Levìwo 23
23
Izràɛlviwo be àzãɖùɖuwo
1Tɔhonɔ̀ gblɔ̃ na Mosè be: 2“Pò nupo na Izràɛlviwo, ne wòa gblɔ̃ na wo be: Tɔhonɔ̀ be àzã tɔ̀xɛwo ye nyi àzãɖùɖu kèwo ji mì la nɔ kpe Izràɛlviwo na bɔ̀bɔ kɔ̀kɔ̀ɛwo lèa. Bɔ̀bɔ kɔ̀kɔ̀ɛ be àzãɖùɖuawo ye nyi ekèawo:
3Ŋùkèkè àdɛ̃ ye mì la nɔ wɔ̀dɔ, vɔ̀a, ŋùkèkè adrɛ̃gɔ̃ a gbèa nyi jɛ̃gbɔ̃zãgbè; mì la wɔ̀ bɔ̀bɔ tɔ̀xɛ lè ŋùkèkè ŋua ji; mì mu la wɔ̀ èdɔ ɖekpe ò. Tɔhonɔ̀ be jɛ̃gbɔ̃zã ye be nyi, lè àfi ɖekpekpe kè mì lèa#23.3 Gɔ̃m 2.1-3; Tot 16.23-30; 20.8-11; 23.12; 31.12-17; 34.21; 35.2; Gbì 5.12-14..
4Tɔhonɔ̀ be àzã kèwo gbè mì la nɔ wɔ̀ bɔ̀bɔ tɔ̀xɛwo, lè ŋùkèkè ɖoɖɛwo jiawo ye nyi ekèawo:
5Wètri cucugbãa be ŋùkèkè woènègɔ̃a gbè, lè fìɛ̃si mèa ye nyi Tɔhonɔ̀ be Toŋutivayì#23.5 Kpɔ Tot 12.1-14; Hɛ̃h 28.16; Gbì 16.1-2..
6Wètri kèa ke be ŋùkèkè woeàtɔ̃gɔ̃a gbè ye nyi kpɔ̃nɔ àkpiti be àzãa na Tɔhonɔ̀. Mì la ɖù kpɔ̃nɔ àkpiti, ŋùkèkè adrɛ̃. 7Àzãa be ŋùkèkè cucugbãa gbèa, mì la wɔ̀ bɔ̀bɔ kɔ̀kɔ̀ɛ, ne mìa sɛ̃ mù. Mì mu la wɔ̀ èkluvi be èdɔ ɖekpe ò. 8Gbè sia gbè, lè ŋùkèkè adrɛ̃ ŋuawo mèa, mì la wɔ̀ ènumème vɔsa na Tɔhonɔ̀. Ŋùkèkè adrɛ̃gɔ̃ a gbèa, mì la wɔ̀ bɔ̀bɔ kɔ̀kɔ̀ɛ; mì mu la wɔ̀ èdɔ sɛ̃ŋu ɖekpe ò.”
9Tɔhonɔ̀ pò nupo na Mosè, eye be gblɔ̃ na ɛ̀ be: 10“To na Izràɛlviwo be:
Ne mì va yì ɖo ànyigbã kè mù sɔ le na mìa jia, ne mì yà nukuwoa, mì la sɔ èlù kè mì la bla cucugbãa va na hũbonɔa, eye be la nyi mìabe ènuŋɛ̃ŋɛ̃ cucugbãa. 11Hũbonɔa la sɔ èlù bablaa na, lè Tɔhonɔ̀ be ŋùkɔ̀, àleke be Tɔhonɔ̀ ne xɔ̀ mìabe ènu nana. Hũbonɔa la wɔ̀ ènu nana vɔsa kèa, jɛ̃gbɔ̃zãa be ŋùkè gbè. 12Gbè kè gbè mì la sɔ èlù bablaa savɔa, mì la sɔ èpè ɖèka be àlɛ̃vi kè ŋuti èdɔ̀lele ɖekpe mu lè ò a wɔ̀ ènumème vɔsa na Tɔhonɔ̀. 13Mì la sɔ èwɔ, efà be jijenu be mamã èwogɔ̃a tèpe èvè, la blù ì ku àmì, la sɔ wɔ̀ ènumème vɔsa kè la hɔ̃ɛ gbligbli do Tɔhonɔ̀, ne bèa fa àkɔ na ɛ̀. Mì la sɔ vɛ̃, hɛ̃ be jijenu be mamã ènègɔ̃a kpe ɖo e ŋuti, na èsìkɔ̀ɖɛ. 14Mì mu la ɖù nukuyàya kèa be ènu ɖekpe kè nyi kpɔ̃nɔ, èlù mème, èbli yeye, jè ŋùkɔ̀ na gbè kè gbè mì la sɔ mìabe Mawu be ènu nana a va ò. Èse kòkòɖàbì be nyi na mì, so jìjimè, yì jìjimè, lè àfi ɖekpekpe kè mì la nɔ̀a.”
Nukuyàya be àzã
15Mì la hlɛ̃ kuasiɖa adrɛ̃, so jɛ̃gbɔ̃zã be ŋùkè gbè ji, ekè nyi so gbè kè gbè mì sɔ èlù bablaa va ɖo Tɔhonɔ̀ be ŋùkɔ̀a ji, mì la hlɛ̃ kuasiɖa ɖɔɖɔ adrɛ̃; 16kaka va ɖo jɛ̃gbɔ̃zã adrɛ̃gɔ̃ a be ŋùkè gbè ji, eŋuã, mì la hlɛ̃ ŋùkèkè èkà ci èwo, eye mì la sɔ nukuyàya be ènu nana va Tɔhonɔ̀ be ŋùkɔ̀. 17Àfi ɖekpekpe kè mì lèa, mì la hɛ̃ kpɔ̃nɔ kè wo sɔ èwɔ jijenu efà be mamã èwogɔ̃a tèpe èvè wɔ̀a, wo la mè è, be la nyi kpɔ̃nɔ kè hɔ̃a: ekèa la nyi Tɔhonɔ̀ be nuku cucugbãa, eye mì la sɔ va ɖo ŋùkɔ̀ na ɛ̀. 18Sɔ kpe ɖo kpɔ̃nɔa ŋutia, mì la sɔ èpè ɖèka be àlɛ̃vi adrɛ̃ kèwo ŋuti èdɔ̀lele ɖekpe mu lè ò a, ènyì-su ɖèka ku àgbò èvè, la wɔ̀ ènumème vɔsa na Tɔhonɔ̀, eye mì la sɔ ènu ɖùɖu vɔsa be ènuwo ku woabe èsìkɔ̀ɖɛ be àhàwo, ne woa nyi vɔsa kè la hɔ̃ɛ gbligbligbli, la fa èjì na Tɔhonɔ̀a. 19Mì la sɔ ègbɔ-su ɖèka, sɔ wɔ̀ vɔsa ɖo èvuɛ̃ ta, ku èpè ɖèka be àlɛ̃vi èvè, sɔ wɔ̀ ŋuti fàfa be vɔsa. 20Hũbonɔa la sɔ wo ɖo Tɔhonɔ̀ be ŋùmè, àlɛ̃vi èvèawo ku nuku cucugbãa be kpɔ̃nɔawo ɖodu. Ènu nana kɔ̀kɔ̀ɛ wo nyi na Tɔhonɔ̀, eye, e yomè a, wo la nyi Hũbonɔa tɔ̀. 21Àzã ŋua gbèa, mì la wɔ̀ bɔ̀bɔ kɔ̀kɔ̀ɛ; mì mu la wɔ̀ kluvi be èdɔ ɖekpe ò. Èse kòkòɖàbì be nyi na mì, so jìjimè, yì jìjimè, lè àfi ɖekpekpe kè mì lèa#23.21 Kpɔ Tot 23.16; 34.22; Hɛ̃h 28.26; Gbì 16.9-22..
22Ne mì yà nuku, lè mìabe ànyigbãwo jia, mì mu la ŋɛ̃ nukuawo kaka sɔ yì àgblèa be ètomè ò, eye mì mu la lɔ nuku kèwo hlɛ̃ ɖo ànyigbãa ò; mì la gble wo ɖɛ na wɔ̀amènɔ̀ ku àmèjrowo. Ènyè ye nyi Tɔhonɔ̀, mìabe Mawu#23.22 Kpɔ èta 19.9-10; Gbì 24.19-22..”
Ŋùkuɖoji ku kafu be àzã
23Tɔhonɔ̀ gblɔ̃ na Mosè be: 24“To na Izràɛlviwo be:
Wètri adrɛ̃gɔ̃ a be ŋùkèkè cucugbãa la nyi jɛ̃gbɔ̃zã na mì; e la nyi ŋùkuɖoji be àzã ku àyosòso, àsikpepòpo ku kafu be àzã na mì. 25Mì mu la wɔ̀ èdɔ sɛ̃ŋu ɖekpe ò; mì la wɔ̀ ènumème vɔsa na Tɔhonɔ̀#23.25 Hɛ̃h 29.1-6.
Èvuɛ̃ sɔsɔkè be Ŋùkèkè Gãa
26Tɔhonɔ̀ gblɔ̃ na Mosè be:
27“Wètri adrɛ̃gɔ̃ kèa be ŋùkèkè èwogɔ̃a gbè kè le nyi sɔsɔkè be ŋùkèkè gãa, mì la wɔ̀ bɔ̀bɔ kɔ̀kɔ̀ɛ, mì la blanu, eye mì la wɔ̀ ènumème vɔsa na Tɔhonɔ̀. 28Mì mu la wɔ̀ èdɔ sɛ̃ŋu ɖekpe lè ŋùkèkè kèa ji ò. Ɖoa, sɔsɔkè be ŋùkèkè gã kè gbè wo la wɔ̀ èvuɛ̃ sɔsɔkè be èkɔ̀nu na mì, lè Tɔhonɔ̀, mìabe Mawu be ŋùmè a ye be nyi. 29Àmè ɖekpekpe kè mu la blanu lè ŋùkèkè ŋua ji ò a, wo la ɖè è jo lè yebe xòmètɔwo dòmè; 30eye, àmè ɖekpekpe kè la wɔ̀dɔ lè ŋùkèkè ŋua jia, mù la bu ŋùmè na ɛ̀, lè yebe dùkɔ̃a dòmè. 31Mì mu la wɔ̀ èdɔ ɖekpekpe ò: èse kòkòɖàbì be nyi na mì, lè àfi ɖekpekpe kè mì la nɔ̀a, so jìjimè, yì jìjimè. 32Jɛ̃gbɔ̃zã be nyi na mì, ŋùkèkè kè ji mì la gbɔ̃jɛ̃ lè, la blanua. So wètria be ŋùkèkè àsiɖèkɛgɔ̃a gbè be fìɛ̃si mè, so yebe ŋùkè gbè be fìɛ̃si mè, mì la zɔ̃ ɖo jɛ̃gbɔ̃zã kèa ji#23.32 hɛ̃hlɛ̃ 27 yì 32: Kpɔ èta 16; Hɛ̃h 29.7-11.”
Gòxɔwo be àzã
33Tɔhonɔ̀ gblɔ̃ na Mosè be: 34“To na Izràɛlviwo be: Wètri adrɛ̃gɔ̃ kèa be ŋùkèkè woeàtɔ̃gɔ̃a gbèa, la nyi Gòxɔ̀wo be àzã kè la xɔ̀ ŋùkèkè adrɛ̃, na Tɔhonɔ̀ be gogo. 35Ŋùkèkè cucugbãa gbèa, mì la wɔ̀ bɔ̀bɔ kɔ̀kɔ̀ɛ, eye mì mu la wɔ̀ èdɔ ɖekpe ò. 36Ŋùkèkè adrɛ̃awo be gbè sia gbèa, mì la wɔ̀ ènumème vɔsa na Tɔhonɔ̀. Ŋùkèkè ènyigɔ̃a gbèa la nyi àzãa be ènuwuwu; mì mu la wɔ̀ èdɔ ɖekpe gbè ŋua gbè ò.
37Àzã ŋuawo ye nyi Tɔhonɔ̀ be àzã tɔ̀xɛ kèwo ŋuti bùbu la nɔ̀, àzã kèwo ji mì la wɔ̀ bɔ̀bɔ kɔ̀kɔ̀ɛ lè, ne mìa wɔ̀ ènumème vɔsa na Tɔhonɔ̀, mìa wɔ̀ ŋuti fàfa be vɔsa, àlo, èsìkɔ̀ɖɛ be èkɔ̀nu, sɔ zɔ̃ ɖo gbè sia gbè be èkɔ̀nu ji. 38Mì la nɔ zɔ̃ ɖo e ji, kpe ɖo Tɔhonɔ̀ be jɛ̃gbɔ̃zãwo ku ènu nana kudo èjro nyuɛ̃ be vɔsa gbàkudo vɔsa kèwo keŋu mì la wɔ̀ na Tɔhonɔ̀a ŋuti.
39Sɔ kpe ɖo ekèa ŋutia, wètri adrɛ̃gɔ̃ a be ŋùkèkè woeàtɔ̃gɔ̃a, ne mì yà àgblèmè nukuwo vɔ̀a, mì la wɔ̀ èmɔzɔ̃zɔ̃, la sɔ ɖù àzã na Tɔhonɔ̀, ŋùkèkè adrɛ̃. Ŋùkèkè cucugbãa la nyi jɛ̃gbɔ̃zã, eye ŋùkèkè ènyigɔ̃a, cã la nyi jɛ̃gbɔ̃zã. 40So àzãa be ŋùkèkè cucugbãa gbèa, mì la ji àtikusɛ̃sɛ̃ nyakpɔkpɔwo, mì la ji èdebàyà, àti be àlɔ̀zɛ̃ kèwo do àmà nyuɛ̃ ɖe a, àlo, ètɔ̀to be àtivi kèwo vũ nyuɛ̃ ɖeawo ɖo àsi, la nɔ sò àyo lè Tɔhonɔ̀, mìabe Mawu be ŋùkɔ̀, ŋùkèkè adrɛ̃ sɔ̃ŋu#23.40 Kpɔ Neh 8.15-17. 41Mì la nɔ wɔ̀ èmɔzɔ̃zɔ̃ kèa, la sɔ ɖù àzã na Tɔhonɔ̀, ŋùkèkè adrɛ̃ sɔ̃ŋu, lè èpèa mè. Èse kòkòɖàbì be nyi na mì, eye mì la nɔ zɔ̃ ɖo e ji, so jìjimè, yì jìjimè. Mì la nɔ wɔ̀ èmɔzɔ̃zɔ̃ kɔ̀kɔ̀ɛ kèa, lè wètri adrɛ̃gɔ̃ a mè. 42Mì la nɔ dɔ̃ gòxɔ mè, ŋùkèkè adrɛ̃; Izràɛlvi jìji ɖe sia ɖe la nɔ dɔ̃ gɔ̀xɔ mè, 43àleke be, so jìjimè yì jìjimè, mìa nya be mù na Izràɛlviwo nɔ̀ gòxɔ mè kpɔ, wàlɛbɛ kè mù ɖè wo to so Ejiptè-nyigbã jia. Ènyè ye nyi Tɔhonɔ̀, mìabe Mawu#23.43 Tot 23.16; 34.22; Hɛ̃h 29.12; Gbì 16.13-15..”
44Ekèa yomè a, Mosè gblɔ̃ leke wo la dogò Tɔhonɔ̀, lè àzãɖùɖu kɔ̀kɔ̀ɛwo mè ɖoa na Izràɛlviwo.
Mina Bible © Bible Society of Togo, 2014.