Levìwo 7
7
Àgɔ̀jèje jàjràɖo be vɔsa
1“Èkɔ̀nu kè wo la wɔ̀, la sɔ jrà àgɔ̀jèje ɖoa ye nyi ekèa; ènu kɔ̀kɔ̀ɛ ŋutɔ ye be nyi. 2Wo la wù àgɔ̀jèje jàjràɖo be èlã kè la wɔ̀ vɔsaa lè àfi kè wo sònà èhlò na ènumème vɔsa-lãa lèa, e yomè a, hũbonɔa la sɔ èlãa be èhũa wu, trɔ do vɔsakpea. 3E la sɔ èlãa be àfi kèwo keŋu do àmìa: àsikea#7.3 Tot 29.22, àmì kè trɔna do àdɔ̀mènuawoa, ɖo Mawu be ŋùkɔ̀, 4kpe ɖo àyìku èvèawo, ku àmì kè lè woa ku àlìmèa ŋuti. Wo la ɖè àgòa be ètomè kpe ɖo àyìkuawo ŋuti. 5Ekèa yomè a, hũbonɔa la sɔ èlãa be àkpa kèawo ɖo vɔsakpea be èzòa nu: e nyi ènu ɖùɖu kè wo tɔzò na Tɔhonɔ̀a. Ekèa ye nyi àgɔ̀jèje jàjràɖo be vɔsa. 6Ŋusù ɖekpekpe kè lè hũbonɔwo dòmèa teŋu ɖù ì, eye wo ɖo la ɖù ì lè Tèpe Kɔ̀kɔ̀ɛ, ɖoa, ènu kɔ̀kɔ̀ɛ ŋutɔ ye be nyi. 7Lekè wo la wɔ̀ èvuɛ̃ sɔsɔkè be èkɔ̀nua, nènea ke ye wo la wɔ̀ àgɔ̀jèje jàjràɖo be èkɔ̀nua cã: èkɔ̀nu ɖèka ŋùkumè kpò wo la wɔ̀ na èvèawo. Èlã kè wo sɔ wɔ̀ èkɔ̀nua la nyi hũbonɔ kè wɔ̀ ɛ̀a tɔ̀.”
Ènu kè nyi hũbonɔa tɔ̀a
8Hũbonɔ kè wɔ̀ ènumème vɔsaa be èkɔ̀nu na àmè ɖe a tɔ̀ ye nyi vɔsa-lãa be àgbàzea. 9Ènu nana ɖekpekpe kè wo do èkpo mèa, àlo, ènu nana ɖekpekpe kè wo ɖà lè èzò ji, àlo, kè wo mè lè èkpe jia, nyi hũbonɔ kè wɔ̀ èkɔ̀nua tɔ̀. 10Ènu nana a kpata, kpe ɖo kè wo blù ku àmìa ŋuti, àlo kè wo mu do èsì, àlo, àmì ò a nyi hũbonɔ kèwo keŋu nyi Arɔ̀n be èviwoa tɔ̀. Wo la ma ɛ̀ sɔ̀sɔɛ, lè woa nɔ̀nɔwo dòmè.”
Ɖèkawɔ̀wɔ be vɔsa
11“Ŋuti fàfa be vɔsa be èkɔ̀nu kè wo la wɔ̀ lè Tɔhonɔ̀ be ŋùkɔ̀a ye nyi e kèa: 12Ne wo le wɔ̀ vɔsaa, la sɔ kplɔ̀ àkpedodo vɔsa#7.12 Èhàw 107.22; 116.17 ye à, wo la sɔ klàko kè mè mawɛhuãnu mu lè ò a, kè wo blù ku àmìa, àcɔ̃mɔ̀ kè mè mawɛhuãnu mu lè ò, kè ŋuti wo lìlì àmì ɖoa, kè wo sɔ èwɔ kè wo do àmì nyuɛ̃ ɖe a blùa. 13Sɔ kpe ɖo klàkoawo ŋutia, wo la hɛ̃ kpɔ̃nɔ kè hɔ̃a va, la sɔ kplɔ̀ ŋuti fàfa be vɔsaa kè wo le wɔ̀ sɔ le kafu Tɔhonɔ̀a. 14Wo la sɔ klàko vòvòawo ɖèka ɖèka ɖo Tɔhonɔ̀ be ŋùmè; Tɔhonɔ̀ ye wo le ɖè è na. Kpɔ̀tɛa la yì na hũbonɔ kè sɔ ŋuti fàfa vɔsa be èhũa sɔ wu ɖo vɔsakpea ŋutia. 15Ŋuti fàfa be vɔsa kè wo wɔ̀ na kàfù kafua be èlãa, wo la ɖù ì, gbè kè gbè wo wɔ̀ vɔsaa, eye wo mu la gble ɖekpe ɖɛ, na èsɔ, àlo, na èŋù kè la kè ò.”
16“Ne àmè ɖe sitè, eye be wɔ̀ àjɔ̀gbè fìãfìã be vɔsaa, wo la ɖù ì, gbè kè gbè wo wɔ̀ vɔsaa ke; ne èɖe kpɔ̀tɔ̀a, ne èŋù kèa, wo teŋu ɖù ì fàa. 17Ne vɔsa-lãa gbà kpɔ̀tɔ̀, ŋùkèkè ètɔ̃gɔ̃a gbèa, wo la tɔ ɛ̀ èzò. 18Ne ŋùkèkè ètɔ̃gɔ̃a gbèa, àmè ɖe gbà ɖù ŋuti fàfa vɔsa-lãa kpò ye à, Tɔhonɔ̀ mu la xɔ̀ àmèa be vɔsaa ò, ɖoa, èlãa la gble, eye àmè ɖekpekpe kè la ɖù ìa, la nɔ̀ yebe àgɔ̀jèje nu. 19Sɔ kpe èa, ne èlã ɖe tɔ ènu màkɔ̀ màkɔ ɖekpekpe ŋutia, wo mu la ɖù ì ò; wo la tɔ ɛ̀ èzò.
“Àmè sia àmè kè ŋuti kɔ̀a kpɔ èmɔ, la ɖù vɔsa kèa be èlã. 20Vɔ̀a, àmè kè be ŋuti mu kɔ̀ ò, gãke be ɖù ŋuti fàfa vɔsa kè wo wɔ̀ na Tɔhonɔ̀a be èlãa, àmè ŋua, wo la ɖè è jo lè yebe dùkɔ̃a dòmè. 21Nène a kea, ne àmè ɖe tɔ àsi ènu ɖekpekpe kè ŋuti mu kɔ̀ ò a: ne tɔ àsi àmè màkɔ̀ màkɔ ŋuti, àlo, èlã màkɔ̀ màkɔ ŋuti, àlo, èlã ɖekpe kè be èse Tɔhonɔ̀ do be mu kɔ̀ òa ŋuti, kaka la va ɖù ŋuti fàfa vɔsa kè wo wɔ̀ na Tɔhonɔ̀a be èlãa, wo la ɖè àmè ŋua jo lè yebe dùkɔ̃a dòmè.”
Ɖoɖowo na dùkɔ̃a
22Tɔhonɔ̀ gblɔ̃ na Mosè be: 23“Pò nupo na Izràɛlviwo, ne wòa gblɔ̃ na wo be: Ènu sia ènu kè nyi ènyì be àmì, àlɛ̃ be àmì, ègbɔ be àmìa, mì mu la ɖù ò. 24Mì teŋu zã èlã ɖe kè kua be àmì, àlo èlã ɖe kè ègbemèlã ɖe wùa be àmì, la sɔ wɔ̀ ènu ɖekpekpe, gãkea, mì mu la ɖù ì ò. 25Ne àmè ɖe ɖù èlã ɖe kè wo sɔ wɔ̀ ènumème vɔsa na Tɔhonɔ̀a be àmìa, wo la ɖè àmè kè ɖù ìa jo lè yebe dùkɔ̃a dòmè godo. 26Nène a ke, mì mu ɖo la ɖù ènu ɖekpe kè nyi xèvi, àlo, èlã ɖe be èhũ ò. Mì mu la ɖù ì, lè àfi ɖekpekpe kè mì lèa ò. 27Àmè ɖekpekpe kè la ɖù ènu ɖekpekpe be èhũ kpòa, wo la ɖè è jo lè yebe dùkɔ̃a dòmè.
28Tɔhonɔ̀ gblɔ̃ na Mosè be: 29“Pò nupo na Izràɛlviwo, ne wòa gblɔ̃ na wo be:
Àmè kè le wɔ̀ ŋuti fàfa be vɔsa na Tɔhonɔ̀a, ŋutɔ ye la hɛ̃ yebe ènu nana a va na Tɔhonɔ̀. 30Ye ŋutɔ la sɔ yebe àlɔ̀wo sɔ ènumème vɔsaa va na Tɔhonɔ̀; ènu kèawo ye nyi èlãa be àfi kèwo do àmìa. E la sɔ wo kpe èlãa be àkɔtaa, eye be la wɔ̀ nɔ̀nɔmè kè wo sɔ sɔna ènu ɖo Tɔhonɔ̀ be ŋùmè a. 31E yomè a, hũbonɔa la sɔ èlãa be àfi kèwo do àmìa ɖo èzòa nu, lè vɔsakpea ji, eye wo la sɔ àkɔtaa na Arɔ̀n ku yebe ŋusùviwo. 32Mì la sɔ èlãa be ɖùsi mè be àta ŋùkɔ̀tɔ̀a na hũbonɔa, ne bèa nyi ènu kè wo ɖè lè mìabe ŋuti fàfa be vɔsa ŋutia. 33Èlãa be àta kèa le nyi Arɔ̀n be èvi kè sɔ ŋuti fàfa be vɔsa-lã be èhũ ku àmìa ɖo Tɔhonɔ̀ be ŋùkɔ̀a tɔ̀. 34Ɛ̃ɛ, mù le sɔ àkɔta kè wo sɔ wɔ̀ èkɔ̀nu, ɖo Tɔhonɔ̀ be ŋùkɔ̀a ku àta kè wo sɔ wɔ̀ èkɔ̀nu, ye mù ɖè lè vɔsa ŋutia, mù xɔ̀ wo lè Izràɛlviwo si, ɖè wo lè ŋuti fàfa be vɔsaa mè, eye mù sɔ wo le na Arɔ̀n, hũbonɔa ku yebe ŋusùviwo. E la nyi àkpa kè la nɔ nyi woa tɔ̀a so Izràɛlviwo gbɔ.”
35Ekèawo ye nyi Arɔ̀n ku yebe ŋusùviwo be mamã kè wo le xɔ̀ lè Tɔhonɔ̀ be ènumème vɔsaa mè, so gbè kè gbè wo gbe ɖè wo fiɔ, ne woa nɔ wɔ̀ Tɔhonɔ̀ be sɛ̃sɛ̃dɔ kpòa. 36Mamã kèa ye Tɔhonɔ̀ sɔ wɔ̀ ɖoɖo na Izràɛlviwo, be wo ne nɔ sɔ na wo, so gbè kè gbè, e la gbe do àmì èta na wo kpòa. Èse kòkòɖàbì be nyi na wo, so jìjimè, yì jìjimè.”
37Ekèa ye nyi ènumème vɔsa be èkɔ̀nu, ènu nana be èkɔ̀nu, vɔsa ɖo èvuɛ̃ ta be èkɔ̀nu, vɔsa ɖo ènujràɖo ta, vɔsa sɔ do àmì èta na àmè ku vɔsa ɖo ŋuti fàfa ta. 38Ɖoɖo kèawo ye Tɔhonɔ̀ wɔ̀ na Mosè, lè Sinaì be ètoa ji, gbè kè gbè be ɖè ègbè na Izràɛlviwo, lè Sinaì be zògbè a ji be wo ne hɛ̃ woabe ènu nanawo va na Tɔhonɔ̀a.
Mina Bible © Bible Society of Togo, 2014.