Yɔb 9
9
Mawu be ŋusɛ̃ tùkùnà àmè
1Yɔb ɖo e ŋuti be:
2Ɛ̃ɛ, mù nya be nyàwo ye wò le to.
Àgbètɔ be ènyà la teŋu jɔ̀ lè Mawu be ŋùkɔ̀a?
3Ne wo ji la hɛ̃ ènyà kudo èa,
Mawu mu la ɖo ènyà ɖèka tètè ŋuti ò!
4Yebe nunya gòglò eye yebe ŋusɛ̃a trì àkɔ.
Àmè kɛ ye la teŋu nɔ̀tè lè ŋùkɔ̀ na ɛ̀
eye mu la kpɔ e mè sonu ò?
5E ɖènà ètowo jo lè àɖàbà pòpo ɖèka mè
eye e kãkãnà wo kudo àdɔ̀mèze.
6E nana ànyigbã hũhũna,
e hũhũna sɔti kèwo ji ànyigbã a nɔ̀ ànyi ɖoa.
7E teŋu na dɔ̃ŋùkusu mu la to ò,
eye e teŋu xe èmɔ̃ na wètriviwo ne wo mu gbà klɛ̃ ò.
8E ɖèka pɛɛ ye vlũ jiŋùkusiwo sìgbè àvɔ nène,
eye e zɔ̃nà lè àpù srɔ̀kewo ji.
9E bɔ̀ wètriviwo vòvòvò:
Sisiblìsi gã, wètrivi ènè kɔ̀ ceŋu-ceŋu,
wètrivi adrɛ̃awo (kòklo-èvinɔ̀) kudo àpùgo be wètriviwo
10E wɔ̀ ŋùdãnu kèwo mè àmè ɖe mu la teŋu sè òa.
Àmè ɖe cã mu la teŋu hlɛ̃ yebe wɔ̀na jɔ̀ àsuwo ò.
11E to àhàda mè na mù va yì, vɔ̀, nyè mu kpɔ ɛ̀ ò.
E le yì cã, nyè mu teŋu kpɔ ŋùgbedòmè na ɛ̀ ò.
12Àmè kɛ ye la hlùɛ̃ ènu kè be sɔ ŋusɛ̃ xɔ̀a lè e si ò?
Àmè kɛ ye la teŋu dojì gblɔ̃ na ɛ̀ be: “Nukɛ ye wò le wɔ̀ ò?”
13Mawu mu tɔnatè yebe àdɔ̀mèze ò.
Àpù mè be èlã bàɖàwo, màmiwàta kudo
yebe àgbàsìviwo do ènu gũ lè yebe àfɔ̀wo gbɔ.
*
14Ènu kèa ŋuti ye nyè mu la teŋu ɖo ènyà ŋuti na Mawu ò.
Nyè mu ɖo ènyà ɖe la gblɔ̃ so e ŋuti ò.
15Ne àpe ènyà gbà jɔ̀ cã a,
nukɛ ŋuti mù la hlùɛ̃ ɖokoe nyè ta ɖo ò?
Mù la teŋu biɔ kòjoɖotɔ nyèa kpò be
ne kpɔ ɖo e mè na mù.
16Ne e gbà ɖo àpe yɔyɔ ŋuti cã,
nyè mu kã ɖo e ji be e le sè àpe kuefã ò.
17E le tɛ mù ɖo ànyi gbalo,
e kpɔ̀tɔ̀ le do mù àbì gɔ̃mèsèse mà-ɖo.
18Mu nana mù èmɔ̃ ne ma gbɔ̃ viɖe tètè ò,
vɔ̀ e le ɖɔ èjì nyèa kudo vève kaɖi kaɖi.
19E hiã be ma wɔ̀ àvũ kudo Mawu a?
E ɖo ŋusɛ̃ wu mù fuu!
E hiã be ma yɔ kòjoa?
Vɔ̀ àmè kɛ ye la yɔ mù
ne ma hlùɛ̃ ɖokoe nyè ta ò?
20Ne àpe ènyà gbà jɔ̀ cã a, nupo nyèwo la do mù àgɔ̀jètɔ.
Ne mù nyi ɖemànyatɔ cã a, e la be mù jè àgɔ̀.
21Vɔ̀, ɖemànyatɔ ye mù nyi nyàwoa?
Nyè mu gbà nya ò. Àgbèa tìkɔ̀ na mù!
22Tɔ̀ nyè gomèa, ɖemànyatɔ àlo àgɔ̀jètɔa, ènu ɖèka ye wo nyi.
Ekèa ŋuti ye mù dojì gblɔ̃ be:
“Mawu wùnà ɖemànyatɔ sìgbè àgɔ̀jètɔ ke nène.
23Ne jɔ̀gbèvuɛ̃ ɖe va gblenu lè àgbètɔ xòmèa ŋutia,
Mawu mu sɔna èɖe lè e mè na ɖemànyatɔ kèwo kua ò.
24Ne èdù ɖe jè àglajòtɔ ɖe sia, Mawu miɔ̃na ŋùku na kòjoɖotɔwo!
Ne e nyi be mu nyi e ye ŋutɔ ye le wɔ̀ ɛ̀ òa ɖe, eŋuã àmè kɛ ye ò?
*
25Àgbèzã nyèwo va le yì sìgbè èdùputɔ nène,
wo si va le yì ma ɖɔ nyɔna ɖe kpɔ.
26Wo si piãŋu va yì sìgbè keti be àklo nène,
sìgbè àlekè èhɔ̃ zrò va jènà ègbɔvi jia nène.
27Mù gblɔ̃ na ɖokoe nyè be:
“Ŋlɔ̀be àpo tamèbùbuwo,
ŋùmè ne vlũ na wò ne wòa kpɔ jìjɔɛ.”
28Vɔ̀ àyàɖùɖu nyè le do vɔ̃vɔ̃ na mù.
Nyàwo ye be èwò Mawu ya
wò mu xɔ̀ ɛ̀ sè be mù nyi ɖemànyatɔ ò.
29Lè gbɔ wòa, mù ɖo la nyi àgɔ̀jètɔ!
Nène a, nukɛ ŋuti ye wò gbà ɖèfũ na mù gbalo ɖo ò?
30Ne mù gbà lè àɖi ŋutɔ cã a,
ne mù gbà sɔ àkãŋù klɔ àsi ŋutɔ cã a,
31wò la zĩ mù ɖo ègbeɖiɖɔɛ mè,
àpe àwùwo ŋutɔ cã la gbe mù.
32Nyàwo, Mawu mu nyi àgbètɔ sìgbè ènyè ke nène ò.
Nyè mu la teŋu ɖo ènyà ŋuti na ɛ̀ ò,
eye mi mu la teŋu yì kòjoɖope cã ò.
33Ènyàmèsòtɔ ɖe cã mu lè mia dòmè
ne bèa sò ènyà na mi ò.
34Ne ènyàmèsòtɔ ɖe lèa,
e la xe èmɔ̃ na Mawu ne mu gbà pò mù ò.
Eye vɔ̃vɔ̃ mu la gbà ɖo mù kaka be ma ku ò;
35Mù la teŋu pò nupo kudo è àdìka mà so.
Vɔ̀ mu nyi nène ò, nyè ɖèka pɛɛ
kpò ye lè kudo àpe wudowo.
Currently Selected:
Yɔb 9: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
