Levìwo 22
22
Ɖoɖo so Mawu be vɔsanuwo ɖùɖu ŋuti
1Tɔhonɔ̀ gblɔ̃ na Mosè be:
2“Pònupo na Arɔ̀n ku yebe ŋusùviwo so gà kèwo mè, wo ɖo la nɔ nɔ̀ àzɔ̀ge na ènu nana kɔ̀kɔ̀ɛ kè Izràɛlviwo hɛ̃ va na mùa, ne wo mu gbà va dovlo àpe nyikɔ kɔ̀kɔ̀ɛa ò. Ènyè ye nyi Tɔhonɔ̀. 3Gblɔ̃ na wo be:
Kaka sɔyìa, mìabe jìjimèvi kè la nɔ̀ màkɔ̀ màkɔ, eye be la gogo ènu nana kɔ̀kɔ̀ɛ kè Izràɛlviwo la wɔ̀ na Tɔhonɔ̀a, wo la crɔ̃ àmè ŋua, jo lè ŋùkɔ̀ na mù. Ènyè ye nyi Tɔhonɔ̀. 4Arɔ̀n be jìjimèvi ɖekpe, kè jè èkpò, àlo, kè ŋuti èsì le sìɔ̃ lèa mu la ɖù ènu nana kɔ̀kɔ̀ɛa, gbɔ̀xue woa kɔ̀ e ŋuti ò. Nène a ke be lè na àmè kè tɔ àsi ènu ɖekpekpe kè ŋuti àmèkuku tɔ, eye be trɔ zũ màkɔ̀ màkɔa, nènea ke ye be lè na àmè kè ŋuti èsì lè kɔ̀ lèa, 5ku àmè kè tɔ àsi èlãklìvi ɖekpekpe kè nana be àmè ŋuti mu kɔ̀nà ò a, àlo, àmè kè tɔ àsi àmè kè ŋuti mu kɔ̀ ò a. 6Àmè kè ŋuti ènu kèawo tɔa, la nɔ̀ màkɔ̀ màkɔ kaka na fìɛ̃si, eye ne e lè èsì vɔ̀a, gbɔ̀xue be la teŋu ɖù ènu nana kɔ̀kɔ̀ɛa. 7Ne èwè ɖoxɔ̀a, yebe ŋuti la kɔ̀; ekèa yomè a, e teŋu ɖù ènu nana kɔ̀kɔ̀ɛa, ɖoa, yebe ènu ɖùɖu ye be nyi. 8Mu ɖo la ɖù èlã kè ku, àlo, kè ye èlã ɖe vũvũa ò; ekèa la wɔ̀ ɛ̀ màkɔ̀ màkɔ. Ènyè ye nyi Tɔhonɔ̀.
9Gblɔ̃ na Izràɛlviwo be wo ne le àpe èsewo ɖo àsi, àleke be woabe ènu ɖùɖu mu gbà dro èvuɛ̃ be àgbã na wo ò. Ne wo gble èse nyèwo be èkɔ̀doa, ekèa la na wo la ku; ènyè ye nyi Tɔhonɔ̀ kè kɔ̀ woa ŋutia.
10Àmè kè mu nyi hũbonɔ ò a mu kpɔ èmɔ, la ɖù ènu ɖùɖu kè ŋuti wo kɔ̀a ò. Àmè kè hũbonɔa ŋutɔ kpea cã, àlo àmè kè le wɔ̀dɔ, be le tufɛ̃ na cã mu la ɖù ì ò. 11Gãkea, ne hũbonɔa plè àmè ɖe ku ègàa, àmè kèa teŋu ɖù ènu ɖùɖu kè nyi Mawu tɔ̀a, sìgbè lekè sumɔ̃vi kè wo jì lè àxuea mèa cã ɖùnà ɛ̀a nène. Woawo ye la teŋu ɖù ì. 12Hũbonɔ be nyɔ̃nùvi kè ɖè àmè kè mu nyi hũbonɔ ò a mu kpɔ èmɔ, la ɖù ènu kè wo ɖè lè ènu ɖùɖu kè lè kɔ̀kɔ̀ɛa ŋutia ò. 13Gãkea, ne hũbonɔ be nyɔ̃nùvi ɖe nyi àhòsì, àlo, wo nyà ɛ̀ lè àsuxuea, ne mu jì èvi ò, eye be trɔ yì ètɔa be àxomè, sìgbè wàlɛbɛ kè be gbà nyi tùgbɛ̀jɛa nènea, eŋuã, e teŋu ɖù ètɔa be ènu ɖùɖu, togbɔ be àmè kè mu nyi hũbonɔ òa mu ɖo la ɖù ì ò a.
14Ne àmè ɖe kè mu nyi hũbonɔ ò a, mu nya ò, vɔ̀a ɖù ènu kè nyi Mawu tɔ̀a, e ɖo la sɔ ènu kè be ɖùa ɖo e tèpe, eye be la tu yebe mamã àtɔ̃gɔ̃a na hũbonɔa.
15Hũbonɔwo mu kpɔ èmɔ la gble èkɔ̀do na ènu nana kɔ̀kɔ̀ɛ kè Izràɛlviwo hɛ̃ va, kèwo wo ɖè ɖovò na Tɔhonɔ̀a ò. 16Ne wo ɖù ènu nana kɔ̀kɔ̀ɛ kèawoa, wo la dro èvuɛ̃ kè biɔ ènujràɖo be àgbãa na woa ɖokoewo, ɖoa, ènyè ye nyi Tɔhonɔ̀ kè le kɔ̀ woa ŋutia#22.16 Lè gɔ̃mèɖèɖe buwo mèa, wo ŋlɔ̀ be: “…ne wo ɖè àsi lè Izràɛlviwo ŋuti, wo ɖù ènu kèawoa, wo la dro èvuɛ̃ kè biɔ jàjràɖoa be àgbã na wo.”. Ènyè ye nyi Tɔhonɔ̀ kè kɔ̀nà ènu nanawo ŋutia.”
Ɖoɖo so vɔsa be èlãwo ŋuti
17Tɔhonɔ̀ gblɔ̃ na Mosè be: 18“To na Arɔ̀n ku yebe ŋusùviwo kudo Izràɛl be àmèha bliboa be:
“Ne ŋusù ɖe kè nyi Izràɛlvi, àlo, àmèjro kè lè Izràɛl-nyigbã jia jro be yèa sɔ ènu nana va wɔ̀ ènumème vɔsa na Tɔhonɔ̀, sìgbè vɔsa kèwo wo wɔ̀nà na Tɔhonɔ̀, ne wo fìã àjɔ̀gbèa nènea, 19ne mì jro be mìabe ènu nana a ne jè ŋùmè na Tɔhonɔ̀a, mì sɔ èlã àsu, kè ŋuti èdɔ̀lele ɖekpe mu lè ò a, lè mìabe ènyìwo, àlɛ̃wo, àlo, ègbɔwo be èlãha dòmè. 20Mì mu gbà sɔ èlã ɖe kè ŋuti èdɔ̀lele ɖe lèa ò; ne mu nyi nène ò a, Tɔhonɔ̀ mu la xɔ̀ mìabe vɔsaa ò#22.20 Hɛ̃hlɛ̃ 18-20: Kpɔ 1.3; Gbì 17.1.. 21Ne ŋusù ɖe jro la wɔ̀ vɔsa ɖo àjɔ̀gbè ɖe kè be fìã na Tɔhonɔ̀a ta, àlo, la wɔ̀ ŋuti fàfa be vɔsaa, èlã kè be la sɔ lè yebe ènyì, ègbɔ, àlo, lè àlɛ̃wo dòmèa mu ɖo la ɖo èdɔ̀lele ɖekpe, àlo, èvuɛ̃ ɖekpe, ne àmèa jro be Tɔhonɔ̀ ne xɔ̀ yèbe vɔsaa ò. 22Ŋùkuvi mu ɖo la gbã na èlãa ò, àfi ɖekpe mu ɖo la ŋɛ̃ na ɛ̀ ò. Yebe ŋutilã be àfi ɖekpe mu ɖo la sò jo ò, mu ɖo la jè àkpà ò, èjì, àlo, àgbàze mè be èdɔ̀ ɖekpe mu ɖo la le è ò. Mì mu gbà sɔ èlã kèwo ŋuti èdɔ̀lele kèawo dòmètɔ ɖe lèa ɖo Tɔhonɔ̀ be ŋùmè, àlo, la sɔ ɖo Tɔhonɔ̀ be vɔsakpe ji be woa sɔ wɔ̀ ènumème vɔsa na Tɔhonɔ̀ ò. 23Ne àmè ɖe ŋutɔ jro kpò kpàtà, be yèa savɔ, eye ènyì àlo, àlɛ̃, àlo, ègbɔa be àfɔ̀ ɖe glia, Tɔhonɔ̀ teŋu xɔ̀ yebe vɔsa. Vɔ̀a, ne e nyi àjɔ̀gbè ɖèɖe be vɔsa ye be nyia, Tɔhonɔ̀ mu la xɔ̀ ɛ̀ ò. 24Mì mu gbà sɔ èlã ɖe kè be neku, wo gbã, neku kè wo mimi, wo vũvũ, àlo, neku kè wo sò joa; mì mu gbà sɔ ekèa gbèɖe, va na Tɔhonɔ̀ lè mìabe ànyigbã ji ò. 25Mì mu gbà xɔ̀ èlã ŋuawo dòmètɔ ɖekpe lè àmèjro be èvi ɖe si, la sɔ wɔ̀ ènu ɖùɖu, ɖo ŋùmè na mìabe Mawu ò. Ɖoa, ènu ɖe wɔ̀ èlã ŋuawo. Tɔhonɔ̀ mu la xɔ̀ èlã ŋuawo be vɔsa na mì ò.”
26Tɔhonɔ̀ gbà gblɔ̃ na Mosè be:
27“Ne wo jì ènyìvi, àlɛ̃vi, àlo, ègbɔvi ɖe a, e la gbà nɔ̀ ènɔa ŋuti, ŋùkèkè adrɛ̃. Ne wo sɔ wo savɔ, wàlɛbɛ kè wo xɔ̀ ŋùkèkè ènyi vɔ̀ yomè a, Tɔhonɔ̀ la xɔ̀ woabe ènumème vɔsa na mì. 28Vɔ̀a, mì mu kpɔ èmɔ la sò èhlò na èlã ɖe, ènyì, àlɛ̃, àlo, ègbɔ ku èvia, lè ŋùkèkè ɖèka gbè ò#22.28 Kɔ̀do kèwo lè hɛ̃hlɛ̃ 27 ku 28, wo susu be Kanàn-nyigbã jitɔwo wɔ̀nà ènu kèawo sùgbɔ sãa.
29Ne mì le wɔ̀ kàfù-kafu be vɔsaa, mì wɔ̀ ɛ̀, àleke be Tɔhonɔ̀ bèa xɔ̀ ɛ̀ na mì: 30Mì la ɖù ì, gbè ŋua gbè ke, kè mì mu la gble ènu ɖekpe ɖɛ, èŋù la kè ɖo e ji ò a. Ènyè ye nyi Tɔhonɔ̀.
31Mì le èse nyèwo ɖo àsi, ne mìa nɔ zɔ̃ ɖo woa ji. Ènyè ye nyi Tɔhonɔ̀. 32Mì mu la dovlo nyikɔ kɔ̀kɔ̀ɛ nyèa ò, àleke be nyikɔ nyè ŋuti ne kɔ̀, lè Izràɛlviwo dòmè; ènyè ye nyi Tɔhonɔ̀ kè le kɔ̀ mìa ŋutia. 33Ènyè ye nyi Tɔhonɔ̀ kè kplɔ̀ mì jo lè Ejiptè-nyigbã ji, ne ma nyi mìabe Mawu. Ènyè ye nyi Tɔhonɔ̀.
Mina Bible © Bible Society of Togo, 2014.