Màteo 21
21
Yesù be Yèruzàlɛm yìyi
(Mrk 11.1-11; Luk 19.28-40; Yòh 12.12-19)
1Wàlɛbɛ kè wo gogo Yèruzàlɛm, eye wo va ɖo Bɛtfagè, lè àmìti-toa#21.1 Àmìti-to: èto kè ji wo do àmìtiwo ɖoa. jia, Yesù dɔ̃ *nukplavi èvè, 2gblɔ̃ na wo be: “Mì yì kɔpe kè lè ŋùkɔ̀ na mìa mè, ne mì ɖo funu troloa, mì la kpɔ èsɔ-àkɛtɛ ɖe lè èkà mè, eye èvia lè e gbɔ; mì tu èkà na wo ne mìa kplɔ̀ wo va na mù. 3Eye ne àmè ɖe gblɔ̃ ènyà ɖe na mìa, mì ɖoeŋuti na ɛ̀ be: 'Àpetɔa ye le hiã wo', eye e la tàsi wo na mì.”
4Ekèa jɔ̀ ne ènyà kè gblɔ̃ɖɛtɔa gblɔ̃a ne zɔ̃ sù be:
5“Mì to na Yèruzàlɛmtɔwo be:
'Kpɔɖa, èfìɔ wòa gbãnà gbɔ wò,
e ɖɔ ku fàfa, eye be lè èsɔ-àkɛtɛ kè nyi èdɔwɔ̀lã be èvi ji.'”
6Yesù be nukplaviwo yì, eye wo wɔ̀ ènuawo kpata sìgbè àlekè Yesù gblɔ̃ na woa nène. 7Wo kplɔ̀ èsɔ-àkɛtɛa ku èvia va, eye wo ɖè woabe àwùwo ɖo woa ji, eye Yesù nɔ̀ ànyi ɖo e ji. 8Àmè sùgbɔ ɖo woabe àwùwo, ɖo èmɔa ji. Àmè ɖewo sò àtiwo be àlɔ̀zɛ̃wo ɖo èmɔa ji. 9Eye àmèha kèwo lè ŋùkɔ̀ na Yesùa, ku kèwo lè ŋùgbedòmè na ɛ̀a, wo le do àpa, gblɔ̃ be: “Hozanà na *David be Via! Sìtu ɖèɖe ye e nyi na àmè kè gbãnà lè Tɔhonɔ̀ be nyikɔ mèa! Gogo na Mawu lè jiŋùkusi hũi!”
10Kè Yesù ɖo Yèruzàlɛm-a, èdù-amètɔ̀wo keŋu tɔ̀zĩ le gblɔ̃ be: “Àmè kɛ ye nyi àmè kèa ò?” 11Eye àmèhawo ɖoeŋuti be: “Yesù, Mawu be gblɔ̃ɖɛtɔ kè so Nazarɛ̀t lè Galilea nyigbã jia ye.”
Yesù nyà àsìsàtɔwo to lè mawuxɔa mè
(Mrk 11.15-19; Luk 19.45-48; Yòh 2.13-22)
12Eye Yesù ɖo mawuxɔa mè. E nyà àmè kèwo keŋu le sà ènu ku àmè kèwo le plè ènu lè mawuxɔa mèawo to. E mù ègàɖɔ̀lìtɔwo be èkplɔ̃wo, ku àmè kèwo le sà àhɔ̃nɛa be àzìkpewo. 13Eye, e gblɔ̃ na wo be: “Wo ŋlɔ̀ ɛ̀ ɖɛ be: 'Àxue nyèa, wo la yɔ ɛ̀ be kuefãpe.' Vɔ̀a, mìawo ya mì sɔ ɛ̀ wɔ̀ fĩãfìwo be do.”
14Ŋùvìnɔ̀wo ku kpòtɛ̃wo va Yesù gbɔ lè mawuxɔa mè, eye e dà èdɔ̀ na wo. 15Kè * mawunɔ gãwo ku èsefiɔtɔwo kpɔ ŋùdãdɔ kèwo Yesù le wɔ̀ lè mawuxɔa mè ku àpa kè ɖèviwo le do be: “Gogo na *David be Via”, wo do àdɔ̀mèze. 16Eye wo gblɔ̃ na ɛ̀ be: “Wò sè ènyà kèwo wo le gblɔ̃a?” Eye Yesù gblɔ̃ na wo be “Ɛ̃ɛ, mì mu hlɛ̃ kpɔ be: 'Vifɛ̃wo ku kèwo lè ànɔnuawo be ènu ye wò ɖènà kafuhawo so' òa?” 17Kè Yesù gblɔ̃ ènyà kèawo vɔ̀a, e gble wo ɖo funu, to lè èdùa mè, yì Betanìa eye be ci funua dɔ̃.
Yesù sɛ̃kpɛ̃ na èvòti kè mu sɛ̃ èku òa
(Mrk 11.12-14, 20-24)
18Ŋùdekɛ̃nyɛ mè, wàlɛbɛ kè e trɔ le yì èdùa mèa, àdɔ̀ wù ì. 19E kpɔ vòti ɖe lè èmɔ to, eye e zɔ̃ gogo è, vɔ̀a, mu kpɔ ènu ɖekpe lè e ji sɔ wu àmàkpawo ɖèɖe ò. E gblɔ̃ na ɛ̀ be: “Wò mu la gbà sɛ̃ èku gbèɖe ò.” Eye vòtia yrɔ̀ lè funu zè ɖèka. 20Nukplaviawo kpɔ ènu kè jɔ̀ a, eye, e kpaca wo. Wo biɔ Yesù be: “Nukɛ ŋuti ye èvòtia ku trolo ɖo ò?” 21Yesù ɖoeŋuti na wo be: “Nyàwo mù le to na mì, ne mì ɖo xɔ̀sè eye mì mu dona àɖìka òa, mu nyi ènu kè mù wɔ̀ ɖo èvòti kèa ŋutia, kpò ye mì la wɔ̀ ò, vɔ̀a, ne mì to na èto kèa be: 'Hɔ̃ jo lè fikèa, ne wòa yì jè àpù mè' cã a, e la va e mè. 22Eye ènu ɖekpekpe kè mì la biɔ lè kuefã mè, ku xɔ̀sèa, wo la na mì.”
Àmè kɛ ye na àcɛ̀ Yesù ò?
(Mrk 11.27-33; Luk 20.1-8)
23Wàlɛbɛ kè Yesù ɖo mawuxɔa mè, le fiɔ ènu àmè woa, * mawunɔ gãwo ku èdùmèmègãwo va e gbɔ. Wo biɔ ɛ̀ be: “Àcɛ̀ kɛ wò ɖo sɔ le wɔ̀ ènu kèawo ò? Àmè kɛ ye na wò àcɛ̀ ŋua ò?” 24Eye Yesù ɖoeŋuti na wo be: “Nyè cã mù la biɔ mì ènyà ɖèka pɛɛ. Ne mì ɖoeŋuti na mùa, nyè cã mù la gblɔ̃ àcɛ̀ kè mù sɔ le wɔ̀ ènu kèawoa na mì. 25Yòhanɛ̀s be Mawusi lèlea fikɛ ye be so ò? Jiŋùkusia, àlo àgbètɔwo gbɔ?” Eye wo le ènyà kpɔ lè woa nɔ̀nɔwo dòmè be: “Ne mi gblɔ̃ be: 'Jiŋùkusi ye à', e la to na mi be: 'Nukɛ ŋuti ye mi mu xɔ̀ Yòhanɛ̀s be àŋɛ̀a ji sè ò?' 26Vɔ̀a, ne mi ɖoeŋuti na ɛ̀ be: 'Àgbètɔwo gbɔ ye à', àmèhaa ma lɔ̃ na mi ò, ɖo, wo bùnà Yòhanɛ̀s be e nyi Mawu be gblɔ̃ɖɛtɔ.” 27Eye wo ɖoeŋuti na Yesù be: “Mi mu nya ò.” Yesù cã gblɔ̃ na wo be: “Nyè cã nyè mu la gblɔ̃ àmè kè na mù àcɛ̀ kè mù sɔ le wɔ̀ ènu kèawo na mì ò.”
Yesù do èlo so nɔ̀vi ŋusù èvè ŋuti
28“Nukɛ mì kpɔ so ènyà kèa ŋuti ò? Ŋusù ɖe ɖo èvi-ŋusù èvè. E va cucugbã tɔ̀a gbɔ gbè ɖèka, gblɔ̃ na ɛ̀ be: 'Èvi nyè, wò la yì wɔ̀ èdɔ lè vɛ̃-gble nyèa mè egbè.' 29Đèvi a ɖoeŋuti na ɛ̀ be: 'Nyè mu le ji la yì ò.' Kè e wɔ̀ èzã ɖe a, e bù e ŋuti kpɔ, eye e yì wɔ̀ èdɔ lè àgblèa mè. 30E yomèa, ŋusùa gbà gblɔ̃ ènyà ŋua ke na èvia èvègɔ̃a. E ya ɖoeŋuti na ètɔa be: 'Àpetɔ, mù la yì', vɔ̀a mu yì ò. 31Lè èvi èvèawo dòmèa, àmè kɛ ye wɔ̀ ètɔa be jro ò?” Wo ɖoeŋuti na ɛ̀ be: “Èvi cucugbã tɔ̀a ye.” Eye Yesù gblɔ̃ na wo be: “Nyàwo mù le to na mì: èdɛ̃jɔ̀tɔwo ku *àhasìwɔ̀tɔwo la jè ŋùkɔ̀ na mì yì Mawu be fìɔdua mè. 32Đo, Yòhanɛ̀s va mìa gbɔ, fiɔ mì àlekè mì ɖo la wɔ̀ ènu jɔ̀jɔɛ ɖoa, vɔ̀a, mì mu xɔ̀ e ji sè ò. Vɔ̀a, èdɛ̃jɔ̀tɔwo ku *àhasìwɔ̀tɔwo ya, xɔ̀ yebe àŋɛ̀a ji sè, eye wo trɔ lè woabe èvuɛ̃wo yomè. Mì kpɔ ènu kèawo, gãke mu wɔ̀ ènu ɖe na mì ne mìa cã mìa xɔ̀ yebe àŋɛ̀a ji sè, la trɔ lè mìabe ènuvuɛ̃wo yomè ò.”
Vɛ̃gblèdɔwɔ̀tɔwo be èlododo
(Mrk 12.1-12; Luk 20.9-19)
33“Mì ɖo èto èlododo bu. Ŋusù àxuetɔ ɖe dà vɛ̃-gble. E tɔ̃ èkpa trɔ do è. Eye be kù vɛ̃fiɔ̃-do ɖo àgblèa mè, e tù àgblèjikpɔxɔ̀ ɖo e mè. E sɔ àgblèa do àsi na vɛ̃-gbledàtɔwo, eye be jo yì èmɔ ji. 34Gà kè mè vɛ̃kusɛ̃sɛ̃ gbãgbã be hùenu va ɖoa, e dɔ̃ yebe sumɔ̃viwo ɖoɖa vɛ̃gblèdàtɔawo gbɔ, ne woa xɔ̀ èkusɛ̃sɛ̃ kèwo nyi yè tɔ̀awo va na yè. 35Vɛ̃gblèdàtɔawo le sumɔ̃viawo, pò àmè ɖèka, wù àmè èvègɔ̃a, pò èkpe àmè ètɔ̃gɔ̃a. 36Àgblètɔa gbà dɔ̃ sumɔ̃vi bu kèwo sùgbɔ wu àmè cucugbã tɔ̀awo ɖoɖa, vɔ̀a, vɛ̃gblèdàtɔawo gbà wɔ̀ nènea ku wo. 37Eye memlɛ̃nua, àgblètɔa dɔ̃ ye ŋutɔ be èvi ɖoɖa, ɖo, e le gblɔ̃ lè ye ɖokoe mè be: 'Wo la ɖo bùbu na èvi nyèa ya.' 38Vɔ̀a, kè vɛ̃gblèdàtɔawo kpɔ èvia a, wo gblɔ̃ lè woa nɔ̀nɔwo dòmè be: 'Ècrɔ̃ɖùtɔa ye nyi ekè; mì va ne mia wù ì, ne vɛ̃-gblea bèa trɔ zũ mia tɔ.' 39Eye wo jè e ji, dɔ̃ ɛ̀ yì vɛ̃-gblea godo, eye wo wù ì.”
40“Fifìa, ne vɛ̃gblètɔa vaa ɖe, nukɛ ye be la wɔ̀ ku vɛ̃gblèdàtɔawo ò?” 41Wo ɖoeŋuti na ɛ̀ be: “E la na àmè vuɛ̃ ŋuawo la crɔ̃ ŋɔjitɔ̀. Eye e la sɔ yebe vɛ̃-gblea do àsi na àgblèdàtɔ bu kèwo la nɔ̀ na ɛ̀ èkusɛ̃sɛ̃ kèwo nyi ye tɔ̀a ɖo àmè hùenu.”
42E yomèa, Yesù gblɔ̃ na wo be: “Mì mu kpɔ ènyà kèa hlɛ̃ lè ŋɔ̀ŋlɔ̃awo mè kpɔ òa?
'Èkpe kè èxɔ̀tùtɔwo gbea, ye va trɔ zũ koŋùjikpea?
Ekèa nyi Tɔhonɔ̀ be ènuwɔ̀wɔ
eye e wɔ̀ ŋùdã na mi ŋutɔ!'”
43“Ye ŋutia, mù le to na mì be: Mawu la ɖè mì to lè yebe fìɔdua mè, la sɔ kɔ̀ta kèwo be wɔ̀na sɔ̀gbèa, ɖo e mè. [ 44Àmè kè la jè èkpe kèa jia, la gbã hãnya-hãnya, eye àmè kè ji èkpea la jè a, e la tù ì kpɔɖɔ-kpɔɖɔ.]”
45Kè mawunɔ gãwo ku Farizìwo sè Yesù be èlododo ŋua woa, wo ŋɔjè e mè nyuɛ̃ ɖe be yèwo ŋuti ye be le do èloawo so. 46Eye wo le ji la le è, vɔ̀a wo le vɔ̃ àmèha, ɖo dùkɔ̃a kpɔ be Mawu be gblɔ̃ɖɛtɔ ye be nyi.
Mina Bible © Bible Society of Togo, 2014.