ne wòa yì àxomè.” 7Eye ŋusùa sitè, yì àxomè. 8Kè àmèwo kpɔ ènu kè jɔ̀ a, vɔ̃vɔ̃ ɖo wo, eye, wo na gogo Mawu kè na ŋusɛ̃ kèa hati àgbètɔwoa.
Yesù yɔ Màteo
(Mrk 2.13-17; Luk 5.27-32)
9Kè Yesù jo lè funua va le yìa, e kpɔ ŋusù ɖe kè wo yɔna be Màteo-a nɔ̀ ànyi lè èdɛ̃jɔ̀xɔ mè. Yesù gblɔ̃ na ɛ̀ be: “Jè yo nyè mè!” Eye, e sitè, kpàsà ɛ̀ do. 10Ekè Yesù le ɖù ènu lè Màteo be àxomèa, e va jɔ̀ be, èdɛ̃jɔ̀tɔ sùgbɔ ku ènuvuɛ̃wɔ̀tɔ buwo va nɔ̀ ànyi lè funu, lè ɖù ènu ku Yesù kudo yebe nukplaviwo. 11Kè Farizìwo kpɔ ènu kèa, wo to na yebe nukplaviawo be: “Nukɛ ŋuti mìabe Àpetɔa ɖùnà ènu ku èdɛ̃jɔ̀tɔwo kudo ènuvuɛ̃wɔ̀tɔwo ɖo ò?” 12Kè Yesù sè ènyà kè wo le gblɔ̃a, e gblɔ̃ be: “Mu nyi àmè kèwo lè sɛ̃sɛ̃ɖea, wo ye hiã èdɔ̀dàtɔ ò, vɔ̀a dɔ̀nɔ̀wo bòhũ ye. 13Vɔ̀a, mì yì, ne mìa ji ènyà kèa be gɔ̃mè sè: 'Ŋuzĩzĩkuku ye mù jro, mu nyi vɔsa ò', ɖo nyè mu va la yɔ àmèjɔ̀jɔɛwo ò, vɔ̀a èvuɛ̃wɔ̀tɔwo bòhũ.”
Yesù fiɔ ènu so ènubabla ŋuti
(Mrk 2.18-22; Luk 5.33-39)
14Yòhanɛ̀s Mawusilènamètɔa be nukplaviwo va Yesù gbɔ, biɔ ɛ̀ be: “Nukɛ ŋuti ye miawo yaa mi blana ènu, eji-eji, Farizìwo cã blana ènu, eji-eji, vɔ̀a àpo nukplaviwo yaa mu blana ènu ò?” 15Vɔ̀a, Yesù ɖoeŋuti na wo be: “Àmè kèwo wo yɔ va àlɔ̀lepea teŋu bla ènu wàlɛbɛ kè nyɔ̃nùkpetɔa lè ku woa? Vɔ̀a, èŋù ɖewo la va kè, ekè wo la sɔ nyɔ̃nùkpetɔa jo lè woa gbɔ, àzã ŋuawo ji ye wo la bla ènu lè.”
16“Àmè ɖe mu sɔna àvɔ-nuɖèɖe yeye tana àwù xoxo ò; ɖo àvɔ-nuɖèɖe yeyea la na àwù xoxoa la zɛ̃, eye zɛ̃zɛ̃ yeyea, la nyrã wu xoxoa. 17Àmè ɖe cã mu kɔ̀nà vɛ̃ yeye ɖo èlãgbàzegò xoxowo mè ò. Đo, ne wo wɔ̀ nènea, èlãgbàzegòawo la wo, vɛ̃a cã la kɔ̀ ŋùgbe, eye wo la gu àmè. Vɔ̀a, vɛ̃ yeyea, èlãgbàzegò yeyewo mè bòhũ ye wo kɔ̀nà ɛ̀ ɖo, eye vɛ̃a ku èlãgbàzegòawo, nɔ̀nà nyuɛ̃ ɖe.”
Yesù dà èdɔ̀ na nyɔ̃nù ɖe eye be fɔ̃ Jayirò be nyɔ̃nùvi
(Mrk 5.21-43; Luk 8.40-56)
18Wàlɛbɛ kè Yesù le gblɔ̃ ènyà kèawo na woa, Yudàviwo be èga ɖe va e gbɔ, blìbɔ̀ lè ŋùkɔ̀ na ɛ̀, gblɔ̃ be: “Èvi nyè nyɔ̃nùvi ku èzã ɖe kèa, vɔ̀a va, ne wòa sɔ àpo àlɔ̀ ɖo e ji, eye, e la gbɔ̀ àgbè.” 19Yesù sitè, eye ye ku yebe nukplaviwo kpàsà Yudàviwo be ègaa do.
20Nyɔ̃nù ɖe kè ŋuti èhũ ŋɛ̃ŋɛ̃ be èdɔ̀ lè, so èpè woèvè sɔ̃ŋua, to Yesù be ŋùgbe dòmè, tɔ àsi yebe àwù be ètomè. 21Đo, e le gblɔ̃ lè ye ɖokoe mè be: “Ne mù gbe tɔ àsi yebe àwù ŋuti kpòa, mù la gã.” 22Yesù trɔ, kpɔ nyɔ̃nùa, gblɔ̃ na ɛ̀ be: “Èvi nyè, àgbɔ̃ ne jèpò na wò! Àpo xɔ̀sèa hlùɛ̃ wò gã.” Eye èdɔ̀a jè e mè na nyɔ̃nùa zè ɖèka.
23Kè Yesù yì Yudàviwo be ègaa be àxomè, eye be kpɔ èzèkutɔ kèwo va na àmè ɖìɖi, ku àmè sùgbɔ kèwo lè wɔ̀ zigìdi lè funuawoa, e gblɔ̃ na wo be: 24“Mì to lè fikèa, ɖo tùgbɛ̀jɛvia mu ku ò, e le dɔ̃ àlɔ̃ ye.” Wo tɔ ɛ̀ kòko. 25Kè wo ɖè àmèwo toa, Yesù ɖo èxɔ̀a mè; e le ɖèvia be àlɔ̀; nyɔ̃nùvia fɔ̃, eye be sitè. 26Ènyà kèa kãkã ɖo àgo ŋua kpata ji.
Yesù dà èdɔ̀ na ŋùvìnɔ̀ èvè
27Kè Yesù jo lè funu va le yìa, ŋùvìnɔ̀ èvè jè e yomè. Wo le do àpa sɛ̃sɛ̃ɖe gblɔ̃ be: “*David be èvi, ku ŋuzĩzĩ na mi!”
28Kè Yesù ɖo àxomèa, ŋùvìnɔ̀awo gogo e, eye, e biɔ wo be: “Mì xɔ̀sè be mù teŋu hũ ŋùkuvi na mìa?” Wo ɖoeŋuti na ɛ̀ be: “Ɛ̃ɛ, Àpetɔ.” 29Kè wo gblɔ̃ nènea, Yesù tɔ àsi woabe ŋùkuviwo, gblɔ̃ be: “Ènu kè mì xɔ̀sèa ne va e mè na mì.” 30Eye woabe ŋùkuviwo hũ. E yomèa, Yesù gbe na wo sɛ̃sɛ̃ ɖe be wo mu gbà na ne àmè ɖe bèa nya ò. 31Vɔ̀a, kè wo jo lè funua, wo tɔ ènu kè Yesù wɔ̀a gbɔ̃gblɔ̃ lè àgo ŋua kpata ji.
Yesù dà èdɔ̀ na àmumui ɖe
32Wàlɛbɛ kè ŋùvìnɔ̀ kèwo Yesù dà èdɔ̀ na a, wo le yìa, àmèwo kplɔ̀ ŋusù àmumui ɖe kè mè gbɔ̃gbɔ̃ vuɛ̃ lèa va na Yesù. 33Kè Yesù nyà gbɔ̃gbɔ̃ vuɛ̃ a toa, ŋusùa tɔ nupo pòpo zè ɖèka. Ènu kè jɔ̀ a kpaca àmèhaawo, eye wo le gblɔ̃ be: “Mi mu kpɔ ènu kèa hati jɔ̀ lè Izràɛl kpɔ ò!” 34Vɔ̀a Farizìwo gblɔ̃ be: “Gbɔ̃gbɔ̃ vuɛ̃wo be àpetɔ ye na ɛ̀ ŋusɛ̃ kè be sɔ le nyà gbɔ̃gbɔ̃ kèawo.”
Àmèha màɖo kplɔ̀tɔ
35Yesù to èdù gãwo kpata ku kɔpewo kpata mè. E fiɔna ènu lè bɔ̀bɔ̀pewo. E dona Mawu be èfìɔɖùɖua be àŋɛ̀nyuɛ̃ a, dànà èdɔ̀ sia èdɔ̀ ku lãmè-gblegblewo. 36Kè be kpɔ àmèhawoa, woabe ènu wɔ̀ ŋuzĩzĩ na ɛ̀, ɖo ènu tìkɔ̀ na wo, àgbɔ̃ cã kpe wo, eye wo lè sìgbè àlɛ̃ kèwo mu ɖo kplɔ̀tɔ òa nène. 37Ye ŋutia, e gblɔ̃ na yebe nukplaviwo be: “Nukuyàyaa sùgbɔ, vɔ̀a, èdɔwɔ̀tɔwo mu sùgbɔ ò. 38Ye ŋutia, mì fãkue na ènukuyàya be àpetɔa ne bèa ɖo èdɔwɔ̀tɔwo ɖoɖa yebe ènukuyàyaa mè.”
Mina Bible © Bible Society of Togo, 2014.