Màteo 27
27
Wo kplɔ̀ Yesù yì Pilatò gbɔ
(Mrk 15.1; Luk 23.1-2; Yòh 18.28-32)
1Ekè èŋù kèa, * mawunɔ gãwo kpata ku èdùmèmègãwo bɔ, pò nupo, ɖo èkpe e ji ɖo Yesù ŋuti be, yèwo la gblehùɛ do è na èku. 2Eye ekè wo bla Yesù vɔ̀a, wo kplɔ̀ ɛ̀ to, sɔ ɛ̀ yì do àsi na dùjiɖùtɔ Pilatò.
Yudà be èku
(Dɔw 1.18-19)
3Kè Yudà, àmè kè do Yesù àsia, kpɔ be wo gblehùɛ do èa, ènu kè be wɔ̀a ve è. E sɔ klòsalò-ga ègbãawo yì na * mawunɔ gãawo ku dùmèmègãawo, 4gblɔ̃ be: “Mù jè àgɔ̀, mù do èhũ mà-nyãɖe àsi.” Vɔ̀ a, wo to na ɛ̀ be: “Fikɛ eŋuã kã mi ɖo ò? Èwò ye be kã.” 5Eye Yudà sɔ klòsalò-ga a dãŋùgbe ɖo kɔ̀kɔ̀ɛpe a gbɔ, eye be jo. E yomè a, e yì do èkà ève#27.5 E do èkà ève: e do èkà èkɔ̀, àlo e do èkà èhlò. . 6Mawunɔ gãawo yì cã klòsalò-gaawo, gblɔ̃ be: “Miabe *èse mu ɖè èmɔ̃ na mi be mi a sɔ ègà kè a do ènujɔ̀ɖakà a mè ò, ɖo èhlɔ̃ dãdã be ègà ye be nyi.” 7Eye, ekè wo jrò ènyà a mè kpɔ nyuɛ̃ ɖe a, wo ɖo ègbè du, sɔ ègà a plè èze-mètɔ ɖe be àgblè. Wo sɔ àgblè ŋua wɔ̀ àmèjrowo be ɖìpe. 8Ènu kè a ŋuti ye wo yɔna àgblè ŋua be: “Èhũ be àgblè” kaka va na egbè. 9Wàlɛbɛ ŋua, Mawu be gblɔ̃ɖɛtɔ Yeremìa be ènyà, kè be gblɔ̃ ɖɛ a, zɔ̃ sù be: “Wo sɔ klòsalò-ga ègbã, àmè kè ta wo do àsì ɖoa be èci, àmè kè ta ye Izràɛlviwo do àsì ɖoa. 10Wo sɔ ɛ̀ plè èzemètɔ be àgblè, sìgbè àlekè Tɔhonɔ̀ ɖè ègbè na mùa nène.”
Pilatò biɔ ènyà Yesù
(Mrk 15.2-5; Luk 23.3-5; Yòh 18.33-38)
11Kè Yesù va dùjiɖùtɔ Pilatò be ŋùkɔ̀a, dùjiɖùtɔa biɔ ɛ̀ be: “Èwò ye nyi Yudàviwo be èfìɔa?” Yesù ɖoeŋuti be: “Èwò ye le gblɔ̃ ɛ̀.” 12Vɔ̀a, wàlɛbɛ kè mawunɔ gãawo ku dùmèmègãawo le dohùɛ do èa, mu kè ènu ò. 13Eye Pilatò gblɔ̃ na ɛ̀ be, “Wò mu le sè ènyà gbogbo kè wo le gblɔ̃ so ŋuti wòa?” 14Vɔ̀a, Yesù mu ɖo ènyà ɖekpe ŋuti ò, eye, e kpaca dùjiɖùtɔa ŋutɔ.
Wo gblehùɛ do Yesù
(Mrk 15.6-15; Luk 23.13-25; Yòh 18.39—19.16)
15Lè àzã ɖùɖu hùenua, Romà be dùjiɖùtɔa, ɖènà gàmènɔ̀tɔ kè àmèhaa biɔa ɖèka to lè ègàkpa mè. 16Lè gà ŋua mèa, wo ɖo gàmènɔ̀tɔ ɖèka kè àmèwo keŋu jèsi, wo yɔna ɛ̀ be Yesù Barabas. 17Kè dùkɔ̃a va bɔ̀a, Pilatò biɔ wo be: “Àmè kɛ ye mì jro be ma ɖè to lè ègàkpa mè na mì ò? Yesù Barabas ye loo, àlo Yesù kè wo yɔna be Kristò?” 18Đo e nya nyuɛ̃ ɖe be ŋuhuã ŋuti ye wo do è àsi na yè ɖo. 19Wàlɛbɛ kè e nɔ̀ ànyi lè kòjoɖo-zìkpea jia, èsrɔ̃a dɔ̃ àmè ɖoɖa ɛ̀ be: “Mù gbà ɖo ènu ɖekpe ku àmèjɔ̀jɔɛ ŋua ò, ɖo, egbè, èzã mè, lè èdrɔ̃ mèa, mù kpe èfũ sùgbɔ ɖo e ŋuti.”
20Vɔ̀a, mawunɔ gãawo ku dùmèmègãawo, zĩ àmèhaa ji, ne woa biɔ Pilatò be, bèa ɖè Barabas to lè ègàkpa mè ne bèa wù Yesù. 21Dùjiɖùtɔa gbà biɔ wo be: “Àmè kɛ ye mì jro be ma ɖè to lè ègàkpa mè na mì lè àmè èvè kèawo dòmè ò?” Wo ɖoeŋuti na ɛ̀ be: “Barabas mi le ji.” 22Pilatò biɔ wo be: “Nukɛ ye mù la wɔ̀ na Yesù kè wo yɔna be Kristò ò?” Woa kpata wo ɖoeŋuti na ɛ̀ be: “Ka ɛ̀ ɖo àtisòga ŋuti!” 23Pilatò gbà biɔ wo be: “Àgɔ̀ kɛ ye be jè ò?” Vɔ̀a, wo do àpa sɛ̃sɛ̃ ɖe be: “Ka ɛ̀ ɖo àtisòga ŋuti!” 24Eye ekè Pilatò kpɔ be, wɔ̀na ɖekpe mu gbà lè ò, vɔ̀ bòhũ èzĩ ji la tɔ̀a, e sɔ èsì klɔ àlɔ̀ lè àmèhaa be ŋùmè, gblɔ̃ be: “Nyè mu nya èɖe lè èhũ kèa be kɔ̀kɔ̀ ɖɛ mè ò. Mìa ŋutɔwo mìabe ènyà ye!” 25Eye dùkɔ̃a kpata ɖoeŋuti be: “Yebe èhũ ne nɔ̀ mia ku miabe èviwo ji.” 26Wàlɛbɛ ŋua, Pilatò ɖè Barabas to lè ègàkpa mè na wo. E na wo pò Yesù ku àtãŋù#27.26 Àtãŋù: èlãba: Èba kè wo sɔ pònà àmè lè àdɔ̀ mè kpa mè a. . E yomèa, e do è àsi na gbãdãgbãwo, ne woa ka ɛ̀ ɖo àtisòga ŋuti.
Gbãdãgbãwo ɖè àlɔmè le Yesù ŋuti
(Mrk 15.16-20; Yòh 19.2-3)
27Wàlɛbɛ ŋua Pilatò be gbãdãgbãwo kplɔ̀ Yesù yì dùjiɖùtɔa be èfìɔsaa mè, eye wo bɔ̀ gbãdãgbãwo be èhaa kpata ɖo e ŋuti. 28Wo ɖè àwù kèwo lè e ŋutiawo, eye wo sɔ àwù jɛ̃ vlàyà ɖe do na ɛ̀. 29Wo sɔ àŋùja lɔ̃ jègbà#27.29 Jègbà: fìɔkuku kè wo cɔ̃ na a., sɔ cɔ̃ èta na ɛ̀. Wo ji àpla #27.29 Àpla: plãŋùpòti kè mu trìnà òa, wo gbà yɔna ɛ̀ be plãŋùpòfɛ̃. do ɖùsi-lɔ mè na ɛ̀, eye wo jè èklò ɖo ŋùkɔ̀ na ɛ̀, le kò è be: “Mi do ègbè na wò, Yudàviwo be èfìɔ.” 30Wo tu ètã kɔ̀ ɖo e ŋuti, eye wo xɔ̀ àplaa lè e si, sɔ pò èta na ɛ̀. 31Kè wo ɖè àlɔ̀mè lè e ŋuti vɔ̀a, wo ɖè àwù jɛ̃ vlàyàa lè èkɔ̀ na ɛ̀. Wo gbìgbɔ̀ sɔ ye ŋutɔ be àwùwo do na ɛ̀. E yomèa, wo kplɔ̀ ɛ̀ yì, ne woa ka ɛ̀ ɖo àtisòga ŋuti.
Wo ka Yesù ɖo àtisòga ŋuti
(Mrk 15.21-32; Luk 23.26-43; Yòh 19.17-27)
32Kè wo to lè funu va le yìa, wo dogò Kirenè ŋusù ɖe, ekè wo yɔna be Simɔ̀n. Gbãdãgbãwo zĩ e ji, be bèa dro Yesù be àtisògaa. 33Kè wo va tèpe kè wo yɔna be Golgatàa, ekè be gɔ̃mèɖèɖe ye nyi “Àmètatèpea”, 34wo sɔ vɛ̃ kè wo caka ku ègbe veve ɖe a na Yesù ne bèa nù. Vɔ̀a, ekè e ɖɔ vɛ̃a kpɔa, e gbe be yè mu la nù ì ò. 35Wàlɛbɛ kè wo ka ɛ̀ vɔ̀a, wo dà àkɔ̀ sɔ ma yebe àwùwo. 36E yomèa, wo nɔ̀ ànyi, lè ɖia ɛ̀. 37Lè yebe èta gbea, wo ŋlɔ̀ àgɔ̀ kè be jè a be: “Àmè kèa ye nyi Yesù, Yudàviwo be èfìɔa.” 38Eye wo ka fĩãfìtɔ èvè bɔ̀ ɖo e ŋuti, ɖèka ɖo ɖùsi mè, èvègɔ̃a ɖo èmìɔ̃ mè.
39Àmè kèwo le to funu, va le yìawo le hũhũ èta, le zũ ì, 40le gblɔ̃ be: “Èwò kè be yèa gbã kɔ̀kɔ̀ɛpea, la gbìgbɔ̀ tù ì lè ŋùkèkè ètɔ̃ mèa yeŋuã? Hlùɛ̃ ɖokoe wò gã. Ne Mawu be Èvi ye wò nyi nyàwo a, ɖì lè àtisògaa ŋuti.” 41Mawunɔ gãwo ku èsefiɔtɔwo kudo èdùmèmègãwo cã le ɖè àlɔmè lè ŋuti. Wo gblɔ̃ na ɛ̀ be: 42“E hlùɛ̃ àmè buwo gã, vɔ̀a mu teŋu hlùɛ̃ ye ɖokoe gã ò. Mu nyi Izràɛl be èfìɔ ye be gblɔ̃ be yè nyia? Ne ɖì le àtisògaa ŋuti fifì, eŋuãa, mi la xɔ̀ e ji sè. 43E be yè dojì ɖo Mawu ŋuti; ne Mawu lɔ̃ ɛ̀ nyàwo a, ne hlùɛ̃ ɛ̀ gã fifì; ɖo e gblɔ̃ be: 'Mù nyi Mawu be Èvi.'” 44Eye fĩãfìtɔ kèwo wo ka bɔ̀ ɖo e ŋutiawo cã le zũ ì.
Yesù ku
(Mrk 15.33-41; Luk 23.44-49; Yòh 19.28-30)
45So gà woèvè mè kaka va yì gà ètɔ̃ mèa, vìvìti do lè èdùa kpata mè. 46Lè gà ètɔ̃ mè lɔ̀gea, Yesù do àpa sɛ̃sɛ̃ ɖe gblɔ̃ be: “Eli, Eli, Lama sàbatanì?” E gɔ̃mè ye nyi: “Mawu nyè, Mawu nyè, nukɛ ŋuti ye wò gble mù ɖɛ ɖo ò?” 47Àmè kèwo nɔ̀tè lè funu a dòmètɔ ɖewo sè ènu kè be gblɔ̃ a, eye wo gblɔ̃ be: “E le yɔ Eli!” 48Eye àmè ɖèka lè woa dòmè pu dù yì sɔ àpùmè-kùsa nyrɔ̃ ɖo vɛ̃ vesì mè, sɔ ɛ̀ ɖo àpla dìdi ɖe nu. E drɛ̃ àpla kè a ɖoɖa Yesù, ne bè a nù. 49Vɔ̀ a, àmè kpɔ̀tɛawo gblɔ̃ be: “Tɔtè ne mi a kpɔ be Eli la va hlùɛ̃ ɛ̀ gã màa?”
50Vɔ̀ a, kè Yesù gbà do àpa sɛ̃sɛ̃ ɖe a, e jo yebe gbɔ̃gbɔ̃ a na. 51Eye, kpɔɖa, xɔ̀mèsòvɔ kè lè Kɔ̀kɔ̀ɛpe a zɛ̃ ɖo èvè, so èji va gɔ̃mè; ànyigbã a hũhũ, eye àkpãwo fɛ̃. 52Èyɔ̀dowo hũ, eye Mawu be àɖèsãme kèwo ku va yìa, sùgbɔ fɔ̃ so èku. 53Wo to lè woabe èyɔ̀dowo mè. Ekè Yesù fɔ̃ yomèa, wo ɖo Yèruzàlɛm, èdù kɔ̀kɔ̀ɛa mè, eye àmè sùgbɔ kpɔ wo. 54Kè àhùagaa ku àmè kèwo bɔ̀ ɖo e ŋuti le ɖia Yesùa, wo kpɔ àlekè ànyigbãa hũhũ ɖoa, ku àlekè ènuwo yì ɖoa, vɔ̃vɔ̃ gã ɖe jè woa ji, eye wo gblɔ̃ be: “Mawu be Èvi ye àmè kèa nyi nyàwo.” 55Nyɔ̃nù kèwo kpàsànà Yesù do, kpena ɖo e ŋutiawo sùgbɔ kplɔ̀ ɛ̀ do so Galilea va funua. Wo lètè lè àzɔ̀ge le kpɔ ènu kèwo le jɔ̀ a ɖoɖa. 56Mari Magdalà tɔ̀a, ku Mari kè nyi Yakobò ku Yozɛ̀f be ènɔa, kudo Zebedeo be viwo be ènɔ̀ lè woa dòmè.
Yesù be ɖìɖi
(Mrk 15.42-47; Luk 23.50-56; Yòh 19.38-42)
57Keŋu gbɔ̀xue èzã la do a, ŋusù àdɔ̀kùnɔ̀ Arimatètɔ̀ ɖe va, wo yɔna ɛ̀ be Yozɛ̀f. Yesù be *nukplavi ye e cã nyi. 58Ŋusù kèa yì Pilatò gbɔ, biɔ Yesù be àmètia. Pilatò na ègbè gbãdãgbãwo be woa sɔ ɛ̀ na ɛ̀. 59Yozɛ̀f ɖè Yesù be àmètia jo lè àtisòga ŋuti, sɔ ɛ̀ bla ɖo kploba xɔ̀asì yeye ɖe mè, 60sɔ ɛ̀ yì mlɔ̃ èyɔ̀do yeye kè wo kù ɖo àkpã mè na ye ŋutɔa mè. Yozɛ̀f mlì èkpe gã ɖe ɖo èyɔ̀doa nu, eye be jo. 61Mari Magdalà tɔ̀a ku Mari ɖètɔawo nɔ̀ ànyi lè funu, jè ŋùkɔ̀ èyɔ̀doa.
Gbãdãgbãwo ɖia Yesù be èyɔ̀do
62Lè ŋùkèkè kè jè jàjràɖo be àzãa yomèa, mawunɔ gãwo ku Farizìwo zɔ̃ ɖodu yì Pilatò gbɔ. Wo gblɔ̃ na ɛ̀ be: 63“Àpetɔ, mì ɖoŋù be wàlɛbɛ kè àmèflùtɔ ŋua kpɔ̀tɔ̀ lè àgbè a, e gblɔ̃ be: 'Mawu la fɔ̃ mù so èku lè ŋùkèkè ètɔ̃gɔ̃a gbè.' 64Ye ŋutia, na ne gbãdãgbãwo ne yì ɖia èyɔ̀doa nyuɛ̃ ɖe, kaka na ŋùkèkè ètɔ̃gɔ̃a gbè. Ne mu nyi nène òa, yebe nukplaviwo teŋu fĩ yebe àmètia, la gblɔ̃ be: 'E fɔ̃ so èku vɔ̀.' Àmèfùflu kèa la nyrã wu cucugbã tɔ̀a.” 65Eye Pilatò gblɔ̃ na wo be: “Gbãdãgbãwo yeŋuã. Mì kplɔ̀ wo, ne woa yì ɖia èyɔ̀doa, sìgbè àlekè mì jro a nène.” 66Wo yì tu èyɔ̀doa nyuɛ̃ ɖe, do e jèsìdo. Wo sɔ gbãdãgbãwo ɖo funua.
Mina Bible © Bible Society of Togo, 2014.