Yɔb 10
10
Mawu jìnà gbà trɔ sɔ wùnàa?
1Àgbèa tìkɔ̀ na mù.
Eŋuã mù la jèhùɛ ŋùgbe màkpɔ,
mù la ɖè vève kè lè èjì ji na mù a kpata to.
2Mù la gblɔ̃ na Mawu be: “Mù gbà gblehùɛ do mù ò.
Àgɔ̀jènu kɛ ye wò kpɔ lè ŋuti nyè ò? Gblɔ̃ ɛ̀ na mù.
3E jè ŋùmè na wò be wò a ɖiki mù a?
Be wò a crì ènu kè àpo àlɔ̀wo wɔ̀ a?
Be wò a na àmè bàɖàwo be ɖoɖowo la va e mè na wo à?
4Ŋùkuviwo lè àsi wò sìgbè àgbètɔ kè wò ɖo a tɔ̀ nène à?
Lekè àgbètɔ kpɔna ènu a ke ye wò cã wò kpɔna ènu à?
5Àgbè wòa cã kpòkpòe sìgbè mia tɔ̀ ke nène à?
Èpèwo va yìnà kaba lè gbɔ wò sìgbè mia gbɔ ke nènea?
6Wò le ji la nya àpe àgɔ̀jèje,
wò yì ji èvuɛ̃ nyèwo gɔ̃mè kpɔ;
nukɛ ŋuti ye ò?
7Wò nya be nyè mu jèagɔ̀ ò,
eye àmè ɖe mu la teŋu hlùɛ̃ mù lè àpo ŋusɛ̃ si ò.
8Àpo àlɔ̀wo ye wɔ̀ mù, gbà ɖo mù.
Eye fifìa, wo le miɔ̃ mù,
eye wò le ji la crɔ̃ mù!
9Ɖo ŋùku e ji be: wò wɔ̀ mù lekè
wo sɔna ànyikɔ mènà èze nène,
eye wò le ji la trɔ mù wɔ̀ ànyikɔ.
10Sìgbè lekè wo kɔ̀nà nyìnɔsi ɖo ègò mè ye be jènà ànyi a nène,
gbè ɖèka, wò wɔ̀ mù ɖo ènɔ̀ nyè be àdɔ̀ mè.
11Wò na èlã kudo àgbàze va ŋuti nyè,
wò lɔ̃ èpu kudo èkãwo ɖo àpe ètù mè.
12E yomè a, wò na mù àgbè èfɛ̃ màtu,
eye wò kpɔ ji nyè kudo èbèlele tɔ̀xɛ.
*
13Vɔ̀, wò wla ènyà wawla ɖe ɖo àpo èjì mè,
mù nya àpo tamèsusuwo:
14Wò le ji la le mù lè èvuɛ̃-gbã nu,
eye wò mu la sɔ ènu ɖekpe kè mù ò.
15Ne mù jèagɔ̀a, kpɛ̃sɛ̃ ne va ji nyè!
Ne mù nyi ɖemànyatɔa, nyè mu ji ŋutɔ cã la kɔ èta yì ji ò.
Mù lè sìgbè àhànùmunɔ̀ ɖe nène
ɖo ŋùkpɛ̃ kudo siayi cici nyèwo ŋuti.
16Ne mù kɔ èta yì jia, wò nyànà mù sìgbè jãŋùta nène,
eye wò kpɔ̀tɔ̀ le zĩ ŋusɛ̃ wòa ɖo ji nyè.
17Àpo àdɔ̀mèzea gbà le yì ji, eye wò gbà le do èba yeyewo na mù,
eye àpo àhùakɔ̃wo vana àgbàkà-àgbàkà va kpena àvũ kudo mù.
18Nukɛ ŋuti wò na mù to lè ènɔ̀ nyè be àdɔ̀mè ò?
Ne mù kè ku gbɔ̀xue wo jìa, àmè ɖe mu la jèsi mù ò.
19Mù la kè yì èyɔ̀do mè xoxo
sìgbè nyè mu kè jɔ̀ kpɔ ò nène.
20Fifìa, e kpɔ̀tɔ̀ gàmè viɖe na mù ne ma nɔ̀ àgbè.
Tàsi mù ne ma gbɔ̃ sɔ do jìjɔɛ viɖe na ɖokoe nyè.
21Mù la jo sɔ̀sɔɛɖe kèa, ne nyè mu gbà trɔ gbɔ̀ va gbèɖe,
va vìvìti kudo èzã klìko be ànyigbã kèa ji ɖe ò.
22Lè funua, vìvìti kudo ɖoɖo ɖe mà nɔ̀ ànyi ye ɖùfìɔ,
eye kɔ̀kɔ̀ɛa ŋutɔ cã lè sìgbè èzã yìbɔ nène.
Currently Selected:
Yɔb 10: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
