Màteo 11
11
Yòhanɛ̀s be àmèdɔ̃dɔ̃awo
(Luk 7.18-35)
1Ekè Yesù do èdɔ àsi na yebe *nukplavi woèvèawo vɔ̀a, e jo lè funua, le fiɔ ènu, eye be le do àŋɛ̀a lè woabe èdùwo mè.
2Wàlɛbɛ kè Yòhanɛ̀s Mawusilènamètɔa lè ègàkpa mèa, e sè èdɔ kèwo Kristò le wɔ̀a, eye be dɔ̃ yebe nukplaviwo ɖoɖa Yesù, 3ne woa biɔ ɛ̀ be: “Èwò ye nyi àmè kè ɖo la vaa, àlo mi ɖo la nɔ̀tè kpɔ àmè bu?” 4Yesù ɖoeŋuti na wo be: “Mì yì ne mìa to ènu kèwo mì le sè, ku ènu kèwo mì le kpɔawo na Yòhanɛ̀s 5Ŋùvìnɔ̀wo le kpɔ ènu, kpòtɛ̃wo le zɔ̃, èkpònɔ̀wo be ŋuti kɔ̀, ètokunɔ̀wo le sè ènu, àmèkukuwo le fɔ̃, eye wo le do àŋɛ̀nyuɛ̃ a na wɔ̀amènɔ̀wo. 6Sìtu ɖèɖe ye e nyi na àmè kè nyè mu la nyi àfɔ̀klɛ̃ na òa.”
7Kè Yòhanɛ̀s be nukplaviwo trɔjoa, Yesù tɔ nupo pòpo na àmèhaa so Yòhanɛ̀s ŋuti be: “Nukɛ ye mì yì zògbèa ji va yì kpɔ ò? Àpla ɖe kè àya le do èwè na a ye à? 8Nukɛ ŋutɔ ye mì yì kpɔ ò? Ŋusù ɖe kè do àwù xɔ̀asìwoa ye à? Vɔ̀a, àmè kèwo dona ècitɔwo be àwùwoa, èfìɔsawo mè ye wo nɔ̀nà. 9Nukɛ ŋutɔ koŋu mì va yì kpɔ ò? Mawu be gblɔ̃ɖɛtɔ ɖe ye à? Ɛ̃ɛ, mù le gblɔ̃ ɛ̀ na mì, e wu Mawu be gblɔ̃ɖɛtɔ ŋutɔ cã. 10E ye nyi àmè kè ŋuti wo ŋlɔ̀ ɛ̀ ɖo ɖɛ be: 'Kpɔɖa, mù le dɔ̃ àŋɛ̀dotɔ nyèa jè ŋùkɔ̀ na wò, àmè kè la jrà èmɔ wòa ji ɖo, lè ŋùkɔ̀ na wòa.' 11Nyàwo mù le to na mì, àmè ɖekpe mu lè ànyigbã kèa ji, lè àgbètɔwo dòmè kè wu Yòhanɛ̀s Mawusilènamètɔa ò. Gãkea, àmè kè hùe wu lè Mawu be fìɔdua mèa, wu ì. 12So Yòhanɛ̀s Mawusilènamètɔa be hùenu kaka va na fifìa, wo dri Mawu be fìɔdua, eye e mè ɖoɖo nyi àvũdɛ̃drɛ̃ be ènu, eye àmè kèwo bla ègo ji ŋutɔawo ye ɖona e mè. 13Đo keŋu gbɔ̀xue Yòhanɛ̀s la tɔ yebe èdɔ jia, Mosè be *Èsea ku Mawu be gblɔ̃ɖɛtɔwo pò nupo so fìɔdu kèa ŋuti vɔ̀, 14eye ne mì jro la sè e gɔ̃mèa, àmè kèa ye le nyi Èli kè ɖo la vaa. 15Àmè kè si èto lèa ne sè è.”
16“Vɔ̀a, àmè kɛ ye mù la sɔ jìjimè kèa sɔ̀ ku ò? Wo lè sìgbè ɖèvi kèwo nɔ̀ ànyi lè àsìto, le do àpa yɔ woa hatiwoa nène. 17Wo gblɔ̃ be: 'Mi ku èzè sɔ jì jìjɔɛ-hàwo na mì, vɔ̀a, mì mu ɖu èwè ò, mi jì ŋuzĩzĩ-hàwo na mì, vɔ̀a, mì mu làmɔɛ̃ ò.' 18Đo Yòhanɛ̀s va, mu ɖùnà ènu ò, mu nùnà àhà cã ò, eye mì be: 'Gbɔ̃gbɔ̃ vuɛ̃ lè e mè.' 19Vɔ̀a, *Àgbètɔ be Èvia va, eye e ɖùnà, gbà nùnà, eye àmèwo be: 'Kpɔɖa, ènusuɖùtɔ ku àhànùgugui, èdɛ̃jɔ̀tɔwo ku ènuvuɛ̃wɔ̀tɔwo be èxlɔ̃ ye be nyi.' Vɔ̀a, Mawu ɖè yebe ènu nyãnyã fiɔ to èdɔ kèwo be le wɔ̀a ji.”
Yesù kã ŋùmè na Galilea be èdùwo
(Luk 10.13-15)
20Wàlɛbɛ ŋua, Yesù kã ŋùmè na èdù kèwo mè e wɔ̀ yebe ŋusɛ̃dɔ sùgbɔ wu lèawo, ɖo wo mu ɖɔ̀lì èdɛ̃ ò. E le gblɔ̃ be: 21“Hèlu na wò Korazìn! Hèlu na wò Bɛtsaida! Đo ne ŋùdãdɔ kèwo mù wɔ̀ lè mìa dòmèa, Tirò ku Sidɔ̀n ye mù wɔ̀ wo lèa, èdù ŋuawo mè tɔwo la kè ɖɔ̀lì èdɛ̃ xoxo, eye wo la tà kòtòku, la sì àfi, sɔ ɖè è fiɔ. 22Ye ŋutia, mù le to na mì be, lè kòjoɖoɖo zãgbèa, mìabe ètodɔ̃ la sɛ̃ŋu wu Tirò ku Sidɔ̀n tɔ̀. 23Vɔ̀a, èwò Kapɛrnaum! Wò bù be wo la kɔkɔ wò kaka yì jiŋùkusi ye à? Gbèɖe! Kaka èkuwo de ye Mawu la ɖiɖi wò yì. Đo ne Sodɔ̀m ye wo kè wɔ̀ ŋùdãdɔ kèawo lèa, èdù ŋua la kpɔ̀tɔ̀ nɔ̀ ànyi kaka va na egbè. 24Ye ŋutia, mù le to na wò be, lè kòjoɖoɖo zãgbèa, Sodɔ̀m be ètodɔ̃ ma sɛ̃ŋu sìgbè tɔ̀ wòa nène ò.”
Mì va gbɔ nyè ne mìa kpɔ gbɔ̃jɛ̃
(Luk 10.21-22)
25Gà ŋua mè kea, Yesù gblɔ̃ be: “Àta jiŋùkusi ku ànyigbã be Tɔhonɔ̀! Mù le kafu wò, ɖo wò wla ènu kèawo do ènunyatɔwo ku àɖàŋùɖotɔwo vɔ̀a, wò ɖè wo fiɔ ɖèviwo. 26Ɛ̃ɛ Àta! Ènu kè jè ŋùmè na wòa yeŋu.”
27“Ètɔ nyè sɔ ènuwo kpata do àsi na mù. Àmè ɖe mu jèsi Èvia, ne mu nyi Ètɔa kpò ò. Nènea kè àmè ɖe mu jèsi Ètɔa ne mu nyi Èvia ku àmè kè Èvia jro la ɖè è fiɔa ò.”
28“Mì va gbɔ nyè, mì, àmè kèwo ènu tìkɔ̀ na, eye àgbã le kpɛ̃awo, mù la na mì gbɔ̃jɛ̃. 29Mì sɔ èkɔ̀ga nyèa, ne mìa kpla ènu kè mù le fiɔ mìa, ɖo mù nyi àmè bɔ̀bɔɛ, xòmèfanɔ̀, eye mì la kpɔ gbɔ̃jɛ̃ ne mìabe èklawo. 30Đo èkɔ̀ga nyèa bɔ̀bɔ̀, eye àgbã nyèa fò.”
Mina Bible © Bible Society of Togo, 2014.