Levìwo 8
8
Mawunɔ cucugbãawo: Arɔ̀n ku èviawo
Mawunɔ ɖoɖo be èkɔ̀nu a
1Tɔhonɔ̀ gblɔ̃#8.1 Ènu kè lè Lev 8 mèa ku kè lè Tot 29 mèa mu tovò ò.na Mosè be: 2“Yɔ Arɔ̀n ku yebe ŋusùviwo va. Na ne woa sɔ sɛ̃sɛ̃-dɔ be àwùawo, àmì kè wo la do ètaa, vɔsa ɖo èvuɛ̃ ta be ènyìsua, àgbò èvèawo ku kpɔ̃nɔ àkpiti be àjàfia va Ègòdodo be gòxɔa mɔnu. 3E yomè a, yɔ àmèha bliboa bɔ̀ ɖo Ègòdodo be gòxɔa mɔnu.” 4Mosè wɔ̀ ènu kè Tɔhonɔ̀ ɖo na ɛ̀a, eye àmèha bliboa bɔ̀ ɖo Ègòdodo be gòxɔa mɔnu. 5Eye Mosè gblɔ̃ na àmèha a be: “Ènu kè Tɔhonɔ̀ ɖo be mia wɔ̀a ye nyi ekèa.” 6Mosè ɖè Arɔ̀n ku yebe ŋusùviwo fiɔ, eye be lè wo ɖì. 7E do àwù vlàyà na Arɔ̀n, sɔ ègojiblakà bla àlì ji na ɛ̀, do àwù gã na ɛ̀, eye be sɔ dàblaa#8.7 Tot 28.6-14 do e si. E bla dàbla be èkàa, sɔ do na ɛ̀. 8E do àkɔtacɔ̃nua na ɛ̀, eye be sɔ Urìm ku Tumìm#8.8 Urìm ku Tumìm nyi èdɔwɔ̀nu ɖe kèwo hũbonɔwo zãna, sɔ biɔna ènyà Tɔhonɔ̀. Kpɔ Tot 28.15-30 do e mè. 9E bla èta na ɛ̀ ku dukù, eye be sɔ sìka be èsepòpo ɖo dukùa be ŋùgonu. Ènu kèa ye nyi àsiɖota be jèsìdo, sìgbè lekè Tɔhonɔ̀ ɖo è na Mosè a nène#8.9 Tot 28.4-43; 39.1-31. 10E yomè a, Mosè wu àmì kè be sɔ wɔ̀nà èkɔ̀nua, ɖo Ègòdodo be gòxɔa mè, ku ènu kèwo keŋu lè e mèawo ŋuti, sɔ kɔ̀ woa ŋuti. 11E wu àmìa ɖo vɔsakpea ŋuti, zè adrɛ̃. E gbà sì ì do vɔsa be èdɔwɔ̀nuwo, àdàwa gã ku yebe gɔ̃mèɖonua keŋu ŋuti, sɔ kɔ̀ woa ŋuti. 12Mosè kɔ̀ àmì kèa ɖo èta na Arɔ̀n, sɔ kɔ̀ e ŋuti na Tɔhonɔ̀. 13Mosè sɔ Arɔ̀n be ŋusùviwo ɖo Tɔhonɔ̀ be ŋùmè, do àwù vlàyà na wo, bla àlì ji na wo, eye be bla èta na wo, ɖo lekè Tɔhonɔ̀ ɖo è na ɛ̀a ji.
14Mosè na wo kplɔ̀ èvuɛ̃ sɔsɔkè be vɔsa be ènyìsua va; Arɔ̀n ku yebe ŋusùviwo vlũ àlɔ̀ ɖo èta ji na ènyìsua; 15Mosè sò èhlò na ènyìsua, ɖè yebe èhũ; e sɔ àlɔ̀vi, sɔ tɔ èhũa mè, sɔ sì ɖo àzò kèwo ye trɔ do vɔsakpea be èto mèawo ji, sɔ kɔ̀ vɔsakpea ŋuti. E sɔ èhũa kɔ̀ ɖo vɔsakpea be gɔ̃mè, eye be wɔ̀ èvuɛ̃ sɔsɔkè be èkɔ̀nua, sɔ kɔ̀ vɔsakpea ŋuti#8.15 Kpɔ Tot 40.9-13. 16Mosè ɖè àmì kè kpata lè àdɔ̀mè mè-nuawo jia, àgòa, àyìku èvèawo ku woabe àmìa, eye be sɔ wo ɖo èzò nu, lè vɔsakpea ji. 17Wo tɔzò ènyìa ŋutɔ kè kpɔ̀tɔ̀a be àgbàzea, èlãa ku èmia kpata, lè àsàɖaa godo, sìgbè lekè Tɔhonɔ̀ ɖo è na Mosè a nène.
18Mosè sɔ ènumème vɔsa be àgbòa ɖo Tɔhonɔ̀ be ŋùmè; Arɔ̀n ku yebe ŋusùviwo vlũ àlɔ̀ ɖo èta ji na àgbòa. 19Mosè sò èhlò na àgbòa, eye be wu èhũa, trɔ do vɔsakpea. 20Mosè ko àgbòa, ma ɛ̀ ɖo tèpe ènè, eye be sɔ ètaa, mamãwo ku àmìa ɖo èzò nu. 21Mosè klɔ àdɔ̀mènuawo ku àfɔ̀awo, eye be sɔ àgbò bliboa keŋu ɖo èzò nu; e nyi ènumème vɔsa kè be hɔ̃hɔ̃ɛ gbligbli jènà ŋùmè na Tɔhonɔ̀, sìgbè lekè Tɔhonɔ̀ ɖo è na Mosè a nène.
22Mosè sɔ àgbò èvègɔ̃a ɖo Tɔhonɔ̀ be ŋùmè, sìgbè àmì do èta na àmè be vɔsa be àgbò nène; Arɔ̀n ku yebe ŋusùviwo vlũ àlɔ̀ ɖo èta ji na àgbòa. 23Mosè sò èhlò na ɛ̀, eye be ɖè yebe èhũ, sɔ ɛ̀ tɔ Arɔ̀n be ɖùsi mè be ètoa, sɔ ɛ̀ tɔ Arɔ̀n be ɖùsi-lɔ be dègblèfèsu ji ku yebe ɖùsi-fɔ be dèglèfèsu ji. 24Mosè sɔ Arɔ̀n be ŋusùviwo ɖo Tɔhonɔ̀ be ŋùmè, eye be sɔ èhũa tɔ woabe ɖùsi mè be èto, sɔ tɔ woabe ɖùsi-lɔ be dèglèfèsu ji ku woabe ɖùsi-fɔ be dèglèfèsu ji. E yomè a, Mosè sɔ èhũa wu, trɔ do vɔsakpea. 25Mosè sɔ àgbòa be tèpe kèwo do àmìa, àsikea, àmì kè kpata lè àdɔ̀mènuawo jia, àgòa, ku àyìku èvèawo kpe ɖo woabe àmìa ŋuti, ku ɖùsi mè be àtaa cã. 26Mosè sɔ klàko àkpiti, lè àjàfi kè wo sɔ ɖo Tɔhonɔ̀ be ŋùkɔ̀a mè, klàko kè wo tɔ̀ lè àmì mèa, ku dòkɔ̃, àlo bòtòkɔ̃ɛ, eye be sɔ wo ɖo èlãa be àmìawo ku yebe ɖùsi mè be àtaa ji; 27E sɔ woa kpata ɖo Arɔ̀n ku èvia ŋusùwo be àlɔ̀wo ji. E na wo sɔ ɛ̀ ɖo Tɔhonɔ̀ be ŋùmè, lè ènu sɔsɔ na Tɔhonɔ̀ be ɖoɖo a nu. 28Mosè gbìgbɔ̀ xɔ̀ ɛ̀ lè woa si, eye be sɔ ɛ̀ ɖo èzòa nu ku ènumème vɔsaa, lè vɔsakpea ji. E nyi hũbonɔ ɖoɖo be vɔsa, kè hɔ̃ɛ gbligbli do Tɔhonɔ̀a. Ènuɖùɖu kè wo tɔzò na Tɔhonɔ̀a ye be nyi. 29Mosè sɔ àgbòa be àkɔta, sɔ wɔ̀ èkɔ̀nu ɖo Tɔhonɔ̀ be ŋùmè. Ekèa ye nyi Mosè be mamã kè be xɔ̀ lè vɔsa kèa mè, sìgbè leke Tɔhonɔ̀ ɖo è na Mosè a nène.
30Mosè kù àmì kè be sɔ kɔ̀nà ènu ŋutia, ku èhũ kè le vɔsakpea jia, eye be sɔ wu ɖo Arɔ̀n ku yebe àwùawo ŋuti; nènea ke, e sɔ wu ɖo Arɔ̀n be ŋusùviwo ku woabe àwùwo ŋuti. Lekea ye Mosè kɔ̀ Arɔ̀n ku yebe àwùwo ŋuti, sɔ ɛ̀ ɖo hũbonɔ. Eye be kɔ̀ Arɔ̀n be ŋusùviwo ku woabe àwùwo ŋuti, sɔ wo ɖo hũbonɔwo.
31Mosè gblɔ̃ na Arɔ̀n ku yebe ŋusùviawo be: “Mì ɖà èlãa, lè Ègòdodo be gòxɔa mɔnu; funua ye mì la ɖù ì lè ku kpɔ̃nɔ kè lè èkɔ̀nu ŋua be àjàfi mèa, sìgbè lekè mù ɖè ègbè na mì ɖoa nu be: 'Arɔ̀n ku yebe ŋusùviwo ye la ɖù ì.' 32Èlã ku kpɔ̃nɔ kè la kpɔ̀tɔ̀a, mì la lɔ ɛ̀ kɔ̀ ɖo èzò mè. 33Mì mu la jo lè Ègòdodo be gòxɔa mɔnu, kaka na ŋùkèkè adrɛ̃ kè yomè mìabe hũbonɔ be èdɔxɔ̀xɔa la wu e nu ò. Ɖoa, wo la wɔ̀ èkɔ̀nua na mì, kaka na ŋùkèkè adrɛ̃. 34Leke mi wɔ̀ èkɔ̀nua egbèa ye nyi ɖoɖo kè Tɔhonɔ̀ wɔ̀ na hũbonɔ be èdɔxɔ̀xɔ be èkɔ̀nua. Tɔhonɔ̀ ɖè ègbè be woa wɔ̀ ɛ̀ nènea, ne woa wɔ̀ èvuɛ̃ sɔsɔkè be èkɔ̀nu na mì. 35Mì la nɔ̀ Ègòdodo be gòxɔa mɔnu, èzã ku kedè, ŋùkèkè adrɛ̃. Ekèa yomè kpò ye mì la teŋu kpɔ èmɔ, la wɔ̀ Tɔhonɔ̀ be sɛ̃sɛ̃dɔa, kè mì mu la kpɔ èku ò a. Ègbè kè Tɔhonɔ̀ ɖè na mùa yeŋu.” 36Arɔ̀n ku yebe ŋusùviwo wɔ̀ ɖo ègbè kèwo keŋu Tɔhonɔ̀ ɖè na wo, to Mosè jia.
Mina Bible © Bible Society of Togo, 2014.