Levìwo 24
24
Kɔ̀kɔ̀ɛpea be kãligbɛ̃tia
1Tɔhonɔ̀ gblɔ̃ na Mosè be:
2“Ɖè ègbè na Izràɛlviwo be wo ne hɛ̃ àmìti be àmì kè wo mu zã kpɔ ò a, kè mè kɔ̀ ceke cekea va, ne woa sɔ nɔ sũ kãligbɛ̃ ɖɛ tɛ̀gbɛ̀, 3ɖo zòɖùɖu be èxɔ̀mèsɔ̀vɔa be ŋùkɔ̀, lè Ègòdodo be gòxɔa mè. Arɔ̀n la ɖo kãligbɛ̃ a ɖɛ, àleke be ne nɔ bì, lè Tɔhonɔ̀ be ŋùkɔ̀, so fìɛ̃si mè, kaka na ŋùdekɛ̃nyɛ mè, kaka sɔyì. Èse kòkòɖàbì be nyi na mì. 4E la sɔ kãligbɛ̃awo ɖo kãligbɛ̃ti kè wo sɔ sìka àku-àku wɔ̀a ji, àleke be woa nɔ̀ bì, lè Tɔhonɔ̀ be ŋùkɔ̀, kaka sɔyì.
Kpɔ̃nɔ kè wo sɔ na Mawu a
5Wò la sɔ èwɔ, la sɔ mè èkpomè-klàko woèvè; wò la sɔ èwɔ jijenu efà be mamã èwogɔ̃a be tèpe èvè, sɔ wɔ̀ klàko ɖè sia ɖe. 6Wò la ɖo wo, lè àgbà èvè mè, àdɛ̃ àdɛ̃, èɖe lè èɖe ji, ɖo èkplɔ̃ kè ŋuti wo kɔ̀a ji, lè Tɔhonɔ̀ be ŋùkɔ̀#24.6 hɛ̃hlɛ̃ 5-6: Kpɔ Tot 25.30. 7Wò la sɔ lifi àku-àku ɖo àgbà ɖe sia ɖe ji, ne bèa nyi ŋùkuɖojinu lè kpɔ̃nɔ tèpea. E la nyi vɔsa numème na Tɔhonɔ̀. 8Wo la nɔ sɔ wo ɖo Tɔhonɔ̀ be ŋùkɔ̀, lè Izràɛlviwo be nyikɔ mè, jɛ̃gbɔ̃zã ɖe sia ɖe gbè, kaka sɔ yì, eye be la nyi èzòɖùɖu kòkòɖàbì. 9E la nyi Arɔ̀n ku yebe ŋusùviwo tɔ̀. Wo la ɖù kpɔ̃nɔ kèa lè Tèpe Kɔ̀kɔ̀ɛ, ɖoa, ènu kɔ̀kɔ̀ɛ ŋutɔ be nyi ye wo ɖè lè Tɔhonɔ̀ be ènu ɖùɖu ŋuti na wo. Àjɔ̀ kòkòɖàbì be nyi na wo#24.9 Kpɔ Màt 12.4; Mrk 2.26; Luk 6.4..”
Àmè kè sɛ̃kpɛ̃ na Mawu a be ètodɔ̃
10Izràɛl nyɔ̃nù ɖe be ŋusùvi kè be jì na Ejiptè ŋusù ɖe a ɖo Izràɛlviwo dòmè, lè àsàɖaa mè; ye ku Izràɛl ŋusù ɖe kpe àkɔ; 11Izràɛl nyɔ̃nùa be ŋusùvia dovlo Mawu be nyikɔa#24.11 Lè Hebrùgbe mèa, wo ŋlɔ̀ “NYIKƆ”, kè gɔ̃mè ye nyi “Mawu be nyikɔ”, ɖoa, Izràɛlviwo ŋutɔ mu yɔna Mawu be nyikɔ ò. Gɔ̃mèɖèɖe sùgbɔ zɔ̃ ɖo àfɔ̀ kèa ji, vɔ̀a, èbuwo gblɔ̃ be “Mawu be Nyikɔ”; ekèa ŋutia, wo kplɔ̀ ɛ̀ va Mosè gbɔ. Ènɔ̀a be nyikɔ ye nyi Selomit; e nyi Divri kè so Dàn be jìjimèa be nyɔ̃nùvi. 12Wo le è dà ɖo ɖiatɔwo gbɔ, wàlɛbɛ kè wo le nɔ̀tè kpɔ Tɔhonɔ̀ be ɖoɖo, so e ŋutia.
13Ekèa yomè a, Tɔhonɔ̀ gblɔ̃ na Mosè be: 14“Ɖè àmè kè zũ àmèa to lè àsàɖaa mè; àmè kèwo keŋu sè èzũawo ne vlũ àlɔ̀ ɖo èta ji na ɛ̀, eye àmèha bliboa ne pò èkpe è wù. 15Ekèa yomè a, wò la gblɔ̃ na Izràɛlviwo be:
'Ne àmè ɖe zũ yebe Mawu a, àmèa la dro yebe èvuɛ̃ be àgbã; 16ekèa ŋutia, àmè kè dovlo Tɔhonɔ̀ be nyikɔa, wo la wù ì: àmèha bliboa la pò èkpe è wù. Ne e nyi àmèjro, àlo, àxuevia, wo la wù ì, ɖoa, e dovlo Mawu be nyikɔa.
17Ne àmè ɖe wù àgbètɔa, àmè ɖe kpekpe kè be nyia, wo la wù ye cã. 18Ne e wù èlã ɖe a, e la sɔ èlã ŋua be èbu ɖo e tèpe, àgbè ɖo àgbè tèpe.
19Ne àmè ɖe do àfɔ̀ku yebe èdùmèvi, sɔ gble ènu lè e ŋutia, wo la trɔ wɔ̀ nène be ènua na ye cã. 20Ne e ŋɛ̃ èpu na àmèa, wo la ŋɛ̃ èpu ŋua ke, na ye cã; ne ŋùkuvi be gbã na àmèa, wo la gbã ŋùkuvi ŋua ke na ye cã. Ne àɖu ye be ŋɛ̃a, wo la ŋɛ̃ àɖu na ye cã. Wo la wɔ̀ ènu kè be wɔ̀ ku àmè bua ku ye ŋutɔ cã#24.20 Kpɔ Tot 21.23-25; Gbì 19.21; Màt 5.38..
21Àmè kè wù èlã ɖe a, la na èbu ɖo e tèpe;
àmè kè wù àmèa, wo la wù ye cã.
22Èse ɖèka kpò ye la kplɔ̀ mìa kpata; àmèjro cã, mìawo ŋutɔ cã, èse ɖèka ye la kplɔ̀ mì, ɖoa, ènyè Tɔhonɔ̀ ye nyi mìabe Mawu#24.22 Hɛ̃h 15.15-16..”
23Ekèawo ye Mosè gblɔ̃ na Izràɛlviwo. Wo ɖè àmè kè zũ àmèa to lè àsàɖaa mè, eye wo pò èkpe è, be ku. Nène ye Izràɛlviwo wɔ̀ ɖo ɖoɖo kè Tɔhonɔ̀ sɔ do àsi na Mosè a jia yeŋu.
Mina Bible © Bible Society of Togo, 2014.