Màteo 20
20
Èlododo so vɛ̃gblèdɔwɔ̀tɔwo ŋuti
1“Mawu be fìɔdua sɔ̀ ku àgblètɔ ɖe kè fɔ̃ èzã#20.1 Fɔ̃ zã: to ŋùdekɛ̃nyɛ fùtù. , gbè ɖèka, yì ji èdɔwɔ̀tɔwo ɖo yebe vɛ̃-gble mè. 2E to na wo be yè la tu ŋùkèkè ɖèka be èfɛ̃#20.2 Ŋùkèkè ɖèka be èfɛ̃: lè mawunya xoma kpɔ̀tɛawo mèa, wo ŋlɔ̀ 'dènarìo ɖèka' ekè le nyi Hebrùawo be ègà-a. na wo gbè ɖèka, eye wo lɔ̃ ɖo e ji na ɛ̀, eye, àgblètɔa ɖo wo ɖoɖa yebe vɛ̃-gblea mè. 3Àgblètɔa gbà to ŋùdekɛ̃nyɛ gà àsiɖèkɛ mè, kpɔ àmè buwo bɔ̀ lè àsìto, èdɔ ɖe màwɔ̀. 4E gblɔ̃ na wo be: 'Mìa cã mì yì wɔ̀ èdɔ lè vɛ̃-gble nyèa mè, ne ma tu èfɛ̃ kè jè a na mì.' 5Eye wo yì, tɔ èdɔwɔ̀wɔ lè àgblèa mè nyàwo. Àgblètɔa gbà to gà woèvè mè, gbà to wètrɔ gà ètɔ̃ mè, wɔ̀ nènea ke. 6Àgblètɔa gbà to wètrɔ gà àtɔ̃ mè nène, eye be kpɔ àmè buwo cã bɔ̀ lè àsìto. E biɔ wo be: 'Nukɛ ŋuti mì lè ètè lè fikèa ŋùkèkè bliboa èdɔ ɖe màwɔ̀ ò?' 7Wo ɖoeŋuti na ɛ̀ be: 'Àmè ɖe mu xɔ̀ mi ɖo èdɔ mè ò!' Eye àgblètɔa gblɔ̃ na wo be: 'Mìawo cã mì yì wɔ̀ èdɔ lè vɛ̃-gble nyèa mè.'”
8“Kè fìɛ̃si ɖoa, vɛ̃gblètɔa gblɔ̃ na yebe ènujikpɔtɔa be: 'Yì yɔ èdɔwɔ̀tɔawo va ne wòa tu èfɛ̃ na wo ɖèka ɖèka; tɔ ɛ̀ ji so àmè kèwo va ŋùgbesiawo ji, ne woa va wu e nu ku àmè kèwo va jè ŋùkɔ̀a.' 9Àmè kèwo tɔ èdɔwɔ̀wɔ wètrɔ gà àtɔ̃ mèawo va, eye wo tu ŋùkèkè ɖèka be èfɛ̃ na woa dòmètɔ ɖe sia ɖe. 10Àmè kèwo tɔ èdɔwɔ̀wɔ jè ŋùkɔ̀awo va, eye wo susu be yèwo la xɔ̀ ègà wu àmè kpɔ̀tɛawo, vɔ̀a, ŋùkèkè ɖèka be èfɛ̃ kpò wo tu na woa cã. 11Wàlɛbɛ kè wo le tu èfɛ̃ na woa, wo tɔ lihũi lìli ɖo àgblètɔa ŋuti be: 12'Ŋùgbesitɔ kèawo gàpòpo ɖèka kpò ye wo wɔ̀ èdɔ. Vɔ̀a miawo yaa mi wɔ̀ èdɔ ŋùkèkè bliboa kpata, mi kpe èfũ, eye dɔ̃ŋùkusu ɖù mi, gãkea wò tu èfɛ̃ ɖèka ŋùkumè na mìa kpata.' 13Vɔ̀a, àgblètɔa ɖoeŋuti na woa dòmètɔ ɖèka be: 'Èxlɔ̃ nyè, mù jè àgɔ̀ ɖe do wòa? Mu nyi ŋùkèkè ɖèka be èfɛ̃ ji ye mi pò sè ɖoa? 14Xɔ̀ ègà kè nyi tɔ wòa, ne wòa yì àxomè; ŋùkèkè ɖèka be èfɛ̃ ye mù jro be ma tu na àmè kèa, kè va ŋùgbesia, sìgbè àlekè mù na wò cã a nène. 15Nyè mu teŋu wɔ̀ ènu kè jro mùa ku ègà nyèa? Àlo, wò le hùãŋu ye à? Ne mù sɔ àpe ègà sɔ wɔ̀ nyuɛ̃a, àgɔ̀ ye mù jè a?' 16Nènea ke ye àmè kèwo nyi ŋùgbesiawo la nyi ŋùkɔ̀gbetɔwo, eye ŋùkɔ̀gbetɔawo la nyi ŋùgbesiwo.”
Yesù pò nupo zè ètɔ̃gɔ̃a so yebe àyàɖùɖu, yebe èku, ku yebe fɔ̃fɔ̃ ŋuti
(Mrk 10.32-34; Luk 18.31-34)
17Wàlɛbɛ kè Yesù lè yì Yèruzàlɛm-a, e yɔ yebe *nukplavi woèvèawo va ye ɖokoe gbɔ, lè àsà mè, gblɔ̃ na wo be: 18“Kpɔɖa, mi le yì Yèruzàlɛm, eye wo la do *Àgbètɔ be Èvia àsi na * mawunɔ gãwo ku èsefiɔtɔwo, eye wo la gblehùɛ do e na èku. 19Eye wo la do è àsi na àgbàlèwo, eye wo la kò è, wo la pò è ku àtãŋù, la ka ɛ̀ ɖo àtisòga ŋuti. Vɔ̀a, lè ŋùkèkè ètɔ̃gɔ̃a gbèa, e la fɔ̃ so èku.”
Èvinɔ̀ be ènubiɔbiɔ
(Mrk 10.35-45)
20E yomèa, Zebedeo be èviwo be ènɔ̀ va Yesù gbɔ ku èviawo. E jè èklò lè Yesù be ŋùkɔ̀, ɖèkɔ na ɛ̀, le ji la biɔ ɛ̀ ènu ɖe. 21Eye Yesù gblɔ̃ na ɛ̀ be: “Nukɛ wò le ji ò?” E gblɔ̃ na ɛ̀ be: “Na èvi nyè ŋusù èvè kèawo woa nɔ̀ ànyi, ɖèka lè àpo ɖùsi mè, eye èvègɔ̃a lè àpo èmìɔ̃ mè lè fìɔdu wòa mè.” 22Yesù ɖoeŋuti be: “Mì mu nya ènu kè mì le biɔa ò. Mì la teŋu nù kogò kè mù la nùa?” Wo ɖoeŋuti na ɛ̀ be: “Mi la teŋu.” 23Eye Yesù gblɔ̃ na wo be: “Mì la nù kogò nyèa, vɔ̀a, ne woa nɔ̀ ànyi lè àpe ɖùsi mè, àlo àpe èmìɔ̃ mèa, mu nyi ènyè ye la na ègbè ò. Àmè kèwo ètɔ nyè jrà wo ɖo ɖɛ na a tɔ̀ ye.”
24Kè Yesù be *nukplavi èwo kpɔ̀tɛawo sè ènyà kèa, wo bijì do nɔ̀vi èvè ŋuawo. 25Vɔ̀a, Yesù yɔ wo, gblɔ̃ na wo be: “Mì nya be, dùkɔ̃wo be ègawo, zĩna woabe dùmèviwo ji eye woabe àmègãwo kpànà àcɛ̀ na wo. 26Vɔ̀a, mu ɖo la nyi nène lè mìa dòmè ò. Àmè ɖekpekpe kè jro la nyi àmègã lè mìa dòmèa, ne nyi mìabe sumɔ̃vi. 27Eye ne àmè ɖe le ji la nyi ŋùkɔ̀nɔ̀tɔ lè mìa dòmèa, ne nyi mìabe kluvi. 28Nènea ye *Àgbètɔ be Èvia mu va ne woa sumɔ ɛ̀ ò, vɔ̀a ne bèa sumɔ àmè, eye bèa gbà sɔ yebe àgbè sɔ hlùɛ̃ àmè sùgbɔ gã.”
Yerikò be ŋùvìnɔ̀ èvèawo
(Mrk 10.46-52; Luk 18.35-43)
29Eye wàlɛbɛ kè Yesù ku yebe nukplaviwo to lè Yerikò le yìa, àmèha gã ɖe kpàsà ɛ̀ do. 30Eye kpɔɖa, ŋùvìnɔ̀ èvè ɖewo nɔ̀ ànyi lè èmɔ to. Kè wo sè be Yesù va le yìa, wo tɔ àpa dodo be: “Àpetɔ, *David be èvi, ku ŋuzĩzĩ na mi!” 31Àmèhaa gbe è na wo, be woa bɔ̀ ènu. Vɔ̀a wo gbà do àpa sɛ̃sɛ̃ ɖe kpe è be: “Àpetɔ, *David be èvi, ku ŋuzĩzĩ na mi!” 32Yesù nɔ̀tè, yɔ wo, biɔ wo be: “Nukɛ ye mì jro be ma wɔ̀ na mì ò?” 33Wo gblɔ̃ na ɛ̀ be: “Àpetɔ, na miabe ŋùkuviwo ne hũ.” 34Eye Yesù ku ŋuzĩzĩ na wo, e sɔ àlɔ̀ ɖo woabe ŋùkuviwo ji eye woabe ŋùkuviwo hũ trolo, eye wo kpàsà ɛ̀ do.
Mina Bible © Bible Society of Togo, 2014.