Màteo 22
22
Nyɔ̃nù kpekpe èzã be èlododo
(Luk 14.15-24)
1Yesù gbà do èlo sɔ fiɔ ènu àmèwo. E gblɔ̃ na wo be: 2“Wo teŋu sɔ Mawu be fìɔdua sɔ̀ ku èfìɔ ɖe kè le ɖù nyɔ̃nù kpekpe be àzã na èvia. 3Èfìɔ dɔ̃ yebe sumɔ̃viwo be woa yì yɔ àmè kèwo be sìa ɖɛ be wo ne va ɖù àzã ku yèawo va. Vɔ̀a, wo gbe. 4E gbà dɔ̃ yebe sumɔ̃vi buwo ɖoɖa be: 'Mì to na àmè kèwo mù sìa ɖɛawo be, ènu ɖùɖuawo sɔ̀gbè vɔ̀. Mù wù ènyì-su nyèwo ku èlã nyè kèwo do àmìa, eye, ènuwo keŋu sɔ̀gbè vɔ̀. Mì va ɖù àzã.' 5Vɔ̀a, àmè kèwo be sìa ɖɛawo mu kãma na ènu kèawo ò, eye àmè sia àmè yì ènu kè bìa ŋùku na ɛ̀ gbe. Àmè ɖewo yì àgblè, èɖewo yì àsì, 6eye èɖewo cã le sumɔ̃viawo, wɔ̀ ènu bàɖà ku wo eye wo wù wo. 7Èfìɔa bijì ŋutɔ, eye, e dɔ̃ yebe gbãdãgbãwo ɖoɖa, eye wo yì crɔ̃ èhlɔ̃dãtɔ ŋuawo, tɔ èzò woabe èdù. 8Wàlɛbɛ ŋua, e gblɔ̃ na yebe sumɔ̃viawo be: 'Ènu sia ènu sɔ̀gbè, vɔ̀a, àmè kèwo mù sìa ɖɛawo mu jè be woa kpe wo ò. 9Ye ŋutia, mì yì èmɔzɛ̃kpliwo nu, ne mìa yɔ àmè kèwo keŋu mì la kpɔawo, ne woa va ɖù àzã.' 10Eye sumɔ̃vi ŋuawo to yì èmɔwo ji, eye wo kplɔ̀ àmè kèwo keŋu wo kpɔa va. Àmè vuɛ̃wo ku àmè nyuɛ̃wo, eye àmèwo ɖɔ nyɔ̃nù kpepea. 11E yomèa, èfìɔa ɖo èxɔ̀a mè, be yèa kpɔ àmè kpekpeawo. E kpɔ ŋusù ɖe lè funu ekè mu do nyɔ̃nù kpekpe be àwù òa. 12Èfìɔa gblɔ̃ na ɛ̀ be: 'Èxlɔ̃ nyè, àleke wɔ̀ ye wò va fikèa vɔ̀a, wò mu do nyɔ̃nù kpekpe be àwù ò?' Vɔ̀a, ŋusùa mu kè ènu ò. 13Èfìɔa to na sumɔ̃viawo be: 'Mì bla àfɔ̀wo ku àlɔ̀wo na ɛ̀, ne mìa sɔ ɛ̀ dà ɖo vìvìti mè lè xixenu. Funu ye àvi fãfã ku àɖùklui ɖùɖu la nɔ̀.' 14Đo wo yɔ àmè sùgbɔ, vɔ̀a àmè vi ɖe kpò ye wo cã.”
Wo ɖo la tu ètaci na Romà fìɔgã
(Mrk 12.13-17; Luk 20.20-26)
15Wàlɛbɛ ŋua, Farizìwo to yì bla èse ɖo Yesù ŋuti. Wo le ji èmɔ kè nu wo la biɔ ɛ̀ ènyà lè, ne woa teŋu le è lè yebe nupo pòpo mèa. 16Wo dɔ̃ woabe nukplaviwo ku Herod be èhamènɔ̀tɔwo ɖoɖa Yesù gbɔ, eye, wo yì gblɔ̃ na ɛ̀ be: “Ènufiɔtɔ, mi nya be nyàwototɔ ye wò nyi, eye wò fiɔna Mawu be èmɔa lè nyàwo mè. Wò mu kãmana na àmè ɖe ò, ɖo wò mu sina àmè be ŋùmè ò. 17Ye ŋutia, gblɔ̃ àlekè wò susu ɖoa na mi! E sɔ̀gbè be woa tu ètaci na Romà fìɔgã Kayizaròa, àlo mu sɔ̀gbè ò?” 18Vɔ̀a, ekè Yesù nya woabe susu vuɛ̃woa, e gblɔ̃ na wo be: “Mì àyèmènuwɔ̀tɔ kèawo! Nukɛ ŋuti ye mì le tè mù kpɔ ɖo ò? 19Mì sɔ ègà kè wo sɔ tuna ètacia ɖèka fiɔ mù.” Eye wo sɔ klòsalò-ga ɖèka fiɔ ɛ̀. 20Yesù gblɔ̃ na wo be: “Àmè kɛ be tata ye lè e ji ò? Àmè kɛ be ŋɔ̀ŋlɔ̃ ye nyi ekèa ò?” 21Wo ɖoeŋuti na ɛ̀ be: “Romà fìɔgã Kayizarò tɔ̀ ye.” Eye Yesù gblɔ̃ na wo be: “Mì sɔ ènu kè nyi Kayizarò tɔ̀a na Kayizarò, eye ènu kè nyi Mawu tɔ̀a, na Mawu.” 22Ènyà ŋuawo kpaca wo ŋutɔ, eye wo tàsi ì ɖɛ, eye wo jo.
Àmè kukuwo be fɔ̃fɔ̃
(Mrk 12.18-27; Luk 20.27-40)
23Gbè ŋua gbè kea, Sadusìwo va Yesù gbɔ. — Sadusìwo ye gblɔ̃nà be fɔ̃fɔ̃ so èku ɖe mu lè ò. — Wo biɔ ɛ̀ be: 24“Ènufiɔtɔ, Mosè gblɔ̃ be: 'Ne ŋusù ɖe, ɖè èsrɔ̃, eye mu jì èvi ò, vɔ̀ be kua, nɔ̀via la ɖè àhòsìa, la jì èvi sɔ do xòmè na àmè kè kua.' 25E va jɔ̀ be, nɔ̀vi ŋusù adrɛ̃ ɖewo nɔ̀ mia dòmè. Àmè cucugbã tɔ̀a ɖè èsrɔ̃ vɔ̀a, mu jì èvi ɖekpe gbɔ̀xue ku ò, eye, nɔ̀via ɖè àhòsìa. 26Ènu kèa jɔ̀ ɖo àmè èvègɔ̃a ji, gbà jɔ̀ ɖo àmè ètɔ̃gɔ̃a cã ji, kaka yì jè àmè adrɛ̃gɔ̃ a ji. 27Kè ŋusùawo keŋu ku yomèa, nyɔ̃nùa cã va ku. 28Fifìa, gà kè mè àmè kukuwo la fɔ̃a, àmè kɛ be èsrɔ̃ ye nyɔ̃nùa la nyi lè àmè adrɛ̃awo dòmè ò? Đo woawo keŋu ɖè è kpɔ.” 29Yesù ɖoeŋuti na wo be: “Mì le trã èmɔ, ɖo mì mu nya ŋɔ̀ŋlɔ̃awo kaka la va nya Mawu be ŋusɛ̃ cã ò. 30Đo le fɔ̃fɔ̃ so èku zã gbèa, èsrɔ̃ ɖèɖe àlo nyɔ̃nù nana ɖe cã mu la nɔ̀ ànyi ò. Wo la nɔ̀ sìgbè Mawu be àtikplɔtɔwo nène lè jiŋùkusi. 31Vɔ̀a, ènu kè Mawu gblɔ̃ so àmè kukuwo be fɔ̃fɔ̃ ŋutia, mì mu hlɛ̃ ɛ̀ kpɔ lè mawunya mè be: 32'Ènyè ye nyi, Abràham be Mawu, Izàk be Mawu, Yakɔb be Mawu.' Mawu mu nyi àmè kukuwo be Mawu ò, vɔ̀a àmè àgbè-àgbèwo be Mawu ye be nyi.” 33Kè wo sè ènyà kèa, àmèhaa kpata kã yàa ɖo Yesù be ènufiɔfiɔ kèa ŋuti.
Èse kè wu èsewo kpataa
(Mrk 12.28-34; Luk 10.25-28)
34Kè Farizìwo sè be Yesù do-gà ènu na Sadusìwoa, wo bɔ̀. 35Eye èsefiɔtɔ ɖèka lè woa dòmè le ji la tè Yesù kpɔ. E biɔ ɛ̀ be: 36“Ènufiɔtɔ, *èse kɛ ye wu èsewo kpata ò?”
37Yesù ɖoeŋuti na ɛ̀ be: “'Wò la lɔ̃ Tɔhonɔ̀ Mawu wò ku àpo èjì keŋu, kudo àpo èkla keŋu, gbàkudo àpo susu keŋu.' 38Ekèa ye nyi *èse cucugbãa eye be wu èsewo kpataa. 39Èse èvègɔ̃ kè sɔ̀ ku ìa, ye nyi ekèa: 'Wò la lɔ̃ èhawòvi sìgbè wò ŋutɔ ɖokoe wò nène.' 40Èse èvè kèawo ji ye wo tù Mosè be èsea, ku Mawu be gblɔ̃ɖɛtɔwo be ènufiɔfiɔwo kpata ɖo.”
David be èvi ku yebe Àpetɔ
(Mrk 12.35-37; Luk 20.41-44)
41Kè Farizìwo bɔ̀a, Yesù biɔ wo sè be: 42“Nukɛ ye mì susu so *Mɛ̀sià a ŋuti ò?” Àmè kɛ be èvi ye be nyi ò? Wo ɖo e ŋuti be: “*David be èvi ye.” 43Vɔ̀ a, Yesù gblɔ̃ na wo be: “Ne *David be èvi ye be nyi a, àleke wɔ̀ ye Gbɔ̃gbɔ̃ a na David yɔ ɛ̀ be: 'Tɔhonɔ̀ ò?' Đo David gblɔ̃ be:
44'Tɔhonɔ̀ gblɔ̃ na Tɔhonɔ̀ nyè be:
nɔ̀ ànyi ɖo àpe ɖùsi mè,
kaka ne ma sɔ àpo èkɛ̃tɔwo ɖo àfɔ̀ wòwo gɔ̃mè.'”
45“Ne David ŋutɔ yɔ ɛ̀ be: Tɔhonɔ̀ a, àleke ye e gbà teŋu nyi David be èvi ɖo ò?” 46Vɔ̀ a, àmè ɖekpe mu teŋu ɖo ènyà ɖekpe ŋuti na ɛ̀ ò; eye, so gbè ŋua gbè a àmè ɖe mu gbà dojì biɔ ɛ̀ ènyà ɖe ò.
Mina Bible © Bible Society of Togo, 2014.