Levìwo 6
6
Ɖoɖo na Hũbonɔwo: Ènumème Vɔsa
1Tɔhonɔ̀ pò nupo na Mosè, eye be gblɔ̃ na ɛ̀ be: 2“Wò la sɔ ɖoɖo kèawo do àsi na Arɔ̀n ku èviawo:
Ènumème vɔsa be èkɔ̀nuwo ye nyi ekèa: Ènumème vɔsa kèa la nɔ̀ èzòkaa ji, lè vɔsakpea ji, lè èzãa keŋu-keŋu mè, kaka èŋù la kè, eye vɔsakpea be èzòa la nɔ bì ì. 3Hũbonɔa la do yebe àlɛ̃ŋudà be àwùa, eye be la do àlɛ̃ŋudà be gode ɖo e gɔ̃mè. Hũbonɔa la ɖè àmì be àfi kè so ènumème vɔsa mèa, lè vɔsakpea ji, eye be la sɔ ɛ̀ dà ɖo àkpa ɖèka na vɔsakpea. 4E la ɖè yebe àwùwo, eye be la do èbuwo. E yomè a, e la sɔ àmì be àfiawo to lè àsàɖaa mè, yì ɖo àfi ɖe kè kɔ̀a. 5Èzò kè le bì lè vɔsakpea jia mu ɖo la ci gbèɖe ò. Ŋùdekɛ̃nyɛ sia ŋùdekɛ̃nyɛa, hũbonɔa la tɔzò ànakèawo, la sɔ ènumème vɔ̀sawo ɖo e ji, eye be la sɔ ŋuti fàfa vɔsa be èlãa be àfi kèwo do àmìawo ɖo èzòa nu. 6Èzò la nɔ bì, lè vɔsakpea ji, gà sia gàmè, eye mu ɖo la ci gbèɖe ò.”
Àgblè mè-nukuwo be vɔsa
7Vɔsa kèa be èkɔ̀nuwo ye nyi ekèawo: Arɔ̀n be èviwo ye la jè ŋùkɔ̀ vɔsakpea, la sɔ ɛ̀ ɖo Tɔhonɔ̀ be ŋùmè. 8Wo la kù èwɔ meme kè ji wo kɔ̀ àmì ɖoa, àlɔ̀gògoe ɖèka, ku lifi kè lè ènu nana a jia kpata, eye wo la sɔ ɖo èzòa nu, lè vɔsakpea ji. E la bì, la nyi ŋùkuɖojinu kè be hɔ̃hɔ̃ɛ gbligbli jènà ŋùmè na Tɔhonɔ̀a. 9Ènu kè kpɔ̀tɔ̀a, Arɔ̀n ku èviawo la ɖù ì. Wo la ɖù ì, kè mawɛhuãnu mu la nɔ̀ e mè ò a, lè tèpe kè ŋuti kɔ̀a. Wo la ɖù ì lè Ègòdodo be gòxɔa be gbàjàa ji. 10Wo mu la ɖà ɛ̀ ku mawɛhuãnu ò. Ekèa ye mù la na wo, lè ènumème vɔsa kè wo hɛ̃ va na mùa mè. Ekèa nyi ènu kè ŋuti kɔ̀ ŋutɔa, sìgbè ènu kè kpɔ̀tɔ̀ lè èvuɛ̃ sɔsɔkè be vɔsaa ŋuti, àlo, lè ènujràɖo be vɔsaa ŋutia nène. 11Ŋusù ɖekpekpe kè so Arɔ̀n be jìjimèa teŋu ɖù ì; àjɔ̀ be nyi na mì, lè Tɔhonɔ̀ be ènumème vɔsaa ji, so jìjimè yì jìjimè. Ènu ɖekpekpe kè tɔ vɔsa kèa ŋutia, be ŋuti la kɔ̀.”
12Tɔhonɔ̀ pò nupo na Mosè, eye be gblɔ̃ na ɛ̀ be: 13“Ènu nana kè Arɔ̀n ku èviawo la hɛ̃ va na Tɔhonɔ̀, gbè kè gbè wo la do àmì èta na ɛ̀a ye nyi ekèa: èwɔ jijenu efà ɖèka be mamã èwogɔ̃a, sìgbè ènu nana kòkòɖàbì nène, mamã mè ŋùdekɛ̃nyɛ, mamã mè wètrɔ. 14Wò la blù èwɔa ku àmì, eye wò la sɔ yebe èmaa wɔ̀ klàko wliwli kè wò la mè lè klàko-kpe jia; wò la sɔ klàkoa va ɖo Tɔhonɔ̀ be ŋùkɔ̀, yebe hɔ̃hũɛ gbligblia la jè ŋùmè na Tɔhonɔ̀.
15Arɔ̀n be ŋusùviwo dòmètɔ kè wo la va do àmì èta na, sɔ ɖo hũbonɔ, ɖo ètɔa yomè a cã la wɔ̀ nènea ke: ènu nana kè wo la nɔ wɔ̀ kaka sɔyìa ye be nyi. Wo la tɔ ɛ̀ èzò, be la bì keŋu-keŋu na Tɔhonɔ̀. 16Hũbonɔ be ènu nana ɖekpekpea, la nyi blibo; àmè ɖekpe mu la ɖù ɖekpe lè e ŋuti ò.”
Vɔsa na sɔsɔkè
17Tɔhonɔ̀ gblɔ̃ na Mosè be: 18“Pò nupo na Arɔ̀n ku yebe ŋusùviwo: Èkɔ̀nu kè mì la nɔ wɔ̀ ɖo èvuɛ̃ taa ye nyi ekèa: Mì la nɔ wù èlã kè mì la sɔ savɔ ɖo èvuɛ̃ taa, lè àfi kè mì sònà èhlò na ènumème vɔsa be èlãa lèa, lè Tɔhonɔ̀ be ŋùkɔ̀. Ènu kɔ̀kɔ̀ɛ ŋutɔ ye be nyi. 19Hũbonɔ kè nɔ̀ ŋùkɔ̀ na èkɔ̀nu kèa ye la teŋu ɖù vɔsa kèa be ènu, eye, tèpe kè lè kɔ̀kɔ̀ɛa ye be la ɖù ì lè, lè gòxɔa be gbàjà ji. 20Ènu ɖekpe kè tɛ ɖo vɔsa kèa be èlã ŋutia be ŋuti la kɔ̀; ne yebe èhũ hlɛ̃ kɔ̀ ɖo àwù ɖe ŋutia, wò la nyà àwùa be àfi kè èhũa kɔ̀ ɖoa, lè Tèpe Kɔ̀kɔ̀ɛ ɖe. 21Ne wo ɖà vɔsa-lã kèa lè ànyikɔ be èze ɖe mèa, wo la gbã èzea, ne wo ɖà èlã vɔ̀a; vɔ̀a, ne wo ɖà ɛ̀ lè gàjɛ̃-ze mèa, ne wo gbe klɔ gàjɛ̃-zea nyuɛ̃ ɖe kpòa, wo la kpàsà ɛ̀ ku èsì. 22Ŋusù ɖekpekpe kè lè hũbonɔwo dòmèa teŋu ɖù ì, ɖoa, ènu kɔ̀kɔ̀ɛ ŋutɔ ye be nyi. 23Vɔ̀a, wo mu la ɖù vɔsa ɖo èvuɛ̃ ta be èlã ɖekpekpe kè be èhũ wo sɔ va Ègòdodo be gòxɔa mè, sɔ va wɔ̀ èvuɛ̃ sɔsɔkè be èkɔ̀nua ò. Wo la tɔ ɛ̀ èzò ye.
Mina Bible © Bible Society of Togo, 2014.