Màteo 8
8
Yesù dà èdɔ̀ na èkpònɔ̀ ɖe
(Mrk 1.40-45; Luk 5.12-16)
1Gãke mè Yesù ɖì so ètoa jia, àmèha gã ɖe kpàsà ɛ̀ do. 2Kpɔɖa èkpònɔ̀ ɖe va e gbɔ, jè èklò lè ŋùkɔ̀ na ɛ̀, gblɔ̃ be: “Àpetɔ ne wò jro a, wò teŋu wɔ̀ ne ma kɔ̀.” 3Yesù drɛ̃ àlɔ̀, tɔ ɛ̀ àsi, gblɔ̃ na ɛ̀ be: “Mù jro, àpo ŋuti ne kɔ̀.” Eye, ŋusùa be èdɔ̀a vɔ̀ zè ɖèka. 4E yomèa, Yesù gblɔ̃ na ɛ̀ be: “Kpɔ nyuɛ̃ ɖe, mù gbà gblɔ̃ na àmè ɖe ò, vɔ̀a, yì sɔ ɖokoe wò fiɔ mawunɔa, ne wòa savɔ kè be ènyà Mosè gblɔ̃ so ŋutikɔ̀kɔ ŋutia ne àmè sia àmè bèa nya be wo dà èdɔ̀ na wò nyàwo.”
Àhùagaa be xɔ̀sè
(Luk 7.1-10; Yòh 4.43-54)
5Wàlɛbɛ kè Yesù ɖo Kapɛrnaum-a, Romà be àhùaga ɖe kè kpàcɛ̀ na gbãdãgbã èkà èvè takpoa, va e gbɔ, ɖèkuku na ɛ̀. 6E gblɔ̃ na ɛ̀ be: “Àpetɔ, sumɔ̃vi nyè ŋusù ɖe kplibɔ, lè àba ji, lè àxomè; e le sè veve ŋutɔ.” 7Yesù gblɔ̃ na ɛ̀ be: “Ma yì dà èdɔ̀ na ɛ̀.” 8Vɔ̀a, Romà be àhùagaa ɖoeŋuti na ɛ̀ be: “Àpetɔ nyè mu jè ne wòa ɖo àxue nyè mè ò. Gbe ɖè ègbè kpò, èdɔ̀ a la vɔ̀ na sumɔ̃vi nyè a. 9Đo nyè ŋutɔ a, ŋùkɔ̀nɔ̀tɔ nyèwo kpàcɛ̀ na mù, eye, nyè cã mù kpàcɛ̀ na gbãdãgbã ɖewo. Ne mù to na woa dòmètɔ ɖe be: 'Yì' a, e yìnà. Ne mù to na àmè èbu be: 'Va' a, e vana; eye ne mù to na kluvi nyè be: 'Wɔ̀ ekè a', e wɔ̀nà ɛ̀.” 10Kè Yesù sè ènyà kèawoa, e kpaca#8.10 Kpaca: e le nyi jìjɔɛ ɖe kè va Yesù mè wàlɛbɛ kè be sè ènyà kèa. ɛ̀, eye e gblɔ̃ na àmè kèwo kpàsà ɛ̀ do a be: “Nyàwo mù le to na mì. Lè Izràɛlviwo dòmèa, nyè mu kpɔ àmè ɖe kè ɖo xɔ̀sè kèa hati ò. 11Mù le to na mì be, àmè sùgbɔ la so èwèzɛ̃pe ku èwèɖoxɔ̀pe, la va nɔ̀ ànyi la ɖù ènu ku Abràham, Izàk ku Yakɔb lè Mawu be fìɔdua mè. 12Vɔ̀a, àmè kèwo ɖo la nyi fìɔdua be ècrɔ̃ɖùtɔwoa, wo la sɔ wo dãŋùgbe ɖo e godo, lè vìvìti mè; funu ye wo la fã àvi, la ɖù àɖuklui lè.”
13E yomèa, Yesù gblɔ̃ na àhùagaa be: “Yì àxomè, ènu kè wò xɔ̀sèa ne va e mè na wò.” Àhùagaa be sumɔ̃vi ŋusùa be èdɔ̀a vɔ̀ zè ɖèka.
Yesù dà èdɔ̀ na àmè sùgbɔ
(Mrk 1.29-34; Luk 4.38-41)
14Eye ekè Yesù va yì yebe *nukplavi Petrò be àxomèa, e kpɔ Petrò be lɔ̃xo lè ànyi mɔmlɔ̃, ɖo àvìvɔ le wɔ̀ ɛ̀. 15Yesù tɔ àsi àlɔ̀ na ɛ̀, eye àvìvɔa jo lè e ji. Nyɔ̃nù kèa sitè xɔ̀ Yesù àmèjro.
16Ekè fìɛ̃si ɖoa, wo kplɔ̀ àmè kèwo be lãmè gbɔ̃gbɔ̃ vuɛ̃wo lèa va Yesù gbɔ. E ɖè ègbè, nyà gbɔ̃gbɔ̃ vuɛ̃awo to lè woabe lãmè, eye e dà èdɔ̀ na dɔ̀nɔ̀wo kpata, 17ne ènyà kè Mawu be gblɔ̃ɖɛtɔ Ezayà gblɔ̃a ne zɔ̃ sù be: “E ye sɔ miabe gbɔ̀jɔ̀gbɔjɔwo, eye be dro miabe èdɔ̀wo.”
Àmè kèwo jro be yèwoa jè Yesù yomèa
(Luk 9.57-62)
18Kè Yesù kpɔ be àmè kèwo kpàsà yè do a sùgbɔa, e to na yebe nukplaviwo be: “Mì na ne mia fla#8.18 Fla: wo gbà gblɔ̃nà be do àta; sò ètɔ̀. ètɔ̀a yì àgo ɖèa ji.” 19Èsefiɔtɔ ɖe va Yesù gbɔ, to na ɛ̀ be: “Ènufiɔtɔ mù la kpàsà wò do yì àfi kèwo kpata wò la yìa.” 20Yesù gblɔ̃ na ɛ̀ be: “Wɛ̀tɛ̀klɛ̀wo ɖo woabe nɔ̀pewo eye àyamè xèviwo ɖo woabe àtɔ̃wo, vɔ̀a *Àgbètɔ be Èvia mu ɖo àfi kè be la sɔ èta dà ɖo ò.”
21Ŋusù bu, kè nyi Yesù be nukplaviwo dòmètɔ ɖèkaa gblɔ̃ na ɛ̀ be: “Ènufiɔtɔ, na ne ma yì ɖì ètɔ nyè keŋu gbɔ̀xue.” 22Vɔ̀a, Yesù gblɔ̃ na ɛ̀ be: “Kpàsà mù do. Tàsi àmèkukuwo woa ɖì woa ŋutɔwo be àmèkukuwo.”
Yesù tɔtè àya sɛ̃sɛ̃
(Mrk 4.35-41; Luk 8.22-25)
23Yesù ku yebe nukplaviwo ɖo ètɔ̀jihũ ɖe mè. 24Kè wo le yìa, àya sɛ̃sɛ̃ ɖe tɔ pòpo lè ètɔ̀a ji, àleke be àsrɔ̀kewo le cɔ̃ èhũa. Wàlɛbɛ ŋua, Yesù ya lè dɔ̃ àlɔ̃. 25Nukplaviawo gogo è, fɔ̃ ɛ̀, gblɔ̃ na ɛ̀ be: “Àpetɔ, va hlùɛ̃ mi gã, mi la ku.” 26Yesù gblɔ̃ na wo be: “Nukɛ ŋuti mì le vɔ̃ ɖo ò? Xɔ̀sèvitɔwo#8.26 Xɔ̀sèvitɔwo: àmè kèwo be xɔ̀sè mu kpɔ likè òa. .” E yomèa, Yesù sitè, ɖè ègbè ɖo àyaa ku ètɔ̀a ji, eye èɖa ɖo see. 27Ènu kè jɔ̀ a kpaca Yesù be nukplaviwo ŋutɔ, eye wo gblɔ̃ be: “Àmè kɛ ŋùmè ye nyi ŋusù kèa, eye àya ku ètɔ̀ ŋutɔ cã sènà ègbè na ɛ̀ ò?”
Gadaratɔ èvè kèwo mè gbɔ̃gbɔ̃ vuɛ̃wo lèa
(Mrk 5.1-20; Luk 8.26-39)
28Ekè e jè àgo ɖèa ji, lè Gadaratɔwo#8.28 Gadara: Gadara, Geraza ku Genezarɛtè èdù ɖèka ye. be ànyigbã jia, àmè èvè ɖe kèwo mè gbɔ̃gbɔ̃ vuɛ̃wo lèa, va dogò è. Wo to so èyɔ̀dowo mè, wo jiŋɔ àleke be àmè ɖe mu gbà teŋu tona èmɔ ŋua ji ò. 29Wo tɔ àpa dodo gblɔ̃ be: “Mawu be Èvi, nukɛ ye lè mia ku èwò dòmè ò? Wò va fikèa la dɔ̃ èto na mi keŋu gbɔ̀xue Mawu be gà mèa la sùa?”
30Vɔ̀a, èhã sùgbɔ ɖewo lè àzɔ̀ge, le ɖùnu lè funua. 31Gbɔ̃gbɔ̃ vuɛ̃awo ɖèkuku na Yesù be: “Ne wò la nyà mi toa, na mia yì ɖo èhã ŋuawo mè.” 32Yesù gblɔ̃ na wo be: “Mì yì.” Eye wo to yì ɖo èhãawo mè. Èhãwo kpata pu dù gblì gblì so ètoa ji, jè àpù mè zè ɖèka. Eye wo ku ci èsìa mè. 33Àmè kèwo le kpɔ èhãawo jia, pudù yì gblɔ̃ ènu kèwo kpata jɔ̀ a na àmèwo lè èdùa mè; wo gbà gblɔ̃ ènu kè jɔ̀ ɖo ŋusù èvè kèwo mè gbɔ̃gbɔ̃ vuɛ̃wo nɔ̀ sãa cã ji. 34Èdùamètɔwo kpata to be yèwoa yì kpɔ Yesù. Kè wo kpɔ ɛ̀a, wo fãkue na ɛ̀ be, bèa jo lè yèwo be àgowo ji.
Mina Bible © Bible Society of Togo, 2014.