Màteo 26
26
Wo bla èse ɖo Yesù ŋuti
(Mrk 14.1-2; Luk 22.1-2; Yòh 11.45-53)
1Kè Yesù gblɔ̃ ènyà kèawo keŋu vɔ̀a, e gblɔ̃ na yebe nukplaviwo be: “Mì nya be lè ŋùkèkè èvè yomèa, wo la ɖù Toŋutivayì be àzãa. 2Wo la sɔ *Àgbètɔ be Èvia do àsi ne woa ka ɛ̀ ɖo àtisòga ŋuti.”
3Wàlɛbɛ ŋua, * mawunɔ gãwo ku èdùmèmègãwo bɔ̀ lè mawunɔ gã kè wo yɔna be Kayafà be èfìɔsa mè, 4eye wo pò ɖodu be, yèwo la le Yesù ku àyè, la wù ì. 5Wo gblɔ̃ be: “Mu gbà nyi lè àzãa gbè, ne àmèhaa bèa tɔ̀zĩ ò.”
Wo sì àmì na Yesù lè Betanìa
(Mrk 14.3-9; Yòh 12.1-8)
6Yesù va Betanìa, lè Simɔ̀n èkpònɔ̀a#26.6 Simɔ̀n èkpònɔ̀a: ye nyi Simɔ̀n kè Yesù dà èkpòdɔ na va yìa. be àxomè. 7Nyɔ̃nù ɖe va e gbɔ, hɛ̃ àmì huɛ̃ titi, xɔ̀ ci ɖe kè lè àlùbatrò be ègòvi mèa ɖo àsi. Nyɔ̃nùa kɔ̀ àmì huɛ̃ titia ɖo èta na Yesù, wàlɛbɛ kè be le ɖù ènua. 8Kè Yesù be nukplaviwo kpɔ ènu kèa, àdɔ̀mè ve wo ŋutɔ eye wo gblɔ̃ be: “Ènu gugu kɛ ye nyi ekèa ò? 9Đo wo teŋu sà àmì huɛ̃ titi kèa èci sùgbɔ, la sɔ yebe ègàa ma na wɔ̀amènɔ̀wo.”
10Kè Yesù nya ɛ̀a, e gblɔ̃ na wo be: “Nukɛ ŋuti ye mì le do nupo na nyɔ̃nù kèa ɖo ò? Ènu nyuɛ̃ ye be wɔ̀ na mù. 11Đo wɔ̀amènɔ̀wo la nɔ̀ ku mì tɛ̀gbɛ̀. Vɔ̀a ènyè yaa, nyè mu la nɔ̀ ku mì, kaka sɔ yì ò. 12Đo ekè e kɔ̀ àmì huɛ̃ titi kèa ɖo ŋuti nyèa, e wɔ̀ ɛ̀ na àpe ɖìɖi. 13Nyàwo mù le to na mì: àfi sia àfi kè wo la do àŋɛ̀nyuɛ̃ kèa lè, lè xixe kplògòdòa mèa, wo la gblɔ̃ ènu kè nyɔ̃nù kèa wɔ̀a cã lè yebe ŋùɖo mè.”
Yudà be kplixɔ̀xɔ
(Mrk 14.10-11; Luk 22.3-6)
14Eŋuã yomèa, àmè kè tɔ̀ Yudà Iskariɔt lè Yesù be *nukplavi woèvèawo dòmèa, yì kpɔ * mawunɔ gãwo, 15eye e gblɔ̃ na wo be: “Nukɛ ye mì la na mù, ne mù sɔ Yesù do àsi na mì ò?” Wo hlɛ̃ klòsalò-ga ègbã sɔ na ɛ̀. 16Sò gà ŋua mèa, Yudà le ji gà kè mè la nyɔ ne bèa sɔ Yesù do àsì na woa.
Jàjràɖo na Toŋutivayì be ènu ɖùɖu
(Mrk 14.12-21; Luk 22.7-14, 21-23; Yòh 13.21-30)
17Lè *kpɔ̃nɔ àkpiti be ŋùkèkè cucugbã gbèa, nukplaviawo va gblɔ̃ na Yesù be: “Fikɛ ye wò jro be mia jràɖo ɖɛ na wò, ne wòa ɖù Toŋutivayì-lɛ̃via lè ò?” 18Eye e gblɔ̃ be: “Mì yì èdùa mè, lè ŋusù kèa leke gbɔ. Mì to na ɛ̀ be: 'Ènufiɔtɔa be: àzã nyè lili vɔ̀, gbɔ̀ wò ye mù la ɖù *Toŋutivayì be àzã ku *nukplavi nyèwo lè.'” 19Nukplaviawo wɔ̀ ènu kè Yesù gblɔ̃ na woa, eye wo ɖà Toŋutivayì be ènu ɖùɖua.
20Eye ekè fìɛ̃si ɖoa, Yesù ku nukplavi woèvèawo nɔ̀ ànyi la ɖù ènu. 21Wàlɛbɛ kè wo le ɖù ènua, Yesù gblɔ̃ be: “Nyàwo mù le to na mì. Àmè ɖèka lè mìa dòmè la do mù àsi.” 22Nènea, àkpɔ̃ ɖɔ wo ŋutɔ, eye woa dòmètɔ ɖè sia ɖè le biɔ ɛ̀ be: “Àpetɔ, ènyè ye à?” 23Yesù ɖoeŋuti na wo be: “Àmè kè do àsi àgbãa mè ku mùa ye nyi àmè kè la do mù àsia 24*Àgbètɔ be Èvia le yì, sìgbè àlekè wo ŋlɔ̀ ɛ̀ ɖɛ ɖo e ŋutia nène. Vɔ̀a hèlu na àmè ŋua kè la do Àgbètɔ be Èvia àsia. E la nyɔ na nènemea wu, be wo mu gbà jì ì klua ò.” 25Eye Yudà, àmè kè do è àsia gblɔ̃ be: “Àpetɔ, ènyè ye à?” E gblɔ̃ na ɛ̀ be: “Èwò ye gblɔ̃ ɛ̀.”
Ènuɖùɖu kɔ̀kɔ̀ɛa
(Mrk 14.22-26; Luk 22.14-20; 1Kòr 11.23-25)
26Wàlɛbɛ kè wo le ɖù ènua, Yesù sɔ kpɔ̃nɔ eye ekè e do àkpe na Mawu vɔ̀a, e kã ɛ̀, eye e sɔ ɛ̀ na yebe nukplaviawo. E gblɔ̃ na wo be: “Mì xɔ̀ ne mìa ɖù ì. Ekèa ye nyi àpe ŋutilã.” 27E yomèa, e sɔ kogòa, eye, ekè e do àkpe na Mawu vɔ̀a, e sɔ ɛ̀ na wo, gblɔ̃ be: “Mìa kpata mì nù ì, 28ɖo, ekèa ye nyi àpe èhũ, *zòɖùɖu be hũ kè wo kɔ̀ ɖɛ ɖo àmè sùgbɔ ta, sɔ na èvuɛ̃ be kèkea. 29Mù le to na mì: so ekèa yomèa, nyè mu gbà la nù vɛ̃ kèa, kaka sɔ na àzã ŋua gbè, ekè mù la gbà nù ì ku mì lè Ètɔ nyè be fìɔdua mè ò.” 30Eye ekè wo jì àkpedohàwo vɔ̀a, wo to yì àmìti-toa ji.
Yesù gblɔ̃ be Petrò la gbe yè
(Mrk 14.27-31; Luk 22.31-34; Yòh 13.36-38)
31Wàlɛbɛ ŋua, Yesù gblɔ̃ na wo be: “Mìa kpata mì la kpɔ àfɔ̀klɛ̃ lè èzã kèa mè ɖo ŋuti nyè. Đo wo ŋlɔ̀ ɛ̀ ɖɛ be: 'Mù la pò àlɛ̃kplɔ̀tɔa, eye àlɛ̃haa la kãhlɛ̃.' 32Vɔ̀a ne mù fɔ̃ so èkua, mù la jè ŋùkɔ̀ na mì yì Galilea.” 33Petrò ɖoeŋuti na ɛ̀ be: “Ne àmèwo keŋu la kpɔ àfɔ̀klɛ̃ ɖo ŋuti wò cã, nyè yaa, nyè mu la kpɔ ɛ̀ gbèɖe ò.” 34Yesù gblɔ̃ na ɛ̀ be: “Nyàwo mù le to na wò be, lè èzã kèa mè ŋutɔ cã a, gbɔ̀xue kòklo la ku àtɔa, wò la gbe zè ètɔ̃ be yè mu jèsi mù ò.” 35Vɔ̀a, Petrò gblɔ̃ na ɛ̀ be: “Ne e hiã be ma ku ku wò cã a, nyè mu la gbe wò ò.” Nukplavi kpɔ̀tɛawo kpata cã gblɔ̃ nènea.
Yesù lè Gecemanì
(Mrk 14.32-42; Luk 22.39-46)
36Eŋuã yomèa, Yesù ku yebe nukplaviawo va tèpe ɖe kè wo yɔna be Gecemanìa, eye e gblɔ̃ na wo be: “Mì nɔ̀ fikèa ne ma yì fãkue lè funu ma va.” 37E kplɔ̀ Petrò ku Zebedeo be èvi ŋusù èvèawo ɖo ŋuti. Àkpɔ̃ ɖɔ ɛ̀ eye e ci siayi#26.37 Siayi: ŋuzĩzĩme ku tamèbùbu. 38E gblɔ̃ na wo be: “Èkla nyè ɖɔ ku àkpɔ̃ sìgbè ma ku nène; mì nɔ̀ fikèa, ne mìa nɔ̀ ŋùtè#26.38 Nɔ̀ ŋùtè: nɔ̀ ŋùsà, ŋùzɔ̃ nɔ̀nɔ. ku mù.” 39Eye, e zɔ̃ yì ŋùkɔ̀ vi ɖe, sɔ ŋùmè cɔ̃ ànyi. E fãkue gblɔ̃ be: “Ètɔ nyè, ne e la teŋu nya wɔ̀wɔa, na ne kogò#26.39 Kogò: kɔpò. kèa ne to ŋuti nyè va yì. Mu gbà nyi àpe èjro ò, vɔ̀a ne nyi àpo èjro.” 40E yomèa, e trɔva yebe nukplavi ètɔ̃awo gbɔ, eye e kpɔ wo lè àlɔ̃ mè. E to na Petrò be: “Eŋuãa, mì mu teŋu nɔ̀ ŋùtè gàpòpo ɖèka tètè ku mù òa? 41Mì nɔ̀ ŋùzɔ̃, ne mìa nɔ fãkue, ne mì mu gbà jè tètèkpɔ mè ò. Gbɔ̃gbɔ̃ a ɖo èjro nyuɛ̃, vɔ̀a ŋutilãa gbɔjɔ.”
42E gbà yì fãkue lè àzɔ̀ge zè èvègɔ̃a, be: “Ètɔ nyè, ne kogò kèa mu teŋu to ŋuti nyè, ekè nyè mu la nù ì òa, e ŋua àpo èjro ne nyi wɔ̀wɔ!” 43E yomèa, Yesù gbà trɔva yebe nukplaviawo gbɔ, gbà kpɔ wo lè àlɔ̃ mè ke, ɖo, woabe ŋùkuviwo kpata ci kàɖì. 44E gble wo ɖɛ, eye be gbà yì àzɔ̀ge. E fãkue zè ètɔ̃gɔ̃a, eye be gbà gblɔ̃ ènyà ŋuawo ke. 45E yomèa, e trɔva nukplaviawo gbɔ, gblɔ̃ na wo be: “Mì gbà le dɔ̃ àlɔ̃ eye mì jo le gbɔ̃jɛ̃a? Gà kè mè wo la sɔ Àgbètɔ be Èvia do àsi na ènuvuɛ̃wɔ̀tɔwoa sù vɔ̀. 46Mì sitè, ne mia jo. Kpɔɖa, àmè kè la do mù àsia va ɖo vɔ̀!”
Wo le Yesù
(Mrk 14.43-50; Luk 22.47-53; Yòh 18.3-12)
47Eye wàlɛbɛ kè e kpɔ̀tɔ̀ le pò nupoa, kpɔɖa Yudà kè nyi nukplavi woèvèawo dòmètɔ ɖèkaa, va ɖo. Àmè sùgbɔ kpàsà ɛ̀ do. Wo hɛ̃ èwui ku èkpò. Mawunɔ gãwo ku Yudàviwo be èdùmèmègãwo ye dɔ̃ wo ɖoɖa. 48Àmè kè le do Yesù àsia na wo jèsì ɖe be: “Àmè kè mù la kisì na a ye, mì le è.” 49Kè e gogo Yesù zè ɖèkaa, e gblɔ̃ na ɛ̀ be: “Mù do ègbè na wò Ènufiɔtɔ!” Eye e kisì na ɛ̀. 50Yesù gblɔ̃ na ɛ̀ be: “Èxlɔ̃ nyè wɔ̀ ènu kè ŋuti wò va ɖoa.” Eye àmè kèwo kpàsà Yudà doawo jè Yesù ji, le è. 51Eye kpɔɖa àmè kèwo lè ku Yesùa, dòmètɔ ɖèka ɖè yebe èwui to lè àku mè. E dà èwuia mawunɔ gãa be sumɔ̃vi, kpà èto na ɛ̀. 52Wàlɛbɛ ŋua, Yesù gblɔ̃ na ɛ̀ be: “Gbìgbɔ̀ èwui wòa ɖo ye tèpe, ɖo àmè kèwo keŋu sɔna èwuia, èwui kè wo la sɔ wù wo. 53Wò susu be nyè mu la teŋu biɔ Ètɔ nyè, ne bèa ɖo àtikplɔtɔ kèwo la wu àhùakɔ̃ woèvèa ɖoɖa mù òa. 54Vɔ̀a, ne mù wɔ̀ nènea, àleke ye ènu kèwo wo ŋlɔ̀ ɖɛ ɖo mawunya xoma a mèa la zɔ̃ sù ɖo be ekèawo ɖo la jɔ̀ ò?”
55Eye Yesù gblɔ̃ na àmèhawo be: “Fìãfìtɔ ye mù nyi, ye mì sɔ èwui ku èkpò la va le mùa? Gbè sia gbèa, mù nɔ̀nà mawuxɔa mè, fiɔna ènu, gãke mì mu le mù ò. 56Vɔ̀a, ekèa jɔ̀ ne gblɔ̃ɖɛtɔwo be ŋɔ̀ŋlɔ̃awo ne zɔ̃ sù.” Eye nukplaviawo kpata gble è ɖɛ, si jo.
Yesù lè èdùnyagbɔ̃gblɔ̃ be kòjoɖotɔwo be ŋùkɔ̀
(Mrk 14.53-65; Luk 22.54-55, 63-71; Yòh 18.13-14, 19-24)
57Àmè kèwo le Yesùa, kplɔ̀ ɛ̀ yì mawunɔ gã Kayafà gbɔ, lè àfi kè èsefiɔtɔwo ku èdùmèmègãwo bɔ̀ lèa. 58Petrò kpàsà Yesù do, vɔ̀a mu gogo è ò. E nɔ̀ àzɔ̀ge kaka yì mawunɔ gãa be àxomè, nɔ̀ ànyi ku sumɔ̃viwo, ne bèa teŋu nya àlekè ènuwo la vɔ̀ ɖoa.
59Vɔ̀a, Mawunɔ gãwo ku àmè kèwo lè èdùnyagbɔ̃gblɔ̃ be kòjoɖotɔwo be èhabɔ̀bɔ#26.59 Kòjoɖotɔwo be èhabɔ̀bɔ: wo gbà gblɔ̃nà be Sànɛ̀drɛ̃ lè frãse gbe mè. mèawo kpata le ji àmè kè la ɖù àjè ɖase ɖo Yesù ŋuti ne woa teŋu sò èku kòjo na ɛ̀a. 60Àmè sùgbɔ va ɖù àjè ɖase ɖo e ŋuti, vɔ̀a, ènyà kèwo wo gblɔ̃ so e ŋutiawo mu sù ne woa sò èku kòjo na ɛ̀ ò. Mɛmlɛ̃ nua, àmè èvè ɖewo va ɖo, gblɔ̃ be: 61“Àmè kèa gblɔ̃ be: 'Mù teŋu gbã mawuxɔa, eye mù la gbìgbɔ̀ tù ì lè ŋùkèkè ètɔ̃ mè.'” 62Mawunɔ gãa sitè, biɔ ɛ̀ be: “Ènu kè àmè kèawo gblɔ̃ so ŋuti wòa yeŋu. Wò ɖo ènu ɖe la sɔ ɖo e ŋuti na woa?” 63Vɔ̀a, Yesù bɔ̀nu. Eye mawunɔ gãa gblɔ̃ na ɛ̀ be: “Mù le biɔ wò lè Mawu àgbè-àgbè a be nyikɔ mè be, ne èwò ye nyi *Mɛ̀sia, Mawu be Èvia, to è na mi.” 64Yesù ɖoeŋuti na ɛ̀ be: “Wò gblɔ̃ ɛ̀, eye, mù le to na mì be, so ekèa yomèa, mì la kpɔ Àgbètɔ be Èvia la nɔ̀ ànyi lè Ŋusɛ̃kpatatɔa be ɖùsi mè, gbãnà lè jiŋùkusi be lilikpowo mè.” 65Ekè mawunɔ gãa sè ènyà kèa, e zɛ̃ àwù kè be do a, gblɔ̃ be: “E gblɔ̃ bùsu-nya, ɖase kɛwo ye mi gbà hiã ò. Mìa ŋutɔwo mì sè àlekè ye be gblɔ̃ bùsu-nya ɖo Mawu ŋuti ɖo fifìa. 66Nukɛ ye mì bù so e ŋuti ò?” Wo ɖoeŋuti na ɛ̀ be: “E jè na èku!” 67Wàlɛbɛ ŋua, wo tu ètã kɔ̀ ɖo ŋùmè na ɛ̀, wo tù èkɔ̃ ɛ̀, eye àmè buwo pò èto mè na ɛ̀, 68gblɔ̃ be: “Kristò, gblɔ̃ àmè kè pò wò fifìa na mi!”
Petrò gbe Yesù
(Mrk 14.66-72; Luk 22.56-62; Yòh 18.15-18, 25-27)
69Wàlɛbɛ ŋua, Petrò nɔ̀ ànyi lè àxuea mè, lè xixenu, mawunɔ gãa be sumɔ̃vi nyɔ̃nù ɖèka va e gbɔ, gblɔ̃ na ɛ̀ be: “Èwò cã wò nɔ̀ Yesù Galileatɔa ŋuti kpɔ.” 70Vɔ̀a Petrò gbe lè àmè kèwo lè funua kpata be ŋùmè be: “Nyè mu mɔnu jè ènyà kè wò le gblɔ̃a ŋuti ò.” 71Eye ekè Petrò zɔ̃ le yì àxuea be àgboa jia, sumɔ̃vi nyɔ̃nù bu kpɔ ɛ̀, gblɔ̃ na àmè kèwo lè funua be: “Àmè kèa nɔ̀ ku Yesù Nazarɛttɔ̀a kpɔ.” 72Eye, Petrò gbà gbe kaka kã àtãŋu ɖo e ji be: “Nyè mu jèsi ŋusù ŋua ò.”
73E yomè, zè ɖèkaa, àmè kèwo nɔ̀tè lè funua, wo va Petrò gbɔ, gblɔ̃ na ɛ̀ be: “Nyàwo ye, woa dòmètɔ ɖèka ye wò cã wò nyi, ɖo àpo nupo pòpo cã ɖè è fiɔ.” 74Wàlɛbɛ ŋua, e tɔ ènu tàta ku kpɛ̃sɛ̃ na ye ɖokoe gblɔ̃ be: “Nyè mu jèsi ŋusù kèa ò.” Gà ŋua mè tututua, kòklo ku àtɔ. 75Eye Petrò ɖoŋù ènyà kè Yesù gblɔ̃ na ɛ̀ sãa be: “Gbɔ̀xue kòklo la ku àtɔa, wò la gbe mù zè ètɔ̃.” Petrò to jè àgboanu, fã àvi veve ɖe.
Mina Bible © Bible Society of Togo, 2014.