Màteo 10
10
Àmèdɔ̃dɔ̃ woèvèawo
(Mrk 3.13-19; Luk 6.12-16)
1Eye kè Yesù yɔ yebe *nukplavi woèvèawo va ye ɖokoe gbɔa, e na wo ŋusɛ̃ ɖo gbɔ̃gbɔ̃ màkɔ̀màkɔwo ji, ne woa nyà wo to, woa dà èdɔ̀wo ku lãmè-gblegblewo kpata. 2*Àmèdɔ̃dɔ̃ woèvèawo be nyikɔ ye nyi ekèawo: jè ŋùkɔ̀a, Simɔ̀n, kè wo yɔna be Petròa ku Ãdre, nɔ̀viaa. E yomèa Yakobò ku nɔ̀viaa, Yòhanɛ̀s kèwo nyi Zebedeo be èvi-ŋusùwo. 3Sɔ kpe èa, Filipò ku Bartelemeo, Tomà kudo Màteo, èdɛ̃jɔ̀tɔa, Yakobò, Alfeò be èvia, ku Tadeo. 4Wu e nua, Simɔ̀n, àvũ drɛ̃tɔ na yebe èdùa ku Yudà Iskariɔt àmè kè xɔ̀kpli na ɛ̀a.
Àmèdɔ̃dɔ̃awo be èdɔ do àsi
(Mrk 6.7-13; Luk 9.1-6)
5Yesù dɔ̃ àmè woèvè kèawo, e do ègbè kèawo àsi na wo be: “Mì mu gbà yì àgbàlèwo gbɔ ò; mì mu gbà yì ɖo Sàmarìatɔwo be èdù ɖe mè ò. 6Vɔ̀a, mì yì Izràɛl be àlɛ̃ bubuawo gbɔ bòhũ. 7Eye ne mì le yìa, mì nɔ̀ do àŋɛ̀a be: 'Mawu be èfìɔɖùɖua gogo vɔ̀!' 8Mì dà èdɔ̀ na dɔ̀nɔ̀wo; mì fɔ̃ àmè kukuwo; mì na èkpònɔ̀wo be ŋuti ne kɔ̀; mì nyà gbɔ̃gbɔ̃ vuɛ̃wo to. Fàa ye mì xɔ̀. Mì na ɛ̀ fàa. 9Mì mu gbà sɔ sìka, àlo klòsalò, àlo ègà ɖo mìabe àkpòwo mè ò. 10Mì mu gbà sɔ àkpɛtɛ ò; mì mu gbà sɔ àwù bu wu ekè lè èkɔ̀ na mìa ò; mì mu gbà hɛ̃ àfɔ̀kpa àlo èkpò ò. Nyàwo ye be nyi be èdɔwɔ̀tɔ ɖo la ɖù ènu.”
11“Eye èdù sia èdù, àlo kɔpe sia kɔpe kè mè mì la ɖoa, mì biɔ àmè kè sù la xɔ̀ mìa ta. Mì zɛ̃ nènemea gbɔ kaka na gà kè mè mì la jo lè funua. 12Ne mì ɖo àxue ɖe mèa, mì do ègbè na àxuea mè tɔwo. 13Ne àxue kèa jè a, mìabe ŋuti fàfa ne va e ji. Vɔ̀a ne mu jè òa, mìabe ŋuti fàfa ne gbìgbɔ̀ va na mì. 14Ne wo mu xɔ̀ mì ò, àlo wo mu ɖo èto mì òa, mì hũhũ mìabe àfɔ̀kɔ kɔ̀ ɖɛ ne mìa jo lè funu. 15Nyàwo mù le to na mì: lè kòjoɖoɖo zãgbèa, Sodɔ̀mtɔwo ku Gòmɔràtɔwo be ètodɔ̃ la bɔ̀bɔ̀ wu èdù kèa mè tɔwo tɔ̀.”
Èfũkpekpe kèwo lè nɔ̀tè kpɔ àmèdɔ̃dɔ̃awoa
(Mrk 13.9-13; Luk 21.12-17)
16“Kpɔɖa, mù le dɔ̃ mì sìgbè àlɛ̃wo nène ɖoɖa gbètewo dòmè. Ye ŋutia, mì jè àyè sìgbè èdãwo nène; mì fa sìgbè àhɔ̃nɛwo nène. 17Mì jè àyè, ɖo àgbètɔwo la do mì àsi na kòjoɖotɔwo, eye, wo la pò mì ku àtãŋù lè bɔ̀bɔ̀pewo. 18Wo la kplɔ̀ mì yì dùjiɖùtɔwo ku èfìɔwo be ŋùkɔ̀, ɖo ŋuti nyè, ne mìa ɖù ɖase lè woa ku àgbàlèwo be ŋùkɔ̀. 19Wàlɛbɛ kè wo la kplɔ̀ mì yì kòjoɖopea, mì mu gbà nɔ bù ètamè so ènu kè mì la gblɔ̃, àlo àlekè mì la gblɔ̃ ɛ̀ ɖoa ŋuti ò; wo la na mì ènyà kèwo mì la gblɔ̃a lè gà ŋua mè tututu. 20Đo mu nyi mìawo ye la pò nupo ò, vɔ̀a, mìa Tɔ be Gbɔ̃gbɔ̃ a ye la pò nupo lè mìa mè. 21Nɔ̀vi la do nɔ̀via àsi na èku, eye ètɔ la do èvia àsi, eye èviwo la sitè ɖo woabe àjìtɔwo ŋuti, eye wo la gblehùɛ do wo na èku. 22Eye àmèwo kpata la crì mì ɖo ŋuti nyè. Vɔ̀a, àmè kè la dojì kaka yì vɔ̀vɔnua, àmè ŋua la gã. 23Ne wo tĩ mìa yomè lè èdù ɖe mèa, mì si yì èdù bu mè. Nyàwo mù le to na mì: mì mu la kpɔ to Izràɛl be èdùwo kpata mè keŋu gbɔ̀xue *Àgbètɔ be Èvia la va ò.”
24“*Nukplavi mu wuna yebe ènufiɔtɔ ò, eye sumɔ̃vi cã mu wuna yebe àpetɔ ò. 25E sù be *nukplavi bèa nɔ̀ sìgbè yebe ènufiɔtɔ nène, eye sumɔ̃vi cã sìgbè àpetɔa nène. Ne wo yɔ àxuetɔa be Bɛlzebul-a, àleke ye wo mu la yɔ yebe àxomètɔwo cã wu nène ò?”
Àmè kè mì ɖo la vɔ̃a
(Luk 12.2-7)
26“Ye ŋutia, mì mu gbà vɔ̃ àgbètɔwo ò. Ènu ɖekpe mu la nɔ̀ wawla mè kè wo mu la ɖe sia ò, eye ènu ɖekpe mu la nɔ̀ bèbe mè kè mu la va gàglàgbè ò. 27Ènu kè mù gblɔ̃ na mì lè vìvìti mèa, mì gblɔ̃ ɛ̀ lè kɔ̀kɔ̀ɛ mè, eye ènu kè mù ɖèkpa gblɔ̃ na mìa, mì do àpa gblɔ̃ ɛ̀ le èdù tòpò. 28Mì mu gbà vɔ̃ àmè kèwo wùnà ŋutilã, vɔ̀ wo mu teŋu wù èkla ò. Mì vɔ̃ Mawu bòhũ, ɖo e yaa teŋu wù ŋutilã ku èkla, lè èzò màvɔ mè. 29Àfixèvi èvè be ègà mu sù ènu ɖe ò. Vɔ̀a, woa dòmètɔ ɖèka mu gɛ̃na, ne mu nyi mìa Tɔ be jro ò. 30Eye èɖà kèwo lè èta na mìa ŋutɔ cã nyi ènu hɛ̃hlɛ̃. 31Ye ŋutia, mì mu gbà vɔ̃ ò! Đo mì xɔ̀ àsì wu àfixèviwo fuu.”
Mia hũ Kristò mè, àlo mia gbe è
(Luk 12.8-9)
32“Àmè ɖekpekpe àmè kè la gblɔ̃ lè àmèwo be ŋùmè be yè nyi nukplavi nyèa, nyè cã mù la gblɔ̃ lè Ètɔ nyè kè lè jiŋùkusia be ŋùmè be e nyi nukplavi nyè. 33Vɔ̀a, àmè ɖekpekpe àmè kè la gbe ènu lè ŋuti nyè lè àgbètɔwo be ŋùmèa, nyè cã mù la gbe ènu lè nène mèa ŋuti lè Ètɔ nyè kè lè jiŋùkusia be ŋùmè.”
Mu nyi ŋuti fàfa ò, vɔ̀a àhùa
(Luk 12.51-53; 14.26-27)
34“Mì mu gbà susu be ŋutifàfa ye mù hɛ̃ va ànyigbã ji ò. Nyè mu hɛ̃ fàfa va ò, èwui ye mù hɛ̃ va. 35Ɛ̃ɛ, mù va ne èvi-ŋusù ne sitè ɖo ètɔa ŋuti; ne èvi-nyɔ̃nù ne sitè ɖo ènɔa ŋuti; ne lɔ̃xoyɔvi nyɔ̃nù ne sitè ɖo lɔ̃xoa ŋuti, 36eye àmè ŋutɔ be àxomètɔwo la nyi yebe kɛ̃tɔwo. 37Àmè kè lɔ̃ ètɔa àlo ènɔa wu mùa, mu la teŋu nyi nukplavi nyè ò. Eye àmè kè lɔ̃ èvia ŋusù àlo èvia nyɔ̃nù wu mùa, mu jè la nyi nukplavi nyè ò. 38Àmè kè mu sɔ yebe àtisògaa, jè yo nyè mè òa, mu jè la nyi nukplavi nyè ò. 39Àmè kè la ji yebe àgbè a, la bu ì; vɔ̀a, àmè kè la bu yebe àgbè ɖo ŋuti nyèa, la gbìgbɔ̀ kpɔ ɛ̀.”
Àmè kè xɔ̀ mìa, xɔ̀ nyè cã
(Mrk 9.41)
40“Àmè kè xɔ̀ mìa, xɔ̀ mù, eye àmè kè xɔ̀ mùa, xɔ̀ àmè kè dɔ̃ mù ɖoɖaa. 41Àmè kè xɔ̀ Mawu be gblɔ̃ɖɛtɔ, ɖo e nyi Mawu be gblɔ̃ɖɛtɔ ŋutia, la xɔ̀ Mawu be gblɔ̃ɖɛtɔ be àjɔ̀; eye, àmè kè xɔ̀ àmèjɔ̀jɔɛ, ɖo e nyi àmèjɔ̀jɔɛ ŋutia, la xɔ̀ àmèjɔ̀jɔɛ be àjɔ̀. 42Nyàwo mù le to na mì, àmè kè la na èsì fàfa kɔpò ɖèka nukplavi nyèwo dòmètɔ ɖe, ɖo e nyi nukplavi nyè ŋutia, mu la bu yebe àjɔ̀ ò.”
Mina Bible © Bible Society of Togo, 2014.