Màteo 28
28
Yesù fɔ̃ so èku
(Mrk 16.1-10; Luk 24.1-12; Yòh 20.1-10)
1Lè Kuasiɖa be ŋùkèkè cucugbãa gbe, lè jɛ̃gbɔ̃zã yomèa, Mari Magdalà tɔ̀a ku Mari ɖètɔawo fɔ̃ zã la yì kpɔ Yesù be èyɔ̀doa. 2Eye kpɔɖa, ànyigbã hũhũ ku hɔ̃hlɔ̃, eye Tɔhonɔ̀ be àtikplɔtɔ ɖe so jiŋùkusi va mlì èkpe kè wo sɔ tu èyɔ̀doa nua jo, eye be nɔ̀ ànyi ɖo e ji. 3*Àtikplɔtɔa be nɔ̀nɔmè lè sìgbè èjikèzò nène, eye yebe àwù ɣe peŋu-peŋu. 4Ekè gbãdãgbã kèwo le ɖia Yesù be èyɔ̀doawo kpɔ ɛ̀a, vɔ̃vɔ̃ ɖo wo eye wo le hũhũ tìtìtì. Wo jè ànyi, lè sìgbè àmè kukuwo nène. 5Vɔ̀a, àtikplɔtɔa gblɔ̃ na nyɔ̃nùawo be: “Mìawo yaa, mì mu gbà vɔ̃ ò, ɖo mù nya be Yesù kè wo ka ɖo àtisòga ŋutia ye mì le ji. 6Mu lè fikèa ò, ɖo e fɔ̃ so èku sìgbè àlekè ye ŋutɔ gblɔ̃ na mì sãa nène. Mì va kpɔ àfi kè wo sɔ ɛ̀ mlɔ̃ a ɖa. 7Mì ɖè bla yì to na yebe nukplaviwo be: 'E fɔ̃ so àmè kukuwo dòmè vɔ̀. E jè ŋùkɔ̀ na mì le yì Galilea, funu ye mì la kpɔ ɛ̀ lè.' Kpɔɖa mù gblɔ̃ ɛ̀ na mì.” 8Nyɔ̃nùawo ɖèbla jo lè èyɔ̀doa to. Wo le vɔ̃, gãke èjì gbà le jɔ̀ wo ŋutɔ. Wo pu dù va yì do àŋɛ̀a na Yesù be nukplaviawo. 9Eye kpɔɖa, Yesù va dogò wo, eye be gblɔ̃ na wo be: “Mù do ègbè na mì.” Wo tètè gogo è, le yebe àfɔ̀wo, eye wo sumɔ ɛ̀. 10Wàlɛbɛ ŋua, Yesù to na wo be: “Mì mu gbà vɔ̃ ò, mì yì, ne mìa to na nɔ̀vi nyèwo be woa yì Galilea; funu ye wo la kpɔ mù lè.”
Gbãdãgbãwo ɖù ɖase
11Eye wàlɛbɛ kè nyɔ̃nùawo lè èmɔ ji le yìa, gbãdãgbã kèwo le ɖia Yesù be èyɔ̀doa dòmètɔ ɖewo va Yèruzàlɛm. Wo gblɔ̃ ènu kèwo keŋu jɔ̀awo na * mawunɔ gãwo. 12*Mawunɔ gãwo ku èdùmèmègãwo bɔ̀, bù èta mè so ènyà kè gbãdãgbãwo va gblɔ̃ na woa ŋuti. Wo na ègà sùgbɔ gbãdãgbã kèawo, 13bla èse ku wo be: “Mì to na àmèwo be: 'Yesù be nukplaviwo zɔ̃ èzã va fĩ yebe àmètia, wàlɛbɛ kè mi le dɔ̃ àlɔ̃a.' 14Eye ne dùjiɖùtɔa gbà sè cã a, mi la fa ɛ̀, eye wo mu la do nupo na mì ò.” 15Gbãdãgbãwo xɔ̀ ègàa, wɔ̀ ɖo ènu kè wo fìɔ woa ji. Eye ènyà kèa kãkã ɖo Yudàviwo dòmè kaka va na egbè.
Yesù ɖè yeɖokoe fiɔ yebe nukplaviwo
(Mrk 16.14-18; Luk 24.36-49; Yòh 20.19-23; Dɔw 1.6-8)
16 *Nukplavi woeɖèkaawo yì Galilea, lè èto kè Yesù fiɔ àsi na wo sãa ji. 17Wo kpɔ Yesù lè funu, sumɔ ɛ̀; vɔ̀a woa dòmètɔ ɖewo do àɖìkà. 18Yesù tètè gogo wo, gblɔ̃ ènyà kèawo na wo be: “Wo sɔ ŋusɛ̃ kè lè jiŋùkusi ku ànyigbã jia kpata do àsi na mù. 19Mì yì ne mìa fiɔ ènu dùkɔ̃wo keŋu, ne woa trɔ zũ àpe nukplaviwo. Mì lè mawusi na wo, lè Àta ku Èvia kudo Gbɔ̃gbɔ̃ Kɔ̀kɔ̀ɛ a be nyikɔ mè. 20Mì fìɔ wo ènu, ne woa wɔ̀ ɖo ènu kèwo keŋu mù fiɔ mìa ji. Kpɔɖa, mù lè ku mì kaka sɔ na xixea be vɔ̀vɔnu.”
Mina Bible © Bible Society of Togo, 2014.